Le Tala Lelei mo E Agamalu
1 Ua tatou ola i se vaitaimi ua faaloloi mai ai le faamasinoga. (Eseki. 9:5, 6) Ua faanatinati le tatau ona faailoa atu i e agamalu uma i so o se mea ina ia mafai ai ona latou nofo sauni mo le mea o le a tupu i le lumanai. I lona alofa ma le agalelei, ua tofia ai e Ieova ona tagata ina ia “talaʻi le tala lelei i e agamalu.” (Isa. 61:1, 2, NW) O a tatou mekasini ua fesoasoani ia i tatou e folafola atu ai lenei tala lelei i vaipanoa uma lava.
2 Ua saunia e Le Olomatamata ma le Awake! meaʻai aano faaleagaga e faamalosia ma uunaia ai i tatou. Ua faamafanafanaina e agamalu e Le Olomatamata i le tala lelei e faapea, ua le pine ona faaliliuina lea e le Malo o le Atua le lalolagi e avea ma parataiso. Ua atiina aʻe e le Awake! le mautinoa i le folafolaga a Lē na Foafoaina mea e uiga i se lalolagi fou e filemu ma saogalemu. O le faasalalauina atu o nei mekasini i le lalolagi aoao, o se tasi lea o auala aupito sili ona vave e faaooina atu ai le tala lelei i e agamalu. O ā ni manatu mo talanoaga e mafai ona tatou faamatilatilaina i lomiga fou?
3 E mafai ona e faatomua “Le Olomatamata” o Me i lou faasino atu i le mataupu “Mauaina o Aogā Mai le Faitauina o le Tusi Paia i Lea Aso ma Lea Aso” ma fesili atu:
◼ “O le a se aogā e te manatu e mafai ona tatou maua mai i le faitauina o le Tusi Paia? [Faataga mo se tali.] Ua fesoasoani mai le Tusi Paia lava ia i le Roma 15:4, ia i tatou e mafaufau ai i lena fesili. [Faitau le Roma 15:4] O le toatele o tagata i lo tatou nuu e tofu lava ma le Tusi Paia, a e e toaitiiti lava e maua se taimi e faitau ai i ai e lē aunoa. Ua matou talitonu e na o le pau lava le faamoemoe mautinoa mo le lumanai, o loo maua lea i le Tusi Paia—ma o le a faamanuiaina i tatou pe afai tatou te faitau i ai.” Ona toe faaopoopo atu lea i ai ma ofo loa mekasini.
4 I “Le Olomatamata” o Me 15, o loo faatomua ai se mataupu faagaee loto ua faaulutalaina: “Se Olaga Fou mo O Tatou Tuaa.” Atonu e mafai ona e faagaeeina le fiafia i lenei faatomuaga:
◼ “E masani lava ona taumanatu le toatele pe na faapeī o latou tuaa. Ona ua maliliu i latou ma ua le o toe i ai, ua faia ai e le toatele se faaiuga e faapea, o le a lē mafai ona tatou iloa. E te manatu e i ai se avanoa e mafai ai ona tatou toe vaai ai i o tatou tuaa?” Faatali mo se tali. Ona faitau lea o le Ioane 5:28, 29, ma faamatala le folafolaga a le Atua i le avatua ia i latou o se olaga fou i le lalolagi parataiso.
5 E mafai ona e ofo le “Awake!” o Me 8 i lou fesili atu:
◼ “O le ā sou manatu, o le ā se mea e mafai ona faia ina ia uigā ai le olaga?” Faatali mo se tali. Faasino i le mataupu “O le ā le Uiga o le Olaga?”, (What is the Meaning of Life?) itulau 26, ma faitau upu a Solomona i le Failauga 2:11. Ona faasino lea i le fautuaga i le mataupu e 12 fuaiupu e 13. Ia valaaulia le ona le fale e talia le mekasini.
6 Afai o e tufaina mekasini a o lei oo ia Me 14, ia faamautinoa ua ave ni kopi o le Tala o le Malo Nu. 34 ma ofo i so o se tasi o se e lei maua se kopi. I le tufaina atu o mekasini, e tatau ona tatou manatua e talisapaia le faia e i latou e ona fale o se meaalofa tauofo itiiti mo le lagolagoina o la tatou galuega pe afai latou te mananao ai. E tatau lava ona tatou nofo sauni pea e tufa atu a tatou lomiga, i le iloa e faapea, atonu o le a faitauina e isi i le aiga faapea foi ma uo o e atonu e asiasi atu ia i latou. (1 Timo. 6:18) O le tala lelei o loo tatou avatua i e agamalu e ono mafai ona faasaoina ai o latou ola.—1 Timo. 4:16.