Maua Aogā Mai le Polokalame o le Aʻoga o le Faiva Faatiokarate o le 1999
1 O Iesu, sa avea o le Faiaʻoga Sili ona tomai. Sa “matuā ofo foi [tagata] i lana aʻoaʻoga.” (Mare. 1:22) E ui lava e leai se tasi o i tatou e mafai ona tautala ma aʻoaʻo lelei e pei o Iesu, ae mafai lava ona tatou taumafai ina ia faaaʻoaʻo ia te ia. (Galu. 4:13) O lea la, o le faia o so tatou sao i le polokalame o le Aʻoga o le Faiva Faatiokarate, o le a fesoasoani ia i tatou e atili faaleleia ai pea la tatou tautala ma tomai e aʻoaʻo ai.
2 O le Lauga Nu. 1 mo le 1999, o le a tele lava ina faavae mai i mataupu o mekasini o Le Olomatamata ma le Ala Mai! o le 1997. O vaega o le tusi “All Scripture” e tatau ona talanoaina, o le a lomia atu o se polosiua i le faa-Samoa. O le a sili atu ona faateleina ai lo tatou malamalama i mea faaleagaga pe afai tatou te muai faitau i nei faamatalaga ma mulimuli ane faalogo atu i ai i le polokalame o le aʻoga. O i latou o le a tofia e fofogaina atu nei lauga e aʻoaʻo ai, e tatau ona faia ni faatatauga aogā o le mataupu, i le avatua lea i se auala faatupu fiafia ma le tiotio. O le Lauga Nu. 3 o le a faavae mai i le tusi o le Fiafia i le Aiga, ma o le Lauga Nu. 4, o le a faaautu i se tagata i le Tusi Paia, e ui o le a fesuiai tusi autū e faavae mai ai nei lauga. E tatau i le ovasia o le aʻoga ona manatunatu ma le faaeteete i le mataupu a o lei faia ia tofiga. O tagata aʻoga uma e tofia e faia lauga mai le tusi, Fiafia i le Aiga, e tatau ona fai ma faaaoaoga lelei i o latou lava olaga faaleaiga.
3 Ia Faatatau le Fautuaga ma Sauniuni Lelei: E mafai e tagata uma ona faaleleia atili o latou tomai i le tautala ma le aʻoaʻo atu. (1 Timo. 4:13) I lea, e tatau ona tatou saili ni fautuaga ma aua lava neʻi manatu i ai faapea o se mea e alofia. (Faata. 12:15; 19:20) O le molioo atu o le upu moni i se auala uigā i sauniga ma le faiva i le fanua, e manaomia ai ni mea e sili atu na i lo le tau ina faailoa mai o mea moni pe na ona faitauina foi o mau e aunoa ma le manatunatu i ai. E manaomia ona tatou pāʻia loto ma uunaia i latou o ē o loo faalogo mai ia i tatou. E mafai ona tatou faia lenei mea e ala i lo tatou tautala ma le mautinoa i le upu moni mai o tatou loto. (Faatusatusa i le Galuega 2:37.) O fautuaga o loo tatou maua i le aʻoga o le a fesoasoani ia i tatou i le faataunuuina o lenei mea.
4 I le taimi lava e te maua ai se tofiga, ia mafaufau e uiga i agavaa tau failauga e manaomia ona e galue i ai e pei ona faamatala mai i le tamai tusi Auala e Faaleleia ai Lou Tomai i le Tautala ma le Aʻoaʻo Atu. Ia manatunatu po o le ā e manaomia ona e fai ina ia faatatauina ai le fautuaga na tuuina mai ia te oe talu ai. Mafaufau loloto i lau matua, le faatulagaga o le a e faaaogaina pe a manaomia, ma le auala o le a e faatatauina ai mau na o loo maua i lau mataupu. Ia mafaufau foi i se auala e sili ona lelei e faaaogā ai faamatalaga i le aʻoaʻo atu ma ia uunaia ai le aofia.—1 Timo. 4:15, 16.
5 Afai e te fefe i le tusia o lou igoa i le aʻoga, ia tatalo mo lena mea ma ia talanoa ma le ovasia o le aʻoga e faatatau i ou lagona. E mafai e tagata uma ona maua aogā e ala i le faaaogā atoatoa o le polokalame lea o le a saunia i le Aʻoga o le Faiva Faatiokarate i le 1999.