Aʻoaʻo ina ia Olioli i le Mataʻu i a Ieova
“Le fanau e, ina o mai ia, ina faalogologo mai ia ia te au; ou te aʻoaʻo atu ia te outou ia matatau ia Ieova.”—SALAMO 34:11.
1. O le a faapefea ona faamutaina e le Malo o le Atua le mataʻu, ae po o lona uiga ea o ituaiga uma lava o mataʻu?
O LOO moomoo tagata i vaipanoa uma mo se saolotoga mai le mataʻu—le mataʻu i soligatulafono ma faiga sauā, le mataʻu i le leai o ni galuega, le mataʻu i maʻi matuia. Maeu se aso sili o le a iai pe a oo ina iai moni lena saolotoga i le pulega a le Malo o le Atua! (Isaia 33:24; 65:21-23; Mika 4:4) Peitai, e lē o mataʻu uma o le a faamutaina ai i lena taimi, e lē tatau foi ona tatou taumafai e aveese uma lava so o se mataʻu mai ō tatou olaga i aso nei. E iai le mataʻu e lelei, e iai foi le mataʻu e leaga.
2. (a) O le ā le ituaiga o mataʻu e leaga, ae o le ā le ituaiga e manaomia? (e) O le ā le mataʻu i le Atua, ma ua faapefea ona faailoa mai lena mataʻu e mau ia o loo siiina mai?
2 E mafai ona avea le mataʻu e pei o se mea e faaoonaina ai le mafaufau, e pe ai le tomai o le tagata e fefulifulisai ai lona mafaufau. E mafai ona faavaivaia ai lagona lototele ma faaleaogaina ai faamoemoega. E ono mafai ona oo lena mataʻu i se tasi ua faamataʻuina moni lava e se fili. (Ieremia 51:30) E mafai ona oo i se tasi o lē ua sili atu ona tāua i a te ia le manao ia talia aloaia o ia e nisi o tagata o loo mautofi ma tele so latou leo i upufai. (Faataoto 29:25) Peitai e iai foi le mataʻu e mamā, o le ituaiga lea e mafai ona taofia ai i tatou mai le faia o so o se mea e leaga, ma mai le faamanuaina ai o i tatou. Ae o le mataʻu i le Atua e aofia ai nisi mea e tele atu na i lo na. O le migao lea i a Ieova, o se faaaloalo loloto mo ia, ua fusia faatasi ma se lagona mataʻu lelei ina ia lē faia se mea e lē fiafia mai ai o ia. (Salamo 89:7) O lenei mataʻu ina ia lē faatupuina le lē fiafia o le finagalo o le Atua, e amata mai i le talisapaia o lona alofa tunoa ma lona agalelei. (Salamo 5:7; Hosea 3:5) E aofia ai foi le iloaina lelei, o Ieova o le Faamasino Silisili ma o Lē e Ona le Malosi Uma Lava, o lē o loo iai le mana e faaoo mai ai faasalaga, e oo lava i le oti, i a i latou o ē mumusu e usiusitai i a te ia.—Roma 14:10-12.
3. Ua faapefea ona eseese le mataʻu i a Ieova ma le mataʻu lena e iai mo nisi o atua faapaupau?
3 E mamā le mataʻu i le Atua, e lē alualua i ni faalogona lē mamā. E uunaia ai lagona o se tasi ina ia mausali mo le mea ua tonu, ae lē faagutugutulua i le faia o le mea leaga. E lē pei o le mataʻu sa iai i le atua o Phobos o Eleni anamua, o lē sa faamatalaina e faapea, o se atua leaga sa fai ma taufaafefe. E lē pei foi o le mataʻu lea sa iai i le atua fafine o Kali o le lotu Hindu, o lē sa faamatalaina i nisi taimi o se atua na galala i le fia inu i le toto, na te faaaogā tino o tagata oti, o gata, ma atigipoo e fai ma mea teuteu. O le mataʻu i le Atua e tosina i ai le loto; e lē inoino i ai. Ua fusia faatasi ai le alofa ma le loto talisapaia. O le mataʻu la i le Atua tatou te matuā vavalalata atu ai i a Ieova.—Teuteronome 10:12, 13; Salamo 2:11.
Le Pogai e Matatau ai Isi ae Lē Matatau Isi
4. E pei ona faamatalaina e le aposetolo o Paulo, o le ā le tulaga lea ua faaleagaina tagata, ma o le ā le mafuaaga o lenei mea?
4 E lē o uunaia tagata uma e le uiga lelei o le mataʻu i le Atua. I le Roma 3:9-18, ua faamatalaina ai e le aposetolo o Paulo le mamao ua paʻū ese atu i ai le tagata mai le lelei atoatoa sa iai i le amataga. Ina ua uma ona taʻua le iai o tagata uma i le tulaga agasala, ona sii lea e Paulo upu a le Salamo i le faapea mai: “E leai sē amiotonu, e leai lava se tasi.” (Tagaʻi i le Salamo 14:1.) Ona ia aumaia lea o auiliiliga e ala i le sii mai o mea e pei o le faatalalē o le tagata i la latou saili atu i le Atua, o le leai o so latou agalelei, o ā latou upu faaʻoleʻole, o ā latou upu faifai, ma le faamasaa toto. Maeu le saʻo o lena faamatalaga mo le lalolagi i aso nei! O le toatele o tagata ua lē o toe fiafia i le Atua ma ana fuafuaga. Ua masani lava ona faaleoleo le agalelei e faatoʻā faaali i ni mea e iloa e mafai ona toe maua mai ai se taui. Ua taatele i so o se mea le pepelo ma le tautatala i gagana matagā. O le faamasaa toto ua lē gata ina ua faatomua mai ai tala fou ae ua iai foi i faafiafiaga. O le ā le pogai o lea tulaga? O le mea moni o i tatou uma lava na tupuga mai i le tagata agasala o Atamu, ae afai e faaalia mai e tagata i ō latou olaga mea ia na faamatalaina e le aposetolo o Paulo, o lona uiga ua iai se isi mea e sili atu o loo aafia ai. Ua faamatalaina e le fuaiupu e 18 lena mea e faapea: “E leai lava so latou mataʻu i le Atua.”—Tagaʻi i le Salamo 36:1.
5. Aisea ua mataʻu ai nisi tagata i le Atua, ae ua lē faapena isi?
5 Ae aisea ua mataʻu ai nisi i le Atua, ae ua lē faapena isi? E faigofie le tali, talu ai o loo atiina aʻe e nisi tagata, a o isi e leai. E leai se tasi o i tatou na fanau mai ua mataʻu i le Atua, ae ua i a i tatou uma le tomai e mafai ai ona mauaina. O le mataʻu i le Atua, o se mea e tatau ona tatou aʻoaʻoina. Ma ina ia avea la o se uunaiga malosi o gaoioiga i ō tatou olaga, e manaomia ai ona tatou atiina aʻe.
Se Valaaulia Faaoso Naunau
6. O ai ua ia faasalafa maia i a i tatou le valaaulia o loo faamauina i le Salamo 34:11, ma ua faaalia faapefea e lenei mau e faapea, e tatau ona aʻoaʻoina ina ia maua le mataʻu i le Atua?
6 O loo faasalafa mai i le Salamo 34 i a i tatou se valaaulia faaoso naunau, ina ia aʻoaʻoina le mataʻu i a Ieova. O le salamo lenei a Tavita. Ma o ai na faaatagia mai e Tavita? E leai se isi ua na o le Alii o Iesu Keriso. O le valoaga na faatatauina atu faapitoa e le aposetolo o Ioane i a Iesu, lea o loo tusia i le fuaiupu e 20 o lenei salamo. (Ioane 19:36) I ō tatou aso, o loo avea ai Iesu o lē o loo faasalafa maia le valaaulia e pei o lena o loo taʻua i le fuaiupu e 11: “Le fanau e, ina o mai ia, ina faalogologo mai ia ia te au; ou te aʻoaʻo atu ia te outou ia matatau ia Ieova.” Ua faaalia manino mai i lenei mea, o le mataʻu i le Atua o se mea e mafai ona aʻoaʻoina, ma ua silisili ona agavaa Iesu Keriso mo le aʻoaʻoina ai o i tatou. Aisea?
7. Aisea ua tatau faapitoa ai lava ona avea Iesu ma lē e aʻoaʻoina mai ai le mataʻu i le Atua?
7 E silafia e Iesu Keriso le tāua o le mataʻu i le Atua. Ua faapea mai le Eperu 5:7 e faatatau i a te ia: “O ia [Keriso] lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia ona o lona migao [“mataʻu i le Atua,” NW].” O lena mataʻu i le Atua o se uiga na faaalia e Iesu Keriso, e oo lava i le taimi a o leʻi fesagai ma le oti i le laau faaoosala. Manatua, i le Faataoto mataupu e 8, o loo faamatalaina ai i inā le Alo o le Atua e faapea, o ia o le faatinoga atoatoa o le poto. Ma i le Faataoto 9:10, ua taʻu mai ai i a i tatou: “O le mataʻu i a Ieova, o le amataga lea o le poto.” O le mataʻu la i le Atua, o se vaega autū lea o uiga totino o le Alo o le Atua ua leva ona iai a o ia leʻi afio mai i le lalolagi.
8. I le Isaia 11:2, 3, o le ā ua tatou iloa mai ai e uiga i le mataʻu i a Ieova?
8 E lē gata i lea, ua taʻua i le Isaia 11:2, 3, e faatatau i a Iesu i le avea ma Tupu Faa-Mesia: “E afio mau i a te ia le agaga o Ieova; o le agaga o le poto ma le mafaufau; o le agaga o le faatonuga ma le malosi; o le agaga o le malamalama ma le mataʻu i a Ieova; e fiafia foi o ia i le mataʻu i a Ieova.” Maeu le matagofie o le faamatalaina mai o lea tulaga! O le mataʻu i a Ieova e lē o se mea e faanoanoa ai. E aogā ma e maua ai le mea lelei. O se uiga o le a iai i le puleaga atoa lea e pule ai Keriso o se Tupu. O loo pule o ia i le taimi nei, ma o i latou uma ua aoaoina e avea ma tagatanuu o lana pulega, ua ia faatonuina ina ia matatau i a Ieova. E faapefea?
9. Ua faapefea ona aʻoaʻo mai e Iesu Keriso i a i tatou le mataʻu i a Ieova, ma o le ā o loo finagalo o ia ina ia tatou iloa e uiga i lea mataʻu?
9 E ala i ā tatou sauniga i faapotopotoga, o ā tatou fonotaga, ma tauaofiaga, ua fesoasoani mai ai i a i tatou Iesu, o lē ua tofia e fai ma Ulu o le faapotopotoga, ma o ia foi o le Tupu Faa-Mesia, ina ia tatou malamalama lelei i le uiga o le mataʻu i le Atua ma le mafuaaga e aogā ai. I lea auala, ua ia taumafai ai ina ia faateleina lo tatou talisapaia mo lea mataʻu, ina ia tatou maua ai le olioli i le mataʻu i a Ieova, e pei foi ona ia faia.
Po o le a E Faia ea ni Taumafaiga?
10. Pe a auai atu i sauniga faa-Kerisiano, o le ā e ao ona tatou fai pe afai tatou te fia malamalama i le mataʻu i a Ieova?
10 O le mea moni, o le tau ina tatou faitauina o le Tusi Paia po o lo tatou auai i sauniga i le Maota o le Malo, e lē faamaonia ai o le a i a i tatou le mataʻu i le Atua. Seʻi mātau le mea e manaomia ona tatou fai pe afai tatou te fia malamalama moni i le mataʻu i a Ieova. Ua faapea mai le Faataoto 2:1-5: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.” O lea, pe a auai atu i sauniga, e manaomia ona tatou uai atu i mea o talanoaina, ia faia ni taumafaiga filigā e matuā uai atu ma ia manatua manatu autū, ia manatunatu loloto pe faapefea i le auala o loo tatou manatu ai i a Ieova, ona aafia ai ō tatou uiga i ni fautuaga e aumai—ioe, ia tatala atu i ai ō tatou loto. Ona tatou malamalama ai lea i le mataʻu i a Ieova.
11. Ina ia atiina aʻe le mataʻu i le Atua, o le ā e ao ona tatou faia ma le naunautai, ma ia faifaipea?
11 Ua tatai atu e le Salamo 86:11 ō tatou manatu i se isi vala tāua, o le tatalo lea. Na tatalo faapea le faisalamo: “Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa.” Na talia e Ieova lena tatalo, auā o lea na ia faamauina i le Tusi Paia. Ina ia atiina aʻe le mataʻu i le Atua, tatou te manaomia ai foi ona tatalo atu i a Ieova mo lana fesoasoani, ma o le a tatou maua aogā e ala i le tatalo atu ma le naunautai ma ia faifaipea.—Luka 18:1-8.
O loo Aafia ai Lou Loto
12. Aisea e tatau ai ona uai faapitoa atu i le loto, ma o le ā e aofia ai i lena uai atu?
12 E iai foi se isi mea e ao ona tatou mātauina i le Salamo 86:11. Sa leʻi tau ina ole atu le faisalamo ina ia faamalamalamaina lona mafaufau i le uiga o le mataʻu i le Atua. Ua ia taʻua ai lona loto. O le faatupuina aʻe o le mataʻu i le Atua e aofia ai le fatu faafaatusa, lea e manaomia ona uai faapitoa atu i ai, auā o le uiga lilo lea o loo i totonu o le tagata, e pei ona faaalia mai i ā tatou gaoioiga uma lava o le olaga ma e aofia ai ō tatou mafaufauga, ō tatou uiga, ō tatou faanaunauga, o uunaiga o ō tatou loto, o ō tatou sini.
13. (a) O le ā e mafai ona iloa ai po o fevaevaeaiina le loto o se tagata? (e) A o tatou faatupuina aʻe le mataʻu i le Atua, o le ā le sini e ao ona tatou taumafai e galue agaʻi i ai?
13 Ua lapataia i tatou e le Tusi Paia e faapea, e mafai ona fevaevaeaiina le loto o le tagata. E mafai ona taufaaʻoleʻole. (Salamo 12:2; Ieremia 17:9) E ono uunaia ai i tatou ina ia faia ni gaoioiga lelei—le alu atu i sauniga a le faapotopotoga ma i le faiva i le fanua—ae atonu foi o le a fiafia i nisi o vala o le olaga a le lalolagi. E ono mafai e lenei mea ona taofia mai ai i tatou mai le uai atoatoa atu i le faaauilumaina o manaoga o le Malo. Atonu la o le a taumafai le loto taufaaʻoleʻole e tauanau i tatou e faapea, o lena e tutusa lava le tele o mea o loo tatou faia, ma mea o loo faia e le toatele o isi. Pe atonu foi i le aʻoga po o ō tatou fale faigaluega, e ono taaina ai le loto i le fefe i tagata. O le iuga, atonu tatou te faatalatu ai i na nofoaga e faailoa atu o i tatou o Molimau a Ieova, ma atonu e oo lava ina tatou faia mea e lē talafeagai mo ni Kerisiano. Peitai mulimuli ane, e faalavelave mai ai ō tatou loto fuatiaifo. E lē o le ituaiga o tagata lena tatou te mananao i ai. O le mea lea, tatou te tatalo faatasi ai ma le faisalamo i a Ieova e faapea: “Ia e faia ina ia tasi loʻu loto e mataʻu i lou suafa.” Tatou te mananao i le tagata lilo atoa, e pei ona faaalia atu i ā tatou gaoioiga uma o le olaga, ina ia avatu le faamaoniga e faapea, tatou te ‘matatau i le Atua moni, ma anaana i ana poloaiga.’—Failauga 12:13.
14, 15. (a) A o valoia atu le toe faafoisia o Isaraelu mai la latou tafeaga i Papelonia, o le ā na folafola e Ieova na te avatuina i ōna tagata? (e) O le ā na faia e Ieova ma se fuafuaga ina ia faatupuina le mataʻu i le Atua i loto o ōna tagata? (i) Aisea na fulitua atu ai Isaraelu i ala o Ieova?
14 Ua folafola mai e Ieova lona avatuina i ōna tagata, o lena loto e mataʻu ai i le Atua. Na ia valoiaina le toe faafoisia o Isaraelu ma faapea mai, e pei ona tatou faitau ai i le Ieremia 32:37-39: “Ou te faafoisia mai i latou i lenei mea, ma ou faanonofoina ai i latou ma le filemu; e fai foi i latou moʻu nuu, e fai foi aʻu mo latou Atua. Ou te foaiina atu ia te i latou le loto e tasi, ma le ala e tasi, ina ia latou matatau ia te au i aso uma lava, ia lelei ai i latou, atoa foi ma a latou fanau pe a mavae atu i latou.” I le fuaiupu e 40, ua toe faamamafa mai ai le folafolaga a le Atua: “Ou te tuuina atu foi le mataʻu ia te au i o latou loto, ina ia latou le liliu ese ia te au.” I le 537 T.L.M., na toe faafoi ai e Ieova i latou i Ierusalema e pei ona ia folafolaina. Ae faapefea le isi vaega uma o lena folafolaga—e faapea o le a ia tuuina atu i a i latou le ‘loto e tasi ina ia matatau ai pea i a te ia’? Aisea na fulitua ai le nuu anamua o Isaraelu i a Ieova, ina ua mavae ona toe faafoisia o i latou mai Papelonia, ma na faaumatiaina ai lo latou malumalu i le 70 T.A., ma lē toe fausia ai?
15 E lē o se lē taulau lenei i le fuafuaga a Ieova. O le mea moni lava, sa faia e Ieova ni laasaga ina ia tuuina atu le mataʻu i le Atua i loto o ōna tagata. Ona o le alofa mutimutivale na ia faaalia i le faasaoina mai o i latou mai Papelonia ma le toe faafoi atu o i latou i lo latou nuu, na ia tuuina atu ai i a i latou faamaoniga uma e tatau ai ona latou faaaloalo atu i a te ia. Sa toe faamamafa atu i ai e le Atua na mea uma e ala i upu faamanatu, o fautuaga, ma aoaiga na fai atu e perofeta o Hakai, o Sakaria, ma Malaki; o Esera o lē auina atu i a i latou o se faiaoga; o le Kovana o Neemia; ma na ala foi i le Alo o le Atua lava ia. Na iai ni taimi sa faalogo ai tagata. Na latou faia faapea ina ua latou toe fausia le malumalu o Ieova lea na augani atu ai Hakai ma Sakaria, faapea foi i le taimi ina ua latou toe faafoi avā mai nuu ese sa faia i aso o Esera. (Esera 5:1, 2; 10:1-4) Ae o le tele lava o taimi, sa latou lē usiusitai. Sa latou lē tausisi pea i le uai atu; sa lē faaauau foi ona latou taliaina fautuaga; sa latou leʻi tatalaina atu pea lava ō latou loto. Sa leʻi atiina aʻe e le fanauga a Isaraelu le mataʻu i le Atua, ma o le iuga, sa leʻi avea lea o se uunaiga malosi o gaoioiga i ō latou olaga.—Malaki 1:6; Mataio 15:7, 8.
16. O loto o ai ua faatupuina aʻe ai e Ieova le mataʻu i le Atua?
16 Ae, sa faataunuuina lava le folafolaga a Ieova i lona tuuina o le mataʻu i le Atua i loto o ōna tagata. Na ia faia se feagaiga fou ma le Isaraelu faaleagaga, na ia tuuina atu i na Kerisiano le faamoemoe faalelagi. (Ieremia 31:33; Kalatia 6:16) I le 1919, na toe faafoisia ai e le Atua i latou mai le tafeaga i Papelonia le Aai Tele, o le emepaea i le lalolagi o lotu sese. Ua ia faamausaliina i ō latou loto le mataʻu i a te ia. Ua aumaia e lenei mea le anoanoai o aogā mo i latou, faapea ma le “motu o tagata e toatele,” o ē o loo iai le faamoemoe e avea ma tagatanuu faalelalolagi o le Malo. (Ieremia 32:39; Faaaliga 7:9) Ua oo ina iai foi i ō latou loto le mataʻu i a Ieova.
Le Auala e Faatupuina ai le Mataʻu i le Atua i Ō Tatou Loto
17. Pe ua tuuina faapefea e Ieova le mataʻu i le Atua i ō tatou loto?
17 Ua faapefea ona faatupuina e Ieova lenei mataʻu i a te ia i ō tatou loto? E ala i le faagaoioiga a lona agaga. Ma o le ā se fua o le agaga paia lea o loo i a i tatou? O le Tusi Paia, le Afioga faagaeeina a le Atua. (2 Timoteo 3:16, 17) O mea na ia faia i le taimi ua teʻa, o āna feutagaiga ma ana auauna i le taimi nei i le faataunuuga o lana Afioga faavaloaga, ma valoaga o mea o le a oo mai, ua saunia ai e Ieova se faavae mautu mo i tatou uma ina ia tatou faatupuina aʻe ai le mataʻu i le Atua.—Iosua 24:2-15; Eperu 10:30, 31.
18, 19. Ua aogā faapefea i a i tatou tauaofiaga, o fonotaga, o sauniga a le faapotopotoga, ina ia tatou maua ai le mataʻu i le Atua?
18 Ua onomea ona matauina, e pei ona taʻua i le Teuteronome 4:10, na fetalai Ieova i a Mose: “Ina faapotopoto mai ia ia te au le nuu, ia latou faalogologo mai i aʻu upu, ina ia aʻoaʻoina ai i latou, ina ia matatau mai ia te au i aso uma lava latou te ola ai i le fogāeleele, ma ia latou aʻoaʻo ai i a latou fanau.” Ua faapena foi i aso nei, ua faia e Ieova le anoanoai o sauniuniga ina ia fesoasoani ai i ōna tagata e aʻoaʻo ina ia matatau i a te ia. I tauaofiaga, i fonotaga, i sauniga a le faapotopotoga, ua faamanatu mai ai pea i a i tatou faamaoniga o le alofa tunoa o Ieova ma lona agalelei. O le mea lena sa tatou faia a o tatou suesueina le tusi The Greatest Man Who Ever Lived. Na faapefea i lena suesuega, ona aafia ai oe ma ou uiga faaalia i a Ieova? A o e vaai atu i vala eseese o uiga totino silisili o lo tatou Tamā faalelagi ia na atagia mai i lona Alo, pe sa leʻi faamalosia ai ea e lena mea ou faanaunauga ina ia aua lava neʻi faia se mea e lē fiafia ai le Atua?—Kolose 1:15.
19 I ā tatou sauniga, o loo tatou suesueina ai foi tala e uiga i le faasaoina e Ieova o ōna tagata i aso ua teʻa. (2 Samuelu 7:23) A o tatou suesueina le tusi o Faaaliga i le Tusi Paia, faatasi ma le fesoasoani mai a le tusi o le Revelation—Its Grand Climax At Hand!, e tatou te iloa ai vaaiga faavaloaga na ua uma ona faataunuuina i lenei 20 o senituri ma e uiga i isi mea tutupu e mataʻu ai, ia e leʻi oo mai. Ua taʻua i le Salamo 66:5 e faatatau i na galuega uma a le Atua e faapea: “O mai ia, ia outou matamata i galuega a le Atua; e matautia ia i mea na na faia i le fanau a tagata.” Ioe, o le matauina totoʻa ma le saʻo o nei gaoioiga a le Atua ua faatupuina ai i ō tatou loto le mataʻu i a Ieova, o se faaaloalo loloto. Ona mafai ai lea ona tatou iloa le auala e faataunuuina ai e Ieova le Atua lana folafolaga: “Ou te tuuina atu foi le mataʻu ia te au i o latou loto, ina ia latou le liliu ese ia te au.”—Ieremia 32:40.
20. Ina ia matuā faatupuina i ō tatou loto le mataʻu i le Atua, o le ā e manaomia ona tatou faia?
20 Peitai ane, ua faamaonia e lē mafai ona oo le mataʻu i le Atua i ō tatou loto, e aunoa ma ni ā tatou taumafaiga. E lē faavavega le oo mai o ni iuga. E faia e Ieova lana vaega. E tatau foi la ona faia la tatou vaega i le atiina aʻe o le mataʻu i le Atua. (Teuteronome 5:29) Sa lē taulau ona faia e Isaraelu faaletino lena mea. Ae o le faalagolago atu i a Ieova, ua mafai ai e Isaraelu faaleagaga ma ā latou aumea i le taimi nei, ona tofo i le tele o aogā e maua e i latou o ē matatau i le Atua. O le a tatou talanoaina nisi o na aogā i le mataupu o sosoo mai.
O le a Faapefea ona E Tali?
◻ O le ā le mataʻu i le Atua?
◻ Ua faapefea ona aʻoaʻoina i tatou ina ia olioli i le mataʻu i a Ieova?
◻ Ina ia maua le mataʻu i le Atua, o ā taumafaiga e manaomia mai i a i tatou?
◻ Aisea e aofia ai vala uma o lo tatou fatu faafaatusa po o le loto, i le mauaina o le mataʻu i le Atua?
[Ata i le itulau 13]
E manaomia se suesuega maeʻaeʻa ina ia malamalama ai i le mataʻu i a Ieova