Pusa Fesili
◼ O le ā le umi e tatau ai ona faia se suesuega faale-Tusi Paia ma se tagata i le tusi o Le Poto?
O loo faamanuia e Ieova lana faalapotopotoga i aso nei. Ua tatou vaaia faamaoniga o lenei mea i tausaga taitasi a o faia taumafaiga maumaututū a le faitau afe o ē fou i le upu moni. Ua faamaonia le avea o le tusi o Le Poto o se meafaigaluega aogā i le faataunuuina o lenei tulaga. Ua faamatala mai i le lomiga o Ianuari 15, 1996, o Le Olomatamata e faapea o lenei tusi ua saunia e fesoasoani ai i se tagata aʻoga o le Tusi Paia e vave ona agaigai i luma faaleagaga, ma atonu e ono papatisoina ai i totonu o ni nai masina.
Ona o lenei tulaga, ua fautua mai ai Le Olomatamata lava lea, i le itulau e 17 e faapea: “Pe a uma ona faamaeʻa e se tasi lana suesuega faale-Tusi Paia i le tusi o Le Poto ma ua papatiso foi, atonu e lē o se mea manaomia ona toe faia se isi suesuega ma ia i se tusi lona lua.”
Ae faapefea se tagata e lei papatisoina ae ua maeʻa le tusi o Le Poto? Ua faamanatu mai ia i tatou e La Tatou Faiva o le Malo o Iuni 1996, itulau e 6, palakalafa 23, ia manatu o loo taʻua i Le Olomatamata e uiga i le lē toe suesueina o nisi tusi faaopoopo ma le tagata aʻoga lava lea pe afai ua maeʻa le tusi o Le Poto. Pe o le uiga ea o lenei mea e faapea tatou te lē toe fia avatua se fesoasoani i se tagata aʻoga o le Tusi Paia pe afai ua oo i le tulaga lena? E leai. Tatou te mananao ia maua e tagata le poto faavae o le upu moni. Ae peitai, o se faiaʻoga e lelei lana aʻoaʻo e faatalitalia lana fesoasoani atu i se tagata aʻoga e naunau moni ia ona mauaina le poto manaomia e faia ai lana faaiuga talafeagai e auauna ai ia Ieova i lena taimi puupuu. Atonu ona o o latou tulaga patino ua mananao ai nisi o tagata aʻoga o le Tusi Paia ia faia le suesuega e sili atu nai lo o le faatasi i le vaiaso.
O le mea moni, o nisi tagata aʻoga e tuai ona agaigai i luma nai lo isi. Ae afai ua uma ona suesueina le tusi o Le Poto, lea atonu e faaaluina ai sina taimi e umi atu nai lo le taimi e masani ai, ae lei faia lava se faaiuga a le tagata pe auaufaatasi ma le faapotopotoga, atonu ua tatau loa i le tagata talaʻi ona talanoaina le mataupu ma se tasi o toeaina o le Komiti o le Auaunaga a le Faapotopotoga. Afai o nisi o tulaga e lē masani ai o aofia ai, atonu e manaomia la nisi fesoasoani faaopoopo talafeagai. Ua fetaui tonu lenei ma le mataupu silisili o loo taʻu mai i le palakalafa 11 ma le 12 i le itulau e 17 o Le Olomatamata o Ianuari 15, 1996.
O le talisapaia o le aʻoaʻoina o le poto faavae o le upu moni e tatau ona uunaia ai le tagata aʻoga e auai i sauniga faa-Kerisiano. O lenei mea e mafai ona taʻitaʻia atu ai le tagata aʻoga i le avatua o ni faamaoniga manino o lona faanaunauga e auauna ia Ieova. Afai e lē o vaaia na uiga o le talisapaia faaleagaga i le taimi e uma ai ona suesue le tusi o Le Poto mo se taimi umi, atonu la e fautuaina loa le tatau ona faamutaina o le suesuega.