Aogā o le Mataʻu i le Atua Moni
“O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—ISAIA 48:17.
1. O ā mala sa ono mafai e le mataʻu i le Atua ona taofia mai le ono tupu?
PE ANA fai sa atiina aʻe e Atamu le mataʻu i le Atua, semanū e mafai ona taofia ai o ia mai le agasala lea ua oo ai le oti e faavavau i a te ia, ma le faitau afe o tausaga o mafatiaga mo āna fanau. Pe ana utagia e le nuu anamua o Isaraelu le fautuaga a Ieova ina ia matatau ma alolofa atu i a te ia, semanū e lē faatagataotauaina lena nuu i Papelonia, na semanū foi latou te lē teena ai le Alo o le Atua, lea ua latou nofosala ai i le faamasaaina o lona toto. Pe ana matatau i le Atua le lalolagi i aso nei, semanū e leai ni mea faapiopio i faiga mālō ma faiga pisinisi, e leai ni solitulafono, e leai ni taua.—Faataoto 3:7.
2. E ui lava i tulaga o le lalolagi o loo tatou iai, ae aisea e ao ai ona tatou atiina aʻe le mataʻu i a Ieova?
2 Peitai ane, e tusa lava po o ā mea o loo faia e le lalolagi o loo tatou iai, ae i ō tatou tulaga taitoatasi, i aiga, ma i faapotopotoga, o ni auauna a Ieova, e mafai ona tatou maua aogā i le atiina aʻe o le mataʻu i le Atua moni. Ua ogatasi lenei mea ma upu na faamanatu atu e Mose i le nuu o Isaraelu e faapea: “Se a se mea e finagalo i ai Ieova lou Atua ia te oe, na ona ia e mataʻu ia Ieova lou Atua, ina ia e savali i ona ala uma lava, ma ia e alofa atu ia te ia, ma ia e auauna ia Ieova lou Atua ma lou loto atoa ma lou agaga atoa, ina ia e tausiusi i poloaiga a Ieova . . . ina ia manuia ai oe?” (Teuteronome 10:12, 13) O ā nisi o aogā tatou te maua pe a tatou matatau i a Ieova, le Atua moni?
Atamai—E Sili atu le Tautele na i lo o le Auro
3. (a) O le ā le aogā muamua ua mafai ona tatou mauaina? (e) O le ā le uiga o le Salamo 111:10?
3 O le aogā muamua lava, o le atamai moni. Ua faalauiloa mai e le Salamo 111:10 e faapea: “O le mataʻu ia Ieova, o le amataga lea o le poto [“atamai,” NW].” O le ā le uiga? O le atamai, o le tomai lea e faaaogā le poto i se tulaga manuia ina ia foia ni faafitauli, aveesea ni lamatiaga, ma maua ai ni sini patino. E aofia ai ni faamasinoga saʻo. O le amataga, o le uluai vaega, o le faavae foi o lena atamai, o le mataʻu lea i a Ieova. Aisea? Auā o foafoaga uma lava, o galuega ia a ōna aao. E faalagolago atu i a te ia. Na ia tuuina mai i tagata le saolotoga e filifili ai, ae leʻi tuuina mai i ai se tomai latou te faatonutonuina ai ma le manuia ō latou lava ala e aunoa ma lana taitaiga. (Iosua 24:15; Ieremia 10:23) Seʻi vaganā lava ua tatou talisapaia na mea moni autū o le olaga, ma ola aʻe e ogatasi ma na mea, ona mafai lea ona tatou maua le manuia tumau. Pe afai o lo tatou poto e uiga i a Ieova, tatou te maua ai le talitonuga mautinoa e lē maluelue e faapea, o le finagalo o le Atua e mautinoa le manuia ma e mautinoa foi lana folafolaga ma lona tomai e tauia ai le faatuatua, ona avea ai lea o le mataʻu i le Atua ma uunaiga i a i tatou ina ia gaoioi ma le atamai.—Faataoto 3:21-26; Eperu 11:6.
4, 5. (a) Aisea na lē maua ai e se taulealea le atamai moni mai lana aʻoaʻoga sa iai i le iunivesite? (e) Na faapefea ona maua mulimuli ane e lenei taulealea ma lona toalua le atamai moni, ma i ā auala na mafai ai e lenei mea ona suia ō la olaga?
4 Seʻi mafaufau i se faaaoaoga. I le faitau sefulu o tausaga ua mavae, sa aʻoga ai se tama talavou i le Iunivesite o Saskatchewan, i Kanata. O mataupu sa iai e aofia ai le suesuega i olaga o meafaiola (biology), ma sa ia aʻoaʻoina ai le evolusione. Ina ua faauu mai o ia, sa iai sona atamai faapitoa i suesuega o fausaga o mea ninii ma atoma (atomic physics), ma maua ai sana sikolasipi e faaauau ai ana aʻoaʻoga i le Iunivesite o Toronto. A o iai i le aʻoga, na ia vaaia ai le ofoofogia o faamaoniga o le maopoopo ma le fuafuaina lelei o mea e faaaogā ai atoma (atomic structures). Ae leai ni tali na taliina ai fesili nei: O ai na fausiaina nei mea uma? O anafea? Ma aisea? Pe afai sa lē taliina na fesili, pe sa mafai la ona ia faaaogā ma le atamai lona poto i se lalolagi sa fetauai i lena vaitaimi? O le ā sa fai ma ona taiala? Po o le lotonuu ea? Po o se faanaunauga ea i ni manuia faaletino? Ae o le fesili moni lava, pe na ia maua ea le atamai moni?
5 E leʻi umi talu ona mavae lona faauuga, ae amata loa e lea taulealea ma lona toalua ona suesue le Tusi Paia faatasi ma Molimau a Ieova. O le Afioga a le Atua lava ia na amata ai ona la maua tali ua leva ona la sueina. Na la iloa ai o Lē na Foafoaina Mea, o Ieova le Atua lea. A o la suesueina le tala e uiga i a Mose i le Sami Ulaula, ma le tala e uiga i a Tanielu ma āna aumea i Papelonia, na la iloa ai le tāua o le mataʻu i le Atua ae lē i tagata. (Esoto 14:10-31; Tanielu 3:8-30) O lena mataʻu i le Atua ua fusia faatasi ma le alofa moni mo Ieova na amata ona uunaia ai i laua. E leʻi umi ae suia atoa loa ō la olaga. O lea ua faatoʻā iloa ai e le taulealea Lē e āna galuega matagofie ia sa ia suesueina i le mataupu o olaga o meafaiola (biology). Na oo ai ina malamalama o ia i le fuafuaga a Lē e āna le atamai lea na ia vaaia le atagia mai i āna suesuega i le fausaga o mea (physics). Na i lo le faaaogā la o lona poto e fausia ai ni auupega e ono faaumatia ai le isi ōna uso a tagata, na la mananao loa ma lona toalua e fesoasoani atu i isi ina ia latou alolofa foi i le Atua ma ia alolofa atu i ō latou tuaoi. Sa la ulu atu i le auaunaga faataimi atoa e avea ma nisi e folafolaina le Malo o le Atua. Mulimuli ane, na la auai atu i le Aʻoga o le Olomatamata ma le Tusi Paia o Kiliata ma tofia atu ai e avea o ni misionare.
6. Pe afai o loo i a i tatou le atamai lea e māfua mai i le mataʻu i a Ieova, o ā ni mea e pupuu ō latou aogā o le a tatou alofia le sailia, ae na i lo lea, o le ā o le a tatou faia?
6 O le mea moni, e lē mafai e tagata uma ona avea ma misionare. Ae e mafai e i tatou uma ona olioli i le atamai lea e māfua mai i le mataʻu i a Ieova. Pe afai tatou te atiina aʻe lena atamai, o le a tatou lē soona maelega ai e aʻoaʻoina filosofia a tagata o ē, o le mea moni lava o loo latou taumatemateina le uiga moni o le olaga. O le a tatou uai faapitoa atu i le suesueina o le Tusi Paia, lea ua faagaeeina e le Puna o le ola, o Ieova le Atua, o lē e mafai ona ia aumaia i a i tatou le ola e faavavau. (Salamo 36:9; Kolose 2:8) Na i lo le faapologaina o i tatou i se faiga o mea faapisinisi, lea ua iai nei i le siui o le faaumatiaga, ae o le a tatou utagiaina le fautuaga a Ieova ina ia gata ō tatou manao i meaai ma lavalava ua tatou maua, ae ia faia la tatou faiā ma le Atua o se mea e faamuamua i le olaga. (1 Timoteo 6:8-12) Na i lo le ola e peiseai o loo faalagolago atu lo tatou lumanai i le faamautuina lelei o ni ō tatou nofoaga i lenei lalolagi, ae o le a tatou talitonu i le Afioga a Ieova lea ua faapea mai, o le a mavae atu lenei lalolagi ma ōna tuinanau, ae o lē e fai le finagalo o le Atua e tumau e faavavau.—1 Ioane 2:17.
7. (a) Ua fesoasoani faapefea i a i tatou le Faataoto 16:16 ina ia iai le uiga paleni i mea e sili ona tāua? (e) O ā taui e maua mai i le avea o le faia o le finagalo o le Atua ma taulaiga i ō tatou olaga?
7 Ua faalaeiauina i tatou e le Faataoto 16:16 i le taʻua moni mai e faapea: “Ia maua le poto [le atamai lea e amata mai i le mataʻu i le Atua], e sili ona lelei lea i le auro; ia maua foi le atamai, ia sili ona manaomia lea i le ario.” O lena poto ma le atamai o le a uunaia ai i tatou ina ia avea le faia o le finagalo o le Atua ma taulaiga o ō tatou olaga. Ma o le ā le galuega ua tuuina mai e le Atua i āna Molimau i lenei vaitaimi o le talafaasolopito o le tagata? O le talaʻiina lea o lona Malo ma fesoasoani atu i ē loto faamaoni, ina ia avea ma ni soo moni o Iesu Keriso. (Mataio 24:14; 28:19, 20) O le galuega lenei e maua ai le taui o le faamalieina moni ma le fiafiaga tele. Ona o na mafuaaga lelei, ua faapea mai ai le Tusi Paia: “Amuia le tagata na te maua le poto.”—Faataoto 3:13.
Ia Leoleomalu e Teena le Faia o Mea Leaga
8. (a) Taʻu mai le aogā lona lua e maua mai i le mataʻu i le Atua. (e) O le ā le mea leaga lea e tatau ona tatou leoleomalu mai ai? (i) Ua faapefea ona avea le mataʻu i le Atua ma uunaiga malosi o gaoioiga?
8 O le aogā lona lua o le mataʻu i le Atua, o le a leoleomaluina mai ai i tatou i le faia o mea leaga. O i latou e faaaloalo moni i le Atua latou te lē faia ā latou lava filifiliga i mea ua lelei ma mea ua leaga. Latou te lē taʻuleagaina mea ua fetalai le Atua e lelei, latou te lē taʻuleleia foi mea ua fetalai le Atua e leaga. (Salamo 37:1, 27; Isaia 5:20, 21) E lē gata i lea, o se tagata ua uunaia e le mataʻu i le Atua, e lē lava i a te ia le tau ina iloa o mea o loo fetalai Ieova e lelei ma mea o loo ia fetalai e leaga. O le a alofa lea tagata i mea e alofa i ai Ieova ma ʻinoʻino foi i mea e ʻinoʻino i ai Ieova. O le iuga, e gaoioi ai o ia e ogatasi ma tapulaa a le Atua. E pei la ona taʻua i le Faataoto 16:6, “o le mataʻu foi ia Ieova, ua ʻalo ese ai tagata i le leaga.” O lena mataʻu i le Atua o le a avea ma uunaiga malosi o gaoioiga, ina ia ausia se mea atonu e lē mafai e se tagata ona faia i lona lava malosi.
9. Na faapefea i se faanaunauga malosi ina ia lē faia se mea e lē fiafia ai le Atua, ona aafia ai le filifiliga a se tasi fafine i Mekisikō, ma o le ā le iuga?
9 E tusa lava pe o faatoʻā tau amata ona tupu aʻe i se tagata lona mataʻu i le Atua, ae e mafai lava ona faamalosia ai o ia ina ia alofia le faia o se mea o le a ia toe faanoanoa mulimuli ane ai i lona olaga atoa. Mo se faaaoaoga, na fesiligia e se fafine Mekisikō sa maʻitaga, se tasi o Molimau a Ieova e faatatau i le faapaʻū tama. Na iai ni mau o le Tusi Paia na faitau atu e le Molimau i le fafine ona ia talanoa atu lea e faapea: “E tāua tele le ola i Lē na Foafoaina Mea, e oo lava foi i ola o i latou na e leʻi fananau mai.” (Esoto 21:22, 23; Salamo 139:13-16) E tusa ai ma suesuega a le falemai, na taʻu atu ai i a te ia atonu o le a lē atoatoa le soifua maloloina o lana pepe lea o le a fanau mai. Peitai, ona ua uunaia o ia e mea na ia aʻoaʻoina mai le Afioga a le Atua, na filifili ai pea le fafine ina ia faaola lana pepe. Na musu lana fomai e toe tausia o ia, ma na faamataʻu ane foi lana tane o le a na tuua o ia, peitai sa mausali pea le fafine. Ina ua oo i le taimi tonu, ona ia fanaua mai ai lea o se pepe teine—e leai ma se faaletonu, e maloloina, ma aulelei. I le faagaeeina i le loto faafetai, na ia faafesootaia atu ai Molimau, ma amata loa ona latou suesueina faatasi ma ia le Afioga a le Atua. E leʻi atoa le tausaga ae papatisoina o ia ma lana tane. I se tauaofiaga itumalo i ni tausaga mulimuli ane, sa matuā fiafia i laua ina ua la toe feiloai atu i le uluai Molimau lea na latou muai fetaui ma sa la faasino atu i ai le la tama teine aulelei ua fa ona tausaga. O le faaaloalo talafeagai mo le Atua, ma se faanaunauga malosi ina ia lē faia se mea e lē fiafia mai ai o ia, e mautinoa le iai o ni āna taaʻiga malolosi i le olaga o se tasi.
10. O ā ituaiga o gaoioiga sese ia, e mafai e le mataʻu i le Atua ona faamalosia ai tagata ina ia saoloto mai ai?
10 E faamalosia i tatou e le mataʻu i le Atua, ina ia tetee atu ai i le tele o gaoioiga sese. (2 Korinito 7:1) Pe afai e lelei ona atiina aʻe, e mafai ona fesoasoani ai i se tagata e taofia ni agasala faalilolilo, e na o ia ma Ieova o loo iloa. E fesoasoani foi i a te ia e saoloto mai ai i le faapologaina i le faaaogā sese o le ʻava malosi po o le faaaogā sese o vailaau oona. Na faamatala mai e se tagata na aafia muamua i vailaau oona i Aferika i Saute, e faapea: “A o oʻu aʻoaʻoina le poto e uiga i le Atua, na tuputupu aʻe ai foi i a te aʻu se mataʻu ina ia aua neʻi oʻu faia se mea e tiga ma lē fiafia ai o ia. Sa ou iloa o loo silasila mai o ia i a te aʻu, ma sa iai soʻu faanaunauga ina ia faitaulia aʻu i lana silafaga. Ona uunaia ai lea o aʻu e faatamaia uma vailaau oona sa i a te aʻu, i loʻu faaaluina lea i le pu o le faleese.” O le mataʻu i le Atua ua aogā i le faitauafe o tagata o loo oo iai i tulaga faapenei.—Faataoto 5:21; 15:3.
O se Puipuiga Mai le Fefe i Tagata
11. O le ā le mailei masani lea e mafai ona leoleoina mai ai i tatou pe a iai le mataʻu e atoatoa ona mamā i a Ieova?
11 O le mataʻu i le Atua e atoatoa ona mamā, e leoleoina ai i tatou mai le fefefe i tagata. O le toatele o tagata ua aafia i le fefefe i tagata i tulaga eseese. E oo lava foi i aposetolo o Iesu Keriso, na latou tuulafoaia o ia ae sosola ese ina ua puʻea o ia e fitafita i le faatoaga o Ketesemane. Mulimuli ane, i le potu faamasino i le fale o le ositaulaga sili, na lē mautonu ai, ma ona o le fefe, na faafiti ai Peteru e lē o ia o se soo o Iesu, ma na te lē iloa foi o ia. (Mareko 14:48-50, 66-72; Ioane 18:15-27) Ae na toe maua e le ʻau aposetolo le fesoasoani e toe maua ai lo latou paleni faaleagaga. I se isi tulaga, i aso o le tupu o Ioakima, na matuā fefe ai Uria le atalii o Semaia, lea na oo ai ina ia lafoaia lana auaunaga o se perofeta a Ieova, ae sola ese mai le atunuu, peitai na puʻea ai ma fasiotia.—Ieremia 26:20-23.
12. (a) O le ā le puipuiga mai le fefe i tagata lea e faasino atu i ai le Faataoto 29:25? (e) Ua faapefea ona tupu aʻe le faatuatua i le Atua?
12 O le ā e mafai ona fesoasoani i se tagata ina ia manumalo mai ai i le fefe i tagata? Ina ua uma ona lapatai mai e faapea “o le fefe i tagata e tupu ai le mailei,” ona toe taʻua lea i le Faataoto 29:25: “O lē faatuatua ia Ieova e faamamaluina o ia.” O le faatuatua i a Ieova, o le faavae autū lea. O lena faatuatua e faavae aʻe i le poto ma le poto masani. O le suesueina o lana Afioga, tatou te iloa ai faamaoniga o le tonu o ala o Ieova. Tatou te masani ai i mea tutupu o loo faaalia mai ai e mafai ona faalagolago atu i ai, o le mautinoa o āna folafolaga (e aofia ai le folafolaga i le toetu), o lona alofa ma le i a te ia o le mana uma lava. Pe a tatou gaoioi la e tusa ai o lena poto, i le faia o mea ua faatonu mai e Ieova ma ia maumauai e teena mea ua ia lapataia i tatou ina ia aua le faia, ona amata ai lea ona tatou tofo i lana tausiga alofa ma lona tomai e mafai ona tatou faalagolago atu i ai. Ua tatou vaaia totino foi le faamaoniga o le faagaoioia o lona mana ina ia faataunuuina lona finagalo. E faateleina pea lo tatou faatuatua ma le mautinoa i a te ia, ma o lena mautinoa, o le a tuputupu aʻe ai foi lo tatou alofa mo ia, ma lo tatou faanaunauga sili ina ia alofia mea e lē fiafia mai ai o ia. O lena faatuatua e fafau aʻe i se faavae e mausali. E avea o se pa pupuni malosi e teena ai le fefe i tagata.
13. E aogā faapefea i a i tatou le mataʻu i le Atua, i nofoaga o loo tatou faigaluega ai, i le aiga, ma i le aʻoga?
13 O lo tatou faatuatua i a Ieova, ua fusia faatasi ma le mataʻu i a te ia, o le a faamausaliina ai i tatou mo le faia o mea ua tonu, pe a faamatauina i tatou e se pule i le galuega e faapea o le a tuliese i tatou mai le galuega pe a tatou mumusu e auai i ni auala lē faamaoni i faiga pisinisi. (Faatusatusa i le Mika 6:11, 12.) O lena mataʻu i le Atua ua mafai ai e le faitau afe o Kerisiano ona tutumau pea i le tapuaiga moni a o fesagai ai ma teteega mai tauāiga e lē talitonu. Ua faalototeleina ai foi talavou o loo iai i aʻoaʻoga, ina ia faailoa atu i latou o ni Molimau a Ieova, ma ua faamalosia ai i latou e manumalo i faifaiga mai i ā latou aumea i vasega, o ē o loo upuvale i tapulaa a le Tusi Paia. Ona faapea mai lea o se teine Molimau talavou: “E lē afaina po o ā mafaufauga o ia talavou o le lalolagi. O le finagalo o Ieova o le mea lea e taulia.”
14. Ua mafai faapefea e auauna a Ieova ona manumalo e tusa lava pe faamatauina ō latou ola?
14 O le talitonuga maumauai foi lena ua avatu ai i Kerisiano moni le malosi e tutū mausali ai i ala o Ieova, e tusa lava pe faamatauina ai ō latou ola. Ua latou iloa e ao ona latou faatalitalia sauaga mai le lalolagi. Ua latou iloa na sasaina faamoʻamoʻa le ʻau aposetolo ma na oo lava i a Iesu Keriso sa sasaina foi ma fasiotia e tagata amio leaga. (Mareko 14:65; 15:15-39; Galuega 5:40; faatusatusa i le Tanielu 3:16-18.) Ae ua matuā mautinoa aʻiaʻi e auauna a Ieova e faapea, e mafai ona faamalosia i latou e Ieova ina ia tutumau; ona o le fesoasoani a le Atua e mafai ai ona latou manumalo; o le a mautinoa le tauia e Ieova o i latou o loo faatuatua—ma pe afai ua tatau ai, e ala i le toe faatutuina mai i le ola i lana lalolagi fou. O lo latou alofa mo le Atua ua fusia faatasi ma lo latou matatau i a te ia, ua uunaia malosi ai i latou ina ia alofia le faia o so o se mea o le a lē fiafia mai ai o ia.
15. O le ā na mafai ai e Molimau a Ieova ona tausisia lo latou faamaoni i nofoaga o falepuipui a Nasi?
15 O lenei uunaiga o le loto na mafai ai e Molimau a Ieova ona tumau mai i faiga matautia i nofoaga o falepuipui a Nasi a o faagasolo tausaga mai le 1930 e oo i le 1950. Sa uigā i a i latou le fautuaga a Iesu o loo taʻua i le Luka 12:4, 5: “A ou te fai atu ia te outou na aʻu uo, aua tou te matatau ia te i latou o e fasioti le tino; a mavae lea, ua leai se toe mea latou te mafaia. A e ou te faasino atu ia te outou i lē tou te matatau i ai; ia outou matatau ia te ia, a mavae ona fasioti e ia, e ana le pule e lafo atu i Kēna; e moni, ou te fai atu ia te outou, ia outou matatau ia te ia.” O lea na tusi mai ai mulimuli ane Gustav Auschner, o se Molimau sa faafalepuipuiina i Sachsenhausen e faapea: ‘Na fanaina August Dickmann e fitafita a le Nasi (SS), ma latou faamataʻu mai le tafanaina o le isi vaega uma o i matou, pe a matou lē sainia le pepa e faafitia ai lo matou faatuatuaga. E leai se isi o i matou na saini. Sa sili atu ona matou matatau ina neʻi lē fiafia mai Ieova i a i matou, na i lo le matatau i ā latou pulufana.’ O le fefe i tagata e ono oo atu ai i le faagutugutulua, ae o le mataʻu i le Atua e mafai ona faamausaliina ai se tasi i le faia o mea e tonu.
Le Faasaoina o le Ola
16. O le ā na mafai ai e Noa ona tausisia se ala saʻo i le faitau sefulu o tausaga seia oo atu lava i le taimi o le Lolo, ma o le ā le iuga na oo ai i a te ia ma lona auaiga?
16 Sa ola Noa seia oo atu lava i aso faaiuiu o le lalolagi lea na iai a o leʻi oo mai le lolo. Sa maumauai le finagalo o Ieova ina ia faaumatia le lalolagi o tagata amio leaga i lena vaitaimi, talu ai amioga e sili ona leaga a tagata. Peitai ane, i le taimi lea, sa iai i inā Noa i lena lalolagi lea na tumu i faiga sauā, o amioga sili ona lē mamā, ma le lē fiafia i le finagalo o le Atua. E ui lava ina talaʻi atu i ai e Noa le amiotonu, ae “na le iloa foi e i latou ina seia oo le lolo, ma aveesea i latou uma.” (Mataio 24:39) Ae sa leʻi faavaivai ai Noa mai le galuega na tuuina atu e le Atua i a te ia e fai. Na ia faia “e faapei ona poloai atu ai le Atua ia te ia i mea uma, sa faapea lava ona fai e ia.” (Kenese 6:22) O le ā na mafai ai pea e Noa ona tausisia se ala talafeagai o āna gaoioiga mai i lea tausaga i lea tausaga, seia oo atu lava i le taimi o le Lolo? Ua tali mai le Eperu 11:7, NW: “O le faatuatua na faaalia ai e Noa le mataʻu i le Atua, ina ua uma ona lapataia o ia e le Atua i mea e leʻi vaaia i ia ona po.” O le iuga, na faasaoina ai o ia ma lana avā ma ōna atalii ma ō latou taitoalua, mai le Lolo.
17. (a) E ui lava i mea o loo faia e isi tagata, ae o le ā e ao ona tatou faia? (e) Aisea ua avea ai i latou o ē o loo matatau i a Ieova, o ni tagata o loo fiafia moni?
17 O loo tatou ola i se vaitaimi e tele mea e tali tutusa ai ma tuā i aso o Noa. (Luka 17:26, 27) Ua toe alagaina atu foi le lapataiga. O loo taʻua i le Faaaliga 14:6, 7 se agelu o loo feleleai i le taulotoaiga o le lagi, o loo uunaia tagata o atunuu uma ma ituaiga ma gagana ina ia “matatau i le Atua, ma avatu ia te ia le viiga.” Po o ā lava tulaga o loo faia e le lalolagi lenei o loo e ola ai, ae ia utagia na upu, ona faasalafa atu ai lea o le valaaulia i isi. I le pei o Noa, ia gaoioi ma le faatuatua, ma ia faaalia le mataʻu i le Atua. O lou faia faapea o le a faasaoina ai lou ola ma ola o isi tagata e toatele. A o tatou manatunatu loloto i manuia ia ua olioli ai i latou o ē o loo matatau i le Atua moni, ona tatou malilie faatasi lea ma le faisalamo faagaeeina o lē na pese e faapea: “Amuia le tagata o lē mataʻu ia Ieova, o loo o fiafia tele i ana poloaiga.”—Salamo 112:1.
O le a Faapefea ona E Tali?
◻ O ā nisi aogā matilatila e maua mai le mataʻu i le Atua moni?
◻ E mafai faapefea e le atamai lea ua māfua mai i le mataʻu i le Atua, ona puipuia ai i tatou?
◻ Aisea e faapogaia ai e le mataʻu i le Atua i tatou ina ia aloese mai le leaga?
◻ Ua faapefea e le mataʻu i le Atua ona puipuia i tatou ina ia teena ai le fefe i tagata?
◻ O ā iuga o le a oo i lo tatou ola i le lumanai ona o lo tatou matatau i le Atua?
[Ata i le itulau 16]
“Amuia le tagata o lē mataʻu ia Ieova, o loo fiafia tele i ana poloaiga.”—Salamo 112:1