Polokalame Fou mo le Fonotaga Matagaluega
1 O le polokalame fou mo le fonotaga matagaluega, e amata ia Setema, o le a talanoaina ai le matua “Ia Tofo i le Fiafiaga Sili i le Foai Atu.” (Galu. 20:35) Ua faamatalaina le fiafia e faapea, “o se tulaga o le manuia ma lelei, ma le loto malie.” E toatele tagata i aso nei latou te puʻea so o se fiafiaga e mafai ona latou maua mai le olaga, ma afai latou te maua, e masani lava ona mo na o sina taimi puupuu. E lē o le fiafiaga moni lena. Peitai, ua aʻoaʻoina i tatou e Ieova i le auala tatou te maua ai aogā e faavavau mo i tatou lava. (Isa. 48:17; 1 Ioa. 2:17) O le polokalame fou o le fonotaga matagaluega, o le a faamamafaina ai le auala e mafai ona tatou maua ai le fiafiaga e sili atu, e ala i le foai atu i se auala faaleagaga.
2 O le a tatou aʻoaʻoina ai auala aogā e mafai ona foai atu ai i tatou i le faiva. O matua nei o nisi o lauga o le a fofogaina atu e ovasia faimalaga: “Faia o Uo e Ala i Oa o le Amioletonu,” “Ia Faaaloalo i le Sauniuniga a le Atua o ‘Meaalofa i Tagata,’” ma le “Ia Tofo i le Tele o Tāfa o le Fiafiaga Moni.” O i latou ua faanaunau e papatiso i le fonotaga, o le a mananao e talanoa atu i le ovasia taimua ina ia mafai ai ona ia fuafua mo ni toeaina e autaluina fesili o le papatisoga ma i latou. O le auauna ia Ieova i se faiā mamā, o le a maua ai e tagata fou o le a papatiso se fiafiaga sili.
3 O le iloa lelei o le pule a Ieova e aumaia ai foi le fiafiaga moni ma le saogalemu. E manaomia ona iloa e tagata uma lenei mea. I lea, o le a talanoaina ai i le lauga lautele i le fonotaga matagaluega le matua “Ia Autasi ma Tagata Fiafia o le Atua.” Ia faamautinoa ua valaaulia i latou uma o ē ua faaalia le naunau i le upu moni, ina ia ō mai i lenei lauga. Latou te lē o maua le saogalemu moni ma le fiafiaga tumau i pulega faaletagata a lenei lalolagi o loo nofo toilalo i le pule a Satani. (Fai. 8:9) Ae maeu le olioli o le a latou maua i le auaufaatasi ma tagata fiafia o Ieova!—Sala. 144:15e.
4 E ui ina faateleina le leaga o tulaga i lenei faiga o mea, ae o i latou ua tofo i le fiafiaga sili i le foai atu faaleagaga, o le a lē mafai ona lē faamanuiaina i latou e le Atua fiafia. (1 Timo. 1:11) O le a faaalia e le polokalame fou mo le fonotaga matagaluega le moni o lenei mea. ʻAua lava neʻi e misia!