Taulimaina o le Tala Lelei—I le Faia o Avanoa e Avatu ai se Molimu lē Fuafuaina
1 Sa faatonu e Iesu ona soʻo e faasusulu atu lo latou malamalama. (Mata. 5:14-16) Na finagalo o ia i a latou taʻu atu i isi e uiga i le tala lelei o le Malo o le Atua i so o se avanoa talafeagai. I lenei faatatau, o Iesu o se ata vaaia. O se faaaʻoaʻoga o lenei ina ua ia puʻeina le avanoa e taʻu atu ai le upu moni i se fafine Samaria i le vaieli i Sukara. (Ioane 4:5-30) Ae ā i tatou? Pe o tatou faia na avanoa e avatu ai se molimau?
2 E lē o i tatou uma e mafai ona auai i le auaunaga tau le fanua i aso uma. Ae atonu e i ai avanoa toetoe lava o aso uma tatou te mafai ai ona avatu se molimau. I le ā le auala? O le molimau lē fuafuaina. E faitau afe le toatele ua oo ina iloa le upu moni i lenei auala. Afai tatou te mataala e matau avanoa ma faia se taumafaiga, o le a toatele atili tagata e mafai ona ausia.
O AI E MAFAI ONA TATOU TALAʻI IAI?
3 E faaopoopo i le molimau aloaia mai lea fale ma lea fale, toe asiga, ma suesuega faale-Tusi Paia, e mafai ona tatou molimau ia tatou uo faigaluega, uo i aʻoga, aumea faipisinisi, tau aiga, ma isi e masani i se faavae e leʻi fuafuaina. Pe a malaga i le pasi, nofoaafi, po o le vaalele, atonu e mafai ona tatou faamaite se talanoaga ma le au malaga. A o iai i malologa, atonu tatou te fetufaai i le tala lelei ma ē pulea faletalimalo ma fale mau totogi, o tautua i pamu penisini, tagata faigaluega i faleʻaiga, ma ave taavale laʻu pasese. E mafai foi ona tatou talanoa i isi a o faatalitali i le ofisa o se fomaʻi po o fale tamea mo le lautele. A o iai i le aiga, atonu e mafai ona tatou molimau i tuaoi, tagata faatau, po o ē tiliva meli. Tusa foi pe faataotolia i le falemaʻi, e mafai ona tatou molimau i fomaʻi, teine tausi maʻi, ma isi maʻi.
E FAAPEA ONA AMATA
4 Afai na fai sa tatou tuugatala ma ua tatou iloa o le a alu ai sina taimi e faatalitali, e mafai ona tatou ō ma ave mekasini fou ma ia sauniuni e talanoaina se mataupu faaoso naunau ma se tasi tatou te feiloai. Pe mafai foi ona tatou faaaogā se savali po o se polosiua e fai ma faavae mo le amataina o se talanoaga. I se faatulagana faapena, ua iloa e nisi le uigā o le amataina o le talanoaga i le faia o se faamatalaga tuusaʻo e faavae i se mea fou na tupu ona siligia lea mo le tali mai a le tagata. Ua maua e isi faapea o le siligia o se fesili faatupu manatu e faatatau i nisi o mea fou o loo tutupu e mafai ona taʻitaʻia ai i se molimau lelei. I tulaga uma lava, e manaomia le tausolomua ina ia tutupu ai mea.
MOLIMAU I LE GALUEGA
5 O i latou e i ai galuega masani e mafai ona saunia avanoa e molimau ai i aumea faigaluega. Na faia e ni tuafafine e toalua i Iunaite Setete se lisi o aumea faigaluega na la manatu atonu e naunau i le upu moni. I le talanoa ma i latou ua i le lisi ma isi, na la mafai ai ona tuua e sili atu i le 65 tusi Revelation Climax ma galueaina ai le tele o le naunau.
6 I se isi tulaga, na manatu ai se uso faapea o le a ia molimau atu i le tagata muamua lava e saofai ane e sosoo ma ia i le 15-minute o le malologa i le galuega. Sa silafia e le tamaloa na ia talanoa i ai e uiga i le upu moni peitai na ia faapea mai e le manao e saili atili i le mataupu. Ae ui i lea, na tuua e lo tatou uso lomiga i se mea e ono faigofie ona ave ai e le tamaloa. I totonu o le ono masina sa papatiso uma lena tamaloa ma lona aiga.
7 I le avea ma “malamalama o le lalolagi,” sa saunia e Iesu avanoa e avatu ai se molimau lē fuafuaina. (Ioane 8:12) Afai tatou te mataala ma loto malie e fetufaai lo tatou faamoemoe e faavae i le Tusi Paia, o le a tatou lē misia foi avanoa e avatu ai se molimau. O lea, e pei o soʻo o Iesu, o le a tatou ‘susulu e pei o ni malamalama i le lalolagi.’—Fili. 2:15, 16.