“Ia Outou Nofo Sauni”
1 I le valoaga mataʻina a Iesu e faatatau i le iʻuga o lenei faiga o mea, na ia lapataʻi mai ai e faatatau i le faaalu uma o le taimi i mea masani o le olaga. (Mata. 24:36-39; Luka 21:34-36) Talu ai e mafai ona amata le puapuaga tele i so o se taimi lava, e matuā talafeagai tele la le utagiaina o le lapataʻiga a Iesu lea na faapea mai: ʻIa outou nofo sauni auā o le itu aso tou te lē manatunatu ai, e sau ai le Atalii o le tagata.’ (Mata. 24:44) O le ā o le a fesoasoani iā i tatou e faia lenei mea?
2 Faafetaiaʻia o Popolega ma Mea e Taaʻina Ese Ai: O se tasi o mailei i le itu faaleagaga lea e tatau ona puipuia mai ai i tatou, o le “popole i mea a le olaga nei.” (Luka 21:34) I nisi o atunuu, o le mativa, le leai o ni galuega, ma le taugatā o le soifuaga ua faigatā ai ona maua mea e manaʻomia o le olaga. I nisi o atunuu, o le mauaina o mea faitino, o se tulaga taatele lea i soifuaga o tagata. Afai la ua avea le popole i meafaitino ma mea ua amata ona alu uma i ai o tatou mafaufau, ua tatou iai i se tulaga lamatia o le ono lē taulau ona tatou taulaʻi atu i mea moni o le Malo. (Mata. 6:19-24, 31-33) E fesoasoani sauniga faa-Kerisiano iā i tatou e taulaʻi atu ai i mea o le Malo. Po o fai ea ma ou sini le auai i sauniga uma?—Epe. 10:24, 25.
3 Ua tumu le lalolagi i aso nei i faatosinaga, lea e faigofie ai lava ona aveesea o tatou taimi tāua. O le faaaogāina o le komepiuta, e mafai ona avea ma mailei pe a faaalu e se tasi lona taimi tele e autiloina ai le Initineti, faitauina o I-meli e auina mai ma tali atu i ai, po o le taalo i taaloga i le komepiuta. E tele taimi e mafai ona maumau i le televise, ata tifaga, mausa e fiafia ai, faitauina o tusitusiga faalelalolagi, ma taaloga, lea e itiiti ai lava le taimi ma le malosi e totoe mo le faia o mea faaleagaga. O faafiafiaga, taaloga ma mālōlōga e itiiti lava se faafouina e maua mai ai, ae o suʻesuʻega faale-Tusi Paia a le tagata lava ia faapea ma le aiga e maua mai ai aogā e faavavau. (1 Timo. 4:7, 8) Pe e te faaavanoaina se taimi e manatunatu loloto ai i le Afioga a le Atua i aso taʻitasi?—Efe. 5:15-17.
4 Maʻeu lo tatou lotofaafetai ona ua faatulaga e le faalapotopotoga a Ieova se polokalame o aʻoaʻoga faaleagaga e fesoasoani iā i tatou ina ia ʻsao mai i mea uma ua tali oo mai, ma ia tutū i luma o le Atalii o le tagata.’ (Luka 21:36) Seʻi o tatou faaaogāina atoatoa nei sauniuniga faaleagaga ma ia ʻtatou nofo sauni’ ina ia avea lo tatou faatuatua ma mea “e iʻu ai i le viiga, ma le mamalu, ma le manuia pe a faaalia mai Iesu Keriso.”—1 Pete. 1:7.