Fesoasoani i Ē Leai se Poto Ina ia Malamalama
1 E ala i le galuega o le faia o soo, ua tatou aʻoaʻoina ai isi i mea o manaomia e le Atua mai ia i latou. (Mata. 28:19, 20) Ua faia nei se taumafaiga tele i le lalolagi aoao e Molimau e sili atu i le lima miliona, ina ia faia lena mea. O le taulau manuia e lē fuaina i le aofai o itula na faaaluina, lomiga na tufaina atu, po o suesuega faale-Tusi Paia ua amataina. Ua faataulauina lo tatou sini ina ua malamalama tagata ma gaoioi e tusa ma mea ua latou aʻoaʻoina.
2 O le fesoasoani atu i isi i le tulaga faaleagaga, e aofia ai le “faamalamalamaina o ē e leai se poto.” (Sala. 119:130, NW) Pe a pāʻia loto ona faatoʻā gaoioi ai lea o tagata ‘pe a latou lagona.’ (Mata. 15:10) A o faalauteleina ma faateleina la tatou galuega, ua oo ai ina faateleina lo tatou iloa o le manaomia ona faafaigofie la tatou tautala ma le aʻoaʻo atu. O le mafuaaga lena ua lomia ai e le Sosaiete le polosiua, O le ā e Manaomia e le Atua Mai ia i Tatou? O loo iai ni mataupu saunia lelei mo suesuega o loo talanoaina ai aʻoaʻoga faavae o le Tusi Paia. O lesona e pupuu, o faaupuga e faigofie, ma o faatonuga e faigofie lava ona malamalama i ai, ua matuā sili ai ona talisapaia le polosiua e ituaiga uma o tagata.
3 O lenei polosiua, o le a faatomua faatasi ma mekasini i le masina o Aperila ma Me. Ua fautuaina e faapea, pe a faia fuafuaga mo lau auaunaga faalevaiaso, ia e fuafua e ofo mekasini i Aso Toonai, ae faatomua ia polosiua i lau faiva i isi aso uma o le vaiaso. Ave le polosiua i tagata na talia muamua lomiga. Ia manatua e mafai ona aogā faapitoa e aʻoaʻo ai le fanau, tagata e tāutala i se isi gagana, ma i latou e faalēlelei le faitau.
4 Faaaogā se Taulimaga Faigofie: Pe a ofoina le polosiua Manaomia, tataʻi i le itulau e 2, o iina o loo faamatala mai ai e faapea, “ua fuafuaina lenei polosiua e faia ai ni suesuega faale-Tusi Paia.” Faasino i le palakalafa e 3 i le itulau e 3 e faailoa atu ai le pogai e manaomia ai e se tagata ona suesueina le Tusi Paia. Ia faaoso lona naunau i nisi o ulutala o lesona na o loo faaalia ai upu moni faigofie o le Tusi Paia. Ia faataitai le auala ua mafai ai e lenei polosiua ona avea le aʻoaʻoina o se mea e fiafia ai, ma fai i ai e mafai ona e fesoasoani totino atu ia te ia.
5 Faia se Suesuega e Agaigai i Luma: O lo tatou sini, o le faia o mea e sili atu nai lo o le tau ina faia suesuega—e tatou te mananao e faia ni soo o ē o le a avea o ni lagolago mausali o le tapuaiga moni. E mafai ona talanoaina le polosiua mo na o ni nai vaiaso, ma e tatau ona taitaiina saʻo atu ai i se suesuega i le tusi o Le Poto. (Tagai i le faamatalaga i lalo i le itulau 31.) Mai lava i le amataga, ia fesoasoani i le tagata aʻoga ia iloa le faalapotopotoga a Ieova. (Tagai i le tusi Reasoning, itulau 283-284.) Faamamafa le tāua o sauniga a le faapotopotoga, ma faamatala i ai, o le auai i sauniga ua saunia ai se malamalamaga loloto i le auala e faatinoina ai le tapuaiga moni.—Epe. 10:24, 25.
6 O le faia o se sao atoatoa i lenei galuega faapitoa ia Aperila ma Me, e mautinoa o le a tatou maua ai le olioli e ala i le fesoasoani atu i tagata loto faamaoni e “maua le poto” e taʻitaʻia ai i le ola.—Faata. 4:5.