E Sili Atu le Faamagalo a Ieova Nai lo se Isi

1. I le Failauga 7:20, o le ā le upu moni na faailoa mai e le tupu o Solomona?

NA TUSI le tupu o Solomona: “E leai se tagata e amiotonu i le lalolagi e na te faia pea le mea lelei ma e lē agasala.” (Fai. 7:20) Maʻeu le moni o lenā manatu! E tatou te agasala uma. (1 Ioa. 1:8) O lea, e tatou te manaʻomia uma ai le faamagaloga a le Atua ma isi.

2. O ā ou faalogona pe a faamagalo atoatoa oe e sau uō mamae?

² E lē taumatea na iai se taimi na e faia ai se mea na lē fiafia ai sau uō mamae iā te oe, ma na e manaʻo e faalelei le lua faiā ma faatoese i lau uō. O ā ou faalogona ina ua faamagalo atoatoa oe e lau uō? Ioe, na toe lelei ou faalogona ma lagona ai le fiafia!

3. O le ā o le a tatou talanoaina i lenei mataupu?

³ E tatou te mananaʻo e avea Ieova ma a tatou Uō vavalalata, ae o nisi taimi e tatou te tautatala ai ma faia mea e lē fiafia ai Ieova. Aiseā e tatou te mautinoa ai e naunau Ieova e faamagalo i tatou? O ā auala e sili ai le faamagalo a Ieova nai lo i tatou? O ai e faamagalo e Ieova?

E NOFOSAUNI IEOVA E FAAMAGALO

4. Aiseā e tatou te mautinoa ai e nofosauni Ieova e faamagalo i tatou?

⁴ O loo faamautinoa mai i le Afioga a le Atua e nofosauni Ieova e faamagalo i tatou. Ina ua faamatala atu e Ieova iā Mose i le Mauga o Sinai le ituaiga Atua e iai o ia, na fetalai atu Ieova e ala i se agelu: “O Ieova, o Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni, e tausia le alofa faamaoni e oo atu i afe o tupulaga, e faamagalo mea sesē, o solitulafono ma agasala.” (Eso. 34:6, 7) O Ieova o se Atua agalelei ma alofa mutimutivale, ma e nofosauni e faamagalo tagata agasala ua salamō.​—Nee. 9:17; Sala. 86:15.

5. E tusa ai ma le Salamo 103:13, 14, o le ā ua uunaʻia Ieova e fai ona e na te silafia lelei tagata?

⁵ E silafia e Ieova mea uma e faatatau iā i tatou, ona na ia Foafoaina i tatou. E na te silafia mea uma e faatatau i so o se tagata i lenei lalolagi. (Sala. 139:15-17) E na te silafia o tatou tulaga lē lelei atoatoa na tuufaasolo mai i o tatou mātua. E na te silafia foʻi mea na tutupu i o tatou olaga ua aafia ai o tatou uiga ma amioga. O le ā ua uunaʻia Ieova e fai ona e na te silafia lelei i tatou? Ua uunaʻia o ia e faaalia le alofa mutimutivale iā i tatou.​—Sala. 78:39; faitau le Salamo 103:13, 14.

6. Na faapefea ona faamaonia e Ieova e naunau e faamagalo i tatou?

⁶ Ua faamaonia mai e Ieova e naunau o ia e faamagalo i tatou. E malamalama Ieova o le agasala a le uluaʻi tagata o Atamu, ua tatou mafatia ai i āuga o le agasala ma le oti. (Roma 5:12) E leʻi iai se auala na mafai ai ona tatou faasaʻolotoina i tatou lava, po o se isi mai i lenā mala. (Sala. 49:7-9) Peitaʻi, ua faaalia e lo tatou Atua alofa le tigā alofa, ma faia se fuafuaga e faasaʻoloto i tatou mai i le agasala ma le oti. O le ā na ia faia? Ua faamatala mai e le Ioane 3:16, na auina mai e Ieova lona atalii pele e toʻatasi ina ia maliu mo a tatou agasala. (Mata. 20:28; Roma 5:19) Na maliu Iesu e sui aʻi i tatou, ma pagatia i le faasalaga oti ina ia faasaʻoloto ai so o se tasi e faatuatua iā te ia. (Epe. 2:9) Pagā le ootia o faalogona o Ieova i le silasila atu i le maliu tigā ma le faalumaina o lona Alo pele e toʻatasi! E mautinoa e lē mafai ona faatagaina e Ieova lona Alo e maliu, pe ana lē finagalo o ia e faamagalo i tatou.

7. O ā nisi faaaʻoaʻoga o loo i le Tusi Paia o i latou na faamagalo atoatoa e Ieova?

⁷ E tele faaaʻoaʻoga o loo i le Tusi Paia o i latou na faamagalo e Ieova. (Efe. 4:32) O e manatuaina se tasi o i latou? Atonu o loo e mafaufau i le tupu o Manase. E matuiā agasala a lenā tagata amioleaga iā Ieova. Na ia faaauilumaina tapuaʻiga sesē. Na ia fasiotia foʻi lana fanau ma ofo atu o ni taulaga i atua faapaupau. Na ia faia foʻi se faatusa o se atua sesē ma tuu i le malumalu paia o Ieova. Ua faapea mai le Tusi Paia e faatatau iā Manase: “E matuā tele lava mea leaga na ia faia i le silafaga a Ieova e faatigā ai iā te ia.” (2 No. 33:2-7) Peitaʻi, ina ua faaalia e Manase le salamō mai le loto, na faamagaloina atoatoa o ia e Ieova. Na toe faafoʻisia o ia e le Atua i lona tulaga o se tupu. (2 No. 33:12, 13) Atonu o loo e mafaufau foʻi i le tupu o Tavita, o lē na faia agasala matuiā iā Ieova e aofia ai le mulilua ma le fasioti tagata. Ae ina ua faaalia e Tavita le salamō moni ma taʻutino ana agasala, na faamagalo foʻi o ia e Ieova. (2 Samu. 12:9, 10, 13, 14) Ioe, e tatou te mautinoa e naunau Ieova e faamagalo i tatou. O le a tatou aʻoaʻoina e matuā sili atu le lotofaamagalo o Ieova nai lo tagata.

O LE LOTOFAAMAGALO O SE TASI O UIGA SILISILI O IEOVA

8. E faapefea i le avea o Ieova ma Faamasino silisili ona uunaʻia ai o ia e faamagalo?

⁸ O Ieova o le “Faamasino o le lalolagi uma.” (Kene. 18:25) O se faamasino lelei e manaʻomia ona iloa lelei le tulafono. E matuā moni lenā manatu e faatatau iā Ieova, e lē gata o ia o lo tatou Faamasino ae o ia foʻi o lo tatou Faitulafono. (Isa. 33:22) Ua na o Ieova lava e na te silafia lelei le mea saʻo ma le mea sesē. O le ā se isi mea e manaʻomia e se faamasino lelei? E tatau ona iā te ia le tomai e iloilo ai mea moni uma e faatatau i se faamasinoga, a o leʻi faia lana faaiʻuga. O lea la, o Ieova o le Faamasino silisili ona e na te silafia mea moni i taimi uma.

9. O ā mea e silafia e Ieova pe a filifili o ia pe e faamagalo se tasi?

⁹ E malamalama atoatoa Ieova i mea moni uma i faamasinoga e na te faia, e lē pei o faamasino a tagata. (Kene. 18:20, 21; Sala. 90:8) E silasila ma faafofoga Ieova i mea uma e lē mafai ona iloa ma faalogo ai tagata. E malamalama atoatoa o ia i le māfuaaga e taaʻina ai gaoioiga a se tagata i uiga ma amioga na tuufaasolo mai i ona mātua, tulaga tauaʻoaʻoga, le siʻomaga na ola aʻe ai, ma tulaga tau faalogona ma le mafaufau. E silafia foʻi e Ieova o tatou loto. E malamalama lelei o ia i uunaʻiga, manatunatuga ma faanaunauga o tagata taʻitoʻatasi. E leai se mea e lilo i le silafaga a Ieova. (Epe. 4:13) O lea la, e faavae i taimi uma le faamagalo a Ieova i lona silafia atoatoa o le tulaga o mea.

10. Aiseā e tatou te faapea atu ai e tonu ma saʻo le faamasinoga a Ieova? (Teuteronome 32:4)

¹⁰ E tonu ma saʻo faamasinoga a Ieova i taimi uma. E lē faailoga tagata Ieova. E lē faalagolago le faamagalo a Ieova i foliga o se tagata, tamaoaiga, tulaga taualoa po o ona tomai. (1 Samu. 16:7; Iako. 2:1-4) E leai se isi e mafai ona faamalosia pe faapiʻopiʻoina le faamasinoga a Ieova. (2 No. 19:7) E lē mafai ona faavae ni faaiʻuga a Ieova i faalogona lē fiafia po o faalogona ootia. (Eso. 34:7) E tatou te mautinoa o le malamalama lelei o Ieova i mea uma e uiga iā i tatou ma o tatou tulaga, ua avea ai o ia ma Faamasino e sili ona agavaa.​—Faitau le Teuteronome 32:4.

11. Aiseā e tutasi ai le faamagaloga a Ieova?

¹¹ Na iloa e tusitala o Tusitusiga Eperu, le tutasi o le lotofaamagalo o Ieova. I nisi taimi, na latou faaaogāina se upu Eperu na faamatalaina e se tasi o tusitusiga e faapea, “o lenā upu e faatoʻā faaaogā e faamatala ai le auala e faamagalo ai e le Atua se tagata agasala, ma e lē mafai ona faaaogā e faamatala ai le auala faatapulaa e faamagalo ai e le tasi tagata le isi.” E na o Ieova e iai le aiā e faamagalo ai se tagata faimea sesē ua salamō. O le ā le iʻuga pe a faamagalo i tatou e Ieova?

12-13. (a) O le ā e mafai ona olioli ai se tagata pe a faamagalo e Ieova? (e) O le ā le umi e aogā ai iā i tatou le faamagaloga a Ieova?

¹² Pe a tatou taliaina le faamagaloga a Ieova, e tatou te olioli ai i “taimi e toe faafouina ai,” maua ai le filemu o le mafaufau ma iai se lotofuatiaifo mamā. O lenā ituaiga faamagaloga e “mai iā Ieova lava ia,” ma e lē mafai ona maua mai i faamagaloga a tagata. (Galu. 3:19) Pe a faamagaloina i tatou e Ieova, e na te toe faaleleia atoatoa la tatou faiā ma ia e pei lava e tatou te leʻi agasala.

¹³ Pe a faamagalo i tatou e Ieova, e na te lē toe tuuaʻia pe faasalaina i tatou ona o lenā agasala. (Isa. 43:25; Iere. 31:34) “E pei ona vavamamao o le mea e oso aʻe ai le lā mai i le mea e goto ifo ai,”b e faapena le auala e faamagalo ai e Ieova a tatou agasala. (Sala. 103:12) E tatou te matuā maofa pe a mafaufau i le tele o le faamagaloga a Ieova, ma e faatumuina ai foʻi i tatou i le lotofaafetai. (Sala. 130:4) Ae o ai e mauaina le faamagaloga a Ieova?

O AI E FAAMAGALO E IEOVA?

14. O le ā ua tatou aʻoaʻoina e faatatau i le faamagalo a Ieova?

¹⁴ Ua tatou aʻoaʻoina, e lē fuaina le faamagalo a Ieova i le laʻitiiti po o le telē o le agasala. Ua tatou aʻoaʻoina foʻi e faaaogā e Ieova lona poto o Lē na Foafoaina i tatou, o le Faitulafono ma o le Faamasino pe a filifili e faamagalo i tatou. O ā vala e iloilo e Ieova?

15. E tusa ai ma le Luka 12:47, 48, o le ā le isi vala e iloilo e Ieova?

¹⁵ O se tasi o vala e iloilo e Ieova, pe na iloa e le tagata agasala e sesē le mea na ia faia. Na faamatala manino mai e Iesu lenā manatu i le Luka 12:47, 48. (Faitau.) O se tagata e fuafua ma le loto i ai e faia se mea leaga ma e na te iloa lelei o le faia o lenā mea e faatigā ai iā Ieova, ma o se agasala matuiā. E ono lē faamagaloina e Ieova lenā tagata. (Mare. 3:29; Ioa. 9:41) Peitaʻi, o nisi taimi e tatou te iloa e sesē le mea na tatou faia. I lenā tulaga, pe e mafai ona faamagaloina i tatou? Ioe! O le a tatou talanoaina la le isi vala e iloilo e Ieova.

16. O le ā le salamō, ma aiseā e tāua ai pe a tatou mananaʻo e faamagalo i tatou e Ieova?

¹⁶ O le isi vala e iloilo e Ieova po ua salamō moni le tagata agasala. O le ā e uiga i ai le salamō? O le salamō e uiga atu i le “suia o le mafaufau, o uiga ma le mea e te manaʻo e fai.” E aofia ai le matuā faanoanoa o lenā tagata ona o mea sesē na ia faia, po o le lē faia o le mea saʻo na tatau ona ia faia. E lē gata e matuā faanoanoa se tagata ua salamō ona o mea sesē na ia faia, ae o lona tulaga lē lelei faaleagaga na māfua ai ona ia faia lenā mea sesē. Manatua, na faia e le tupu o Manase ma Tavita agasala matuiā, ae na faamagaloina i laʻua e Ieova ona na la faaalia le salamō moni. (1 Tu. 14:8) Ioe, e tatau ona silafia e Ieova faamaoniga o lo tatou salamō ina ia faamagaloina ai i tatou. Ae pe e lava lo tatou faaalia o faalogona salamō ona o se ala agasala na tatou uia, po o se agasala na tatou faia? E tatau ona tatou nofosauni e fai ni gaoioiga.c Seʻi o tatou talanoaina se isi vala e iloilo e Ieova.

17. O le ā e uiga i ai le liliu, ma aiseā e matuā tāua ai pe a tatou mananaʻo e ʻalofia le toe faia o se mea sesē? (Isaia 55:7)

¹⁷ O le isi vala tāua e iloilo e Ieova po ua liliu le tagata agasala. I nisi faaupuga, o le “liliu” e uiga atu i le suia o le ala e uia e lenā tagata, ia tuua lona ala leaga ae tausisi i le ala o Ieova. (Faitau le Isaia 55:7.) E tatau ona suia le mafaufau o lenā tagata ina ia taʻitaʻia ai o ia e manatu o Ieova. (Roma 12:2; Efe. 4:23) E tatau ona maumauaʻi e lafoaʻi ona mafaufauga ma gaoioiga leaga na iai muamua. (Kolo. 3:7-10) O lo tatou faatuatua i le taulaga togiola a Keriso, o le faavae moni lenā o le faamagaloina ma le faamamāina e Ieova o a tatou agasala. E faasafua mai e Ieova aogā o lenā taulaga togiola iā i tatou, pe a silasila mai o loo fai a tatou taumafaiga faamaoni ina ia suia a tatou amioga.​—1 Ioa. 1:7.

IA MAUFAATUATUAINA LE FAAMAGALOGA A IEOVA

18. O le ā ua tatou talanoaina e faatatau i le lotofaamagalo o Ieova?

¹⁸ Seʻi o tatou iloiloina puupuu nisi o manatu tāua na tatou talanoaina. E silisili le lotofaamagalo o Ieova i le vateatea. Aiseā? Muamua, e nofosauni o ia e faamagalo i tatou. Lua, e na te silafia lelei i tatou. E silafia lelei e Ieova le ituaiga tagata e iai i tatou, ma e leai se isi e sili atu ona iloa pe ua salamō moni se tagata nai lo o Ieova. Tolu, pe a faamagalo i tatou e Ieova e na te faamagaloina atoatoa e pei lava e tatou te leʻi faia se agasala. O le faia faapea, e tatou te maua ai se lotofuatiaifo mamā ma lona finagalo malie.

19. Aiseā e tatou te olioli ai e ui e tatou te lē lelei atoatoa ma agasala pea?

¹⁹ O le mea moni, e tatou te agasala pea ona e tatou te lē lelei atoatoa. Peitaʻi, e mafai ona faamāfanafanaina i tatou i upu o loo i le Insight on the Scriptures, Tusi 2, itulau 771 o loo faapea mai: “Talu ai e alofa mutimutivale Ieova ma e na te silafia vaivaiga o ana auauna, e lē tatau la ona iā i latou faalogona faanoanoa i taimi uma ona o mea sesē e latou te faia e māfua i le lē lelei atoatoa. (Sala. 103:8-14; 130:3) E mafai ona latou maua le olioli pe afai e latou te faia le mea sili e ola ai i ala o le Atua. (Fili. 4:4-6; 1Ioa 3:19-22).” Maʻeu le faalaeiau o lenā manatu!

20. O le ā o le a tatou talanoaina i le suʻesuʻega o le a sosoo mai?

²⁰ Maʻeu lo tatou lotofaafetai ona e nofosauni Ieova e faamagalo i tatou, pe a tatou faaalia le salamō moni mai i agasala na tatou faia. Ae e faapefea ona tatou faaaʻoaʻo i le lotofaamagalo o Ieova? O ā auala e tutusa ai lo tatou lotofaamagalo ma le lotofaamagalo o Ieova, ma o ā auala e eseese ai? Aiseā e tāua ai le malamalama i lenā eseesega? O le a taliina na fesili i le suʻesuʻega o le a sosoo mai.