Toe Tuliloa Mekasini ma Polosiua na Tuua
1 Sa faalaeiauina e Iesu ona soʻo ina ia galulue i le faia ma soʻo. (Mata. 28:19) E iai se uiga e sili atu o lena galuega na i lo o le tau ina tuu o lomiga; tatou te mananao e fesoasoani i tagata ia agaigai i luma faaleagaga. Ina ia faia lena, e tatau ona tatou toe foi atu e avatu se fesoasoani atili ia i latou sa faaalia le naunau.
2 Afai sa e faamatilatilaina se mataupu o i se tasi o mekasini i lau uluai asiasiga, atonu e lelei ona talanoa le mataupu lava lena pe a e toe foi atu:
◼ “I laʻu asiasiga talu ai, sa ou faasinoina ai oe i le mataupu i Le Olomatamata (po o le Awake!) lea sa fesoasoani ia i taʻua e talisapaia le manaoga o le suesueina o le Tusi Paia. O le fuafuaga a le Atua mo se lumanai e sili atu ona lelei mo tagata, o loo taulai atu i lona Malo. Ua tusia i le Mika 4:3, 4 lana folafolaga e faapea, o le a faaiuina e lenei Malo taua uma.” A uma ona faitau le mau, ia faailoa atu i ai le polosiua o le “Faauta!” ma faaali i ai le ata i le faavaa. Ia iloilo le palakalafa muamua ma mau o loo sii mai mo lena palakalafa, ia iloa ai o le Mika 4:3, 4 o le tasi lea o mau. Ia fuafua se toe asiga e faaauau ai le talanoaina o le palakalafa e 2.
3 Afai e foliga mai e itiiti se naunau o lē ona le fale pe lē maua foi se taimi e talanoa ai, atonu e te filifili e faaopoopo lona suafa i lau ālamekasini:
◼ “Talu ai sa e naunau i mekasini na ou tuua ia te oe talu ai, ou te manatu o le a e fiafia foi i nei lomiga fou. Ou te talitonu o le a e iloa patino ai le faafiafiaina o oe i lenei mataupu.” Faasino i ai se mataupu e te manatu e ono tosina mai i ai. (O le toatele sa latou faia faapea, na latou iloa le nofo sauni o tagata e foai mai se meaalofa e aunoa ma lo tatou tau faamatala atu i ai.) Taʻu i ai o le a e toe asiasi atu ma isi lomiga e sosoo ai.
4 Afai sa faitau e lē ona le fale le mekasini ma faaalia sona talisapaia, atonu e te filifili e ofo atu i ai se tusiga:
◼ “Talu ai e foliga mai e te fiafia i Le Olomatamata, ou te fiafia foi e faaoo mai isi lomiga fou pe a maua mai. Afai e te manao ai, e mafai ona ou faia se fuafuaga ina ia maua mai ai pea au lomiga taitasi e ala mai i le meli.” Afai e manao o ia i se tusiga, e mafai ona e faaopoopo atu: “E lē totogia a matou lomiga ona o loo lagolagoina la matou galuega i foai tauofo. Ae afai e te fiafia e faia se foai itiiti i la matou galuega, ou te fiafia e taliaina.”
5 Afai sa e tuua se polosiua ae leʻi iai se avanoa e faataitai ai le faiga o se suesuega, fuafua e fai lena i le isi au asiasiga.
Mo se faaaoaoga, afai sa e tuua le polosiua o le “Malo,” talosaga i lē ona le fale e aumai lana kopi, ma fai atu i ai:
◼ “Seʻi mātau le mea ua taʻu mai ia i taʻua i le itulau e 3 e uiga i le matua o le feau a Iesu sa talaʻia a o iai i le lalolagi.” Ona talanoa puupuu lea i faamatalaga i le itulau e 3. Fesili i lē ona le fale po o le ā na te iloa e manaomia ona fai ina ia aʻoaʻo ai atili. Ona fai atu lea: “E tāua tele lo tatou talisapaia o le pogai ua tatou manaomia ai le Malo o le Atua. Ou te fiafia e toe foi mai ma talanoaina le pogai e tatau ai ona tatou vāai atu i le malo o le Atua ua na o lea lo tatou faamoemoe.”
6 Ua ia i tatou le tele o polosiua eseese. Faailoga ni manatu tāua i le polosiua lena ua e fuafua e faaaogā. O le a fesoasoani ia te oe e faalaeiau ē loto naunau e aʻoaʻo atili i mea sa poloaia e Iesu.—Mata. 28:20.