“Ia Fefaamagaloai Outou”

“Ia fefaapalepaleai, ma ia fefaamagaloai outou.”—KOLOSE 3:13.

1. (a) Ina ua faaali mai le manatu o Peteru faapea ia tatou faamagalo atu i isi “seia atu fitu,” aisea atonu na ia manatu ai o lea sa agalelei? (e) O le ā na uiga i ai Iesu ina ua ia fetalai faapea e tatau ona tatou faamagalo atu “ia fitugafulu ni fitu”?

“LE ALII e, e agaleaga mai faafia ea loʻu uso ia te au, ma ou faamagalo ia te ia? seia atu fitu ea?” (Mataio 18:21) Atonu na faapea Peteru sa matuā agalelei lava o ia e tusa ai ma lona manatu na faaali. I lena taimi, na taʻua i uputuu faarapi, e lē tatau i se tasi ona sili atu i le faatolu ona ia faamagaloina pea le agasala lava lea e tasi o loo fai.a Seʻi manatu la i le ofo o Peteru, ina ua tali atu Iesu: “Ou te le fai atu ia te oe, seia atu fitu, a ia fitugafulu ni fitu”! (Mataio 18:22) O le taʻua soo o le faafitu sa tutusa ma le faapea atu “e lē gata mai.” I le silafaga a Iesu, e matuā leai lava se tapulaa i le aofaiga o taimi e tatau ai i se Kerisiano ona faamagalo atu ai i isi.

2, 3. (a) O ā nisi o tulaga e foliga mai e ono faafaigata ai ona faamagalo atu i isi? (e) Aisea e mafai ai ona tatou mautinoa e mo lo tatou lelei pe a tatou faamagaloina isi?

² Peitai, e lē faigofie i taimi uma ona faatatauina lena fautuaga. O ai se tasi o i tatou e lē lagona le matuitui tiga o ni aafiaga na teʻi lava ua afaina ai? Atonu o se tasi sa e faatuatuaina ae ua ia faaalia se upu faalilo sa fai na o oulua. (Faataoto 11:13) O faamatalaga lē mafaufau a se uo vavalalata atonu ua ‘tutuʻi ai oe e pei o se pelu.’ (Faataoto 12:18) O faiga lē tonu mai se tasi sa e alofa ma faatuatuaina e ono faapogaia ai ni manuʻa ogaoga. Pe a tutupu mea faapena, o la tatou tali masani lava atonu e lagona le ita. Atonu tatou te lē toe fia tautala atu i lē na faatiga mai, ma alofia le toe fesootai atu i ai pe a mafai. E ono foliga mai, o le faamagaloina o ia, o le a lē faasalaina ai o ia e tusa o mea ua ia faatiga mai ai ia i tatou. Peitai, o le faatuputupuina pea o lagona ita, e iu i lo tatou faatiga ai ia i tatou lava.

³ O lea ua aʻoaʻo mai ai Iesu ia i tatou ina ia faamagalo—“ia fitugafulu ni fitu.” E mautinoa e lē tāitai ona faaleagaina i tatou i ana aʻoaʻoga. O mea uma na ia aʻoaʻo ai e puna mai ia Ieova, ‘o Lē o loo aʻoaʻo ia te i tatou i mea e aogā.’ (Isaia 48:17; Ioane 7:16, 17) O le mea talafeagai, e mo lo tatou lelei pe a tatou faamagaloina isi. A o tatou lei talanoaina le mafuaaga e tatau ai ona tatou faamagalo ma le auala e mafai ona tatou faia ai faapea, atonu e aogā pe a muamua ona tatou faamaninoina po o le ā e uiga i ai le faamagalo ae o le ā e lē uiga i ai. O lo tatou talitonuga i le faamagalo atonu e iai se aafiaga i lo tatou tomai e faamagalo atu ai pe a faatiga mai isi ia i tatou.

4. O le ā e lē uiga i ai le faamagaloina o isi, ae ua faapefea ona faamatalaina le faamagalo?

⁴ O le faamagaloina o isi mo ni mea ua tatou afaina totino ai e lē uiga faapea ua tatou lē āno ai pe lē manatu mamafa i mea na latou faia; e lē uiga foi i le tuu ai pea o isi e faaaogā sese lo tatou agalelei. Manatua foi, pe a faamagalo e Ieova i tatou, e mautinoa lava e lē faapea ua ia manatu māmā i le matuia o a tatou agasala, ma o le a lē tāitai ona ia faatagaina tagata agasala e tafili saunoa i lona alofa mutimutivale. (Eperu 10:29) I le Insight on the Scriptures, ua faamatalaina ai le faamagalo i “le gaoioiga o le faapalepale i lē na faatiga mai; agaʻi ina faamutaina lagona ita ia te ia ona o ana mea leaga na fai mai ma tuu ese ni mafaufauga uma sa fia taui ma sui atu ai.” (Tusi 1, itulau 861)b Ua aumaia e le Tusi Paia ia i tatou mafuaaga lelei mo le faamagaloina o isi.

Aisea e Faamagalo Atu ai i Isi?

5. O le ā se mafuaaga tāua mo le faamagalo atu i isi o loo faaalia mai i le Efeso 5:1?

⁵ O se mafuaaga tāua mo le faamagalo atu i isi o loo faaalia mai i le Efeso 5:1: “O lenei, ia faaaʻoaʻo outou i le Atua, faapei o le fanau pele.” I le ā le itu e tatau ai ona tatou ‘faaaʻoaʻo i le Atua’? O le upu “o lenei” e fesootai atu i le faaupuga o loo iai i se fuaiupu na muamua atu e faapea: “Ia outou feagaleleiai, ia femutimutivaleai lo outou alofa, ia [“matuā,” NW ] fefaamagaloai outou, faapei ona faamagaloina outou e le Atua ia Keriso.” (Efeso 4:32) Ioe, pe a oo mai i le mataupu o le faamagalo, e tatau ona tatou faaaʻoaʻo atu i le Atua. E pei ona taumafai se tamaitiiti ina ia pei o lona tamā, ua faapena foi i tatou, o fanau e alofa faapelepele i ai Ieova, e tatau ona tatou mananao ia tatou pei o lo tatou Tamā faalelagi e loto faamagalo. Maeu se fiafia atonu e iai le finagalo o Ieova i le silasila ifo mai le lagi ma silafia mai lana fanau i le lalo-lagi o loo taumafai ia faapei o ia e ala i lo latou fefaamagaloai!—Luka 6:35, 36; faatusatusa i le Mataio 5:44-48.

6. I le ā le itu e matuā telē ai lava se eseesega i le faamagalo a Ieova ma la tatou faamagalo?

⁶ E mautinoa, e lē tāitai mafai ona tatou faamagalo i se uiga atoatoa e pei ona faia e Ieova. Ae ua atili ai ona tatau ona tatou fefaamagaloai. Seʻi manatu: E matuā telē se eseesega i le faamagalo a Ieova ma la tatou faamagalo. (Isaia 55:7-9) Pe a tatou faamagaloina i latou o ē agasala mai ia i tatou, o le mea masani tatou te mafaufau faapea, i se taimi lata mai tatou te manaomia foi i latou ina ia faaali mai lena lava uiga lelei, e ala i le faamagalo mai o i tatou. I le tulaga o tagata, e masani lava o loo faamagalo e isi tagata agasala isi tagata agasala. Peitai, o Ieova, e pitotasi lana faamagalo. Na te faamagaloina i tatou, ae na te matuā lē manaomia lava ona tatou faamagaloina o ia. Afai la o Ieova, e lē agasala, ae mafai ona ia matuā faamagalo mai ma le alofa i tatou, pe lē tatau foi la ia i tatou o tagata agasala ona taumafai e fefaamagaloai?—Mataio 6:12.

7. Pe afai tatou te mumusu e faamagalo atu i isi ae o loo iai se avanoa e faaalia ai le alofa mutimutivale, e mafai faapefea ona telē sona aafiaga i la tatou lava faiā ma Ieova?

⁷ E sili atu ai ona tāua, afai tatou te mumusu e faamagalo atu i isi ae o loo iai se avanoa e faaalia ai le alofa mutimutivale, e mafai ona telē sona aafiaga i la tatou lava faiā ma le Atua. E lē na ona talosagaina i tatou e Ieova e fefaamagaloai; na te faatalitalia i tatou ia faia faapea. E tusa ai ma le Tusi Paia, o se tasi o uunaiga mo i tatou e faamagalo atu, ina ia mafai ai ona faamagalo mai e Ieova i tatou, pe ona ua ia faamagaloina i tatou. (Mataio 6:14; Mareko 11:25; Efeso 4:32; 1 Ioane 4:11) Afai tatou te lē mananao e faamagalo atu i isi ae e iai se mafuaaga tatau e faia ai faapea, pe mafai moni lava la ona tatou faatalitalia lena faamagaloga mai ia Ieova?—Mataio 18:21-35.

8. Aisea ua avea ai le faamagalo atu o se mea e sili ona lelei mo i tatou?

⁸ E aʻoaʻo e Ieova ona tagata “i le ala lelei latou te savavali ai.” (1 Tupu 8:36) Ina ua ia faatonuina i tatou e fefaamagaloai, e mafai ona tatou mautinoa e finagalo o ia mo le mea e sili ona lelei mo i tatou. O se mafuaaga lelei ua faapea mai ai le Tusi Paia ia i tatou ia “tuu atu i le toasa.” (Roma 12:19) O le tumau o lagona ita o se avega e mamafa lona tauaveina i le olaga. Pe afai tatou te teumauina pea, e faaleagaina ai o tatou mafaufauga, aveesea ai lo tatou filemu, ma mou atu ai lo tatou olioli. O le ita faaumiumi, e pei o le loto leaga, e mafai ona iai sona aafiaga leaga i lo tatou soifua maloloina. (Faataoto 14:30) Ma a o tatou lofia pea i nei tulaga, atonu e matuā lē o iloa mai lava e lē o loo tiga i ai o tatou loto! E silafia e Lē alofa na Foafoaina i tatou lo tatou manaomia moni ona faamagalo atu i isi, e lē gata mo lo latou lelei ae mo i tatou lava foi. O le fautuaga la faale-Tusi Paia ina ia faamagalo, e mautinoa lava, o ‘le ala lelei lea e savali ai.’

“Ia Fefaapalepaleai”

9, 10. (a) O ā ituaiga o tulaga e lē tau manaomia ai se faamagaloga aloaia? (e) O le ā ua fautuaina mai e le faaupuga “ia fefaapalepaleai”?

⁹ O manuʻa faaletino atonu e amata mai lava i nai lavea laiti e oo atu i ni manuʻa tugā, ma e lē tutusa uma togafitiga e manaomia mo na manuʻa. E talitutusa lena ma manuʻa tau i faalogona—o nisi manuʻa e sili atu ona loloto nai lo isi. Pe tatou te manaomia moni lava la ona faamamafa mea sese laiti uma tatou te mafatia ai i a tatou faiā ma isi? O ni mea iti tatou te tiga ai, o ni nai faalemigao, ma mea e faaita ai i tatou, o se vaega masani o le olaga ma e lē tau manaomia ai se faamagaloga aloaia. Afai e lauiloa i tatou o se tasi e teena isi mo tamai mea uma e ita ai, ma o sē e maumauai lava e tatau i ē na faatiga mai ona faatoese ona tatou faatoʻā toe fetautalatalaai ai lea, atonu la ua tatou faamalosia i latou ina ia matuā faaeteete lava pe a latou iai faatasi ma i tatou—po o le lē toe iai o se aufaatasiga vavalalata ma i latou!

¹⁰ Nai lo lea, e sili atu ona lelei le “iai o se talaaga o lē e faautauta.” (Filipi 4:5, Phillips) I le avea o ni foafoaga lē lelei atoatoa o loo galulue soosootauau, e mafai ai ona talafeagai lo tatou faatalitalia faapea, e iai taimi atonu e faia ai e o tatou uso ni mea tatou te ono tiga ai, ma tatou te ono faia foi na lava mea ia i latou. Ua fautuaina i tatou e le Kolose 3:13: “Ia fefaapalepaleai.” O lena faaupuga ua fautuaina ai le onosai i isi, ia faapalepale i mea tatou te lē fiafia ai ia i latou, po o o latou uiga masani e ono avea ma faaʻonoʻono ia i tatou. O lena onosai ma le faapalepale e mafai ona fesoasoani ia i tatou e foia ai nai mea iti tatou te ono tiga ai i a tatou feutagaiga ma isi—e aunoa ma le saveuina ai o le filemu o le faapotopotoga.—1 Korinito 16:14.

Pe a Oo Ina Loloto Manuʻa

11. Pe a agasala mai isi ia i tatou, o le ā e mafai ona fesoasoani ia i tatou ina ia faamagalo atu ia i latou?

¹¹ Peitai, e faapefea pe a agasala mai isi ia i tatou, ma e mautinoa ua faapogaia ai se manuʻa iloga? Afai e lē matuia tele le agasala, atonu e lē faigata tele la mo i tatou ona faatatauina le fautuaga a le Tusi Paia ina ia “fefaamagaloai.” (Efeso 4:32) O lena nofo sauni e faamagalo ua ogatusa ma upu faagaeeina a Peteru: “Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.” (1 Peteru 4:8) O le manatuaina pea o i tatou foi o tagata agasala e mafai ai ona tatou faapalepale i agasala a isi. O lea, pe a tatou faamagalo, ua tatou faamatuu atu ai lagona ita nai lo le taofiofia pea. O le iuga, atonu o le a lē pagatia ai la tatou faiā ma lē na faatiga mai i ni aafiaga tumau, ma ua tatou fesoasoani ai foi e faasaoina le filemu tautele o le faapotopotoga. (Roma 14:19) E oo mai le taimi atonu o le a galoma atu ai ma lē toe manatua le mea na faatiga mai ai lena tagata.

12. (a) O le ā le mea e manaomia ona tatou tausolomua e fai ina ia faamagalo atu i se tasi o lē ua ia matuā faatiga mai ia i tatou? (e) Ua faaalia mai faapefea i upu o le Efeso 4:26 faapea e tatau ona tatou vave faaleleia ni mataupu?

¹² Ae faapefea, pe afai e sili ona matuia se agasala ua fai mai e se tasi ia i tatou, ua matuā ogaoga le faamanuʻaina ai o i tatou? Mo se faaaoaoga, atonu ua faasalalau solo e sau uo sa e faatuatuaina ni mataupu e matuā patino lava ia te oe, ae na e sasaa atu ia te ia. Ua matuā tiga lava lou loto, ua e masiasi, ma ua faalataina oe. Ua e taumafai e faagalo, ae lē mafai ona galo. I lena tulaga, e manaomia ona e tausolomua e faaleleia le faafitauli, atonu i le talanoa atu i lē ua faatiga ia te oe. E atamai ona faia lenei mea a o lei leaga tele le mataupu. Na timai mai Paulo ia i tatou: “A outou ita, aua le agasala ai [lona uiga, o le ita faamoemoe po o le gaoioi e tusa ai ma lo tatou ita]; aua neʻi goto le la o ita pea outou.” (Efeso 4:26) E sili atu ona uigā upu a Paulo pe a tatou iloiloina le mea moni faapea, i tagata Iutaia, o le goto o le la sa faailogaina ai le iuga o le aso ae amata ai le isi aso fou. O lea la, o le fautuaga lenei: Ia vave ona faaleleia le mataupu!—Mataio 5:23, 24.

13. Pe a tatou talanoa atu i se tasi o lē na faatiga mai ia i tatou, o le ā e tatau ona avea ma o tatou sini, ma o ā fautuaga e mafai ona fesoasoani ia i tatou e ausia ai lena sini?

¹³ E tatau faapefea ona e talanoa atu i lē na faatiga ia te oe? Fai mai le 1 Peteru 3:11: “Ia saili i le filemu ma tausisi i ai.” O lou sini la, e lē ina ia faasasao atu lou ita ae ina ia maua se filemu ma lou uso. Ina ia taulau lena sini, e sili atu ona lelei pe a alofia upu ma taga malolosi; o mea na atonu e toe tali mai ai foi faapena le isi tagata. (Faataoto 15:18; 29:11) E lē gata i lea, alo ese mai faamatalaga soona lafo e pei o le, “O lau lava lena masani . . . !” po o, “E lē tāitai ona e . . . !” O na upu soona lafo e na ona faapogaia ai o ia e tetee mai. Nai lo lea, ia avea lou leo ma ou foliga vaaia e faaoo atu ai le feau faapea, o loo e manao e foia le mataupu lea ua e matuā tiga ai. Ia maʻoti au upu i le faamatalaina o ou lagona e faatatau i le mea na tupu. Ia tuu atu i le isi tagata le avanoa e faamatala mai ai ana gaoioiga. Ia faalogo atu i mea o loo ia fai mai ai. (Iakopo 1:19) O le ā le lelei o le faia o lena mea? Ua faamatala mai e le Faataoto 19:11: “O le māfaufau o le tagata e faagesegese ai lona ita; o lona viiga foi lea, ina ua le manatua lona agaleagaina.” O le malamalama i faalogona o le isi tagata ma mafuaaga o ana gaoioiga atonu e aveesea ai ni ou mafaufauga ma ni lagona sese e faatatau ia te ia. Pe afai tatou te faatautaia le mataupu ma le sini ina ia maua le filemu ma tausisia lena uiga, e foliga mai lava e mafai ona foia ai so o se lē femalamalamaai, e faia ai ni faatoesega talafeagai, ma faaali atu ai le faamagalo.

14. Pe a tatou faamagalo atu i isi, o le ā e uiga i ai le tatau ona tatou faagalo?

¹⁴ Po o le faamagalo atu ea o isi, e uiga ai faapea e tatau ona tatou faagalo moni lava le mea na tupu? Seʻi manatua le faaaoaoga a Ieova i lenei itu, e pei ona talanoaina i le mataupu na seʻi mavae atu. Ina ua faapea mai le Tusi Paia e faagalo e Ieova a tatou agasala, e lei uiga faapea ua lē mafai ona ia toe manatua na agasala. (Isaia 43:25) Nai lo lea, ua ia faagalo i le uiga faapea, o le taimi lava na te faamagalo ai, e lē toe aofia na agasala i mea na te faamasinoina ai i tatou i se isi taimi i le lumanai. (Esekielu 33:14-16) I se tulaga tutusa, o le faamagaloina o uso a tagata e lē faapea o le a lē mafai ona tatou toe manatua mea na latou faia. Peitai, e mafai ona tatou faagalo i le uiga faapea, tatou te lē toe feita ia te ia ona o na agasala po o le toe faamanatu foi i se isi taimi i le lumanai. Ona o lea ua faaleleia le mataupu, e lē talafeagai ona toe faitala i ai; e lē o se alofa foi le matuā alofia atoatoa o lē na faatiga atu, i le faia o ia e peiseai ua faateaina. (Faataoto 17:9) E moni, atonu e umi se taimi faatoʻā toe sologa lelei a tatou faiā ma ia; atonu foi tatou te lē toe maua le mafana lea sa iai muamua. Peitai tatou te alolofa pea ia te ia o so tatou uso Kerisiano ma faia le mea e sili ona lelei tatou te mafai e tausisia ai faiā toafimalie.—Faatusatusa i le Luka 17:3.

Pe a Foliga Mai e Matuā Lē Mafai Ona Faamagalo

15, 16. (a) Pe manaomia e Kerisiano ona faamagalo atu i se tagata fai mea sese ae lē salamō? (e) E mafai faapefea ona tatou faatatauina le fautuaga a le Tusi Paia lea o loo i le Salamo 37:8?

¹⁵ Ae faapefea, pe afai e agasala mai isi ia i tatou i se tulaga ua matuā ogaoga ai lava ni manuʻa ia i tatou, ae o lea e leai se tautinoga o le agasala, leai se salamō, ma leai se faatoesega o faia mai e lena tagata? (Faataoto 28:13) Ua faaali manino mai e le Tusi Paia e lē faamagaloina e Ieova tagata agasala e lē salamō, e lotomaaa. (Eperu 6:4-6; 10:26, 27) Ae faapefea i tatou? Fai mai le Insight on the Scriptures: “E lē manaomia mo Kerisiano ona faamagalo atu ia i latou o ē fai ma masani le faia o agasala e matuā faaleagaina ai isi po o le agasala ma le loto i ai ae lē salamō. O i latou na ua avea ma fili o le Atua.” (Tusi 1, itulau 862) E leai se Kerisiano ua afaina i ni faiga e matuā lē tonu, matuā inosia ma matagā, e ao ona faamalosia ona se lagona faapea e tatau ona faamagalo atu, pe faapalepale, i le tagata fai mea sese e lē o salamō.—Salamo 139:21, 22.

¹⁶ O le tulaga malamalama, o i latou o ē ua afaina fua i faiga sauā atonu e tiga ma ita o latou loto. Peitai, ia manatua e matuā afaina lava i tatou pe a faaauau pea ona ita ma iai lagona tiga. O le faatalitali mo se tautinoga po o se faatoesega lea e lē tāitai ona faia, atonu e na ona tatou feita atili ai. O le faamamafaina i le mafaufau o faiga lē tonu e ono faateteleina ai pea le ita i totonu o o tatou loto, ona oo ai lea o ni aafiaga leaga i lo tatou itu faaleagaga, i faalogona, ma lo tatou soifua maloloina faaletino. O lona uiga, o loo tatou faatagaina lē na faatiga ia i tatou, e faaauau pea ona ia faatiga i tatou. Ua fautua mai ma le atamai le Tusi Paia: “Ina soia e te ita, ma ia tuu lou tiga.” (Salamo 37:8) O lea la, ua iloa e nisi Kerisiano, a o faagasolo le taimi na mafai ona latou faia se faaiuga ina ia faamagalo atu i le uiga o le tuu ese lea o le loto ita—e lē faapea ua manatu māmā ai i le mea na tupu ia i latou, ae sa latou teena le puleaina o i latou e le ita. O le lafo atu o le mataupu i aao o le Atua o le faamasinotonu, na latou tofo i se mapusaga tele ma mafai ai ona faaauau lo latou olaga e pei ona masani ai.—Salamo 37:28.

17. O le ā le faamautinoaga faalaeiau ua saunia mai e le folafolaga a Ieova lea o loo faamauina i le Faaaliga 21:4?

¹⁷ Pe a matuā loloto se manuʻa, atonu e lē mafai ona tatou matuā tafiesea mai i o tatou mafaufau, atonu i lenei faiga o mea. Peitai ua folafola mai e Ieova se lalolagi fou lea na te “sō-loiesea [ai] loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:4) Po o ā lava mea tatou te ono manatua i lena taimi o le a lē faapogaia ai ni tiga loloto ia i tatou, o mea atonu o loo matuā mamafa i o tatou loto i le taimi nei.—Isaia 65:17, 18.

18. (a) Aisea ua manaomia ai ona ia i tatou le agaga faamagalo i a tatou feutagaiga ma o tatou uso ma tuafāfine? (e) Pe a agasala mai isi ia i tatou, i le ā le uiga e mafai ai ona tatou faamagalo ma faagalo? (i) E faapefea ona aogā ia i tatou lenei mea?

¹⁸ Ae i le taimi nei, e tatau ona tatou ola ma galulue faatasi o ni uso ma tuafāfine, o ni tagata e lē lelei atoatoa ma agasala. Tatou te faia uma lava mea sese. Mai lea taimi i lea taimi, e faaita ai e le tasi le isi, pe oo lava foi ina matuā faatiga le tasi i le isi. Na silafia lelei e Iesu o le a manaomia ona tatou faamagalo atu i isi, “[e lē] seia atu fitu, a ia fitugafulu ni fitu”! (Mataio 18:22) E moni, e lē mafai ona atoatoa la tatou faamagalo e pei o le faamagalo a Ieova. Peitai, i le tele o tulaga pe a agasala mai o tatou uso ia i tatou, e mafai ona tatou faamagalo i le uiga o le faatea ese o lagona ita ma e mafai ona tatou faagalo i le uiga o le lē faavavau lava i le lumanai ona feita ia i latou ona o na mea. Pe a tatou faamagalo la ma faagalo, ua tatou fesoasoani ai i le faasaoina e lē gata i le filemu o le faapotopotoga, ae o lo tatou lava foi filemu o le mafaufau ma le loto. Ae o le sini o mea uma, o le a tatou olioli i le filemu lea, e na o lo tatou Atua alofa lava, o Ieova, e mafai ona ia saunia mai.—Filipi 4:7.

[Faaopoopoga i lalo]

Fesili mo le Autaluga

◻ Aisea e tatau ai ona tatou lotomalilie e faamagalo atu i isi?

◻ O ā ituaiga o tulaga e manaomia ai mo i tatou ona “ia fefaapalepaleai”?

◻ Pe a matuā loloto o tatou tiga ona o agasala a isi, o le ā e mafai ona tatou faia ina ia faaleleia ai le mataupu i se tulaga filemu?

◻ Pe a faamagalo atu i isi, o le ā e uiga i ai le tatau ona tatou faagalo?

[Ata i le itulau 16]

A o teuloto pea lo tatou ita, atonu e matuā lē o iloa mai lava e lē o loo tiga i ai o tatou loto

[Ata i le itulau 17]

Pe a e talanoa i isi ina ia maua se filemu, e faigofie ona faamanino ai ni lē femalamalamaai