Ia Auauna ia Ieova ma le Lē Fetosoaiina
1 “E fiafia tagata o ē fai Ieova ma o latou Atua!” (Sala. 144:15, NW) Po o moni pea nei upu a le tupu o Tavita, e oo lava i nei ona po ua leaga? (Efe. 5:16) Ioe! O loo maua pea e Kerisiano le olioli i le auaunaga ia Ieova. Ua lē faigofie mea mo i tatou. Ua faapogaia e Satani faafitauli mo i tatou i nei “aso faigata,” peitai, tatou te lē loto vaivai ai. (2 Timo. 3:1, 2) O le faaleagaina o le tulaga o mea, o faamaoniga atili ia o le latalata mai o le taimi e soloiesea ai e le Malo o le Atua lenei lalolagi tuai iuvale, ma suia ai i se lalolagi fou mamā. (2 Pete. 3:13) O le pouliuli o lenei lalolagi e lē faanenefuina ai pe mate ai le olaola o lo tatou faamoemoe fiafia; ae o le a susulu atu ma le malamalama tele lo tatou faamoemoe mo le Malo. Pe e te lē fiafia ea e auauna ia Ieova o se tasi e faasusulu atu le malamalama i lenei lalolagi pogisa?—Fili. 2:15.
2 E ao ona tatou vāai pea lava taitoatasi i le auala o loo tatou auauna ai ia Ieova. Aisea? Auā o Satani o se Faatosina sili. Ua faamatala e se tasi lomifefiloi le upu “faatosina” i le “faaliliu” “aveese po o le tosoese (o le manatu o se tasi) i se isi mea e ese, po o ni auala eseese i le taimi e tasi,” ma “faagaepu pe faaseseina i faalogona po o uunaiga o le loto e feteenai.” Talu lava ona lafoina mai o ia i lenei lalolagi, ua faamanuiaina pea Satani i le “taitaiseseina” o tagata. Na te faaaogā le tele o auala e tosoese ai le tagata mai le ala saʻo o loo iai i o tatou aso. (Faaa. 12:9) E ui ina maelega Molimau a Ieova i le talaʻia o le Malo mo le selau tausaga ua mavae, pe toafia tagata na talisapaia vala tāua uma o le faapaiaina o le suafa o le Atua ma faamaonia le tonu o lona silisiliese e ala i le Malo o le Atua? O le mea moni e toaitiiti. (1 Ioa. 5:19) Afai e mafai e Satani ona faaliliuese le faitau piliona o tagata o lenei lalolagi, o le lamatiaga foi la i le taimi nei, e mafai ona ia faaliliuese i tatou pe pulea o tatou mafaufau ina ia tatou lafoaia ai le auaunaga ia Ieova. E faanoanoa lava, o nisi o o tatou uso ua faaseseina e ala taufaasese a Satani. Ua latou faataga o latou mafaufau e fetosoaiina i auala eseese. Ua tele faatosinaga i aso nei. Tatou te talanoaina na o nisi o na auala.
3 Faafitauli Tau le Tamaoaiga ma le Manao i Mea Faitino: I le tele o atunuu o le lalolagi, o le leai o ni galuega ma le maualuga o le tau o le soifuaga ua pogai ai popolega. E moni e ao ona tatou saunia meaai, lavalava, ma fale mo i tatou lava ma o tatou aiga. Ae afai tatou te soona popole tele i manaoga o le olaga, o le a pulea la e nei mea o tatou mafaufauga. O le a avea lo tatou ola faaletino ma mea e sili ona tāua i le olaga, na i lo o le lagolagosua atu i le feau o le Malo. Na fautua mai le aposetolo o Paulo e uiga i lea tulaga i le Eperu 13:5, 6. Ua faamautinoa mai foi e Iesu Keriso ia i tatou e faapea, o i latou o loo faamuamua le Malo e lē tatau ona popole; auā ua saunia e Ieova mea tatou te manaomia moni. (Mata. 6:25-34) O paeonia ma isi auauna sauatoa i le lalolagi aoao, e mafai ona latou faamaonia le saʻo o lenei manatu.
4 Ua faaauilumaina e le lalolagi a Satani le manao i mea faitino. O le manaomia o le tele o mea faitino po o le puipuimaluina o na mea, o le malosiaga autū lea i le tele o olaga o le faitau miliona o tagata. Sa iai foi faatosinaga faapena i aso o Iesu. Sa fesili se tasi pule talavou ma le mauoa ia Iesu po o le ā le mea e ao ona ia faia ina ia ona mauaina ai le ola e faavavau. Na tali atu Iesu e faapea: “Afai e te manao ina ia atoatoa ona lelei o lau amio, ia e alu ma e faatau atu au mea, i le e avatu ai i e matitiva; ona ia te oe lea o le faulaigāoloa i le lagi, i le e sau ma mulimuli mai ia te au.” (Mata. 19:16-23) O le mea moni, o le tele o mea faitino a lenei tamaloa, na tosinaese ai o ia mai le auauna atu i le Atua ma le loto atoa. Na pupū atu lona loto i ana oa. Sa silafia e Iesu e ono maua e lenei tamaloa ni aogā pe afai na te lē faamamafaina nei faatosinaga. Ua taofia e na oa o ia mai le tuu atu atoatoa o lona tuutoina i le Atua. Ae faapefea oe? Po o e faaaluina ea le tele o itula i lau galuega totogi i le tau lava ina ia maua ai le ituaiga o olaga lena ua e masani ai? Pe aafia ai ea lau auaunaga ia Ieova i lenei tulaga? Po o tele ea lou taimi ma lou malosi e faaalu i au mea faitino, ua itiiti ai se taimi mo manaoga o le Malo? (Mata. 6:24) Pe mafai ea ona e faafaigofieina lou olaga ina ia tuuina atu ai le tele o le taimi i manaoga faaleagaga?
5 Mataupu e Masani ai le Olaga i Aso Uma: Afai tatou te lē faaeteete, atonu o le a oo ina tatou popona tele i mataupu e masani ai o le olaga, ma iu ai i le faaleamanaiaina o ala faaleagaga. Ia manatua tagata i aso o Noa. Sa faatumuina i latou i fiafiaga o le olaga, aai ma feinu, faaipoipo ma faaavaga a latou fanau, ma oo ai ina latou lē amanaia le feau lapatai a Noa e faatatau i le Lolo o le a oo mai. Na oo faafuasei mai le Lolo ma tafiesea ai i latou uma ae latou te leʻi nofo sauni. O faatosinaga sa taitaiina ai i latou i le faaumatiaga. Na fetalai Iesu: “E faapea foi pe a sau le Atalii o le tagata.” (Mata. 24:37-39) O le mea moni, o le toatele o tagata ua matuā saisaitia o latou olaga e faalogo ai i le feau lapatai lea tatou te avatua ia i latou. Latou te matuā lē talisapaia mea faaleagaga.
6 Po ua amata ona faatumulia lou olaga i fiafiaga o le olaga ma ua faaitiitia ai lou uai atu i mataupu faaleagaga? I se tasi mea na tupu, na valaaulia ai Iesu e fai ma mālō i le aiga o Mareta ma Maria. Sa matuā faalogologo lelei Maria i mea na ia fetalai mai ai. Ae i le isi itu, sa ‘faatosinaina Mareta i le tele o tiute e fai.’ Sa pupū tele atu Mareta i le avea o ia ma se tagata talimalo lelei. Sa lē taulau ona ia talisapaia le manaomia ona faaalu o se taimi e faalogo atu ai ia Iesu. Sa faasino atu ma le agalelei e Iesu ia Mareta e faapea, o na sauniuniga e leʻi manaomia; ae tāua le matuā uai atu i mataupu faaleagaga. Pe e manaomia ona e faatatauina lena fautuaga? (Luka 10:38-42) Na lapatai foi Iesu i le tatau ona tatou uai totoʻa ifo ia i tatou lava, ina ia tatou lē soona aai ma soona inu tele, e faaninivaina ai o tatou mafaufau. I lenei taimi faigata o le talafaasolopito o le tagata, tatou te manaomia ai lo tatou matuā mataala.—Luka 21:34-36.
7 Faanaunauga i Fiafiaga: O se isi faatosinaga sili ua faaaogā e le Tiapolo e aveesea ai lo tatou uai atu i le feau o le Malo, o faanaunauga ia i fiafiaga. E faitau miliona tagata Kerisinetoma ua latou faamuamua fiafiaga i lo le Atua. E sili ia i latou le fiafia i isi mea na i lo le mafaufau loloto i le Afioga a le Atua. (2 Timo. 3:4) O faafiafiaga ma evaevaga talafeagai, e lē sese. Ae o le faaaluina o le taimi tele i vaiaso taitasi i na mea e pei o televise, tifaga, vitiō, taaloga, tusi faitau, po o ni mea e fiafia i ai, e ono faataga ai le loto taufaaʻoleʻole e atiina aʻe ma tosoese ai i tatou mai ia Ieova. (Iere. 17:9; Epe. 3:12) E mafai faapefea ona tupu lena mea? I taimi o sauniga faa-Kerisiano, e te iloa ai le eva solo o lou mafaufau; atonu e oo lava ina e moomoo inā uma ia le sauniga ae seʻi e toe foi atu i lena faanaunauga i fiafiaga. E lē umi ae e mafaufau i ni auala e te nofo ai i le fale ae faatuanai le sauniga pe auai foi i le galuega i le fanua. O le taimi lenei e te matuā vailiili ai po o avea nei faanaunauga i fiafiaga ma faatosinaga i lou olaga. (Luka 8:14) Pe lē sili ea le faaalu o na taimi tāua e faaaogā i faafiafiaga, e atiina aʻe ai lou itu faaleagaga?
8 Taimi e Faaaogā i Isi Mea Lē Aogā: O nisi ua faaalu o latou malosi e foia ai faafitauli ua taatele i tagata i aso nei. E manaomia e Kerisiano ona alofia le faaaafia ai i fefaloaiga a le lalolagi iuvale i ala o le olaga ma ana taumafaiga lē taulau i le tau faasaʻosaʻo o mea piopio. (Ioa. 17:16) O nei mea uma o ni vaega o togafiti a Satani i lona taumafai e faaliliu mai i tatou mai lo tatou uai atu i fautuaga mai le Tusi Paia, ma le manatu autū e na o le tasi lava le vaifofo tumau—o le Malo lea o le Atua. Afai sa tatou mafatia i ni solitulafono faaletagata po o le lē faamasinotonu, e tatau ona tatou leoleo mai le taui ma sui po o le soona mafatia tau i faalogona e ono faagalo ai o i tatou o—Molimau a Ieova. Ae e sili ai i na mea uma, o Ieova sa tauleagaina, ma o lona suafa e tatau ona tatou faapaiaina.—Isa. 43:10-12; Mata. 6:9.
9 A o mananao tagata uma ia maua se soifua lelei, o le uai tele atu i manatu ma togafiti e tele o loo ofoina mai, e mafai ona lavelave ai o tatou mafaufau i mataupu tau le soifua maloloina. Ua fuafua e le toatele o tagata ituaiga o meaai e aai ai, faia ni togafitiga, ma faamalositino mo ni faafitauli faaletino ma tau i faalogona, ae o le tele o nei togafitiga e feteenai. O le mea e tatau ona faia i mataupu tau le soifua maloloina, o le filifiliga totino a le tagata lava ia, ae ia lē feteenai ma mataupu silisili o le Tusi Paia. Ia tatou faatumauina pea lo tatou faatuatua atoatoa i le Malo o le Atua, o le vaifofo moni lea mo maʻi o tagata.—Isa. 33:24; Faaa. 21:3, 4.
10 Ia Tumau ma le Mausali: A o latalata mai le iuga, o le a faateleina pea e Satani ana taumafaiga e tosoeseina ai oe mai lau auaunaga ia Ieova. “Ia outou tetee atu ia te ia, ma ia mausali outou i le faatuatua.” (1 Pete. 5:9) E faapefea? E tatau ona faatumulia oe i mafaufauga o le Atua. (Mata. 4:4) Aua neʻi avea faatosinaga a le lalolagi e gaoia ai lou taimi, ma le taimi o lou aiga o loo manaomia ona mafaufau ai ma manatunatu ai i mea o i le Afioga a le Atua. I taumafataga a le aiga, ia talanoa i mea tutupu e atiae ai ma isi mataupu faaleagaga. Ia tumau i se faasologa faifaipea o suesuega totino ma sauniuniga mo sauniga.
11 Pe a popole lou mafaufau i popolega o lenei olaga, lafo atu ia Ieova avega uma i le tatalo. Ia e mautinoa o loo ia tausia oe. (1 Pete. 5:7) Ia avea le filemu o le Atua e leoleoina ai o outou loto ma o outou mafaufau. (Fili. 4:6, 7) Aua neʻi avea faatosinaga ma mea e punitia ai lau vaai faaleagaga. Ia e faamuamua pea Ieova, e pei ona sa faia e Iesu. (Galu. 2:25) Ia taulai atu pea lau vaai i lou sini, e pei ona faalaeiau mai ai le Faataoto 4:25-27 e faapea: “Ia vaai saʻo ou mata i ou luma; ma ou laumata, ia faasagatonu ia i ou luma. Ia mafaufau i le ala o ou vae; ona faatumauina ai lea o ou ala uma. Aua neʻi afe i le itu taumatau po o le itu tauagavale; ia ʻalo ese ou vae i le leaga.”
12 Ia auai faamaoni i sauniga uma, ma aoaiina oe lava ia mafai ai ona e uai atu i faatonuga mai i le Afioga a le Atua. (Epe. 2:1; 10:24, 25) Ia fai ma ou sini le tausia o se faiva e fuatele mai, na i lo le vaavaai atu mo fiafiaga o loo ofo mai e lenei lalolagi faamaʻia. E aumaia e lenei mea le olioli ma le faamalieina e lē gata mai. (1 Tesa. 2:19, 20) Ma le manatu mulimuli, aua lava neʻi faatagaina se mea po o se tagata e tosoeseina ai oe mai lau auaunaga paia. “Ia outou tumau, ma le le faagaeetia, ia alualu lo outou faamalosi i le galuega a le Alii ma le le aunoa ina ua outou iloa e le se mea faaleaoga lo outou tautiga i le Alii.”—1 Kori. 15:58.