O E Olioli i Suesuega Totino?

SO O se auauna faamaoni lava a le Atua, e fiafia e tuutoina atu se aofaiga tele o le taimi i suesuega totino faale-Tusi Paia. (Salamo 1:1, 2) Peitai, ona o le tele o mea e alu i ai o latou taimi ma le malosi, ua iloa ai e le toatele le faigata ona faaalu se taimi tele ma se malosi i suesuega totino e pei ona latou mananao ai.

Ae peitai, ina ia avea o ni auauna maelega a le Atua, e manaomia e i latou uma lava ona maua le fiafia ma le malosi faafouina mai lea aso i lea aso, e ala i le mauaina o ni manatu fou po o ni mea loloto o le upu moni o le Afioga a le Atua. O upu moni o le Tusi Paia ia na uunaia loloto oe i le tele o tausaga ua mavae, atonu ua lē o toe tutusa le uunaiga ia te oe i le taimi nei. O lea, o se mea lelei, ma e tāua foi, lo tatou naunau ma faia ni taumafaiga filigā ina ia maua malamalamaga fou i le upu moni, ina ia tumau ai pea ona avea i tatou ma tagata e olaola i le itu faaleagaga.

Na faapefea ona avea tane faatuatua anamua o ni ē e malolosi faaleagaga e ala i suesuega totino o le Afioga a le Atua? E faapefea i nisi o auauna a Ieova i aso nei ona faia a latou suesuega ia avea o se mea e sili atu ona fiafia i ai, ma fua tele mai? Ua faapefea ona tauia i latou ona o a latou taumafaiga?

Na Latou Faafouina Lo Latou Malosi e Ala i Suesuega Totino

Na faia e le tupu o Iosia o Iuta sana tauiviga tele faasaga i ifoga tupua, ma sili atu ona maelega ina ua uma ona faitauina atu ia te ia “le tusi o le tulafono a Ieova na tusia e Mose.” E mautinoa e lē o le taimi muamua lea na ia manatunatu ai i lenei vaega o le Afioga a le Atua; ae o le faalogo i le feau na tuusao mai uluai tusitusiga, na faamalosia ai o ia i lana taua mo le tapuaiga mamā.—2 Nofoaiga a Tupu 34:14-19.

O le perofeta o Tanielu na ia iloaina ‘le aofai o tausaga mo le faataunuuina o le faatamaiaga o Ierusalema,’ ma o le mea moni, sa lē gata na ia iloa mai le tusi o Ieremia, ae sa faapena foi ona ia iloa mai “i tusi.” O nei tusi e aofia ai le tusi o Levitiko (26:34, 35), o le tusi o Isaia (44:26-28), o Hosea (14:4-7), ma le tusi o Amosa (9:13-15). O le mea na ia faamautuina e ala i nei suesuega maeaea o tusi o le Tusi Paia, na taitaiina atu ai lenei tagata naunau e sailia le Atua e ala i le tatalo faatauanau. O ana talosaga ma le naunautai, sa taliina i ni faaaliga atili ma faamautinoaga e tusa ai ma le aai o Ierusalema faatasi ma ona tagata.—Tanielu, mataupu e 9.

O Iosia, o lē sa faia “le amiotonu i luma o Ieova,” ma Tanielu, o lē sa “alofateleina” i fofoga o le Atua, e lē eseese ma i tatou i aso nei. (2 Tupu 22:2; Tanielu 9:23) O le auala na uunaia malosi ai i latou e faia ni taumafaiga totino i le suesueina o le Tusi Paia na iai i lena vaitaimi, na taitaiina atu ai i latou i le avea ma tagata faaleagaga e sili atu, ma fesoasoani ia i latou e olioli ai i le sootaga e sili atu ona malosi ma le Atua. E mafai foi ona fai atu faapena i le toatele o isi auauna anamua a Ieova, e pei o Iefata, o se faisalamo i le aiga o Asafo, o Neemia, ma Setefano. O i latou uma nei ua aumaia ai se faamaoniga o le suesuega totino ma le faaeteete o vaega o le Tusi Paia, sa iai i o latou taimi.—Faamasino 11:14-27; Salamo 79, 80; Neemia 1:8-10; 8:9-12; 13:29-31; Galuega 6:15–7:53.

Ia Avea le Faiva o se Uunaiga Malosi

O le toatele o auauna a Ieova i aso nei o ē ua auauna ia te ia mo le tele o tausaga, o loo iai ni a latou faasologa mo suesuega totino o le Tusi Paia. Ua latou iloaina le tāua o lenei mea, ina ia tumau ai pea i le mataala, ma faataunuuina atoatoa ai a latou avega tauave faa-Kerisiano. E ui i lea, o le toatele o i latou ua faapea mai, e lē faigofie i taimi uma le faapaleniina o le faaaogāina o o latou taimi ma le malosi, i le va o le suesuega ma isi mataupu e lē tatau ona tuulafoaia.

Ae o le mataala faaleagaga e ala i le suesuega totino ma le filigā, e tāua pea i le feagai ai ma manaoga i le faiva faa-Kerisiano i lenei taimi ua agaʻi ai i luma le galuega talaʻi o le Malo i le lalolagi aoao. O i latou o ē o loo fiafia e ala i le faafouina ma le loloto o le malamalama i le Afioga a le Atua, e mafai ona faafetaiaia ai le manaoga o le pāʻia o loto o ē o loo fia aai faaleagaga. E moni lenei mea, e tusa po o se tasi ua tofia e galue i se nofoaga e maua ai le toatele i le faiga faiva faaleagaga, po o se tasi foi o filigā e galue i oganuu ua galueaiina maeaea, i le mea e tele ina lē o faaalia ai e le toatele se naunau fiafia.

Ia Fafagaina Pea i le Afioga a le Atua

O mea o loo faia e isi, atonu e avatu ai ia te oe ni manatu i le auala e mafai ai ona sili atu ona e olioli i lau suesuega faifai pea, po o le auala foi e mafai ai e oe ma lou aiga ona faia ia sili atu ona aogā le taimi o loo faaaogāina mo suesuega. E aofia ai i mea o le a lē manao se auauna a le Atua e misia, o le faitauina lea o le Afioga a le Atua i se faavae faifai pea. O le toatele ua latou faia lenei mea o se sini mo i latou, i le faitauina o se aofaiga pe tolu i le fa mataupu o le Tusi Paia i vaiaso taitasi. Faamata e te manao e faitau le Tusi Paia atoa i le tausaga e tasi? Ia, o le a e fiafia la e faaaluina le taimi e sili atu i le faitauina o le Tusi Paia, atonu pe taʻi ʻafa itula i le aso.

Pe ua e faitauina atoa le Tusi Paia e sili atu i le faatasi? Aisea e lē faatū ai se sini fou i se isi taimi? Mo se suiga, na faitauina e se fafine Kerisiano tusi o le Tusi Paia e tusa ai ma le faasologa o loo tusia ai. Na ia mauaina le tele o faamatalaga, sa faavae mai i talaaga o le faasologa o taimi, lea na ia misia muamua. Na faitauina e le isi foi fafine Kerisiano le Tusi Paia atoa e faalima, i taimi eseese mai vaaiga eseese, i le lima tausaga ua mavae. O le taimi muamua, sa na ona ia faitauina saʻo lava mai le amataga e oo i le faaiuga. I le faitauga lona lua, na ia otootoina ai le aotelega o mataupu taitasi i se fuaiupu se tasi po o le lua i se tamai api. Mai le tausaga lona tolu ma faasolo mai ai, na sui atu ai o ia i se Tusi Paia lapoa e iai ona faasino tusi, muamua na ia filifilia ma siakiina mau faaopoopo i autafa, ma uai totoʻa atu i faamatalaga o i lalo faatasi ai ma faamatalaga faaopoopo. O le taimi lona lima, na ia faaaogā ai faafanua o le Tusi Paia e faateleina ai lona malamalama i nofoaga eseese. Na ia faapea mai: “Ia te aʻu lava ia, na avea le faitauina o le Tusi Paia o se fiafiaga e pei lava o le faia o se taumafataga.”

Ua iloa e nisi tagata aʻoga toaaga o le Tusi Paia le aogā o le iai o se kopi o le Tusi Paia e faaaogā i na o suesuega totino lava, i le tusiaina o ni faamatalaga pupuu e fiafia i ai i autafa, o faataitaiga faatupu manatu, po o numera foi o itulau o isi lomiga na e mafai ona latou faasino i ai mulimuli ane. Ua manatu se tasi faifeau faataimi atoa o le Tusi Paia, o se fiafiaga i faaiuga o masina taitasi le tusia i lana kopi mo le suesuega ni manatu fou na te aʻoaʻoina mai a o faagasolo le masina. Na ia faapea mai: “O le vaai atu agaʻi i luma i oʻu itula tāua nei, ua fesoasoani ia te aʻu e mauaina ai nisi sini mo le masina o i luma.”

Nisi o Auala Poto

Po o e lagona e faapea ua tumu lau faasologa i mea e tatau ona faia pea faalevaiaso, ma ua e manaomia ai sina fesoasoani mo le faaaogāina lelei o lou taimi faatapulaaina? Ia faitau pea le mea ua e manatu e faitau, ma faaaogā tatau ou taimi paganoa. I le aiga po o fea lava le mea e masani ona fai ai au suesuega, ia faalatalata uma ane tusi ma isi mea faigaluega e faaaogā i au suesuega i ou tafatafa ina ia faigofie ona e aapa atu i ai. Ia avea le nofoaga e fai ai au suesuega o se nofoaga e toafilemu, ma faatumauina ai le mataalia ae lē o le fia moe. O iai sau tofiga o se lauga? Ia faitau atoa le mataupu i le uluai avanoa e talafeagai ai, ona faataga lea o manatu e ofi ane i lou mafaufau pe a e mālōlō po o le faia foi o ni galuega laiti.

Atonu e lagolagosua isi ia te oe i le faaaogāina lelei o le taimi ina ia tou maua faatasi ai aogā. Mo se faaaoaoga, atonu o iai se isi na te faitau leotele atu ia te oe manatu faigofie a o faia sau galuega i le aiga, po o e saunia mai foi se ipu ti mo lē o faitauina atu ma le agalelei ia te oe le mataupu. Ae faapefea pe afai ua malilie uma le aiga i se taimi ua leai ai se pisapisao mo le suesuega totino? “O le ā se mea na e faitauina talu ai nei o e olioli ai?” E iai taimi atonu e mafai ai ona e maua aogā sa aʻoaʻoina e au uo, e ala i lou amataina o se talanoaga i le auala lenei.

Pe e te fiafia e faaopoopo atu ni manatu fou i lau polokalama o le suesuega? E mafai ona e faatulaga se sini o le taimi mo le suesuega i le auala lava lea e tasi e faatulaga ai e le toatele se taimi mo talanoaga ma isi e uiga i le Tusi Paia. E faatulaga e se tagata talaʻi faataimi atoa (paeonia) se aofaiga faalemasina mo itula o suesuega, ma e fiafia tele o ia i le vaai atu i lana api o faamaumauina ai ana itula ua latalata lava i lona sini sa faatuina. O nisi ua faatapulaa le taimi e matamata ai i le televise, ma i lena auala, ua mautinoa ai le taimi mo le suesuega. Ua filifilia e le toatele se matua mo le suesuega latou te tuliloaina mo sina taimi, e pei o fua o le agaga paia, le talaaga o tusi o le Tusi Paia, po o le tomai o le aʻoaʻo atu. O nisi ua olioli i le faia o ni faasologa o le faitauga o le taimi, e pei o faasologa na e faaalia ai le faiā i le va o tupu o Isaraelu ma perofeta,a po o Galuega a le au Aposetolo, ma tusi a Pauro.

Talavou e, pe tou te mananao i se faatuatua malosi? Aisea e te lē filifilia ai se lomiga e suesue maeaea pe a oo i le isi vaitaimi o malologa a le aʻoga? Na filifilia e se tasi o tamaitiiti ua uma ona papatiso, e aʻoga i se aʻoga maualuga, le tusi o le Mankind’s Search for God, o se tusi na lomia e le Sosaiete o le Olo Matamata. Na ia faia ni autaluga pupuu mai lea mataupu i lea mataupu, ma faamaumau i lana tamai api mea na ia aʻoaʻoina. Sa o se luʻi ma e alu ai foi se taimi tele na i lo o mea na ia manatu i ai. E ui i lea, ina ua uma ona ia faitauina le tusi atoa, sa matuā maofa o ia e ala i le moni o le feau a le Tusi Paia.

Ia Matuā Naunau e Aʻoaʻoina

O le toatele o auauna faamaoni a Ieova i aso nei, o loo “faamalolosi i le galuega a le Alii ma le le aunoa.” (1 Korinito 15:58) E oo lava i le toe autaluina o se faasologa ma ni taumafaiga faamaoni, o le faasologa o loo e mulimuli i ai i se faiga faalevaiaso atonu e lē telē se suiga. Peitai, o le faataulauina moni o lou naunau i lau vaega ina ia maua se malamalamaga loloto o le upu moni, ma ia faatumauina pea oe lava ina ia ogatasi atoatoa ma fuafuaga a Ieova, o le a iai se eseesega.

O se faalaeiauga le faalogo atu i le tauia o i latou o ē na faaleleia le tulaga o a latou suesuega. Na iloa e se tasi tamaloa Kerisiano ua leiloa lona uiga mautinoa agaʻi i le sailia o se malamalamaga loloto o le upu moni, na ia toe faamaopoopoina lona olaga ina ia mafai ai ona ia tuutoina atu ona itula paganoa ia sili atu mo suesuega totino. Na faapea mai o ia: “Na aumaia ai ia te aʻu se fiafiaga ou te leʻi iloaina muamua. I le tuputupu aʻe o le mautinoa i le tusitala tauatua o le Tusi Paia, na ou iloaina ai e mafai ona ou talanoa atu i isi ma le maelega moni e uiga i loʻu faatuatua. Ua ou lagona ua lelei le fafagaina o aʻu, mautu faaleagaga, ma faamalieina i faaiuga o aso taitasi.”

O se ovasia femalagaai a Molimau a Ieova, o lē na asiasia faapotopotoga, na ia faamatalaina faapenei nisi o aogā: “O i latou o ē e filigā i suesuega totino, e mautinoa o loo malolosi ma malaulau i a latou faamatalaga. E lelei lo latou feagai ai ma isi, ma e lē faigofie ona latou faavaivai ona o tala lē mautinoa mai isi. Pe a ō i le faiva i le fanua, latou te mataala ma faaaogā faaupuga e fetaui lelei ma manaoga o tagata latou te feiloai.”

Na ia faaopoopo mai se manatu atonu e mafai e nisi ona teu i mafaufau pe a fai a latou suesuega totino. “I sauniga mo talanoaga faale-Tusi Paia, o le toatele lava e mafuli i le faitau saʻo mai o a latou tali mai le itulau tusitusia. O le a sili atu aogā latou te maua pe afai latou te mafaufau loloto i le auala e faafesootai ai le mataupu i mea na latou aʻoaʻoina talu ai, po o i o latou lava olaga.” Pe e te manatu e mafai ona faaleleia oe i lenei tulaga?

Ina ua mavae tausaga e 90 o le soifuaga o le perofeta o Tanielu, sa leʻi manatu o ia e faapea, ua lava lona malamalama i ala o Ieova. I ona tausaga faaiu, na ia talosaga atu ai e faatatau i se mea na te leʻi puea atoatoa e faapea: “Le alii e, pe se a le iuga o ia mea?” (Tanielu 12:8) E mautinoa, o lenei naunau moni lē masuia ina ia aʻoaʻo atili le upu moni a le Atua, o le ki lena i le lelei tele o lona tumau i mea uma na tutupu i lona olaga.—Tanielu 7:8, 16, 19, 20.

O auauna taitoatasi uma a Ieova, ua iai le avega tauave tutusa ina ia tumau ai ma le mausali o se tasi o Ana Molimau. Ia matuā tinou e aʻoaʻo ina ia faatumauina pea le malosi o lou itu faaleagaga. Taumafai e faaopoopo atu le tasi po o le lua o ni mea fou i le faasologa o au suesuega totino faalevaiaso, faalemasina, po o le faaletausaga foi. Tagai i ai i le auala o le a faamanuia ai e le Atua so o se taumafaiga itiiti o loo e faia. Ioe, ia olioli i lau suesuega totino o le Tusi Paia, ma iuga e maua mai ai.—Salamo 107:43.

[Faaopoopoga i lalo]