Toe Asia i Latou Uma na Tuu ai Polosiua
1 Na faamālō le aposetolo o Paulo i tagata Filipi ona o lo latou ‘manatua o ia.’ (Fili. 4:10) Afai tatou te faaaogaina la latou faaaʻoaʻoga e fai ma taʻiala mo le faiva i le fanua, o le a tatou ‘toe manatua’ ai i latou na tatou molimau atu i ai, ma vave loa ona tatou ō atu e toe asia i latou.
2 Afai sa e tuua le polosiua “O le Malo o le a na Aumaia le Parataiso,” e mafai ona e faapea atu:
◼ “Sa ou mafaufau i la ta talanoaga lea na fai i le isi aso, ma ou manatua ai ni mau se lua ou te manao ta te talanoa i ai. Atonu e te manatua, na ta talanoa e uiga i le pulea e le Atua o le lalolagi. I le Tusi Paia, ua folafola mai ai e Ieova le Atua e faapea, o le a faataunuuina lava lenei mea. [Faitau le Tanielu 2:44.] E te talitonu e mafai ona tupu moni lena mea? [Faatali mo se tali.] Faafofoga i le mea o fetalai mai ai le Atua e uiga i lona tomai e faataunuu ai ana folafolaga. [Faitau le Isaia 55:11.] Pe e lē tatau ea ona faamalosia ai i tatou e lena mea tatou te faatuatua ai i le Malo o le Atua? A e o afea o le a faataunuu ai e le Atua ana folafolaga?” Faamatala i ai e faapea, o le a e taliina lena fesili i le isi au asiasiga.
3 Pe afai e te toe asia se tagata na aveina le polosiua “Pe a Maliu se Tasi e Pele i a te Oe” e mafai ona e faapea atu:
◼ “Sa ou taumafai faapitoa lava e toe foi mai, ona o le manatu i la ta talanoaga e uiga i le maliu o se tasi.” Faaali le ata i le itulau e 30 ma e faapea atu: “O e manatua lenei vaaiga fiafia e uiga i tagata ua toe faatutūina mai ma toe faatasia ma ē pele ia i latou? Sa ou tuu atu se fesili ia te oe, po o fea o le a faia ai lenei mea, po o le lagi po o le lalolagi. Atonu na e maua le tali a le Tusi Paia i le itulau e 26 o lenei polosiua.” Talanoa i manatu autū i le palakalafa lona tolu e oo i le palakalafa lona lima, ma faitau le Ioane 5:21, 28, 29. A lava le taimi, faitau so o se mau o mau na o loo iai i le itulau.
4 Sa e amataina se suesuega i le polosiua “Faauta! Ou te Faia ia Fou Mea Uma Lava”? E mafai ona e faia le mea lenei pe a e toe asiasi atu:
◼ Toe suʻe i le itulau e 30, ma faasino i le fesili: “I ā auala ua matilatila ai le Tusi Paia?” Suʻe i le itulau e 3 ma le 4, ma toe autalu palakalafa 1-4 faapea ma le ata i le faavaa o le polosiua. Faitau se mau se tasi pe lua na o loo taʻua i le faamatalaga i le pito i lalo o le palakalafa lona 4. Faamatala e faapea, o le Tusi Paia ua na o lea le tusi o loo ofoina mai ai se faamoemoe ofoofogia. Fai ni fuafuaga mo le isi au asiasiga. Pe a uma le asiasiga lona tolu, a e foliga mai o le a faaauau pea le suesuega, ona mafai lea ona e amata lipotia se isi suesuega fou!
5 O lea, ia toe manatunatu ia i latou na e feiloai atu i ai. Ia maumauai e toe foi atu, ma sauni se mea aogā e tufa atu. E mafai ona avea oe o se tasi e “fua mai lava ia” i le faia o soo fou.—Mata. 13:23.