Polokalama Fou mo Fonotaga Matagaluega
1 Ina ia usitaia fetalaiga a Iesu o loo taʻua i le Mataio 6:33, ua faamuamua ai pea e Kerisiano moni le Malo i o latou olaga. O lea la, ua talafeagai ai ona avea le “Muai Saili le Malo,” ma matua o le polokalama mo fonotaga matagaluega, ia o le a amataina ia Setema 1993.
2 Mai le amataga o le polokalama o le a faamatilatila ai le moni o le Malo, ma faamamafa ai faapea, o se faiga malo o loo faatinoina faatasi ma sona pulega, ni ona pule, ona tagatanuu, ma ana tulafono. O le mea moni, o le tele o tulafono o pulega faaletagata ia e aogā mo tagata i aso nei, ua faavae mai i tulafono a le Tusi Paia.
3 O le a talanoaina ai le puipuiga ma faamanuiaga ua tatou maua, ona o le faamuamuaina o le Malo i vala uma o o tatou olaga. O le a tuuina mai ai fautuaga aogā e faaalia ai le auala e mafai ona tatou alofia ai popolega e lē manaomia. O lauga, o faataitaiga, ma talanoaga o le a faaalia ai le mafuaaga ua tāua ai ona faafaigofie o tatou olaga.
4 I le Aso Toonai o le fonotaga, o le a mafai ai e i latou ua agavaa mo le papatisoga ona faalauiloa i le lautele lo latou tuutoina atu ia Ieova. Ma i le Aso Sa, o le a tatou mananao uma ai e auai mo le lauga lautele, o lona matua “O Mea o le a Faia e le Malo o le Atua mo Tagata.”
5 Ia mautinoa ua faia au fuafuaga ina ia e auai i aso uma e lua o le fonotaga matagaluega. O le polokalama o le fonotaga, ae maise le mafutaga matagofie a le au uso, o le a saunia ai se faalaeiauga e faagaee ma faafouina ai, lea o le a leai se isi o i tatou e manao ina ia misia.