Aisea e Loto Faamagalo Ai?

NA FAAMATALAINA e le tagata poto, ma o se tusitala Iutaia o Joseph Jacobs i se tasi taimi le faamagalo e faapea, “o le lesona e aupito sili ona maualuga ma sili ona faigata o lesona uma tau amio.” O le mea moni, e toatele tagata e faigata tele ona fai atu, “Ua ou faamagaloina oe.”

O le faamagalo, e foliga mai, e pei lava o le tupe. E mafai ona faaaluina fua ma le alofa mo isi tagata, ia po o le matuā taofiofia foi mo se tagata lava ia. O le uiga muamua, o le auala faaleatua lea. E tusa ai ma le loto faamagalo, e ao ona tatou atiina aʻe le agalelei e foai atu. Aisea? Auā o loo faalaeiauina e le Atua lena mea, ma o le lē loto faamagalo, ma le agaga o le fia tauimasui, e na ona faateleina ai le leaga o mea tutupu.

E masani lava ona faalogoina upu nei: “Ou te lē ita; ae ou te taui atu!” E faanoanoa lava, ona o le faaupuga lenei ua avea ma mataupu e taitaiina ai le tele o olaga o tagata i aso nei. Mo se faaaoaoga, e iai se tasi fafine e sili atu i le fitu tausaga e lē o toe tautala i le avā a lona tuagane, ona fai mai a ia, “sa ia faia ni mea e matuā leaga tele i a te aʻu, ma ua lē mafai ona ou faamagalo i a te ia.” Ae o lena faiga lē leoa, pe a faaaogaina e avea o se auala e taumafai ai ina ia maua mai se faatoesega mai lē ua tuuaia, pe avea foi o se auupega e faasalaina ai, e seāseā lava ona faamalieina ai le faanaunauga mo le fia tauimasui. Na i lo o lea, atonu o le a na ona faaumiumi ai o le finauga, ma oo ai ina tupu tele le fia tauimasui. Afai e lē faamutaina lenei faalogona tiga, ona mafai lea e lenei faalogona malosi o le fia tauimasui ona faaleagaina faiā e oo lava i le soifua maloloina o se tasi.

Le Leaga o le Lē Loto Faamagalo

Pe a lē loto faamagalo se tasi, o le iuga, o le a tupu mai ai le loto mafatia. O le loto mafatia e mafai ona iu ai i maʻi matuiā. Na tusi mai Dr William S. Sadler e faapea: “I le avea o se fomai, e leai se tasi e mafai ona ia talisapaia atoatoa le matuā tele anoanoai o faamaʻi ma mafatiaga o tagata e fesootai saʻo atu i le popole, mataʻu, feteenaiga, . . . mafaufauga lē mamā ma olaga eleelea.” O lea la, o le ā le tele ua faaleagaina ai ona o le fesouaina o faalogona? Ua tali mai se tasi tusi faafomai e faapea: “I fuainumera faamaumauina . . . ua faaalia ai, o le lua vaetolu o tagata mamaʻi sa ō atu i fomaʻi ma ua maua iuga o suesuega i ō latou maʻi, ua mafua po ua faateleina ona o mafatiaga o le mafaufau.”

Ioe, o le loto tiga, le ita, ma le fia tauimasui e matuā afaina ai. O nei faalogona e faaleagaina ai, e pei lava o le ʻele na te ʻatiʻatilemuina le tino o se taavale. O le tino mai i fafo o se taavale e foliga matagofie, ae i lalo ifo o le vali, ua faasolo mālie ai se gaoioiga e faaleagaina ai.

E sili atu foi ona matuiā ma afaina ai faaleagaga i tatou, pe afai tatou te lē loto faamagalo, ae o loo iai se faavae mo le faaalia o le alofa mutimutivale. I le silafaga a Ieova le Atua, e ono pei i tatou o le auauna i le faataoto a Iesu. Na faamagalo e lona matai sana aitalafu tele sa iai. Ae ina ua talosaga atu lona uso a auauna ina ia faamagalo si aitalafu itiiti sa i a te ia, sa matuā ita o ia ma leai se loto faamagalo. Sa faamanino atu e Iesu e faapea, afai e faapena ona tatou lē loto faamagalo, o le a lē faamagaloina foi e Ieova a tatou agasala. (Mataio 18:21-35) O lea la, afai tatou te lē loto faamagalo, e mafai ona aveesea ai lo tatou loto fuatiaifo mamā i luma o le Atua po o le lē maua ai foi o lo tatou faamoemoe mo le lumanai! (Faatusatusa i le 2 Timoteo 1:3.) O le ā la e mafai ona tatou faia?

Aʻoaʻoina ia Faamagalo Atu

O le faamagaloga moni, e sau mai le loto. E aofia ai le faagaloina o sese a lē o agasala ma tuuesea so o se faanaunauga fia tauimasui. I lea, ua tuu atu ai le faaiuga faafaamasinoga tonu ma le tauimasui pe afai e tatau ai i aao o Ieova.—Roma 12:19.

Ae peitai, e tatau ona matauina e faapea, talu ai “e sili le faaʻoleʻole o le loto i mea uma, ma ua matuā leaga lava,” e lē naunau pea le loto e faamagalo e tusa lava po ua tatau ai. (Ieremia 17:9) Na fetalai Iesu lava ia: “Auā e alu aʻe mai le loto o le manatu leaga, o le fasioti tagata, o le mulilua, o le faitaaga, o le gaoi, o le molimau pepelo, ma le upu leaga.”—Mataio 15:19.

Ae faafetai, ona e mafai ona toleni o tatou loto e faia le mea saʻo. Ae peitai, o le toleniga o loo tatou manaomia, e tatau ona sau mai se puna e sili ona maualuga. E lē mafai ona faia e na o i tatou lava. (Ieremia 10:23) Na iloa e se faisalamo na faagaeeina tauatua lenei mea ma tatalo atu ai mo le taitaiga a le Atua. Na ia ole atu i a Ieova i le tatalo e faapea: “Ia e aʻoaʻo mai ia te au i au tulafono. Ia e faailoa mai ia te au le ala o au feau.”—Salamo 119:26, 27.

E tusa ai ma se isi salamo, na “malamalama ai i le ala” o Ieova le tupu o Tavita o Isaraelu anamua. Sa ia muai tofo i ai ma aʻoaʻo mai ai. I lea, ua mafai ai ona ia faapea atu: “E alofa mutimuti vale ma alofa fua mai Ieova; e tele gese lona toasa, a e tele lona alofa. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia.”—Salamo 103:8, 13.

E manaomia ona aʻoaʻoina i tatou e pei ona sa faia e Tavita. Ia suesue faatasi ma le tatalo le faaaoaoga lelei atoatoa a le Atua i le faamagalo atu, faapea foi ma le faaaoaoga a lona Alo. I lea, ua mafai ai ona tatou aʻoaʻoina ina ia faamagalo mai ō tatou loto.

Peitai, atonu o le a fesili mai nisi: Ae faapefea agasala matuia? Pe tatau ona faamagaloina agasala uma?

Saili se Vaaiga Paleni

Pe a faia e se tasi i se isi se agasala matuā matuia, e mafai ona tiga tutui. O le mea moni lenei ae maise lava pe afai e afaina fua ai lē e lē sala i se agasala matuiā. Atonu e oo ai lava ina taumanatu nisi e faapea, ‘E faapefea ona ou faamagalo se tasi na ia faalataina aʻu i se faiga leaga ma ou āfaina ai?’ I le tulaga o se agasala mamafa e tatau ona faateaina ai, e ao i lē ua āfaina ona faatatauina le fautuaga i le Mataio 18:15-17.

I so o se itu, o le tele lava e mafai ona faalagolago atu i lē o agasala. Po ua faaalia ni fua o le salamō moni, talu ona faia o le mea sese? Po ua iai se suiga o lē ua agasala, atonu ua ia faia se taumafaiga e faasaʻo moni lea sese? I le silafaga a Ieova, o se salamō faapena, o le manatu autū lea i le faamagaloga e tusa lava po o ni agasala ua sili ona leaga. Mo se faaaoaoga, na faamagalo e Ieova Manase, o se tasi o tupu sa sili ona amio leaga i le talafaasolopito o Isaraelu. I le ā le faavae? Na faia faapea e le Atua auā na iu lava ina faamaulalo ma salamō Manase ai ona ala leaga uma lava.—2 Nofoaiga a Tupu 33:12, 13.

I le Tusi Paia, o le salamō moni e aofia ai le faia o se suiga faamaoni o uiga, se faanoanoa mai le loto i so o se mea sese na faia. I mea e talafeagai ai ma e mafai ona fai, o le salamō e ō faatasi ma le faia o se taumafaiga e totogi atu se mea ua faaleagaina a lē na agasala atu i ai. (Luka 19:7-10; 2 Korinito 7:11) Afai e lē faaalia se salamō faapena, e lē faamagaloina foi e Ieova.a E lē gata i lea, e lē faatalitalia e le Atua Kerisiano e faamagalo atu i a i latou ua uma ona muai faamalamalamaina faaleagaga, ae ua faia nei ma le loto i ai, ma le lē salamō se mea sese. (Eperu 10:26-31) Ae e iai nisi tulaga iloga o mea matuia e tutupu mai, atonu ua lē tatau ona faamagaloina.—Salamo 139:21, 22; Esekielu 18:30-32.

Pe mafai ona faamagaloina pe leai, atonu o le a manao se tasi o lē ua āfaina fua i se agasala mamafa e mafaufau i se isi fesili: Po o le a tumau pea ona i a te aʻu se faalogona fesouaina, o le loto tiga ma le ita, seia oo ina faaiuina atoatoa le mataupu? Manatu i se faaaoaoga. Na matuā tiga lava le tupu o Tavita ina ua fasiotia e lana taʻitaʻiʻau o Ioapo, ia Apineru ma Amase, “o tagata e toalua sa sili ona amiotonu ma amio lelei ia te ia [Ioapo].” (1 Tupu 2:32) Na faaleo ma le mautinoa i upu a Tavita lona matuā toʻatamai, ma e mautinoa foi na faia faapea i lana tatalo atu i a Ieova. Peitai, na iu ai ina faapena ona maōna ifo faalogona matuā tiga o Tavita. Sa leʻi pulea o ia e le ita seia oo i le iuga o ona aso. Sa faaauau pea ona galulue faatasi Tavita ma Ioapo, ae na te leʻi tau ina faamagalo lena fasioti tagata lē salamō. I le iuga, sa faamautinoa e Tavita ua faia le faamasinoga tonu.—2 Samuelu 3:28-39; 1 Tupu 2:5, 6.

E ono faaalu ai se taimi umi ma taumafaiga e faaleleia uluai faalogona tiga ua iai i nisi ona o agasala matuiā a isi tagata i a i latou. E ono faigofie atu ona faamatuu mālie atu faalogona mafatia pe afai e taʻutino e lē o agasala lona sese ma salamō ai. Peitai, o lē e lē sala ua āfaina, e mafai ona ia maua le faamafanafanaga ma le mapusaga i lona iloa o le faamasinoga tonu ma le atamai a Ieova, ma i le faapotopotoga Kerisiano, e tusa po o ā ala o uia e lē o fai mea sese.

Ia iloa foi, afai e te faamagaloina se tagata agasala, e lē faapea la ua e manatu māmā ai i le agasala. Mo le Kerisiano, o le faamagalo, o lona uiga ua e faatuatua e tuu atu le mataupu i aao o Ieova. O Ia o le faamasino amiotonu o le vateatea uma lava, ma o le a ia faataunuuina le faamasinoga tonu i le taimi e tatau ai. O le a aofia ai i lena le faamasinoina o ē taupelopelo “o e faitaaga ma e mulilulua.”—Eperu 13:4.

O Aogā o le Faamagalo Atu

Na pese le faisalamo o Tavita e faapea: “Auā le Alii e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe.” (Salamo 86:5) Pe e pei oe o Ieova, e nofo sauni e “faamagalo”? E tele ona aogā.

Muamua, o le faamagaloina o isi e lelei ai faiā. Ua uunaia e le Tusi Paia Kerisiano ina ia: “Feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.”—Efeso 4:32.

Lona lua, o le faamagalo atu, e maua ai le filemu. E lē na o se filemu lenei ma uso a tagata, ae o se filemu foi i totonu o le loto ma le mafaufau.—Roma 14:19; Kolose 3:13-15.

Lona tolu, o le faamagalo atu o isi, ua fesoasoani i a i tatou ia manatua e faapea, tatou te manaomia foi e i tatou le faamagaloga. Ioe, “ua agasala tagata uma lava, ma ua lē oo i le viiga mai le Atua.”—Roma 3:23.

O le mea mulimuli, o le faamagalo atu i isi ua faaava ai le ala mo ā tatou lava agasala ina ia faamagaloina e le Atua. Na fetalai Iesu: “Afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi.”—Mataio 6:14.

I le afiafi o le aso na maliu ai Iesu, seʻi manatu i le tele o mea atonu na ia mafaufau i ai. Sa ia popole e uiga i ona soo, le galuega talaʻi, ae maise lava lona faamaoni i a Ieova. Ae peitai, e ui lava sa matuā tigaina o ia i luga o le laau faaoosala, o le ā na ia fetalai i ai? O nisi nei o ana upu mulimuli, “Loʻu Tamā e, ia e faamagaloina atu ia te i latou.” (Luka 23:34) E mafai ona tatou faataitai i le faaaoaoga lelei atoatoa a Iesu e ala i le fefaamagaloai mai le loto.

[Faaopoopoga i lalo]

[Ata i le itulau 5]

Pe sa e maua le manatu o le faataoto a Iesu i le auauna lē loto faamagalo?

[Ata i le itulau 7]

O le faamagaloina o isi e maua ai faiā lelei ma maua ai le fiafia