Pusa Fesili
◼ O ā ituaiga laʻei e talafeagai pe a asiasi atu i maota po o nofoaga o faaaogā i le auaunaga iā Ieova?
I le lalolagi atoa, o Maota mo Sauniga, Maota Fono, aiga Peteli, ma fale o lālā o ni nofoaga ua faapitoa mo le auaunaga iā Ieova. O ni fausaga talafeagai e masani ai, e mamā, e lelei ona faatulaga ma tausia lelei, ma atagia atu ai se tulaga mamalu. E tuufaafeagai ma le tulaga masani o loo vaaia i le faiga o mea a Satani. O i latou e asiasi atu i nofoaga e faaaogā i le auaunaga iā Ieova e ao foʻi ona mātauina o ni tagata e auauna iā Ieova, ma o nisi o loo faia lona finagalo.
I le avea ai o ni Kerisiano, tatou te ‘faailoa atu i tatou o ni auauna a le Atua’ i mea uma, e aofia ai laʻei ma teuga talafeagai. (2 Kori. 6:3, 4) E faatalitalia foʻi i tatou ia lelei a tatou amio. E ao ona atagia atu i taimi uma lava i o tatou laʻei ma teuga ia foliga e talafeagai i auauna a Ieova le Atua. E faapitoa lava lenei tulaga pe a asiasi atu i le ofisa ulu i Niu Ioka atoa ai ma lālā i le lalolagi atoa.
I le talanoaina o le tāua o laʻei ma teuga talafeagai, o loo taʻua i le tusi, Ua faamaopoopo Ina ia Faia le Finagalo o Ieova le manaʻomia ona mamā faaletino, laʻei talafeagai ma ia lelei teuga pe a auai i le auaunaga i le fanua ma le auai i sauniga faa-Kerisiano. Ae i le itulau e 138, palakalafa e 3, o loo taʻua ai e faapea: “Ia manatua, o le taʻu Peteli o lona uiga o le ‘Fale o le Atua.’ O lea la, o o tatou laʻei, teuga ma amio e ao ona pei lava o lo tatou auai i sauniga mo le tapuaʻiga i le Maota mo Sauniga.” O lenei faatulagaga faamamaluina e ao ona utagia e tagata talaʻi e nonofo taulalata i le Peteli faapena foʻi i latou e malaga mamao mai pe mai isi foʻi atunuu. O le faia faapea, o le a faaalia ai e tagata asiasi i Peteli ia uiga faaaloalo e talafeagai ai.—Sala. 29:2.
E ao i o tatou laʻei ona mātaulia ai i tatou o nisi e ‘faapea atu latou te matataʻu i le Atua.’ (1 Timo. 2:10) O laʻei ma teuga talafeagai e fesoasoani i tagata ia iai se vaaiga saʻo i le tapuaʻiga moni i a Ieova. Peitaʻi, ua mātauina nisi uso ma tuafāfine, pe a asiasi atu i nofoaga o loo faaaogā mo le auaunaga iā Ieova, ua matuā faatamala lava i o latou laʻei, e pei o ni ofu tafao toe valavala foʻi. O ituaiga lavalava ia e lē talafeagai i se Kerisiano i so o se taimi. I lenei la tulaga, e pei lava ona iai i isi vala uma o o tatou olaga o ni Kerisiano, tatou te mananaʻo e tausisi i tapulaa maualuluga lea e ese ai i tatou mai le lalolagi. Tatou te faia mea uma e viia ai le Atua.—Ro 12:2; 1 Kori. 10:31.
Pe a asiasi atu la i le ofisa i Samoa po o fale i isi lālā, tusa lava pe fuafua muamua ia pe o e i se nofoaga foʻi mo tagata tafafao, fesili ifo iā te oe i fesili nei: ‘Po o atagia atu i oʻu laʻei ma aʻu teuga tulaga toʻafimālie, mamā, ma le mamalu o le nofoaga lea o le a ou asiasi i ai? Po o atagia atu ai le Atua lea ou te tapuaʻi i ai? Po o le a faateʻia ma lē fiafia nisi i oʻu foliga vaaia?’ E ala i o tatou laʻei ma teuga, tau ina ia lē aunoa ona tatou “faamamaluina i mea uma lava aʻoaʻoga a le Atua lo tatou Faaola.”—Tito 2:10.