Pusa Fesili

● Aiseā e tatau ai ona tatou uaʻi faapitoa i o tatou laei ma teuga pe a asiasi atu i Peteli i Brooklyn, Watchtower Farms, ma lala uma i le faatafafa o le lalolagi?

Ua faatalitalia Kerisiano ia tausisia amioga talafeagai. O ō tatou laei ma teuga i taimi uma e tatau ona atagia ai le logoleleia ma le malualii e tatau i auauna a Ieova le Atua. E faapitoa ona moni lenei pe a asiasi i Peteli i Brooklyn, Watchtower Farms, ofisa ma fale o le lala i le lalolagi atoa. I le iloiloina o le tāua o laei ma teuga talafeagai, ua tautalagia ai i le Organized to Accomplish Our Ministry le manaoga mo le tumamā faaletino ma laei onomea ma teuga pe a auai i le faiva i le fanua ma faatasi ai i sauniga Kerisiano. Ona oo lea, i le itulau e 131, palakalafa 2, ua ia taʻua: “O le mea lava e tasi e faatatauina pe a asiasi atu i le aiga Peteli i Brooklyn po o se ofisa lala o le Sosaiete. Ia manatua, o le igoa Peteli o lona uiga ‘Maota o le Atua,’ o lea o ō tatou laei, teuga ma amio e tatau ona tutusa ma le mea ua faatalitalia mai ia i tatou pe a auai i sauniga mo le tapuaiga i le Maota o le Malo.”

Na faapea mai le aposetolo o Paulo o i tatou o “mataaga i le lalolagi, o agelu atoa ma tagata.” (1 Kori. 4:9) O lea, o ō tatou laei ma teuga e tatau ona i ai se taaiga maumauai i isi i le auala latou te manatu ai i le tapuaiga moni a Ieova. Peitai, ua matauina faapea o nisi uso ma tuafafine, ua tauau ina matuā lē ʻanoʻano i o latou laei, pe a asiasi atu i lala o le Sosaiete. E lē talafeagai na laei pe a asiasi atu i fale o le lala. I lenei mataupu, e pei ona iai i isi vala uma o lo tatou olaga Kerisiano, tatou te faanaunau e tausisia ia lava tapulaa maululuga e iloga ai tagata o le Atua e ese mai le lalolagi i le faia o mea uma mo le viiga o le Atua. (Roma 12:2; 1 Kori. 10:31) E lelei foi le tatalanoa ma a tatou tagata aʻoga o le Tusi Paia ma isi o ē atonu e asiasi atu i Peteli i Brooklyn po o so o se ofisa lala o le Sosaiete mo le uluai taimi e faamanatu ia i latou le tāua o le uaʻi atu i laei ma teuga talafeagai.

O lea pe a asiasi atu i fale o le Sosaiete, fesili ane ia te oe lava: ‘Faamata o oʻu laei ma teuga e onomea? (Mika 6:8) E atagia lelei ai ea le Atua lea o loo oʻu tapuaia? Pe o le a alofia e isi ma faaseā i oʻu foliga faaalia? O ou faataatia ea se faaaʻoaʻoga tatau mo isi o ē atonu e asiasi ane mo le uluai taimi?’ Tau ina avea pea, o tatou laei ma teuga, “ia viia ai i mea uma . . . le mataupu a le Atua lo tatou Faaola.”—Tito 2:10.