Polosiua—O Meafaigaluega Aogā mo le Faiva
1 O se tufuga tomai, e masani lava ona ia feaveaia ni meafaigaluega eseese, ma ua tofu lava ma lona aogā patino. Ma i le avea o ni ē faalauiloa le Malo, ua i a i tatou le tele o polosiua eseese e fesoasoani i a i tatou ia faafetaiaia ai ma le agavaa ia manaoga o tagata tatou te talaʻi atu i ai. (Faata. 22:29) Atonu o le a lua feiloai i se fale ma se tasi o loo mafatia. A o se tasi i se isi aiga o loo manaonao mo se malo amiotonu, ae atonu o loo iai foi se isi o taumānatu pe iai ea se fuafuaga i le olaga. E mafai faapefea ona tatou faaaogā a tatou polosiua e fesoasoani ai i nei tagata?
2 I le ofoina atu o le polosiua “Po o Silasila Alofa mai ea le Atua ia i Tatou?,” e mafai ona e faapea atu:
◼ “Ua mafuli ina tuuaia e nisi tagata o loo matauina puapuaga ma le leai o se faamasinotonu i le lalolagi ia mea uma i le Atua. Ua latou manatu e faapea, talu ai ona o le Atua e ona le malosi uma lava, o le a ia faaiuina o tatou puapuaga pe a na fai e manatu moni mai o ia mo i tatou. O le ā sou faalogona i lena tulaga? [Faatali mo se tali.] O loo faaalia i le Salamo 72:12-14 le manatu moni mai o le Atua mo i tatou. Ua lē tuuaia o ia ona o le puapuaga ma le leai o se faamasinotonu. Ua ia folafola mai e faapea e toeitiiti ona aveesea lea o ē amioleaga. O le polosiua la lenei ua faaulutalaina e faapea, Po o Silasila Alofa mai ea le Atua ia i Tatou?, ua faaalia ai mea o le a ia faia ma le auala tatou te maua ai aogā.” Atonu o le a mafai ona e faaauau le talanoaga i faamatalaga o i le itulau e 27, palakalafa e 22.
3 Afai o loo e faaaogāina le polosiua o le “Malo,” atonu o le a e manao e amata faapea lau faamatalaga:
◼ “E toetoe lava o tagata uma o le a iai se taimi e fia iloa ai po o le ā le fuafuaga o le olaga. Pe tau ea ina ola mo le 70 po o le 80 tausaga ona oti loa lea? Pe faamata o loo iai se uiga sili atu o le olaga? O le ā sou manatu? [Faatali mo se tali.] I le Salamo 37:29, ua tatou iloa ai le fuafuaga matagofie a le Atua mo le tagata ma le laueleele.” A maeʻa le faitauina o le mau, suʻe i le ata i le itulau e 29, ma faamatala atili tulaga o le a ola ai i le Parataiso.
4 E mafai ona faatomua le polosiua “Faauta!” e ala i le faaalia o le ata o loo i le faavaa atoa, ma fesili atu i ai e faapea:
◼ “O le ā sou manatu, o le ā e manaomia ina ia faapea ai le lalolagi? [Faatali mo se tali.] O tagata uma i lenei ata ua iai fale ma galuega e faafiafiaina ai. O loo iai le filemu ma le tele o meaai, ma e aunoa ma se polusione i le lalolagi. E ui lava i a latou taumafaiga malolosi, ua lē mafai e malo faaletagata ona aumaia se lalolagi faapea. Ae, ua faamautinoa mai e le Tusi Paia i a i tatou o le a ‘faia ia fou o mea uma lava’ e le Atua. [Suʻe i le itulau e 30, ma faitau le Faaaliga 21:3, 4.] E mafai ona fesoasoani lenei polosiua ia te oe e aʻoaʻoina le mea e manaomia ona e faia ina ia e ola ai i lena lalolagi fou.” Afai e faaalia se naunau, suʻe i le itulau e 3, ma faataitai le auala o tatou faia ai se suesuega faale-Tusi Paia.
5 Atonu e te faaaogā le auala lea e taulima ai le polosiua o le “Ola i Le Lalolagi” i le faapea atu:
◼ “O le toatele o tagata ua latou manatu e ao ona latou ō i le lagi ina ia olioli ai i le ola e faavavau, ae o le ā sou manatu e tusa ai ma le ola e faavavau i le lalolagi? [Faatali mo se tali.] Ua faamautinoa mai e le Tusi Paia i a i tatou le mafai ona maua o le ola e faavavau, ma ua faamatala mai ai le auala tatou te ausia ai lena sini.” Faitau le Ioane 17:3. Ona faaali lea i lē ona le fale le ata e 49 ma fesili atu faapea: “Pe e te manao e ola i se lalolagi faapea?” Ia ofo atu i ai le polosiua, ma faia fuafuaga mo le toe asia.
6 Ua iai i polosiua ia mataupu ua fetaui lelei ma o tatou taimi, ua taliina ai fesili a tagata, ma maua ai faamafanafanaga. O le faaaogāina o nei meafaigaluega ma le tomai, o le a mafai ai ona tatou fesoasoani i ē loto faamaoni ina “ia oo ina iloa lelei le upu moni.”—1 Timo. 2:4.