Po o Tatou Mataala Pea—E Alofia Faatosinaga?
1 I le Luka 21:36, na lapatai mai ai Iesu e faapea: “Ia outou mataala . . . ina ia taʻuaogaina outou e sao” mai mala e mautinoa lava o le a oo mai. Ua tatou ola i taimi e sili ona matautia i le talafaasolopito o le tagata. E faatalitalia mala e i latou o tautulemomoe faaleagaga. O lenei mea ua aumaia ai se tulaga lamatia ia i tatou taitoatasi. Na taʻua e Iesu le aai, feinu, ma popolega o le olaga i aso fai soo. Aisea? Auā e oo lava i na mea, e mafai ona alu uma ai lo tatou taimi, ma avea ma faalavelave e oo ai ina lamatia i le tautulemomoe faaleagaga.
2 Faatosinaga Masani: O nisi ua oo lava ina matuā faaaafia i latou i faafiafiaga e lē tatau, ua oo foi ina fai ma masani le matamata faasoloatoa i le TV. O le mea moni, o le muai saili o le Malo, e lē uiga faapea e tatau ona tatou alofia ituaiga uma o faafiafiaga. Pe a tatou magafagafa ma paleni, ona mafai lea ona aogā faafiafiaga. (Faatusatusa i le 1 Timoteo 4:8.) Ae o le a avea o se faalavelave pe a oo ina tuu faamuamua i o tatou olaga, ma alu uma ai le tele o o tatou taimi, a tatou alamanuia, po o lo tatou auai i le galuega talaʻi o le Malo.
3 O le isi faatosinaga masani e māfua ai le tulemomoe faaleagaga, o le naunau tele i mea faitino e lē manaomia. E manaomia ai e lenei mea le faaaluina e se tagata o le tele o le taimi i se galuega totogi faaletino ma oo ai ina lē amanaia mea faaleagaga. Ua leiloa sini faaleagaga o nisi ona ua matuā faaaafia i latou i le sailia o mea faitino ina ia maua ai se olaga sololelei. A o tatou manaomia “mea e aai ai ma mea e oofu ai,” e tatau ona leoleoina i tatou faasaga i le atiina aʻe o le manao tele i tupe, e mafai ona taʻitaʻiseseina ai i tatou i le faatuatua. (1 Timo. 6:8-10) O le lē taulau ona taulai atu o la tatou vaai i faanaunauga o le Malo, o le a oo ai ina tatou faatalalē i le tausia o manaoga faaleagaga o o tatou aiga ma lē taulau ai ona faataunuuina la tatou faiva.—1 Timo. 5:8; 2 Timo. 4:5.
4 Ua faatagaina pea e isi o latou ‘loto e faamamafaina i popolega o le olaga’ ua oo ai ina latou momoe faaleagaga. (Luka 21:34) I nisi taimi, e oo mai ai le popole ona o faafitauli o le soifua mālōlōina po o mafatiaga ona o tulaga i le aiga. Ae o na popolega totino, e lē tatau ona faavaivaia ai lo tatou mataala i le iuga o lenei faiga o mea ua matuā latalata mai lava.—Mare. 13:33.
5 E leai lava se isi mea e faafiafiaina ai le Tiapolo nai lo o le taulau manuia pe a tatou oo i se tulaga e pei o loo moemiti, i le tuliloaina o se sini faalelalolagi. E tatau ona tatou tauivi ina ia tatou mataala ai faaleagaga. Ua tatou iloa e oo mai le aso o Ieova e pei o se gaoi,’ ma e tāua tele lo tatou “mataala, ma ia faautauta.” (1 Tesa. 5:2, 6) Afai tatou te tau iloa ia i tatou lava ni faailoga o le tautulemomoe, ua uunaia i tatou ina ia vave ona “faatea ese ai galuega o le pogisa.”—Roma 13:11-13.
6 Fesoasoani ia Tatou Tumau ai Pea i le Mataala: O ā na fesoasoani? E tāua tele le tatalo. E tatau ona tatou tatalo e lē aunoa. (1 Tesa. 5:17) O le mafuta vavalalata ma le faapotopotoga Kerisiano, o le a ‘taufaatupu ai ia i tatou le alofa ma galuega lelei.’ (Epe. 10:24) O le faia o se suesuega faamaoni e lē aunoa a i tatou lava, e mafai ona fesoasoani e tausia ai lo tatou mataala e tusa ai ma lo tatou manaoga ina ia manumalo i o tatou vaivaiga. (2 Kori. 13:5) O le tausia o se masaniga lelei i le faia o suesuega totino o le a tumau ai ona “tausia [i tatou] i upu o le faatuatua.” (1 Timo. 4:6) Afai tatou te filigā, e mafai ona tatou mautinoa, o le a mafai ai ona tatou alofia faatosinaga, ‘ia mataala, ma tumau i le faatuatua.’—1 Kori. 16:13.