Pe Mafai ona Iloa mai i Tatou e Ē ua Maliliu?

NA FASIOTIA e se fafine lana tane. Ina ua mavae le fitu tausaga mulimuli ane, na faamataʻuina ai i se miti na ia talitonu o se faailoga o le ita o lana tane ua oti. Ina ia faamalie le “agaga” o lana tane, na ia auina atu ai lana tama teine e ofo atu se taulaga e ala i le liligiina i luga o le tuugamau o ni meainu.

Sa lē iloa e le teine se tala o le a fai atu i le agaga o lona tamā, talu ai, o le taulaga, e aumai i lona tinā o lē na fasiotia lona tamā. Ae sa lafi lona tuagane laitiiti ma vaavaai ane. Ua alu atu o ia, ma la tatalo faatasi atu ma lona tuafafine i lo la tamā ina ia fesoasoani i a i laua e taui atu lona oti.

O lenei vaaiga na aumaia i se tala faa-Eleni na tusia e sili atu i le 2,400 tausaga ua mavae, e taʻua o le Libation Bearers. I nisi vaega o le lalolagi, ae maise lava i Aferika, o loo ofoina atu ai faapena taulaga i luga o tuugamau e oo mai lava i aso nei.

Mo se faaaoaoga, seʻi manatu i le mea na tupu i a Ibe, o lē o loo nofo i Nigeria. Ina ua feoti lana fanau e toatolu, na ia faafesootaia ai se fomai faataulaitu o le atunuu, o lē na taʻuina atu i a Ibe e faapea, e iai le mafuaaga o le oti o lana fanau—ua ita le tamā ua oti o Ibe, ona sa lē saʻo le auala na faia ai lona falelauasiga.

I le fautuaga a le fomai faataulaitu, na faia ai e Ibe se taulaga i se ʻoti, ma liligi le sini ma le uaina i luga o le tuugamau o lona tamā. Na ia valaau atu i le agaga o lona tamā, ma aioi atu mo se faamagaloga, ma faamautinoa atu i ai lona alofa, ma talosaga atu mo se faamanuiaga.

E leʻi masalomia e Ibe le mafai ona iloa ma faalogo mai o lona tamā i a te ia. E lē talitonu o ia ua oti lona tamā, ae na manatu, i le oti, ua ia “sopoia” ai le lalolagi vaaia ma agaʻi atu i le lalolagi lē vaaia. Na talitonu Ibe, ua alu atu lona tamā mai le lalolagi o tino aano ma toto, i le lalolagi o agaga, le nofoaga o tuaā.

Sa iai le manatu o Ibe e faapea: ‘E ui e lē o toe iai Tamā i lenei lalolagi, ae o loo ia manatua pea aʻu ma o loo naunau o ia mo loʻu lelei. Ma talu ai ua avea nei o ia ma agaga e iai le mana, ua iai la o ia i se tulaga e sili mamao atu ona lelei e fesoasoani mai ai i a te aʻu, na i lo o le taimi sa iai o ia o se tagata i le lalolagi. E lē gata i lea, e mafai ona ia faalatalata tuusaʻo atu i le Atua mo aʻu, talu ai o le Atua foi, o le agaga ia. E lē taumatea o loo ita Tamā i le taimi nei, ae afai ou te faaali atu i a te ia le faaaloalo tatau, o le a ia faamagalo ma faamanuia mai aʻu.’

I Aferika, e taatele ai i tagata o lotu o loo faia ai uputuu faaleatunuu le talitonuga e faapea, e mafai e tagata ua maliliu ona iloa mai tagata ola i le lalolagi ma taaina ō latou olaga. E iloatino foi lena mea i olaga o i latou ua faapea mai o Kerisiano. Mo se faaaoaoga, pe a uma ona faaipoipo se fafine i se falesa, o se aganuu masani lona alu atu i le fale o ona mātua ina ia maua mai ai se faamanuiaga e tusa ma uputuu faaleatunuu. O i inā e talosaga atu ai i tuaā, ma liligi atu ai i a i latou se taulaga o meainu. E toatele tagata e talitonu e faapea, o le lē taulau ona faia o lenei mea, e aumaia ai mala i le faaipoipoga.

Ua manatu e faapea, o tuaā po o agaga o tuaā, latou te faamautinoaina le faasaoina ma le manuia o ō latou aiga o i le lalolagi. E tusa ai ma lenei manatu, o agaga o tuaā, o ni ʻau e malolosi tele, e mafai ona aumaia seleselega lelei, e faateleina ai tulaga lelei, ma puipuia ai tagata mai le faaleagaina. Latou te faalaa ane e fai ma sui o tagata. Ae peitai, afai e tuulafoaiina pe teena, ona latou aumaia loa lea o mala—faamaʻi, mativa, e oo lava i le oti. I le iuga, ua taumafai ai tagata e tausia ni faiā lelei ma ē ua maliliu e ala i le faia o taulaga ma faamanatuga.

E te talitonu o aafia moni ē ua maliliu i olaga o ē o loo ola? Pe sa iai se taimi na e tū ai i le tuugamau o sē pele ma fai atu ni nai upu, ona atonu po o mafai ona ia lagona mai oe? Ia, po o iloa mai ma faalogo mai ē ua maliliu i a i tatou pe leai foi, e faalagolago lea i le mea e tupu pe a maliu se tasi. Seʻi o tatou iloiloina le mea o loo fai mai ai le Tusi Paia e uiga i lenei mataupu tāua.