Ia Muai Saili le Malo o le Atua—I le Faia Pea o Taulaga o Viiga

¹ O i latou o loo sailia muamua le Malo e masani lava ona manatunatu ina ia talanoa atu e uiga i a Ieova ma lona Malo. (Sala. 145:11-13) I aso uma lava, o loo iai avanoa e faamanū atu ai i lona suafa ma tautala atu ai i le tala lelei. (Sala. 96:2) O le vivii atu i a Ieova sa avea o se fiafiaga i le faisalamo o lē na faapea mai: “Matou te vivii atu pea lava i le Atua.” (Sala. 44:8) Pe afai o lo tatou faalogona foi lena, ona tatou naunautai ai lea e faia e lē aunoa so tatou sao i le faiva o le Malo.

² E leʻi faapatino maia e Ieova po o le ā le tele o se taimi e ao ona tatou faaaluina i le faiva, ae ua ia faalaeiauina i tatou ina ia vivii atu ‘pea’ i a te ia. (Epe. 13:15) Pe afai e talafeagai ma ō tatou tulaga, e ao ona tatou sini ina ia iai se taimi e vivii atu ai i a Ieova i vaiaso taitasi. O ē ua latou faia faapea atonu e mafai ona faatulaga ā latou mataupufai ina ia paeonia lagolago ai mai lea taimi i lea taimi, po o le faia foi faalausosoo. O nisi o ē ua olioli i le auaunaga faapaeonia lagolago atonu e mafai ona avea o ni paeonia sauatoa.

³ Po o ā lava ō tatou tulaga totino, ae pe mafai ea ona tatou toe faateleina la tatou taulaga o viiga? E uunaia le maelega e le loto talisapaia. O le suesueina totino o le Afioga a le Atua e faatupuina ai le loto talisapaia. O sauniga a le faapotopotoga e uunaia ai i tatou ina ia faaalia lea talisapaia i ni auala e aogā. O le aufaatasi vavalalata ma isi tagata o loo maelega e vivii atu, e mafai ona ‘taufaatupu ai i tatou mo le faia o galuega lelei.’ (Epe. 10:24) O le faaaogaina atoatoa o sauniuniga mai le faapotopotoga, e ono mafai ai ona tatou faateleina atili la tatou taulaga o viiga.

⁴ Sa faataatia e le perofeta fafine o Ana se faaaoaoga lelei i le auaunaga a Ieova. E ui ina 84 tausaga lona matua, ae sa “lei alu ese ia i le malumalu, a ua auauna o ia i le Atua . . . i le ao ma le po.” (Luka 2:37) O lona auai ma le loto atoa i mea sa fai a le faapotopotoga na matuā faamalieina ai lava o ia. O le tala a le Tusi Paia e uiga i lana auaunaga faamaoni ua avea o se faalaeiauga mo i tatou i aso nei.

⁵ Na fautua mai Paulo e faapea, o i latou ‘o ē malolosi sa tatau ona fesoasoani i vaivaiga o ē ua lē malolosi.’ (Roma 15:1) Atonu, ua iai nisi i la outou faapotopotoga o ē o le a aogā i ai lau fesoasoani alofa ma au faalaeiauga. Atonu e na o le pau le mea e manaomia o sina au valaaulia lua te galulue faatasi i le faiva i le fanua. Atonu e manaomia e se tagata talaʻi se auala po o se tasi la te galulue. Atonu o le faafitauli o se isi o lona tau faavaivai, ma atonu la o oe e mafai ona e saunia se lagolagosua e faamalosiau ai ma toe faatupu ai le maelega o lena tagata mo le auaunaga o le Malo. (1 Tesa. 5:14) O lou naunau e “tufatufa atu ni . . . mea i le mativa o le au paia” ua faaalia ai le faanaunauga moni mai lou loto ina ia faateleina atili le viiga i le suafa o Ieova.—Roma 12:13.

⁶ E lē mafai ona tatou faitauina ma le tonu mea uma ua faia ma o le a faia e Ieova mo i tatou. E matuā leai se auala e mafai ai ona tatou toe totogiina atu o ia mo nei faamanuiaga uma. Maeu la ni mafuaaga malolosi ua iai ‘ina ia tatau ai i mea uma e mānava ona vivii atu i a Ieova’!—Sala. 150:6.