O Ieova, o le Atua e “Nofo Sauni e Faamagalo”

“Ieova e, o oe e lelei, ma ua e nofo sauni e faamagalo.”—SALAMO 86:5, NW.

1. O le ā le avega mamafa na tauave e le tupu o Tavita, ma na faapefea ona ia maua se faamafanafanaga mo lona loto atuatuvale?

SA ILOA e le tupu anamua o Tavita le mamafa o le avega o le iai o se loto fuatia ifo o loo nofosala. Na ia tusi mai: “Ua oo lava aʻu agasala i luga o loʻu ulu; e pei o se avega mamafa, ua mafatia ai lava aʻu. Ua ou matuā vaivai, ua ou momomo lava; ou te faataio ona o le oi o loʻu loto.” (Salamo 38:4, 8) Peitai, na maua e Tavita se faamafanafanaga mo lona loto atuatuvale. Na ia iloa e ui ina ʻinoʻino Ieova i le agasala, ae lē ʻinoʻino o ia i lē ua agasala—pe afai e salamō moni lena tagata ma teena lona ala agasala. (Salamo 32:5; 103:3) I lona faatuatua atoatoa atu i le finagalo malie o Ieova e faasalafa mai lona alofa mutimutivale i ē ua salamō, na faapea mai ai Tavita: “Ieova e, o oe e lelei, ma ua e nofo sauni e faamagalo.”—Salamo 86:5, NW.

2, 3. (a) Pe a tatou faia se agasala, o le ā le avega e iu ina tatou tauaveina, ma aisea e lelei ai lenei avega? (e) O le ā le lamatiaga o loo iai i le “tofatumoanaina” i lagona nofosala? (i) O le ā le faamautinoaga ua aumaia e le Tusi Paia ia i tatou e faatatau i le nofo sauni o Ieova e faamagalo?

² Pe a tatou faia se agasala, o le a tatou tauaveina foi la le avega mamafatū o le iai o se loto fuatia ifo ua tiga. O se mea ua masani aʻi lenei faalogona o le matuā salamō mai se mea sese, ma e iai foi sona āuga lelei. E mafai ona uunaia ai i tatou e uia ni laasaga lelei ina ia faasaʻoina ai a tatou mea sese. Peitai, o nisi Kerisiano ua lofituina i lagona nofosala. Atonu o le a maumauai pea o latou loto ia ua tausalaina i latou lava e manatu ai faapea, o le a lē faamagaloina atoatoa i latou e le Atua, e tusa lava po o le ā le tele o lo latou salamō. Na faapea mai se tasi tuafafine ina ua ia toe mānatu i se mea sese na ia faia: “O se lagona matuā leaga lava pe a oo ina e manatu faapea ailoga e toe alofa mai Ieova ia te oe.” E ui lava foi ua salamō o ia ma talia fautuaga aogā mai toeaina o le faapotopotoga, ae sa faaauau pea ona ia lagona e peiseai e lē tatau mo ia le faamagaloga a le Atua. Fai mai a ia: “O aso uma ou te augani atu ai ia Ieova mo lana faamagaloga.” Pe a oo ina “tofatumoanaina” i tatou i lagona nofosala, e ono taumafai ai Satani ia uunaia i tatou e faamaamulu, ia lagona faapea e lē talafeagai i tatou mo le auauna atu ia Ieova.—2 Korinito 2:5-7, 11.

³ Peitai e matuā lē faapena le silasila a Ieova i mataupu! Ua faamautinoa mai i tatou e lana Afioga e faapea pe afai tatou te faaalia le salamō moni mai le loto, e naunau Ieova, ioe, e nofo sauni, e faamagalo. (Faataoto 28:13) Afai la e te manatu lava oe e lē mafai ona e mauaina le faamagaloga a le Atua, atonu o le mea e manaomia o sou malamalamaga ia sili atu ona lelei i le mafuaaga ma le auala e faamagalo mai ai o ia.

Aisea e “Nofo Sauni” ai Ieova “e Faamagalo”?

4. O le ā e manatua e Ieova e faatatau ia i tatou, ma e faapefea i lenei mea ona aafia ai le auala o loo ia tausia mai ai i tatou?

⁴ Ua tatou faitau: “E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia.” Aisea ua finagalo ai Ieova e faaalia mai le alofa mutimutivale? Ua tali mai le fuaiupu o loo sosoo ai: “Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:12-14) O le mea moni lava, e lē o galo ia Ieova o i tatou sa foafoaina mai le efuefu, e iai sese, po o vaivaiga, o iuga o le lē lelei atoatoa. O le faaupuga faapea na te silafia “le mea na fai aʻi i tatou,” e faamanatu mai ai ia i tatou le faatusaina e le Tusi Paia o Ieova i sē fai ipu omea ae o i tatou o ipu o loo ia faia.a (Ieremia 18:2-6) E uumau e le fai ipu ana ipu omea, peitai e uu ma le faaeteete, i lona manatuaina pea o le mea na faia mai aʻi na ipu. E faapena foi la Ieova, le Fai Ipu Omea Sili, e faautauta o ia i ana feutagaiga ma i tatou, e tusa ai ma le maʻaleʻale o lo tatou tulaga agasala.—Faatusatusa i le 2 Korinito 4:7.

5. Ua faapefea ona faamatalaina e le tusi o Roma le saisaitiaga malosi a le agasala i o tatou tino augavale?

⁵ E malamalama Ieova i le malosi o le agasala. Ua faamatalaina e le Tusi Paia le agasala e peiseai o se uunaiga malosi ua saisaitia ai le tagata e oo atu ai i le oti. Ae o le ā tonu le malosi o le saisaitiaga a le agasala? I le tusi atu i uso i Roma, ua faamatala ai e le aposetolo faagaeeina o Paulo lenei mea i ni faaupuga malolosi faafaatusa: O i tatou o loo “i lalo o le agasala,” e pei ona iai ni fitafita i lalo o le taitaiga a lo latou taʻitaʻi (Roma 3:9, NW); ua ia “pulea” tagata e pei o se tupu (Roma 5:21, NW); o loo “nofo,” pe o loo “mau,” i totonu o i tatou (Roma 7:17, 20); o lana “tulafono” o loo galue pea i totonu o i tatou, ua iu ina taumafai e puleaina o tatou ala. (Roma 7:23, 25) Pagā se tauiviga faigata e tatau ona tatou teteeina ai le pule malosi a le agasala i o tatou tino augavale!—Roma 7:21, 24.

6. O le ā le silasila a Ieova ia i latou o ē sailia lona alofa mutimutivale faatasi ai ma se loto ua matuā mafatia mai se agasala?

⁶ O lea la, ua silafia e lo tatou Atua alofa mutimutivale e faigata ona tatou faatinoina le usiusitai atoatoa, e tusa lava po o le ā le tele o loo faanaunau o tatou loto ina ia usiusitai atu ai ia te ia. (1 Tupu 8:46) Ua ia faamautinoa mai ma le alofa ia i tatou e faapea, pe afai tatou te sailia lona alofa mutimutivale faatamā, faatasi ai ma se loto ua matuā mafatia mai se agasala, o le a faapena ona ia faasalafa mai lana faamagaloga. Na faapea mai le faisalamo o Tavita: “O taulaga i le Atua, o le loto momomo lea; le Atua e, e te le inosia le loto momomo ma le nutimomoia.” (Salamo 51:17) O le a lē tāitai ona teena e Ieova, pe talituālimaina, se loto ua momomo ma nutimomoia ona o le mamafa o le avega o faalogona nofosala. Maeu le matagofie ona faamatalaina mai ai le nofo sauni o Ieova e faamagalo!

7. Aisea e lē mafai ai ona tatou faaaogā sese le alofa mutimutivale o le Atua?

⁷ Ae, po o le uiga ea o lenei mea, e mafai ona tatou faaaogā sese le alofa mutimutivale o le Atua, i le avea o lo tatou tulaga agasala ma faamolemolega e faia ai le agasala? E matuā leai lava! E lē taitaia Ieova i na o ni lagona faapelepele. E iai tapulaa o lona alofa mutimutivale. O le a ia lē faamagaloina i latou o ē faifai pea ma le loto maaa agasala matuia, ma le loto i ai, e aunoa ma se salamō. (Eperu 10:26-31) I le isi itu, pe a silasila mai o ia i se loto ua “momomo ma le nutimomoia,” e “nofo sauni” o ia “e faamagalo.” (Faataoto 17:3) Seʻi o tatou talanoaina nisi o gagana uigā o loo faaaogā i le Tusi Paia e faamatala ai le atoatoa o le faamagaloga tauatua.

E Faapeī le Atoatoa o le Faamagalo a Ieova?

8. E tusa o le ā ua faia e Ieova pe a ia aveesea a tatou agasala, ma o le ā le aafiaga e tatau ona iai lenei mea ia i tatou?

⁸ Na faapea mai le tupu ua salamō o Tavita: “Ona ou faailoa atu ai lea ia te oe o laʻu agasala, na ou le ufitia foi laʻu amioletonu; sa ou faapea, Ou te faaali atu ia Ieova oʻu solitulafono; ona e aveesea ai lea o le leaga o laʻu agasala.” (Salamo 32:5) O le faaupuga “aveesea” ua faaliliuina ai le upu Eperu o lona uiga autū, o le “sii ese,” “tauamo, tauave.” O lona faaaogaina iinei ua faaalia ai le ‘aveesea o lagona nofosala, agasala, solitulafono.’ O lea la, sa sii i luga e Ieova agasala a Tavita, ma aveese, i se uiga faafaatusa. (Faatusatusa i le Levitiko 16:20-22.) E lē taumatea o lenei mea na faatoafilemuina ai faalogona nofosala ia sa tauaveina e Tavita. (Faatusatusa i le Salamo 32:3.) E mafai foi ona tatou faalagolago atu atoatoa i le Atua o lē na te aveesea agasala a i latou o ē saili mo lana faamagaloga e faavae i lo latou faatuatua i le taulaga togiola a Iesu Keriso. (Mataio 20:28; faatusatusa i le Isaia 53:12.) O i latou o ē ua sii i luga e Ieova a latou agasala ma aveesea, e lē manaomia ona tauamoina pea le avega mamafa o faalogona nofosala ona o agasala ua tuanai.

9. O le ā le uiga o fetalaiga a Iesu: “Ia e faamagalo ia te i matou i a matou agasala [“aitalafu,” NW]”?

⁹ Sa faaaogā e Iesu le faiā i le va o le tagata o loo nonō atu ni mea ma le tagata nofo aitalafu, e faataitaia ai le auala e faamagalo mai ai Ieova. Mo se faaaoaoga, sa faalaeiauina i tatou e Iesu ina ia tatalo: “Ia e faamagalo ia te i matou i a matou agasala [“aitalafu,” NW].” (Mataio 6:12) O lea na faatusaina ai e Iesu “agasala” i ni “aitalafu.” (Luka 11:4) Pe a tatou agasala, ua avea ai i tatou ma “tagata nofo aitalafu” ia Ieova. O le veape Eleni ua faaliliuina “faamagalo” e mafai ona uiga “ia faamamulu ese, faagalo, se aitalafu, e ala i le lē toe tāpāina.” I se uiga faapena, pe a faamagalo mai Ieova, e na te soloia se aitalafu na semanū e moliaina ai i tatou. E mafai la ona maua e tagata agasala ua salamō se faamafanafanaga. O le a lē tāitai ona tāpā mai e Ieova se totogi mo se aitalafu ua uma ona ia soloia!—Salamo 32:1, 2; faatusatusa i le Mataio 18:23-35.

10, 11. (a) O le ā le ata ua faamatala mai e le fuaitau “soloiesea,” o loo taʻua i le Galuega 3:19? (e) Ua faapefea ona faataitaia mai le atoatoa o le faamagalo a Ieova?

¹⁰ I le Galuega 3:19, ua faaaogā ai e le Tusi Paia se isi ituaiga o faaupuga e faamatala ai le faamagalo a le Atua: “O lenei, ina salamo ia ma liliu, ina ia sōloiesea a outou agasala.” O le fuaitau “sōloiesea” ua faaliliuina ai se veape Eleni lea, pe a faaaogā faafaatusa, e mafai ona uiga i le “ia soloi ese, ia matuā tapē ese, ia faaleaogaina pe ia faaumatia.” E tusa ai ma manatu o nisi tagata popoto, o le manatu lea e faamatalaina, o le tapēeseina o se tusilima. Na mafai faapefea ona faia lenei mea? O le vaitusi na taatele lona faaaogaina i taimi anamua sa faia mai i se paluga na palu faatasi ai se lama uliuli (carbon), le sua e pei se apulupulu (gum), ma le vai. E lē umi lava la, pe a uma ona tusitusi se tagata e faaaogā ai lena vaitusi, ona ia aumaia lea o se omomi susū ma tapē ese ai lena tusitusiga.

¹¹ O iina o loo iai se ata matagofie o le atoatoa o le faamagaloga a Ieova. Pe a ia faamagaloina a tatou agasala, e tai pei o loo ia aumaia se omomi ma tapē ese ai. E lē manaomia ona tatou popole faapea o le a ia toe faasalaina i tatou i le lumanai ona o na agasala, auā ua faaalia mai e le Tusi Paia se isi foi mea e faatatau i le alofa mutimutivale o Ieova lea e matuā mataina lava: Pe a ia faamagalo atu, e na te faagaloina foi!

“Ou te Le Toe Manatua a Latou Agasala”

12. Ina ua faapea mai le Tusi Paia e faagalo e Ieova a tatou agasala, po o lona uiga ea ua lē mafai ona ia toe manatua na agasala, ma aisea e te tali mai ai faapena?

¹² E ala mai i le perofeta o Ieremia, na folafola ai Ieova e faatatau ia i latou o loo i le feagaiga fou: “Ou te faamagalo i a latou amio leaga, ma ou le toe manatua a latou agasala.” (Ieremia 31:34) Po o le uiga ea o lenei mea, pe a faamagalo mai Ieova, ona lē mafai lea ona ia toe manatuaina agasala? E lē o lena le tulaga. Ua taʻu mai e le Tusi Paia ia i tatou agasala a le toatele o tagata o ē na faamagaloina e Ieova e aofia ai Tavita. (2 Samuelu 11:1-17; 12:1-13) E manino mai o loo silafia pea e Ieova agasala na latou faia, ma o le tulaga foi lena e tatau ona iai i tatou. O le tala e faatatau i a latou agasala, faapea ma lo latou salamō ma le faamagaloga a le Atua, ua faasaosaoina mai mo so tatou lelei. (Roma 15:4) O le ā la na uiga i ai le Tusi Paia ina ua faapea mai, e lē “manatua” e Ieova agasala a i latou o ē ua ia faamagaloina?

13. (a) O le ā ua aofia ai i le uiga o le veape Eperu ua taʻua ‘ou te manatua’? (e) Pe a fetalai Ieova, Ou te “le toe manatua a latou agasala,” o le ā o loo ia faamautinoaina mai ia i tatou?

¹³ O le veape Eperu ua taʻua ‘ou te manatua’ e tele nisi mea e faauiga atu i ai nai lo le tau ina manatua mea ua tuanai. E tusa ai ma le tusi Theological Wordbook of the Old Testament, e aofia ai “le faatatauga faaopoopo o le faia o se gaoioiga talafeagai.” I lenei la tulaga, ina ia “manatua” se agasala e aofia ai le faia o se gaoioiga e faasaga i ē ua agasala. Ina ua faapea mai le perofeta o Hosea e faatatau i tagata Isaraelu faalogogata, “E manatua e ia [Ieova] a latou agasala,” sa uiga le manatu o le perofeta faapea, o le a gaoioi Ieova e faasaga ia i latou ona o lo latou lē salamō. O lea, ua faapea mai le vaega o totoe o le fuaiupu: “E taui atu [o ia] i a latou amio leaga.” (Hosea 9:9) Ae i le isi itu, pe a fetalai Ieova, “Ou te le toe manatua a latou agasala,” o lona uiga o loo ia faamautinoaina mai ia i tatou e faapea, o le taimi lava na te faamagaloina ai se tagata agasala ua salamō, o le a lē toe gaoioi foi o ia i se taimi i le lumanai faasaga i lena tagata ona o na agasala. (Esekielu 18:21, 22) E faagalo e ia i le uiga faapea, e na te lē faamanatu maia pea lava pea a tatou agasala ina ia faaauau pea ona tuuaia ai pe faasalaina ai i tatou. O lea la ua faataatia ai e Ieova se faaaoaoga sili ona mataina mo i tatou ina ia faataitai i ai i a tatou feutagaiga ma isi. Pe a tutupu aʻe ni feeseeseaiga, e sili ona lelei pe a lē manatuaina pea ni mea sese sa faia i le taimi ua teʻa, lea na e malie e faamagalo.

Ae Faapefea Āuga o a Tatou Agasala?

14. Aisea e lē uiga ai le faamagalo faapea o le tagata na agasala ae ua salamō, ua matuā sao lava mai āuga uma o lona ala sese?

¹⁴ Po o le nofo sauni ea o Ieova e faamagalo e uiga faapea o le tagata na agasala ae ua salamō, ua matuā sao lava mai āuga uma o lona ala sese? E leai. E lē mafai ona tatou agasala ae aunoa ma ni āuga lē lelei. Na tusi mai Paulo: “O le mea e luluina e le tagata, o le mea lava lea e seleseleina mai ai e ia.” (Kalatia 6:7) Atonu tatou te fesagai ma ni āuga o a tatou gaoioiga po o faafitauli, peitai ina ua uma ona faasalafa mai e Ieova lana faamagaloga, e na te lē faapogaia la ni mala matautia e oo mai ia i tatou. Pe a tutupu aʻe faalavelave, e lē tatau ona iai i se Kerisiano se lagona, ‘Atonu o loo faasalaina aʻu e Ieova ona o aʻu agasala ua teʻa.’ (Faatusatusa i le Iakopo 1:13.) I le isi itu, e lē faasaoina e Ieova i tatou mai le oo mai o aafiaga uma o a tatou gaoioiga sese. O se talagā faaipoipoga, se maʻito sa lei manaomia, se faamaʻi ua pipisi mai i feusuaiga lē mamā, le lē toe iai o se faatuatuaina po o se faaaloalogia o i tatou—o na mea uma atonu o āuga faanoanoa na o le agasala, ma o le a lē taofia e Ieova le oo mai o na mea ia i tatou. Seʻi manatua, e ui lava na ia faamagaloina Tavita mai ana agasala i le feagai ai ma Patesepa ma Uria, ae sa lei puipuia e Ieova Tavita mai āuga matautia na sosoo ane ai.—2 Samuelu 12:9-14.

15, 16. Na faapefea i le tulafono o loo faamauina i le Levitiko 6:1-7 ona manuia ai le tagata na afaina fua, ma le tagata foi na agasala?

¹⁵ Atonu e iai foi nisi āuga o a tatou agasala. Mo se faaaoaoga, seʻi manatu i le tala o loo i le Levitiko mataupu e 6. O iinei o loo taulai atu ai le Tulafono Faa-Mose i le tulaga ua faia ai e se tagata se sese matuia e ala i le ave faamalosi o oloa a sona uso Isaraelu e ala i se faiga faagaoi, taufaavalea, pe taufaasese. Ona faafiti lea o lē agasala faapea e lē o sala o ia, ua oo lava ina matuā tauto e sese le tuuaʻiga. O le tulaga lenei ua tuuaʻia ai e le tasi le isi e aunoa ma se faamaoniga mai itu uma e lua. Peitai, e mulimuli ane, ona matuā afaina ai lea o le loto fuatia ifo o lē na faia le mea sese ma tautino ai lana agasala. Ina ia maua le faamagaloga a le Atua, e tolu isi mea e tatau ona ia faia: toe faafoi le mea na ia avea, totogi atu se sala e 20 pasene i le tagata na afaina, ma ofoina se mamoe poʻa e fai ma taulaga o le agasala. Ona faapea mai lea o le tulafono: “E faia foi e le faitaulaga se togiola mo ia i luma o Ieova, ona faamagaloina ai lea o ia.”—Levitiko 6:1-7; faatusatusa i le Mataio 5:23, 24.

¹⁶ O lenei tulafono sa avea o se sauniuniga alofa mutimutivale mai le Atua. Na manuia ai le tagata na afaina fua, o lē na toe faafoi ane i ai ana meatotino ma e mautinoa foi na ia matuā toe lagona se mapusaga ina ua iu ina faaalia e lē na faia le mea sese lana agasala. I le taimi lava e tasi, sa aogā foi le tulafono mo lē na iu ina uunaia o ia e lona loto fuatia ifo e tautino lana agasala ma faasaʻoina ai lona sese. O le mea moni, pe ana fai e na te teena le faia faapea, semanū e lē faamagaloina o ia e le Atua.

17. Pe afai ua tiga isi ona o a tatou agasala, o le ā ua faatalitalia i tatou e Ieova ina ia fai?

¹⁷ E ui tatou te lē o toe tausia le Tulafono Faa-Mose, ae ua aumaia ai ia i tatou se malamalamaga tāua e tusa ai o le finagalo o Ieova, e aofia ai lana silafaga i le faamagalo. (Kolose 2:13, 14) Pe afai ua tiga pe afaina fua isi ona o a tatou agasala, e fiafia le finagalo o Ieova pe a tatou faia le mea tatou te mafai ina ia ‘faasaʻo ai le sese.’ (2 Korinito 7:11) E aofia ai i lenei mea le faailoaina o a tatou agasala, le tautino o lo tatou nofosala, e oo lava i le faatoese atu i lē ua afaina fua. Ona mafai lea ona tatou augani atu ia Ieova e ala i le taulaga a Iesu ma tofo ai i le mapusaga o le iai o se loto fuatia ifo mamā ma le faamautinoaga e faapea ua faamagaloina i tatou e le Atua.—Eperu 10:21, 22.

18. O le ā le aoaiga e ono aumai faatasi ma le faamagaloga a Ieova?

¹⁸ E faapei o se matua alofa, atonu e aumai e Ieova le faamagaloga, faatasi ai ma se aoaiga. (Faataoto 3:11, 12) Atonu e tatau ai ona aveesea mai i se Kerisiano ua salamō sona faaeaga sa auauna ai o se toeaina, se auauna o le faiva, po o se paeonia. Atonu e tiga le lē toe iai ia te ia o ona faaeaga sa ia faapelepele i ai. Peitai, o lena aoaiga, e lē faapea ua lē toe finagalo malie mai ai Ieova ia te ia, pe faapea ua lē faamagaloina o ia e Ieova. E lē gata i lea, e tatau ona tatou manatua o aoaiga mai ia Ieova o se faamaoniga lena o lona alofa mo i tatou. O le taliaina ma le faaaogaina o aoaiga e sili ona lelei mo i tatou ma e mafai ona taitaia atu ai i le ola e faavavau.—Eperu 12:5-11.

19, 20. (a) Pe afai ua e faia se sese, aisea e lē tatau ai ona e lagona faapea ua matuā mamao ese lava oe mai le mauaina o le alofa mutimutivale o Ieova? (e) O le ā le manatu o le a talanoaina i le mataupu o loo sosoo mai?

¹⁹ Maeu le faalaeiauina o le iloa o loo tatou auauna atu i se Atua o lē e “nofo sauni e faamagalo”! E sili atu ona tele isi mea o loo silasila mai i ai Ieova nai lo o a tatou agasala ma sese. (Salamo 130:3, 4) Na te silafia mea o loo i o tatou loto. Afai e te lagona o loo momomo ma nutimomoia lou loto ona o ni ou sese ua teʻa, aua e te manatu faapea ua matuā mamao ese lava oe mai le mauaina o le alofa mutimutivale o Ieova. E ui lava i ni sese atonu ua e faia, ae afai e te salamō moni, ua e uia laasaga e toe faasaʻo ai le sese, ma ua e tatalo faatauanau atu mo le faamagaloga a Ieova e ala i le toto masaa o Iesu, e mafai ona e mautinoa atoatoa e faatatauina ia te oe upu i le 1 Ioane 1:9 e faapea: “A e afai tatou te taʻu atu a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.”

²⁰ Ua faalaeiauina i tatou e le Tusi Paia ina ia faataitai atu i le faamagalo a Ieova e tusa ai ma a tatou feutagaiga o le tasi i le isi. Peitai, o le ā le mamao e mafai ona faatalitalia i tatou e faamagalo ma faagalo ai pe a sese mai isi ia i tatou? O le a talanoaina lena manatu i le mataupu o loo sosoo mai.

[Faaopoopoga i lalo]

E Faapefea Ona E Tali?

◻ Aisea e “nofo sauni” ai Ieova “e faamagalo”?

◻ Ua faapefea ona faamatala mai e le Tusi Paia le atoatoa o le faamagalo a Ieova?

◻ Pe a faamagaloina atu e Ieova, o le ā e uiga i ai le faaupuga na te faagalo?

◻ O le ā e faatalitalia e Ieova i tatou e fai pe afai ua tiga isi ona o a tatou agasala?

[Ata i le itulau 12]

Pe a tiga isi ona o a tatou agasala, ua faatalitalia i tatou e Ieova ia faia se mea e toe faaleleia ai