Po o e Teteeina le Agaga o le Lalolagi?
“A ua maua e i matou e le o le agaga o lenei lalolagi, a o le agaga mai le Atua.”—1 KORINITO 2:12.
1, 2. O le ā se mala na aafia ai se kasa oona na tupu i Bhopal, i Initia, ae o le ā le isi ‘kasa’ e sili atu ona oona lea ua manavaina i le lalolagi atoa?
I SE po mālū o Tesema i le 1984, na tupu ai se mea e faateia ai i Bhopal, i Initia. E iai i lena aai se falegaosi vailaau, ma i lena po o Tesema, na faaletonu ai se ki i se tasi o tane o loo teu ai le kasa. Ona faafuasei ai lea ona sao mai i fafo le tele o le kasa methyl isocyanate. Na agi mai le savili ma avatu ai lenei kasa oona i fale ma aiga o loo momoe. E faitau afe i latou na maliliu ai, ma le toatele o isi na lē toe atoatoa ai le malosi o o latou tino. O se faalavelave sili ona matautia lea i falegaosimea, na tupu i lena vaitaimi.
2 Sa faavauvau tagata ina ua latou faalogo i le mea na tupu i Bhopal. Ae o lena faatamaiaga mai le kasa na sao mai i fafo, e itiiti tagata na fasiotia ai na i lo o tagata ua feoti faaleagaga ona o le ‘kasa’ lea o loo manavaina e tagata i le lalolagi aoao i aso taitasi. Ua taʻua e le Tusi Paia lena kasa o “le agaga o lenei lalolagi.” O se ea matautia lea e oti ai, na faaeseese e le aposetolo o Pauro lona uiga mai le agaga lea e maua mai le Atua ina ua ia faapea mai: “A ua maua e i matou e le o le agaga o lenei lalolagi, a o le agaga mai le Atua, ina ia matou iloa mea ua foaifuaina mai e le Atua ia te i matou.”—1 Korinito 2:12.
3. O le ā “le agaga o lenei lalolagi”?
3 O le ā tonu lava “le agaga o lenei lalolagi”? E tusa ai ma le New Thayer’s Greek English Lexicon of the New Testament, o se uiga lautele o le upu “agaga” (i le faa-Eleni, pneuʹma) o “le tulaga faalemafaufau po o aafiaga e faatumulia ma puleaina ai le solu o so o se tasi.” E mafai ona iai i se tagata se agaga po o se uiga faalemafaufau e lelei pe leaga. (Salamo 51:10; 2 Timoteo 4:22) E mafai foi ona iai i se vaega o tagata se agaga, po o se uiga fiapule. Na tusi atu le aposetolo o Pauro i lana uo o Filemoni e faapea: “Ia i o outou agaga le alofa tunoa o lo tatou Alii o Iesu Keriso.” (Filemoni 25) I se tulaga tutusa—ae i se fua e telē atu—ua iai i le lalolagi lautele se uiga fiapule, ma o “le agaga [lea] o lenei lalolagi” na faasino i ai upu a Pauro. E tusa ai ma le tusi a Vincent o le Word Studies in the New Testament, “o le uiga o le fuaitau e faapea, o le leaga sili, lea e uunaia ai le lalolagi ua lē toe fesuiaia.” O se faanaunauga agasala ua sosolo atu i mafaufauga o lenei lalolagi, ma aafia malosi ai le auala o loo gaoioi ai tagata.
4. O ai le puna o le agaga o le lalolagi, ma o le ā le aafiaga ua faia e lenei agaga i tagata?
4 O lenei agaga e oona. Aisea? Auā e puna mai i “le alii o lenei lalolagi,” o Satani. Ioe, ua taʻua o ia o “le taʻitaʻi o le au faipule i le va nimonimo, o le agaga lea o loo matuā galue nei i e ua faalogogata.” (Ioane 12:31; Efeso 2:2) E faigata tele ona alofia lenei “ea,” po o le “agaga lea o loo matuā galue nei i e ua faalogogata.” O loo iai i vaipanoa uma o le sosaiete faaletagata. Afai tatou te manavaina, ona amata lea ona ia i tatou o ona uiga, o ona faanaunauga. O le agaga o le lalolagi e faamalosia ai le ‘ola ina ia tusa ma le tino,’ o lona uiga, ina ia tusa ma o tatou tino agasala. O se mea e oti ai, “auā afai tou te amio i la le tino, e oti ai outou.”—Roma 8:13.
Le Alofiaina o le Agaga o Lenei Lalolagi
5. Na faapefea ona gaoioi ma le atamai se tasi o Molimau i le taimi o le mala i Bhopal?
5 I le taimi o le mala i Bhopal, na ala ai se tasi o Molimau a Ieova ona o le eē o sailini ma le manogi leaga o le kasa oona. Na leʻi toe faatali ae na ia fafagu loa lona aiga ma latou faanatinati atu i fafo i le auala. Sa na ona mapu lava mo sina minute seʻi vaai po o fea le itulagi o loo agaʻi i ai le savili, ona tau faaofiofi atu ai lava lea o sona auala i le motu o tagata o loo feomai solo, ma tatai atu ai lona aiga i le tumutumu o se mauga i fafo atu o le aai. O i inā na mafai ai ona latou manavaina se ea fou ma le mamā, na agi mai i se vaituloto na latalata ane.
6. O fea e mafai ona tatou ō i ai ina ia alofia ai le agaga o le lalolagi?
6 Po o iai ea se vaipanoa maualuga e mafai ona tatou ō atu i ai mo se sulufaiga mai le ‘ea’ oona o lenei lalolagi? Ua tali mai le Tusi Paia e iai. I le taulai mai i o tatou taimi, na tusia ai e le perofeta o Isaia e faapea: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala; auā e alu atu le tulafono ai Siona, o le afioga foi a Ieova ai Ierusalema.” (Isaia 2:2, 3) O le nofoaga maualuga o le tapuaiga mamā, o le ‘mauga o le fale o Ieova’ ua siitia i luga, ua na o lea le nofoaga i lenei paneta ua lē oo i ai le agaga e mole ai ma oona o lenei lalolagi. O i inā o loo saoloto ai le tafe o le agaga o Ieova i Kerisiano faamaoni.
7. Ua faapefea ona sao mai le toatele mai le agaga o le lalolagi?
7 E toatele i latou na manavaina i taimi ua tuanai le agaga o lenei lalolagi, ua olioli nei i se mapusaga e tali tutusa ma lea na oo i ai lena Molimau i Bhopal. Ina ua uma ona tautala e uiga i “e ua faalogogata” o ē ua manavaina le ea, po o le agaga o lenei lalolagi, ona faapea mai lea o le aposetolo o Pauro: “Na amio faatasi i tatou uma lava ma i latou anamua, ina ua tatou nonofo i tuʻinanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi. A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou, a o oti lava i tatou i amio leaga, ua na faaola mai ia i tatou faatasi ma Keriso.” (Efeso 2:3-5) O i latou ua na o le ea oona lava o lenei faiga o mea o loo latou manavaina, ua feoti i se uiga faaleagaga. Peitai ane, e faafetaia Ieova, ona o le faitau miliona i aso nei ua sosola atu i le nofoaga maualuga faaleagaga, ma ua sao mai i lena tulaga matautia e oti ai.
Le Faaaliaina o “le Agaga o Lenei Lalolagi”
8, 9. (a) O le ā e faaalia ai e tatau ona tatou leoleomalu pea e tetee atu i le agaga o le lalolagi? (e) E ono mafai faapefea ona faaleagaina i tatou e le agaga o Satani?
8 O loo feagiai pea le ea e oti ai a Satani i o tatou autafa. E ao ona leoleomaluina i tatou, ma ia aua lava neʻi toe tafetafea atu i le lalolagi, atonu ina ia tau mole ai faaleagaga. E manaomia ai i lenei itu le mataala faifai pea. (Luka 21:36; 1 Korinito 16:13) O se faataitaiga, seʻi manatu i le mea moni lenei. Ua masani uma lava Kerisiano i tapulaa a Ieova, i amioga mamā, ma o le a lē taitai ona ioe faapea o faiga lē mamā e pei o le mulilua, le faitaaga, le tauatane ma le tauafafine e talia. Peitai, i tausaga taitasi, pe tusa ma le 40,000 i latou ua faateaeseina mai le faalapotopotoga a Ieova. Aisea? I le tele lava o mafuaaga, ona o nei faiga lē mamā. E mafai faapefea ona tupu o lena mea?
9 Talu ai o i tatou uma lava ua lē lelei atoatoa. Ua vaivai le tino, ma ua tatau ai ona faaauau pea ona tatou tau e tetee atu i faanaunauga sese e puna mai i o tatou loto. (Failauga 7:20; Ieremia 17:9) Ae peitai, o na faanaunauga sese ua uunaia e le agaga o le lalolagi. E toatele tagata o lenei lalolagi ua manatu e lē sese amioga lē mamā, ma o le manatu faapea ua taga mea uma, o se vaega lea o uunaiga o le mafaufau o le faiga o mea a Satani. Afai tatou te faatagaina na mafaufauga, o le mea moni, e mautinoa lava o le a amata ona tatou mafaufau e pei o le lalolagi. E lē umi, ae ono faapogaia e na manatunatuga lē mamā ni faanaunauga sese o le a oo atu ai i se agasala matuia. (Iakopo 1:14, 15) Ona tatou toe faaifoifo ai lea i lalo mai le mauga o le tapuaiga mamā a Ieova, ma agaʻi ifo i laufanua maulalo ua faaleagaina o le lalolagi a Satani. E leai se tasi e nofo ai pea i inā ma le loto i ai o le a ia mauaina le ola e faavavau.—Efeso 5:3-5, 7.
10. O le ā se tasi o mea e faaaliaina ai le ea a Satani, ma aisea e ao ai i Kerisiano ona teena lenei mea?
10 Ua matuā manino lo tatou vaaia o le agaga o le lalolagi i so o se mea. Mo se faaaoaoga, ua iai i le toatele le uiga o le lē faaaloalo ma le faitio naua i le olaga. Ona ua faaseseina e le au faipolotiki piopio ma le lē agavaa, ma faaseseina foi e taʻitaʻi lotu amio lē mamā ma le matapeapea, ua oo ai lava i mataupu e sili ona tāua, ua latou tautatala ma le lē faaaloalo i ai. E teena e Kerisiano lenei faanaunauga. E ui atonu ua ia i tatou se uiga mamā faatalasua, ae tatou te alofia le aumaia i le faapotopotoga o le agaga soona faitio o le lē faaaloalo. O le gagana a se Kerisiano e atagia atu ai le mataʻu ia Ieova ma le loto mamā. (Iakopo 3:10, 11; faatusatusa i le Faataoto 6:14.) Pe tatou te matutua pe laiti, e ao i la tatou gagana ona “le aunoa . . . ma le alofa, ia faamāi i le masima, ia iloa e [i tatou] ona fai faatatau se tali i tagata e taitoatasi uma.”—Kolose 4:6.
11. (a) O le ā le vala lona lua o le agaga o le lalolagi? (e) Aisea ua ese ai Kerisiano mai ia i latou o ē o loo faaatagiaina lenei vala?
11 O se tasi o faanaunauga taatele ua atagia mai ai le agaga o lenei lalolagi o le feainai. Ua fevaevaeaiina le lalolagi i le feainai ma maseiga e mafua mai i lanu, i ituaiga, i atunuu, e oo lava i eseesega i va o tagata. Maeu le sili atu ona lelei o le tulaga o mea i le vaipanoa o loo matuā galue ai le agaga o le Atua! Na tusia e le aposetolo o Pauro e faapea: “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia ia te outou, ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu. O lenei, a matelaina le ua ita mai ia te oe, fafaga ia te ia; a fia inu ia, avatu ia te ia e inu ai; auā o le amio faapea e faafaupue ai malala ola i luga i lona ulu. Aua le faatoilaloina oe i le leaga, a ia e faatoilaloina le leaga i le lelei.”—Roma 12:17-21.
12. Aisea e alofia ai e Kerisiano le matapeapea i meafaitino?
12 Ua faagaeeina foi e le agaga o lenei lalolagi le matapeapea i meafaitino. I le uunaia e le lalolagi o faigā faapisinisi, e toatele ē ua faatumuina o latou mafaufau i le fia maua o so o se ituaiga fou o mea e faatulai mai, o aega fou o teuga, le ituaiga fou o taavale. Ua faapologaina i latou i “le tuinanau o mata.” (1 Ioane 2:16) O le toatele o tagata ua latou manatu o le tele o lo latou manuia i le olaga e iloa lea i le tetelē o o latou fale po o se aofaiga o tupe o loo i a latou tusitupe. O Kerisiano, o loo manavaina le ea mamā faaleagaga i le mauga maualuga o le tapuaiga mamā a Ieova, latou te teena lenei faanaunauga. Ua latou iloa o le naunau ina ia sailia mea faitino e mafai ona faaleagaina ai. (1 Timoteo 6:9, 10) Na faamanatu atu e Iesu i ona soʻo e faapea: “Auā e le ola se tasi i le tele o ana mea ua ia te ia.”—Luka 12:15.
13. O ā nisi mea e faaaliaina ai le agaga o lenei lalolagi?
13 E iai foi isi mea e faaaliaina ai le “ea” leaga o lenei lalolagi. O se tasi, o le agaga lea o le fouvale. (2 Timoteo 3:1-3) Pe ua e matauina ea le toatele o tagata ua lē o toe felagolagomai ma faipule silisili? Po ua e matauina ea i lou fale faigaluega le taatele o le uiga lea o le lē faia o se galuega, seiloga e tilotilo atu se isi? E toafia tagata e te iloa o loo latou solia tulafono—atonu pe e lē faamaoni i a latou lafoga po o le gaoi foi o ni mea mai le fale faigaluega? Afai o lena lava e te aʻoga, pe na iai ea se taimi na e faavaivai ai mai le faia o ni au taumafaiga sili, talu ai ona e aamu au uo i le vasega ia i latou o ē e manuia a latou aʻoaʻoga? O mea uma lava nei e faaaliaina ai le agaga o le lalolagi lea e ao i Kerisiano ona teena.
Auala e Teena ai le Agaga o Lenei Lalolagi
14. I ā auala e ese ai Kerisiano mai ia i latou e lē ni Kerisiano?
14 E ui i lea, e mafai faapefea ona tatou teteeina le agaga o le lalolagi, ae semanu o lea tatou te ola ai i le lalolagi? E ao ona tatou manatua, e tusa lava po o fea o loo tatou iai i le tino, ae i le itu faaleagaga, e lē o i tatou o se vaega o le lalolagi. (Ioane 17:15, 16) E lē tutusa o tatou sini ma sini o lenei lalolagi. E eseese foi o tatou manatu i mea. O i tatou o tagata faaleagaga, tatou te tautatala ma mafaufau “e le o upu e aʻoaʻoina ai i le poto o tagata, [a] o loo faamatalaina mea faaleagaga i upu faaleagaga.”—1 Korinito 2:13.
15. E mafai faapefea ona tatou teena le agaga o le lalolagi?
15 O le ā e mafai ona faia e se tagata pe ana iloa ua iai o ia i se vaipanoa ua faapolusioneina e le ea oona? A lē o lona faamauluina o se mea mānava o faapipii atu i se mea e maua mai ai le ea mamā, po o lona matuā alu ese mai lea vaipanoa. Ina ia teena le ea a Satani, e manaomia ai le faaaogā uma o auala nei e lua. I se mamao e mafai ai, ia tatou taumafai e vavae ese i tatou mai so o se mea e ono lē mafai ai e le agaga o le lalolagi ona faaaafiaina o tatou mafaufauga. O lea, ia tatou alofia aumea leaga, ma ia aua neʻi o tatou tuuina i tatou i so o se faafiafiaga o loo uunaia ai faiga sauā, o amioga lē mamā, o faiga faataulaitu, le fouvale, po o so o se isi lava galuega a le tino. (Kalatia 5:19-21) Ae peitai, talu ai o lea tatou te ola i le lalolagi, e lē mafai ai ona tatou teteeina atoatoa le fetaiai ma nei mea. O lea, o se gaoioiga atamai pe a faapipii atu a tatou mea mānava i le puna o le ea fou faaleagaga. Ia tatou faatumuina o tatou māmā faaleagaga, e pei ona sa iai muamua, e ala i le auai e lē aunoa i sauniga, i suesuega totino, i galuega ma auaufaatasiga faa-Kerisiano, ma le tatalo. I lenei auala, pe afai o le a tau sao mai so o se ea a Satani i o tatou māmā faaleagaga, o le a faamalosia e le agaga o le Atua i tatou ina ia tetee atu ai.—Salamo 17:1-3; Faataoto 9:9; 13:20; 19:20; 22:17.
16. E faapefea ona tatou faamaonia atu o loo ia i tatou le agaga o le Atua?
16 O le agaga o le Atua e suia ai se Kerisiano ina ia avea o se tagata e matilatila lona tulai atu e ese mai ia i latou o ē o loo avea ma vaega o lenei lalolagi. (Roma 12:1, 2) Na faapea mai Pauro: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.” (Kalatia 5:22, 23) E avatu foi e le agaga o le Atua i se Kerisiano se malamalamaga loloto i uiga o mea. Na faapea mai Pauro: “E faapena foi ona le iloa e se tasi mea a le Atua, ua na o le Agaga o le Atua.” (1 Korinito 2:11) I se uiga lautele, o “mea a le Atua” e aofia ai upu moni e pei o le taulaga togiola, le Malo o le Atua e ala ia Iesu Keriso, le faamoemoe o le ola e faavavau, ma le mavae ese atu o lenei lalolagi amio leaga lea ua lē o toe umi ae oo mai. Ona o le fesoasoani a le agaga o le Atua, ua iloa ai ma talia e Kerisiano nei mea e avea o upu moni, ma ua avea lea ma pogai ua ese ai lo latou manatu i le olaga, na i lo le manatu o tagata o le lalolagi. Ua faamalieina i latou i le mauaina o lo latou olioli i le auauna nei ia Ieova, faatasi ma se faamoemoe o le auauna atu ia te ia e oo lava i le faavavau.
17. O ai ua faataatiaina se faaaoaoga sili i le teena o le agaga o le lalolagi, ma e faapefea?
17 Sa avea Iesu ma faaaoao sili mo i latou o ē e tetee atu i le agaga o lenei lalolagi. E leʻi umi lava ona mavae le papatisoga o Iesu, ae taumafai loa Satani e tatai ese o ia mai le auauna atu ia Ieova, e ala i le tofotofoina faatolu o ia. (Mataio 4:1-11) O le tofotofoga faaiu na aofia ai se avanoa e mafai ai e Iesu ona ia pulea le lalolagi atoa, o le tau lea mo na o sina gaoioiga lava e tapuai atu ai ia Satani. Sa ono mafai ona mafaufau Iesu faapea: ‘Atonu o le a ou faia le gaoioiga e tapuai atu ai, ae a avea loa aʻu ma pule o le lalolagi, ona ou toe salamō lea ma toe foi e tapuai ia Ieova. Auā a avea aʻu ma pule o le lalolagi, o le a ou maua ai se tulaga e sili atu ona lelei e avatu ai ni manuia i tagata na i lo o le tulaga o loo oʻu iai nei ua na o se kamuta mai Nasareta.’ Sa leʻi mafaufau faapena Iesu. Sa naunau o ia e faatali pea seia oo ina tauaaoina atu e Ieova ia te ia le pule i le lalolagi. (Salamo 2:8) I lena taimi, ma isi taimi uma o lona soifuaga, sa ia teena ai aafiaga oona o le ea a Satani. O lea, na manumalo ai o ia mai lenei lalolagi ua faapolusioneina faaleagaga.—Ioane 16:33.
18. Ua faapefea i lo tatou teena o le agaga o le lalolagi ona viia ai le Atua?
18 Na faapea mai le aposetolo o Peteru e ao ona tatou mulimulitui i tulagaaao o Iesu. (1 Peteru 2:21) O le ā se faaaoaoga e sili atu ona lelei ua ia i tatou? I nei aso e gata ai, ua magoto ifo ai tagata i se lua ua sili ona loloto, talu ai ua aafia i latou i le agaga o le lalolagi. Maeu se tulaga ofoofogia, talu ai i le lotolotoi o lea lalolagi, ua matilatila aʻe ai lava le mamā o le nofoaga maualuga o le tapuaiga a Ieova! (Mika 4:1, 2) E mautinoa lava, ua taliaina le agaga o le Atua, auā o le pogai lea o le lolofi atu o le faitau miliona i le nofoaga o le tapuaiga a le Atua, i le teena lea o le agaga sili ona leaga o lenei lalolagi, ma aumaia ai le mamalu ma le viiga ia Ieova! (1 Peteru 2:11, 12) Tau ina ia maumauai i tatou uma e tumau pea i lea nofoaga maualuga seia oo ina tafiesea e le Tupu faauuina a Ieova lenei lalolagi amio leaga, ma tuu atu Satani le Tiapolo ma ana temoni i le to e lē gata. (Faaaliga 19:19–20:3) Ona lē toe iai lea o le agaga o lenei lalolagi. Maeu se taimi faamanuiaina o le a iai!
Pe Mafai ona E Faamatalaina?
◻ O le ā le agaga o le lalolagi?
◻ O ā aafiaga ua faia e le agaga o lenei lalolagi i tagata taitoatasi?
◻ O ā nisi o auala ua faaalialia ai le agaga o le lalolagi, ma e mafai faapefea ona tatou alofia?
◻ E faapefea ona tatou faailoa atu le ia i tatou o le agaga o le Atua?
◻ O ā faamanuiaga e maua e i latou o ē e tetee atu i le agaga o le lalolagi?
O le agaga o le lalolagi e mai ia Satani
[Ata i le itulau 16, 17]
Ina ia alofia le agaga o le lalolagi, ia sosola atu i le nofoaga maualuga o le tapuaiga a Ieova