‘Ia Faaalia le Onosai’

¹ A o tatou vaai atu i le matuā lalata mai o le iuga o le faiga tuai o mea a Satani, e matuā tāua ai lava lo tatou ‘faaalia o le onosai’ a o faatalitali atu i le aso e laveai ai e Ieova. Ae maise lava i lenei taimi ua matuā lata mai lava, ua maumauai ai fili leaga malolosi e faatosina ese o tatou manatu mai le finauga silisili e faatatau i le pule silisili ese a Ieova ma ua faaosoosoina foi i tatou ina ia faaseseina e ala i le anoanoai o mea e tatou te naunau totino i ai. I lenei auala, o le a faatogafiti ai i tatou e Satani ina ia lafoaia pe faagesegese i le faia o se sao i le galuega talaʻi o le Malo. (Iako. 5:7, 8; Mata. 24:13, 14) I ā auala e mafai ona tatou faaalia ai sea onosai o loo manaomia?

² E Ala i le Faapalepale: Pe a tatou fetaiai ma le lē āno mai o tagata po o ni teteega i la tatou faiva, o le faapalepale, o le a fesoasoani ia i tatou e finafinau ai i le talaʻiga. O le a lē faigofie ai ona faafefeina i tatou pe tetee atu pe afai e faafuasei ona suia uiga o tagata e tatou te feiloai, pe faaalia foi le lē alolofa. (1 Pete. 2:23) O lenei malosi i totonu e mafai ona puipuia ai i tatou mai le faia o ni tala lē lelei e uiga i tagata i la tatou oganuu o ē e lē manatu mamafa mai pe ʻinoʻino i la tatou galuega, i le iloaina o na tala o le a faalotovaivaia ai i tatou ma i latou o loo tatou galulue i le faiva.

³ E Ala i le Onosai ma le Finafinau: E mafai ona tofotofoina lo tatou onosai pe afai e uma ona faia se talanoaga lelei i le auaunaga i le fanua, ae ua lē mafai ona tatou toe maua atu le tagata fiafia i le fale. E faapena foi ia i latou e tatou te suesue pe afai e tuai ona agaigai i luma pe tutū mo le upu moni. Ae peitai, o le onosai ma le finafinau e masani ona tauia i ni iuga lelei. (Kala. 6:9) E tele ni taimi na toe asia ai e se tuafafine se tamaitai talavou ona faatoʻā amata ai lea o se suesuega faale-Tusi Paia. I uluai asiasiga e lima, sa tele lava isi mea na pisi ai le tamaitai. I le taumafaiga lona ono, na susū uma ai le tuafafine i timuga faatasi ma uila ma faititili, ae leai se tasi sa iai i le fale. Ae peitai, i le maumauai e toe asi tasi lava le tamaitai, na toe asiasi atu ai le tuafafine ma maua ai le tamaitai ua nofo sauni mai e faia le suesuega. Mulimuli ane, na matuā agaigai i luma le tagata suesue ma e lei umi se taimi ae tuuina atu loa lona ola ia Ieova.

⁴ Ua tatou iloa, o le a lē faatuai mai le aso o Ieova. O lea e tatou te faatalitali ai i lona galueaiina o mea, i le iloa e faapea, o le onosai o le Atua o le a maua ai fua lelei. (Sapa. 2:3; 2 Pete. 3:9-15) E tatau ona tatou faaalia le onosai e pei o Ieova ae aua le faavaivai i le faiva. “E ala i le faatuatua ma le onosai,” ia vaavaai atu ia Ieova na te tauia outou ona o la outou galuega mamafa.—Epe. 6:10-12, NW.