“Fafaga le Gutu, ae Lē o Vae”

Se Vaaiga i Tu Masani i Falelauasiga Faaleaganuu i Aferika

“LATOU te lē tanuina o latou tagata oti!” O se faamatalaga lenei ua faia soo e uiga i Molimau a Ieova i Aferika i Sisifo. Ae peitai, o le mea moni, ua lausilafia lelei e faapea, e tanu e Molimau o latou tagata oti.

Aisea ua faapea mai ai tagata e lē tanumia e Molimau a Ieova o latou tagata oti? Ua latou faia faapea ona e lē tausia e Molimau le tele o aganuu masani tautaua o falelauasiga.

Tu Masani o Falelauasiga Faaleaganuu

E mau Aliu i se aai itiiti i Central Nigeria. Ina ua maliu lona tinā, na ia logoina ona tau aiga i lona oti ma fuafua loa mo se lauga faale-Tusi Paia e faia i lona fale. I le taulimaina e se toeaina o le faapotopotoga o Molimau a Ieova, na taulai atu ai le lauga i le tulaga o ē ua oti, ma le faamoemoe faamafanafanaloto o le toetu o loo faasino i ai le Tusi Paia. Ina ua maeʻa le lauga, ona tanuina loa lea o le tinā o Aliu.

Sa matuā feita ona tau aiga. Ia i latou, e lē atoatoa se falelauasiga e aunoa ma se leo, lea e masani ona faia i le po pe a mavae le oti o se tagata. O le leo, o se taimi lea o faafiafiaga i le vaiaai o Aliu, ae e lē o faanoanoaga. E faataele le tino oti, faaofu i ofu papae, ona faataoto lea i luga o se moega. E feʻau atu e ē o faavauvau le au fai musika, faatau mai pusa pia ma sioki uaina, ona fuafuaina loa lea o se taulaga e faia i se povi po o se ʻoti. Ona potopoto atu lea o tau aiga ma uo e pepese, sisiva, aai, ma feinu seia tafa ata o le aso e sosoo ai.

A o faagasolo nei faafiafiaga, e tuuina atu ai meaai i vae o le tino oti. E sele ese vaega o le lauulu o le tagata oti, atigilima, ma atigivae, ona tuu ese lea mo le “falelauasiga lona lua.” E faia lenei mea i ni nai aso, vaiaso, po o ni tausaga mulimuli ane foi.

I le aso e sosoo ai pe a maeʻa le leo, ona tanu loa lea o le tino oti, e ui lava o loo faaauau pea sauniga o falelauasiga e tusa o se vaiaso pe umi atu foi. Mulimuli ane, ona faia lea o le falelauasiga lona lua. E afifi vaega o lauulu, atigilima, ma atigivae i se fasiie paʻepaʻe, ona nonoa loa lea i se laupapa e lima pe ono futu po o le [1.5-1.8] mita le umi. I le faagasologa o pesega ma siva, e amo atu ai le laupapa i le fanuatanu ma tanumia i tafatafa o le tagata e ona ia mea. Ona toe faia foi lea o musika tetele, inuga ma faigaai. Ina ia faaiua faagasologa o le falelauasiga, e faapa ai se fana e faatasi agaʻi i le lagi.

Talu ai e leʻi faatagaina e Aliu so o se mea o nei mea, sa tuuaia ai o ia i le leai o se faaaloalo mo ē ua oti po o tu masani e faaaloalogia ai i latou. Ae aisea na teena ai e Aliu, o se Molimau a Ieova, ona gauai atu i ia tu masani? Ona sa lē ono mafai ona talia e lona loto fuatiaifo taofi faalotu o loo faavae ai nei tu masani.

Tu Masani o Talitonuga i Aferika

I Aferika atoa, e talitonu tagata e ō mai tagata uma mai le nofoaga o agaga, ma o le a toe foi atu i inā. Ua faapea mai tagata Yoruba i Nigeria: “O le lalolagi o se maketi, ae o le lagi o le aiga lea.” Ma o le muagagana a tagata Igbo e faapea: “O tagata uma e fananau mai i lenei lalolagi, o le a ao ona toe foi atu i le aiga i le lagi, e tusa lava po o le ā le umi sa nonofo ai i le lalolagi.”

Iloilo aganuu na uluai taʻua. O le fuafuaga o le leo, o le tuuina atu lea i le agaga o se faamavaega lelei. E manatu i ofu papae o ni laei talafeagai mo le nofoaga o agaga. O le tuuina o meaai i vae e fesootai lea ma le manatu e faapea, e ʻai le tino oti e ala atu i vae ma e ao ona fafagaina ina ia lē fiaai i le faigamalaga i le nuu o ona tuaa.

E sili atu i lena, e talitonu tagata lautele e faapea, a tuua e le agaga le tino, ona maeva ai lea i autafa o ē ola ma e lē foi atu i tuaa seia tatala mulimuli mai i le falelauasiga lona lua. Seiloga e faatinoina le falelauasiga lona lua, e matatau ai tagata ona o le a toasa le agaga ma faamalaiaina ē feola i faamaʻi po o le oti. O le faapaina o le fana o le “aauina atu lea o le agaga” i le lagi.

E ui ina matuā fesuisuiai aganuu o falelauasiga mai lea nofoaga i lea nofoaga i Aferika, ae o le manatu autū lava e faapea, e ola pea le agaga pe a oti le tino. O le fuafuaga autū o ia tu masani, o le fesoasoani i le agaga e tali atu i le “valaau mai le lagi.”

Ua faalaeiauina nei talitonuga ma faiga e aʻoaʻoga a Kerisinetoma o le ola pea o le solu o le tagata ma i lona tapuaia o “tagata paia.” Ua tali tutusa ma le tala a se faifeau o vaegaau i Swaziland o lē na faapea mai, na afio mai Iesu e lē ina ia faaumatia talitonuga o tu masani, ae ina ia faataunuu pe faamaonia i latou. Talu ai e masani pea ona taʻitaʻi e faifeau faagasologa o falelauasiga, e manatu ai le toatele o tagata o loo lagolagoina e le Tusi Paia talitonuga o tu masani ma aganuu e mapuna mai ia i latou.

Mea o Taʻua i le Tusi Paia

Pe ua lagolagoina e le Tusi Paia nei talitonuga? E tusa ai ma tulaga o ē ua oti, ua faapea mai le Failauga 3:20: “E oo uma lava [tagata atoa ma manu] i le mea e tasi; e mai le efuefu uma lava, e toe foi atu foi uma lava i le efuefu.” Ua taʻua atili e le Tusi Paia e faapea: “O e ua ola, ua latou iloa e oti i latou; a o e ua oti, latou te le iloa se mea . . . O lo latou alofa foi, ma lo latou ita, ma lo latou mataua, ua mavae lava ia . . . E leai se galuega, po o se mafaufau, po o se iloa, po o se poto i le tuugamau, o loo e alu atu i ai.”—Failauga 9:5, 6, 10.

Ua faamanino mai e nei mau ma isi le lē mafai e ē oti ona iloa i tatou, pe faalogo ia i tatou, pe fesoasoani ia i tatou, pe faatiga ia i tatou. Pe e lē ogatasi ea lenei ma mea ua e matauina? Atonu e te silafia se tamaloa mauoa ma le mamalu o lē ua maliu ma o loo puapuagatia lona aiga, e ui ina sa latou faatino atoatoa sauniga faaleaganuu o le falelauasiga. Afai o loo ola lena tamaloa i le nofoaga o agaga, aisea ua ia lē fesoasoani mai ai i lona aiga? E lē mafai ona ia faia faapea auā, e moni mea o loo taʻua i le Tusi Paia—o ē oti ua leai se ola, ua [“lē mamana i latou i le oti,” NW] ma o lea ua lē mafai ai ona fesoasoani i so o se tasi.—Isaia 26:14.

Na silafia e le Alo o le Atua, o Iesu Keriso, le moni o lenei mea. Iloilo le mea na tupu ina ua mavae le maliu o Lasalo. Ua faapea mai le Tusi Paia: “Ua faapea atu o ia [Iesu] ia te i latou [ona soʻo], O loo moe la tatou uo o Lasalo; a e ou te alu e fafagu ia te ia. Ona faapea mai lea o ona soo, Le Alii e, afai o moe ia, e ola. Ua fetalai Iesu i lona oti.”—Ioane 11:11-13.

Ia mātau na faatusa e Iesu le oti i le moe, o loo malōlō. I lona taunuu atu i Petania, sa ia faamafanafana atu i tuafāfine o Lasalo o Maria ma Mareta. I le uunaia e le alofa mutimutivale, na tagi ai Iesu. Ae peitai, sa leai sana upu po o le faia o se mea e faailoa ai o loo iai pea se agaga o Lasalo o loo ola pea ma faanaunau i se fesoasoani ina ia taunuu i le nuu o ona tuaa. Na i lo o lena, sa faia e Iesu e pei ona ia fetalai o le a ia faia. Sa ia fafagu Lasalo mai le moe i le oti e ala i le toetu. Ua aumaia e lenei faamaoniga, o le a faaaogā mulimuli ane e le Atua ia Iesu e toe faatutuina i latou uma o loo i tuugamau.—Ioane 11:17-44; 5:28, 29.

Aisea e Matilatila ai le Ese Mai?

Pe e iai ea se mea e sese i le mulimuli atu i aganuu o falelauasiga na o loo faavae i talitonuga e lē faale-Tusi Paia? E talitonu Aliu ma le faitau miliona o isi Molimau a Ieova faapea, e iai. Latou te iloa o le a sese—ma faagutugutulua foi—mo i latou ona lagolago so o se faiga e manino e faavae i aʻoaʻoga sese ma le taufaavalea. Latou te lē mananao e pei o le au tusiupu ma le au Faresaio, o ē na tausalaina e Iesu mo le faagutugutulua faalotu.—Mataio 23:1-36.

Na lapataia e le aposetolo o Pauro lana aumea faigaluega o Timoteo e faapea: “O loo taʻutino mai e le Agaga, e o ese nisi mai i le faatuatua i tausaga amuli, latou te faalogo i agaga e faasese ma mataupu a temoni; ona o le pepelo o tagata tala pepelo.” (1 Timoteo 4:1, 2) Pe o le talitonuga e faapea o tagata oti o loo ola i le nofoaga o agaga o se aʻoaʻoga a temoni?

Ioe, o lea lava. Na taʻu atu e Satani le Tiapolo, “le tamā o le pepelo” ia Eva, o le a lē oti o ia, i le faasino atu e faapea o le a faaauau pea ona ola o ia i le tino. (Ioane 8:44; Kenese 3:3, 4) E lē tutusa lena ma le faapea atu e ola pea le solu e lē uma pe a mavae ona oti o le tino. Ae peitai, o loo finafinau Satani ma ana temoni e liliuese tagata mai le upu moni o le Afioga a le Atua, i le faaofi mai o le manatu e faapea, e faaauau pea le ola pe a mavae le oti. Ona latou te talitonu i afioga a le Atua o i le Tusi Paia, ua leai ai se sao a Molimau a Ieova i manatu ma faiga o loo lagolagoina ai pepelo a Satani.—2 Korinito 6:14-18.

I le alofiaina o faiga e lē faale-Tusi Paia o falelauasiga, ua oo ai i auauna a Ieova le lē fiafia o nisi o ē e lē taliaina o latou manatu. Ua aveesea tofi tuufaasolo o nisi o Molimau. Ua faaesea isi e o latou aiga. Ae peitai, i le avea ma Kerisiano moni, ua latou iloatino ai o le usiusitai faamaoni i le Atua, e tupu ai le lē fiafia o le lalolagi. E pei o aposetolo faamaoni a Iesu Keriso, ua latou maumauai ai e “anaana i le Atua i lo le anaana i tagata.”—Galuega 5:29; Ioane 17:14.

A o manatua i le mafaufau mea lelei a ē pele ia i latou ua momoe i le oti, o loo finafinau Kerisiano moni e faataitaia le alofa mo ē o feola. Mo se faaaoaoga, na ave e Aliu lona tinā i lona aiga ma fafaga ma tausi o ia i taimi sa totoe o lona soifuaga ina ua mavae le maliu o lona tamā. Ina ua faapea mai nisi e lē alofa Aliu i lona tinā ona na te leʻi tanua o ia e tusa ai ma aganuu tautaua, sa ia faasino i lenei muagagana taatele i le lotolotoi o ona tagata: “Fafaga loʻu gutu ona fafaga ai lea o oʻu vae.” O le fafagaina o le gutu, po o le tausia o se tagata a o ola pea, e sili atu ona tāua na i lo o le fafagaina o vae, le tu masani na uluai faamatalaina ma o loo fesootai ma le leo pe a oti se tasi. O le mea moni, o le fafagaina o vae, e matuā leai se aogā i lē ua maliu.

Na fesili Aliu i ana au faitio, ‘O lē fea e sili atu—tausia o oe e lou aiga i ou tausaga matua, po o le faia o se fiafiaga tele pe a e maliu?’ Na filifilia e le toatele le tausia a o feola pea. Ua latou talisapaia foi le iloa e faapea, pe a feoti i latou, o le a faia so latou sauniga mamalu e faavae i le Tusi Paia, ma se falelauasiga talafeagai.

O le mea lena o loo taumafai Molimau a Ieova e fai mo ē pele ia i latou. Latou te fafaga le gutu, ae lē o vae.