Ia Naunau i Mekasini a o Faagasolo Oketopa
1 O loo iai i Le Olomatamata, ma le Awake! le feau faamafanafana loto ma faalaeiau o le tala lelei e faavavau. O le naunau i mekasini, e aofia ai le iai o se taimi e faitau maeaea ai ma iloilo ni auala e ono faaosofia ai le naunau o tagata o la tatou oganuu i mataupu o iai.
2 Muamua lava, ia faamasani i mataupu na o loo faamatilatila mai i le faavaa. O ata i le faavaa e masani lava ona faatosina mai ai le tagata e talia le mekasini. Ia fili ni mataupu e te manatu o le a naunau i ai tagata i lau oganuu. Pe ua na o se tasi ea se lotu e auai atu uma i ai tagata? O ā o latou popolega autū? O lou mafaufau i nei manatu, o le a tatau ona mafai ai ona e sauniunia se taulimaga e uigā. Seʻi mātau taulimaga na o loo faatulaga atu i lalo.
3 Pe afai o loo e ofoina “Le Olomatamata” o Oketopa 1, atonu e te faatomuaina le mataupu “Le Tusi Paia—O le ā Lona Tāua Moni?” E mafai ona e faapea atu:
◼ “E toetoe lava o aiga uma i lo tatou nuu nei e te maua i ai se Tusi Paia. O le toatele o ē o loo iai Tusi Paia ua latou manatu o loo iai i le Tusi Paia se mea e faapitoa lona tāua.” Atonu la e te fesiligia i ai se fesili tuusao e pei o lenei: “O le ā se mea e te manatu ua tutasi ai le Tusi Paia?” po o le, “O le ā e te manatu o le a fesoasoani i le toatele o tagata ina ia aogā ai le Tusi Paia i a i latou?” O le matauina o le tali mai a lē e ona le fale, e ono mafai ai ona e fai atu atili ni manatu talafeagai e pei o le: “Ua iai se faamaoniga mataina e faamaonia ai le faagaeeina e le Atua o le Tusi Paia, ma o se taiala maufaatuatuaina foi mo i tatou. Ua iai le poto lea e mafai ona taitaia ai i tatou i le ola e faavavau. [Faitau le Ioane 17:3.] E toatele tagata e faaaloalo i ai ae latou te lē iloa le auala e faaaogā ai. O lenei mataupu i Le Olomatamata ua faamatala atu ai le auala e mafai ai e oe lava ia ona faaaogā le Tusi Paia ina ia maua ai tali i au fesili e uiga i le lumanai. Ou te fia tuuina mo oe lenei kopi. Pe afai e te fiafia i ai, ona ou oo mai lea i le isi aʻu asiasiga ma ou faasino atu ai i a te oe le auala e mafai ai ona auina atu e lē aunoa Le Olomatamata i a te oe i lou aiga.”
4 I le faaaogaina o “Le Olomatamata” o Oketopa 15, atonu e sili i a te oe se faafeiloaiga faigofie e pei o lenei:
◼ “E toetoe lava o tagata uma ua iai sē e pele i a i latou ua toesea ona o le maliu. I lenei mataupu, ua lāgā ai le fesili, ‘O le ā le Tulaga o Ē ua Maliliu?’ O le ā sou manatu i le mea e tupu pe a maliu se tasi? [Faataga se tali mai.] Pe afai e te fia iloa le tali a le Tusi Paia i lena fesili, ou te fia tuuina la lenei mekasini mo oe.” Ia sauni le sāvali O le ā le Faamoemoe mo Ē Pele ua Maliliu? e ofo atu, pe afai e manao lē ona le fale i se mataupu e puupuu.
5 O le “Awake!” o Oketopa 22, ua iloiloina ai se tasi o faamaoniga mai le tele o faamaoniga ia e faaalia ai le lē taulau o tapuaiga sese. I le faaaogaina o mataupu, “Pe a Faaituau Lotu i Taua,” e mafai ona e faatū atu le fesili lenei:
◼ “Pe ana fai o lea e i inei Iesu i le asō, o le ā sou manatu, i sona finagalo e tusa ai o faiga sauā uma o loo tatou vaaia? [Faataga se tali mai.] Na aʻoaʻoina e Iesu i tatou ina ia alolofa atu i tagata uma, e oo lava i ō tatou fili. Peitai, o le tele o tapuaiga ia o loo faapea mai o ni Kerisiano, o loo faaituau i fefinauaiga faapolotiki. E te manatu o faapefea ona aafia ai tagata o ē o loo mananao e usiusitai i mea na aʻoaʻo mai e Iesu? [Faataga se tali mai.] O lenei lomiga o le Awake! ua talanoaina ai lena fesili ma faamatala mai ai le auala o le a tali mai ai le Malo o le Atua.”
6 Ia taumafai e ofo atu mekasini i aiga taitasi, e tusa lava pe lē o mafai ona e talanoa atu i ai i le Tusi Paia. O le toatele o tagata o loo taliaina mekasini ua fiafia e faia se foai itiiti i la tatou galuega tau aʻoaʻoga faale-Tusi Paia i le lalolagi aoao.