Ia Talitonu i le Moni o le Faamagaloga a Ieova

1-2. O le ā e faia e Ieova pe a tatou salamō moni mai i a tatou agasala, ma o ā o tatou faalogona pe a ia faia faapea? (Tagaʻi foʻi i le ata.)

INA ua faia e le tupu o Tavita ni agasala matuiā, na oo iā te ia faalogona o le matuā nofosala. (Sala. 40:12; 51:3; ulutala) Peitaʻi, na ia faaalia le salamō moni ma ia tofo ai i le faamagaloga a Ieova. (2 Samu. 12:13) O le iʻuga, na toe lagona ai e Tavita le fiafia, ona e pei ua matuu ese atu se avega mamafa na lofitūina ai o ia.—Sala. 32:1.

² I le pei o Tavita, e mafai foʻi ona tatou lagona le fiafia pe a tofo i aogā o le faamagaloga a Ieova. O se faamāfanafanaga le iloa, e tusa pe e matuiā a tatou agasala, ae e nofosauni Ieova e faamagalo pe afai e tatou te salamō moni, taʻutino a tatou mea sesē, ma taumafai malosi e lē toe faia. (Faata. 28:13; Galu. 26:20; 1 Ioa. 1:9) Pe a faamagaloina la i tatou e Ieova, e na te lē toe lāgā pe toe taʻua sa tatou mea sesē na fai.—Eseki. 33:16.

3-4. O ā faalogona o se tasi o tuafafine ina ua papatiso, ma o le ā o le a tatou talanoaina i lenei suʻesuʻega?

³ Peitaʻi, e faigatā i nisi ona talitonu e faamagaloina moni i latou e Ieova. O se faataʻitaʻiga, o se tuafafine e igoa iā Jennifer. Na ola o ia i se olaga uigalua e ui na tausia aʻe i le upu moni. Mulimuli ane, na toe foʻi mai o ia iā Ieova ma papatisoina. Na faapea mai o ia: “Sa ou ola i se olaga matapeʻapeʻa, inu tele i le ʻava malosi, faia amioga lē mamā taufeusuaʻiga, ma o se tagata ita leaga. E ui na ou iloa e faamagaloina aʻu e Ieova e ala i le togiola a Iesu, ae na matuā faigatā ona ou talitonu e mafai moni ona ia faamagaloina aʻu.”

⁴ Ae e faapefea oe? Pe e iai ni taimi e faigatā ai ona e talitonu ua faamagaloina moni oe e Ieova, ona o se mea sesē na e faia? E finagalo Ieova ina ia e tofo i aogā o lana faamagaloga, ma maua ai le fiafia e pei foʻi o Tavita. I lenei suʻesuʻega, o le a talanoaina ai (1) māfuaaga e tatou te talitonu ai i le moni o le faamagaloga a Ieova, ma le (2) o vala e fesoasoani iā i tatou e talitonu ai i lana faamagaloga.

AISEĀ E AO AI ONA TATOU TALITONU I LE MONI O LE FAAMAGALOGA A IEOVA?

5. O le ā o loo taumafai Satani e faatalitonu ai i tatou? Aumai se faataʻitaʻiga.

⁵ O lo tatou talitonu e mafai e Ieova ona faamagaloina moni i tatou, o le a fesoasoani e tatou te teena ai se tasi o mailei a Satani. O le sini o Satani ia tatou lē toe auauna iā Ieova. E na te faia faapea e ala i le taumafai e faatalitonu i tatou, e lē faamagaloina moni i tatou e Ieova. O se faataʻitaʻiga, o le mea na tupu i se tamāloa lea na aveesea mai i le faapotopotoga i Korinito, ona o le faia o se agasala matuiā. (1 Kori. 5:​1, 5, 13) Ina ua salamō le tamāloa mai i lana agasala, na manaʻo Satani i le faapotopotoga ina ia aua neʻi faamagaloina le tamāloa pe toe talia o ia. O le faia faapea, o le a ʻlofitūina ai le tamāloa i le faanoanoa tele’ ma taulau ai Satani i le faatalitonuina o ia, e lē mafai ona faamagaloina o ia e Ieova. O na faalogona e mafai ona taofia ai le tamāloa mai i le toe auauna iā Ieova. I aso nei, o loo tumau pea le sini lenā o Satani ma ana togafiti. Peitaʻi, e “tatou te lē vālea i ana togafiti.”—2 Kori. 2:​5-11.

6. O le ā e mafai ona tatou faia ina ia lē lofitūina ai i faalogona nofosala ma maua ai le fiafia?

⁶ O le talitonu e faamagaloina moni i tatou e Ieova, e lē lofitūina ai i faalogona nofosala ma maua ai le fiafia. O se mea masani lo tatou lagona o le nofosala pe a tatou faia se agasala. (Sala. 51:17) O se mea lelei, ona e tatou te aʻoaʻoina mai ai se lesona mai i se mea sesē na tatou faia. (2 Kori. 7:​10, 11) Peitaʻi, o le lofitūina i faalogona nofosala mo se taimi umi, o le a tatou faavaivai ai i le auaunaga iā Ieova. O lea, o lo tatou talitonu e faamagaloina i tatou e Ieova, o le a lē lofitūina ai i tatou i faalogona nofosala. O le a fesoasoani lenā e tatou te auauna ai pea iā Ieova ma le olioli ma se lotofuatiaifo mamā. (Kolo. 1:​10, 11; 2 Timo. 1:3) E faapefea la ona tatou faatalitonu i tatou lava i le moni o le faamagaloga a Ieova?

O Ā VALA E FESOASOANI E TATOU TE TALITONU AI I LE FAAMAGALOGA A IEOVA?

7-8. Na faapefea ona faamatala atu e Ieova iā Mose le ituaiga Atua e iai o ia, ma o le ā e ao ona tatou mautinoa pe talitonu i ai? (Esoto 34:​6, 7)

⁷ Ia manatunatu loloto i le auala o loo faamatala ai e Ieova o ia lava. O se faataʻitaʻiga, ia mātau fetalaiga a Ieova iā Mose i le mauga o Sinai.a (Faitau le Esoto 34:​6, 7.) E ui e tele uiga matagofie o Ieova na ono mafai ona ia faailoa atu iā Mose, ae na ia filifili e faamatala o ia lava o se Atua e ʻalofa mutimutivale ma tigā alofa.’ E matuā lē mafai la e se Atua e iai ni uiga faapena, ona lē faaalia le alofa ma lē faamagaloina sē ua salamō moni.

⁸ E tatou te mautinoa e lē mafai ona tala pepelo Ieova, auā o ia o le Atua faamaoni. (Sala. 31:5) O lea, e mafai ona tatou maufaatuatuaina o ia. Pe afai la o loo e aafia pea i faalogona nofosala ona o ni mea sesē na e faia i le taimi ua teʻa, ia fesili ifo: ʻPo ou te talitonu o Ieova o le Atua alofa mutimutivale ma tigā alofa, ma e na te faamagaloina so o se tasi ua salamō moni?’ Pe afai o lea, e tatau foʻi la ona e talitonu ua faamagaloina oe e Ieova.

9. O le ā e uiga atu i ai pe a faamagalo e Ieova a tatou agasala? (Salamo 32:5)

⁹ Ia manatunatu loloto i le auala o loo faamatala ai le faamagaloga a Ieova i le Tusi Paia. O se faataʻitaʻiga, na faamatalaina e le tupu o Tavita le faamagaloga a Ieova e faapea: “Ua e faamagaloina le leaga o aʻu agasala.” (Faitau le Salamo 32:5.) O le upu Eperu mo le faamagalo, e mafai ona uiga atu i le “tauave ma aveese.” Ina ua faamagalo la e Ieova Tavita, e peiseaʻī na ia tauave ma aveeseina mai iā Tavita lana agasala. O le iʻuga, na lagona ai e Tavita le fiafia ona ua matuu ese atu faalogona nofosala sa pei o se avega mamafa iā te ia. (Sala. 32:​2-4) Pe a tatou faaalia foʻi le salamō moni, o le a tauave ma aveese e Ieova mai iā i tatou a tatou agasala. O lona uiga, o le a matuu ese atu mai iā i tatou le avega mamafa o le aafia i faalogona nofosala.

10-11. O le ā ua faailoa mai iā i tatou e faatatau iā Ieova i le faaupuga “nofosauni e faamagalo?” (Salamo 86:5)

¹⁰ Faitau le Salamo 86:5. Na taʻua e le tupu o Tavita, o Ieova o sē e “nofosauni e faamagalo.” Na faapea mai se faitofā o le Tusi Paia: “O se uiga masani o Ieova le lotofaamagalo, ma e naunau o ia e faamagalo atu.” Na taʻua atili e Tavita: “E tele foʻi lou alofa faamaoni iā i latou uma e valaau atu iā te oe.” E pei ona talanoaina i le suʻesuʻega ua mavae, e faaalia e Ieova le alofa faamaoni i ē e alolofa iā te ia. O lona alofa faamaoni e uunaʻia ai o ia e faamagalo ē e salamō moni. (Isa. 55:7) Afai e faigatā ona e talitonu ua faamagaloina oe e Ieova, ia mafaufau i le manatu lenei: “Po ou te talitonu e nofosauni Ieova e faamagalo i latou uma ua faaalia le salamō moni ma ōle atu mo lona alofa mutimutivale? Pe afai o lea, e mafai foʻi la ona ou talitonu e faamagaloina aʻu e Ieova, pe a ou ʻaiʻoi atu mo lona alofa mutimutivale ma lana faamagaloga.”

¹¹ E faamāfanafanaina i tatou i le iloaina, e silafia lelei e Ieova o tatou faanaunauga e faia le mea sesē ona o lo tatou tulaga lē lelei atoatoa. (Sala. 139:​1, 2) E manino mai le manatu lenā i se isi salamo a le tupu o Tavita, lea e fesoasoani e tatou te talitonu ai, e naunau moni Ieova e faamagalo i tatou.

O LE Ā O LOO MANATUA E IEOVA E FAATATAU IĀ I TATOU?

12-13. E tusa ai ma le Salamo 103:​14, o le ā e manatua e Ieova e faatatau iā i tatou, ma o le ā e uunaʻia ai o ia e fai?

¹² Faitau le Salamo 103:14. Na taʻua e Tavita se tasi o māfuaaga e nofosauni ai Ieova e faamagalo ē ua faaalia le salamō moni. Na ia faapea mai: “Ua ia manatua o le efuefu lava i tatou.” E silafia lelei e Ieova lo tatou faanaunauga e faia le mea sesē ona o lo tatou tulaga lē lelei atoatoa. Seʻi o tatou talanoaina atili la le uiga o le faamatalaga a Tavita e faatatau iā Ieova.

¹³ Na faapea mai Tavita e faatatau iā Ieova, e “silafia lelei e ia le mea na faia ai i tatou.” Na foafoaina e Ieova Atamu “mai i le efuefu o le eleele.” O nisi taimi e faaaogā ai i se uiga faafaatusa le faaupuga “efuefu,” e faasino atu i le mea e gata ai le malosi o tagata. O se faataʻitaʻiga, e oo lava i tagata lelei atoatoa, e manaʻomia ona latou aai, momoe ma mānava. (Kene. 2:7) Peitaʻi, ina ua agasala Atamu ma Eva, ua iai ma le isi uiga o le faaupuga efuefu—o le faanaunauga e faia le mea sesē. E lē gata la e silafia e Ieova o tatou faanaunauga e faia le mea sesē, ae na taʻua foʻi e Tavita e na te “manatua.” O le upu Eperu mo le manatua, e uiga atu i le faia o se gaoioiga agalelei. Pe a toe faaupu la le faamatalaga a Tavita, e mafai ona faapea atu: E silafia lelei e Ieova e iai taimi e tatou te agasala ai. Ae pe a tatou faaalia le salamō moni, o le a ia feutagaʻi ma i tatou i se auala alofa ma agalelei, ma faamagaloina i tatou.—Sala. 78:​38, 39.

14. (a) Na faapefea ona faamatala e Tavita le mamao po o le tele e faamagalo ai i tatou e Ieova? (Salamo 103:12) (e) O le ā e tatou te aʻoaʻoina mai i le auala na faamagalo ai e Ieova le tupu o Tavita? (Tagaʻi i le pusa “Ieova—Le Atua e Faamagalo ma Faagalo.”)

¹⁴ O le ā le mamao po o le tele e faamagaloina ai i tatou e Ieova? (Faitau le Salamo 103:12.) Na taʻua e Tavita, “e pei ona vavamamao o le mea e oso aʻe ai le lā [itu i sasaʻe] mai i le mea e goto ifo ai [itu i sisifo],” e faapena le mamao e aveesea ai e Ieova a tatou agasala. O le ā se mea e taʻu mai ai iā i tatou e faatatau i le faamagaloga a Ieova? O le mea moni, e matuā vavamamao lava sasaʻe mai i sisifo ma e lē mafai ona fetaiaʻi nei itulagi. O lea, pe a aveesea e Ieova a tatou agasala, e peiseaʻī ua ia matuā faamamao ese na agasala mai iā i tatou. E lē mafai ona ia toe manatuaina, ma e lē toe iai foʻi sina mea e faamanatu atu ai iā te ia na agasala, pe e na te toe lāgā mai e faasaga iā i tatou.—Eseki. 18:​21, 22; Galu. 3:19.

15. O le ā e tatau ona tatou manatua pe a faaauau ona iai faalogona nofosala ona o se mea sesē na fai i le taimi ua teʻa?

¹⁵ E faapefea ona fesoasoani le Salamo 103 iā i tatou e talitonu ai i le faamagaloga a Ieova? Pe afai e faaauau ona tatou lagona le nofosala ona o ni mea sesē na tatou faia i le taimi ua teʻa, e tatau ona tatou mafaufau i faalogona moni o Ieova. Ia manatua, o loo silafia lelei e Ieova lo tatou tulaga agasala, ma e na te faamagaloina i latou e faaalia le salamō moni e aofia ai ma oe. E lē gata i lea, pe a faamagalo e Ieova se agasala, e na te lē toe manatuaina pe e iai foʻi sina mea e toe faamanatu atu ai iā te ia na agasala. E na te lē toe lāgāina mai foʻi e faasaga iā i tatou. Pe afai la e lē toe manatua e Ieova a tatou agasala i le taimi ua teʻa, aiseā la e tatou te manatua ai pea? (Sala. 130:3) Pe a tatou talitonu i le moni o le faamagaloga a Ieova, o le a lē lofitūina ai i tatou i faalogona nofosala, ma tatou auauna ai pea iā Ieova ma le olioli.

16. O le ā le lamatiaga o le tatou uaʻi pea i mea sesē na faia i le taimi ua teʻa? Ia faataʻitaʻi. (Tagaʻi foʻi i le ata.)

¹⁶ O le faaauau ona nofosala i ni agasala na faia i le taimi ua teʻa, e tai pei o se tagata o loo aveina se taavale, ae o loo autilo pea i tua e faaaogā ai le faata. E ui e lelei le fai ma tilotilo i le faata ina ia iloa atu ai se mea e ono lavea ai tua o le taavale, ae o le faaauau ona vaai pea i tua o le a lavea ai le taavale. E tatau i le avetaavale ona uaʻi i le auala i luma ina ia saogalemu ai. I se tulaga taitutusa, e lelei le fai ma mafaufau i se mea sesē na tatou faia i le taimi ua teʻa, ona e tatou te aʻoaʻoina mai ai ni lesona ma maumauaʻi e lē toe faia. Peitaʻi, o le uaʻi pea i na mea sesē, e mafai ona faavaivaia ai i tatou mai i le auaunaga iā Ieova. O lea, ia taulaʻi atu pea i luma i le ala e tau atu i le lalolagi fou, lea o le a tatou ʻlē toe manatua ai mea sa iai muamua’ po o mea sesē na tatou faia.—Isa. 65:17; Faata. 4:25.

O LE Ā E AO ONA FAATALITONUINA AI PEA I TATOU LAVA?

17. Aiseā e tatau ai ona faatalitonu pea i tatou lava, e alofa mai Ieova ma e nofosauni e faamagalo i tatou?

¹⁷ E tatau ona faia pea a tatou taumafaiga ina ia faatalitonu i tatou lava, e alofa mai Ieova ma e nofosauni e faamagalo i tatou. (1 Ioa. 3:​19, fpl.) Aiseā? O loo taumafai Satani e faatalitonu i tatou, e lē alofa mai Ieova ma e na te lē faamagaloina i tatou. O lona sini autū, ia aua neʻi tatou toe auauna iā Ieova. Talu ai ua puupuu le taimi o Satani, o le a matuā faateteleina la ana taumafaiga ina ia taofia i tatou mai i le faia faapea. (Faaa. 12:12) Peitaʻi, ia tatou maumauaʻi e aua neʻi faatagaina Satani e manumalo iā i tatou!

18. O ā mea e mafai ona e faia ina ia e talitonu ai pea i le alofa ma le faamagaloga a Ieova?

¹⁸ Ina ia tatou mautinoa atoatoa e alofa Ieova iā i tatou, ia toe iloilo manatu na taʻua i le suʻesuʻega ua mavae. Ina ia faatalitonu i tatou lava i le moni o le faamagaloga a Ieova, ia mafaufau i le auala o loo faamatala ai e Ieova o ia lava. Ia faaalu se taimi e manatunatu ai i faamatalaga a ē na tusia le Tusi Paia e faatatau i le faamagaloga a Ieova. Ia manatua, o loo silafia lelei e Ieova o tatou faanaunauga agasala, ma e feutagaʻi o ia ma i tatou i se auala alofa mutimutivale. Pe a faamagalo foʻi e Ieova a tatou agasala, e na te lē toe manatua pe lāgā mai e faasaga iā i tatou. O lo tatou faia o na mea, o le a tatou mautinoa ai i le alofa mutimutivale o Ieova e pei foʻi o Tavita, ma mafai ai ona tatou faapea atu: “Faafetai tele lava Ieova mo le ʻfaamagaloina o le leaga o aʻu agasala’!”—Sala. 32:5.