Fesoasoani i Ē Fou ina ia Agaʻigaʻi i Luma
1 Ia Aperila 17, 1992, e toetoe lava 11.5 miliona tagata i le lalolagi aoao sa faapotopoto faatasi i le faamanatuina o le Faamanatuga o le maliu o Keriso. E sili atu i le lua ma le ʻafa taimi e sili atu ai lenei aofaiga na i lo o le aofai o tagata talaʻi o loo faatasitasi atu i faapotopotoga o Molimau a Ieova. Maeu le faafiafiaina i le vaai atu i lenei anoanoai o tagata o loo lolofi mai i “le mauga o Ieova”! (Mika 4:2) I le taimi nei, ua iai se fitu miliona o tagata o ē o loo faaalia sina naunau i le tapuaiga moni ma o ē e leʻi oo ina avea ma tagata e vivii atu ia Ieova i luma o nisi tagata. E mautinoa lava la, e leʻi iai lava se isi taimi muamua na sili ai ona uigā upu a Iesu e faapea “e tele le saito e seleseleina”!—Mata. 9:37, 38.
2 A o faagasolo le masina o Aperila, o le a tatou faia ai se taumafaiga faapitoa e fesoasoani atu ia i latou uma o ē ua agavaa e faia se sao i le faiva i le fanua. O le a taʻimua i lenei fuafuaga le taʻitaʻi o le Suesuega Tau Tusi a le Faapotopotoga, faatasi ma le fesoasoani a isi tagata talaʻi agavaa ma paeonia o lana vaega. E vala tolu vaega o lo tatou sini, o le (1) ina ia faatulaga se suesuega faale-Tusi Paia i aiga ma ē fou e auai i le lauga lautele faapitoa ma le Faamanatuga i lenei tausaga; (2) ina ia faalaeiau ia i latou o ē o loo suesue e agavaa e avea ma tagata talaʻi e leʻi papatisoina; ma le (3) ina ia faateleina lo tatou auai o i tatou lava i le faiva i le fanua.
3 E tatau ona faia se taumafaiga faapitoa e faafeiloai atu ai ma faamasani i ē fou ua auai i so o se tatou sauniga. O le ā e mafai ona tatou faia e faalaeiau atili atu ai i nei tagata loto naunau ina ia faia sa latou suesuega faale-Tusi Paia e lē aunoa i aiga?
4 I se tuu faatatau, e 504 suesuega faale-Tusi Paia na faia i Amerika Samoa ma Samoa i Sisifo i masina taitasi i le tausaga faaleauaunaga o le 1992. E mafai e tagata talaʻi ona valaaulia le taʻitaʻi o la latou suesuega tau tusi latou te ō atu faatasi i suesuega faale-Tusi Paia ina ia faamasani atu ai i tagata aʻoga. (km 3/81 itu. 4) O nisi o nei tagata aʻoga o le Tusi Paia atonu ua auai nei i sauniga ma ua agavaa e auai i le galuega mai lea fale i lea fale. Po o molimau lē fuafuaina atu ea e lē aunoa tagata fou? Po ua latou ausia ea agavaa e avea ai ma tagata talaʻi e leʻi papatisoina e pei ona faataatitia mai e le Our Ministry, itulau e 97-99? Afai o le tulaga lena, ia faamatala atu ia i latou le auala e mafai ona latou amata ai i le galuega mai lea fale i lea fale pe a oo ina faamaonia le avea ma tagata talaʻi e leʻi papatisoina.
5 E lē tatau ona tatou faatamala i le faalaeiau atu o le tasi i le isi i la tatou auaufaatasiga faa-Kerisiano. (Epe. 10:24, 25) Afai ua tau faavaivai se isi mai la latou faiva, e tatau i taʻitaʻi o suesuega tau tusi ona faia ni fuafuaga maumaututū ina ia avatu ai le fesoasoani ma faalaeiauga. O nisi taimi e na o le pau lava le tulaga e manaomia, o se valaaulia mafana lea i ai ina ia auai faatasi ma i tatou i le auaunaga i le fanua.
6 Ina ia avea Aperila ma masina mataʻina o le auaunaga i le fanua, o le a manaomia ai le lagolagosua a tagata uma. O le taʻimua maelega a le taʻitaʻi o le suesuega tau tusi e mafai ona mātaulia ai se suiga, a o ia fesoasoani atu i sui taitoatasi o lana vaega ina ia faia se sao atoatoa i le faiva. E mafai foi ona faatulaga nisi faatasiga faaopoopo mo le auaunaga. E tatau ona uaʻi faapitoa atu i ē ua matutua, ma e mafai foi ona fesoasoani atu i ni auala patino i ē talavou. E ao i mātua ona faamautinoa ua faia se sao a le aiga atoa i le faiva ia Aperila. Afai tatou te tuuina atu ia Ieova mea silisili tatou te mafaia i lenei taimi o le seleselega, ona tatou mauaina foi lea o ana faamanuiaga e tele.