Toe Foi ia i Latou e Naunau
1 E toatele i tatou na faamanuiaina i le tufatufaina o mekasini ma polosiua. O lea la, e tāua tele ai lo tatou toe foi atu ma taumafai e faagaee atili le naunau. Peitai, atonu e faalagolago le faamanuiaina o i tatou i lea tulaga, i le lelei o le auala tatou te sauniuni ai muamua ae tatou te leʻi toe ō atu e fai toe asiga.
2 Ia manatua, e tutusa pau lava mea o loo popole ai le toatele o le au talavou ma le au matutua. O lomiga o le Awake! o Me o loo iai ni mataupu o loo iloiloina ai faafitauli i aso nei mai manatu o tagata talavou. O nei mataupu ua aumaia ai le malamalamaga e mafai ona fesoasoani i le au talavou, faapea foi o latou mātua ina ia talisapaia mea e tāua moni i le olaga.
3 Afai sa e tuua le “Awake!” o Me 8, atonu e te fuafua e tulitatao e ala i le ofoina i ai o le lomiga o Me 22. E mafai ona e faapea atu:
◼ “Sa faatomua mai e le lomiga na ou tuua ia te oe talu ai, mataupu e faatatau i le faamoemoe mo tamaiti. O loo ola aʻe a tatou fanauiti i se lalolagi e itiiti se faamoemoe o loo aumaia ai mo le lumanai. Ua faaalia e le toatele o talavou lo latou lē fiafia e ala i a latou amioga faatautee. Peitai, o loo iai nisi o i latou o loo tausia pea lo latou paleni, ma tausisi i auala maualuluga. O lenei mataupu i le lomiga fou lea o le Awake! o loo faamatalaina ai le auala na lagolagoina ai e le faamasinoga maualuga le tulaga o se tasi talavou. Ou te manatu o le a e talisapaia le mea o loo fai mai ai lenei lomiga.”
4 Atonu e te filifili e ofo se polosiua e faaaogā ai nei upu:
◼ “Sa ou fiafia tele i le ta talanoaga lea na fai talu ai, e faatatau i le lumanai o lenei lalolagi. Pe mafai ea ona e manatunatu i le ituaiga o olaga o le a iai i inei i le lalolagi, pe afai lea o le a aumaia e le Atua le mutaaga i le oi ma le amio leaga? [Faaali i ai le ata i le itulau e 24-27 o le polosiua Po o Silasila Alofa mai ea le Atua ia i Tatou?] Seʻi mātau mai foi, o mau uma lava nei mai le Tusi Paia i le itulau e 25 e oo i le 27, o loo faamatalaina mai ai faamanuiaga o le a aumaia e le Malo o le Atua. [Ia filifili mai se mau se tasi, ma faitau saʻo mai foi lava i le polosiua.] Ou te fiafia tele e tuu atu lenei lomiga ia te oe.”
5 Pe a e toe foi atu, atonu o le a e iloa ai o loo iai ni tusi faalelotu a lē ona le fale, ma ua ia lagona ua lava lea. E mafai ona e faapea atu:
◼ “E tusa po o le ā la tatou lotu, ae o loo aafia uma i tatou i le tele o popolega tutusa—o solitulafono, o maʻi tigaina, ma popolega i lo tatou siosiomaga—pe lē o le tulaga ea lea o iai? [Faatali mo se tali.] Pe e te lagona e iai ea se vaifofo moni i nei faafitauli? [Faitau le 2 Peteru 3:13.] O le fuafuaga o a matou lomiga, o loo taʻua i le itulau e 2 o Le Olomatamata. [Faitau se fuaiupu se tasi pe lua ua e filifilia.] O le toatele o tagata e lē o ni Molimau a Ieova, e fiafia tele e faitau a matou lomiga ona o loo iai se feau e aumaia ai se faamoemoe, e faavae mai le Tusi Paia.” Afai e talilelei mai lē ona le fale, faamatala i ai la tatou polokalama o suesuega faale-Tusi Paia.
6 Atonu e te fai atu nei upu:
◼ “I le taimi mulimuli sa ou iai i inei, sa ta talanoa ai e faatatau i fuafuaga i le lumanai mo lo tatou lalolagi. O le ā sou manatu e faatatau i lenei lipoti? [Taʻu se tala fou o loo mamafa i ai mafaufau o tagata.] Pe a faalogo tagata i nei ituaiga o tala, e faapogaia ai i latou e mafaufau po o fea o agaʻi atu i ai lenei lalolagi, a ea? Matou te talitonu o na mea e faaalia ai ua tatou ola nei i ‘aso e gata ai’ e pei ona valoia i le Tusi Paia i le 2 Timoteo 3:1-5.” Pe a maeʻa ona faitau ni manatu tāua, e mafai ona e fesili i ai pe ua ia iloa ni tagata e fetaui tonu i ai lenei faamatalaga. Ia faaauau i le talanoaina o se tasi o tamai ulutala i le itulau e 234-238 o le tusi Reasoning.
7 Afai tatou te sauniuni lelei ma faaalia se faanaunauga moni e fesoasoani atu, e mafai la ona tatou mautinoa o le a faalogo mai ē loto faamaoni.—Ioa. 10:27, 28.