Se Vaaiga Auiluma i le Galuega Faanatinati o le Faia o Soo

¹ A o lei tuua e Iesu le lalolagi, na ia faatonuina ona soo ina ia “fai nuu uma lava ma soo.” Na manaomia ai i lenei mea lo latou matuā uaʻi atu i le faagaoioia o le talaʻi ma le aʻoaʻo atu ma faalautele atu la latou galuega ia oo i nuu ainā uma o le lalolagi. (Mata. 28:19, 20; Galu. 1:8) Pe na latou vaai ea i lea tofiga o se avega mamafa e faigata tele ona tauaveina? E leai pe a fua atu i le aposetolo o Ioane. Ina ua mavae ona faaaluina le 65 tausaga o le avea o ia o sē faia soo, na tusi ai e faapea: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.”—1 Ioa. 5:3.

² Ua faamaonia i faamaumauga faale-Tusi Paia o galuega a uluai Kerisiano e faapea na latou galulue faanatinati i lo latou tofiga ia faia ni soo o Iesu Keriso. (2 Timo. 4:1, 2) Na latou faia lea, e lē tau ona o se tiute, ae ona o lo latou naunau fiafia e viia le Atua ma avatu le faamoemoe o le faaolataga i isi. (Galu. 13:47-49) Ona o i latou na avea ma soo na mulimuli ane avea i latou ma ē faia soo, na vave ai ona tupu le faapotopotoga Kerisiano i le uluai senituri.—Galu. 5:14; 6:7; 16:5.

³ Ua Faavavevave le Galuega o le Faia o Soo: O le galuega o le faia o soo, ua silisili lava i lo se isi taimi muamua atu ma ua faataunuuina i lenei 20 senituri! Ua faapea ai ona faitau miliona tagata ua taliaina le tala lelei ma gaoioi faatatau i ai. (Luka 8:15) Ona ua matuā faaitiitia lava le taimi o totoe mo lenei faiga o mea, ua saunia ai e “le auauna faamaoni ma le mafaufau” mo i tatou meafaigaluega e mafai ona faafaigofie ai mo tagata loto faamaoni ona aʻoaʻoina le upu moni i se tulaga vave.—Mata. 24:45.

⁴ I le 1995 na tatou mauaina ai le tusi o Le Poto e Taʻitaʻia ai i le Ola e Faavavau, ma i le 1996 na mulimuli mai ai le polosiua O le ā e Manaomia e le Atua Mai ia i Tatou? E tusa ai ma le tusi o Le Poto, na taʻua e le lomiga o Le Olomatamata o Ianuari 15, 1996, itulau 14, e faapea: “E mafai ona suesueina lenei tusi e 192 ona itulau mo se taimi puupuu talafeagai, ma o i latou ‘ua saunia mo le ola faavavau’ e tatau ona mafai ona lava ni mea latou te aʻoaʻoina mai le suesueina o le tusi ina ia faia ai sa latou tuuina atu ia Ieova ma papatisoina ai.”—Galu. 13:48.

⁵ O le faaopoopoga o La Tatou Faiva o le Malo o Iuni 1996, “Le Auala e Faia ai Soo e Ala i le Tusi o Le Poto” na aumaia ia i tatou le sini lenei: “Pe a tusa ai ma tulaga ma le atamai o le tagata suesue, atonu e talafeagai mo oe ona suesueina le tele o mataupu i se lesona e tasi i le umi e tasi le itula pe ā, e aunoa ma le faatopelau o le suesuega. O le a sili atu ona lelei le agaigai i luma o tagata suesue pe afai e tausisi pea le faiaʻoga ma tagata suesue i le faia o le la suesuega i vaiaso taitasi.” Na faapea atili mai le mataupu: “E ao ona faatalitalia e oo atu i le taimi e maeʻa ai le suesuega a le tagata i le tusi o Le Poto, ua tatau ona manino lelei mai lona faamaoni ma le loloto o lona faanaunau e auauna atu i le Atua.” Na faamatala mai e le Pusa Fesili i La Tatou Faiva o le Malo o Oketopa 1996: “O se faiaʻoga e lelei lana aʻoaʻo e faatalitalia lana fesoasoani atu i se tagata suesue e naunau moni ia ona mauaina le poto manaomia e faia ai lana faaiuga talafeagai e auauna ai ia Ieova i lena taimi puupuu.”

⁶ Maua ai Iuga i le Tusi o Le Poto: I le taimi o le papatisoga o se tamaitai talavou, na ia faamatala mai ai ona lagona sa iai i le suesueina o le tusi o Le Poto. Mo sina taimi, sa ia suesueina ai le tusi o le Ola e Faavavau. Ina ua tatalaina le tusi o Le Poto, na sui loa e le tuafafine na faia lana suesuega i le tusi fou. Na vave lava ona iloa ai e le tagata suesue le manaomia ona faia o sana filifiliga, ma sa uunaia ai o ia e faia se agaigai i luma faavavevave mai lena taimi. Ua faapea mai le tamaitai talavou lea, ua avea nei ma o tatou tuafafine: “Na fesoasoani mai le tusi o le Ola e Faavavau ia ou alofa ia Ieova, ae na fesoasoani mai le tusi o Le Poto ia ou faia se filifiliga e auauna ia te ia.”

⁷ Manatu i le vave na aʻoaʻoina ai e se isi fafine le upu moni. Ina ua maeʻa lana suesuega lona lua, ona ia auai lea i se sauniga i le Maota o le Malo i le taimi o le asiasiga a le ovasia matagaluega. O le vaiaso lena, i lana suesuega lona tolu, na ia fai ai i le uso ua uma ona faia lona tuuina atu ia Ieova ma ua manao e avea ma tagata talaʻi e lei papatisoina. Na feiloai loa o ia ma toeaina, na faamaoniaina o ia e avea ma tagata talaʻi, ma o le vaiaso lava na sosoo ai na amata ai i le auaunaga i le fanua. O lona matuā naunautai tele i lana suesuega faale-Tusi Paia na ia faanoi ai ni ona aso mālōlō mai lana galuega ina ia suesue faalua pe faatolu i le vaiaso ma faaalu le tele o taimi i le faiva. O nisi taimi, e la te faia ai le lua i le tolu mataupu i le suesuega e tasi. Sa amata ona ia faatatauina mea na ia aʻoaʻoina i vala uma o lona olaga, faaumaina le tusi o Le Poto i le fa vaiaso, ma agaʻi atu ai ina papatiso!

⁸ O le tane a le tuafafine na faamatala maia ia lava faapea “o se paaga lē talitonu e pei ona masani ai.” I se tasi aso, na ofoina atu ai e se uso ia te ia se suesuega faale-Tusi Paia i le tusi o Le Poto i le tuutuuga faapea e mafai lava ona toe tuu pe a mavae le suesuega muamua po o se isi lava taimi o le suesuega. Na lotomalie le tane e faataitai, e ui ina sa lei naunau e suesue i le aʻoga a o talavou ma na te lei suesueina lava se tusi faalelotu mo le silia i le 20 tausaga. O le ā lana tali atu i le suesueina o le tusi o Le Poto? Na ia faapea mai: “O se fiafiaga moni le iloaina o le faigofie o le auala na tusia ai lenei fesoasoani faale-Tusi Paia. O loo manino le aumaia o faamatalaga ma o mea moni lava o loo tutupu, ma e lei umi ae ou matuā naunau atu i le isi a ma suesuega ma le manatu ia iloa mai ai se mea. Na mulimuli ma le tomai loʻu faiaʻoga i metotia o le faia o soo ua faatulaga mai e le Sosaiete, ma faatasi ma le fesoasoani a le agaga o Ieova, na ou papatiso ai i le fa masina mulimuli ane ai. Ou te fai atu moni lava, pe afai tatou te ati ae se naunau mo le faia o soo, faaauau ona sailia i latou o ē saʻo o latou loto o loo i le oganuu, faaaogā le tusi o Le Poto ma isi fesoasoani faale-Tusi Paia e pei ona saunia mai e le Sosaiete ma e sili atu ona tāua, tatalo mo le taitaiga a Ieova, e mafai ona ia i tatou le faaeaga sili ona faapitoa o le fesoasoani atu ia fai tagata ma soo.” O faaaoaoga ua taʻua i luga o ni mea tutupu moni lava e uigaese. O le toatele o a tatou tagata suesue e lē o faapena le vave ona ō mai i le upu moni.

⁹ Eseese le Agaigai i Luma o Tagata Suesue: E tatau ona ioeina e matuā eseese tomai o faiaʻoga ma tagata suesue o le Afioga a le Atua. A lē o le gese po o le vave foi o le tuputupu aʻe faaleagaga. O nisi tagata suesue e vave lava ona faia ni agaigai i luma i ni nai masina lea e umi mo isi ona faia faapea. E fua le tuputupu aʻe faaleagaga o se tagata i le aafiaga mai lona tulaga aʻoaʻoina, e ala i lona tulaga talisapaiaina o mea faaleagaga, ma e ala i le loloto o lona tuutoina atu ia Ieova. E lē o tagata uma o tatou suesue ua “latou talia le upu ma le fiafia tele” ina ia suesue ai le Tusi Paia i aso taitasi, e pei ona sa faia e tagata Perea anamua ia na avea ma tagata talitonu.—Galu. 17:11, 12.

¹⁰ O le mafuaaga lena ua aumaia ai e le faaopoopoga o La Tatou Faiva o le Malo o Aperila 1998, “Manaomia—Nisi Suesuega Atili Faale-Tusi Paia,” le taiala talafeagai lenei: “O le mea moni, e lē tutusa uma le vave o le agaigai i luma o tagata suesue o le Tusi Paia. O nisi e lē tutusa le naunau i mea faaleagaga e pei o isi, e lē vave foi ona latou puepuemauaina mea o loo aʻoaʻoina. O isi e pisi tele o latou olaga ma atonu e lē mafai ai ona tuuina atu le taimi lea e manaomia e faia ai se mataupu atoa i vaiaso taitasi. O lea, i nisi o tulaga, atonu e tatau ona faia e sili atu i lo o le faatasi se suesuega ina ia talanoaina ai nisi o mataupu, ma nisi masina faaopoopo e faaumaina ai le tusi.”

¹¹ Ia Tausia e Ē Faia Soo se Vaaiga Paleni: E manaomia ona fetuunai le alualu o le suesuega ia ogatusa ma tulaga ma le tomai o le tagata suesue. Talu ai o loo faalaeiauina i tatou ia amataina suesuega i le polosiua o le Manaomia, e ono faaalu ai le lua i le tolu masina e faauma ai a o lei oo atu i le tusi o Le Poto. Afai tatou te faatatauina fautuaga uma o loo faatulaga mai i le faaopoopoga o La Tatou Faiva o le Malo o Iuni 1996, o lona uiga e mafai la ona faaaluina ai se isi ono i le iva masina ina ia faaumaina ai le tusi o Le Poto. O nisi na faatoʻā amata le suesuega i le tusi o Le Poto ua sui atu i le polosiua Manaomia ina ia fesoasoani i le tagata suesue ia vave atu ona ia aʻoaʻoina upu moni faavae o le Tusi Paia. Ona toe faasolo lelei lea o le suesuega sa faia i le tusi o Le Poto. Afai o loo amata le suesuega i le tusi o Le Poto ma agaigai lelei i luma, e ono talafeagai la ona suesueina le polosiua o le Manaomia pe a maeʻa le tusi, ia autaluina vave ai upu moni faavae o le Afioga a le Atua. I so o se itu lava, tatou te lē mananao ia faatatope le tusi ae lē o maua lelei e le tagata suesue le malamalamaga manino o le poto saʻo. O tagata suesue uma lava e manaomia se faavae mausalī mo lona faatuatua fou ua maua i le Afioga a le Atua.

¹² O le iloa o le tulaga o loo tatou iai i le gasologa o le taimi, ua matuā faanatinati ai nai lo se isi lava taimi ona tatau ona fesoasoani atu i isi ia aʻoaʻoina le upu moni. Faatasi ma le tatalo faifai pea ina ia amataina ni suesuega fou faale-Tusi Paia, seʻi o tatou tatalo foi mo i latou ua uma ona amata ona tatou suesue faatasi. Ona avea ai lea ma so tatou fiafiaga le faaauau pea ona papatisoina o nisi soo “i aso uma lava, e oo lava i le gataaga o le lalolagi.”—Mata. 28:20.