Ofo Mekasini i Avanoa Uma
1 E iai a tatou mafuaaga lelei e talisapaia ai Le Olomatamata ma le Awake! O ā nisi mekasini e talafeagai lelei ma le tulaga faavaomalo? I le masina lenei, o le a faatomua ai mekasini i la tatou galuega talaʻi, ma maeu ni faamatalaga malolosi o loo i le lomiga o Oketopa! E masani lava ona tatou tufa atu le tele o a tatou mekasini i le galuega mai lea fale i lea fale; ae peitai, o le a tatou mananao ia sauniuni foi e ofo atu i isi avanoa talafeagai uma.
2 Pe a ofoina “Le Olomatamata” o Oketopa 1, e mafai ona e faagaee le fiafia i le mataupu “Se Lalolagi e Aunoa ma ni Taua—O Afea?” i lou faapea atu:
◼ “E toatele tagata e tau manatu pe aisea e foliga mai ai ua lē mafai ona maua se lalolagi e aunoa ma ni taua e ui lava i taumafaiga uma a tagata. O le ā sou manatu e uiga i nei faamatalaga i le itulau e 5 o Le Olomatamata o Oketopa 1? [Faitau le fuaiupu muamua o uluai palakalafa e lua i lalo o le ulutala “Lotu—O se Faalavelave Sili,” ma faatali mo se tali.] O le mea moni, e lē o le uiga o lenei mea e faapea o le a iai pea ni taua. Ia mātau, le folafolaga a le Atua i inei i le Isaia 9:6, 7.” E mafai ona e faitauina lenei mau mai lau Tusi Paia pe e pei ona sii mai ai i le mataupu i Le Olomatamata. Faamatala puupuu e faapea, ua lagolagoina e Le Olomatamata le Malo o Ieova e faapea ua na o lea le faamoemoe mo se lalolagi filemu, ma faalaeiau le tagata e faitau le mataupu.
3 Pe a e tau atu i tagata e fiafia i lotu, aisea e le faatomua ai se mataupu mai “Le Olomatamata” o Oketopa 15? O lenei taulimaga e le taumatea o le a faaoso ai se naunau ma talileleia ai:
◼ “Ou te fia iloa sou manatu i le fesili lenei: Po o se mea tatau ona alofa i le Atua ma mataʻu ia te ia i le taimi lava e tasi?” Faatali mo se tali, ma faitau le faamatalaga i le ata “Aisea e Mataʻu ai Nei i le Atua Moni?” (Fai. 12:13) Faaaogā se tasi o tala faatusa i le itulau e 199 o le tusi Reasoning, ma ofo le mekasini pe a faaalia se naunau.
4 Pe a galulue mai lea fale i lea fale, aua le misia faleoloa ma pisinisi laiti. Ua faamatalaina e i latou e masani ona asiasi atu i faleoloa lenei galuega e faapea, o se mea e olioli ai ma e fua mai. E mafai ona e taumafai i sina taulimaga faigofie faapenei pe a ofoina le “Awake!” o Oketopa 8:
◼ “Ua matou iloa e talisapaia e le au faipisinisi lo latou maua pea o lomiga fou e uiga i mataupu o loo aafia ai lo latou nuu. Ou te mautinoa o le a e fiafia i lenei mataupu.” Ona faamatala puupuu lea o se manatu mai le mataupu “Aiga e Taitoatasi Mātua—E Mafai Faapefea ona Latou Taulau?”
5 Afai o pisi moni le tagata o loo e faafeiloai atu i ai, e mafai ona e faaali atu mekasini ma e faapea atu:
◼ “Ou te iloa e te lei faatalitalia se asiasiga i le asō, o lea o le a faapuupuu laʻu sāvali. Ou te fia tuuina atu ia te oe se avanoa e te faitau ai i se mea e sili ona tāua.” Faasino i ai se mataupu ua uma ona e filifilia, ma ofo loa mekasini.
6 Pe a ofoina atu “Le Olomatamata” o Oketopa 15, e mafai ona e faapea atu:
◼ “O le ā sou manatu i le fesili i le faavaa o lenei mekasini: ‘Aisea e Mataʻu ai nei i le Atua moni’? [Faatali mo se tali.] Ua faamatalaina e nei mataupu e lua pe aisea e mafai ai ona avea le mataʻu i le Atua o se mea e lelei i o tatou olaga, ma po o le ā o le a mulimuli ane ai lava tupu i le mataʻu lea e masani ona tupu ia i tatou i aso nei. Ou te fiafia e tuu lenei kopi mo oe pe afai e te fia faitau i ai.”
7 Tausi lelei se faamaumauga mai lea fale i lea fale, ma toe foi atu e asia i latou uma na tuu ai mekasini. Afai e faaalia le naunau moni i le toe asiga, ofo se tusiga i se tasi o mekasini po o mekasini uma. Ia tatou nofo sauni ma mataala e ofo a tatou mekasini i avanoa talafeagai uma.