“Ia . . . Pupula Atu lo Outou Malamalama”
1 O le lalolagi o loo siʻomia ai i tatou, o loo pouliuli i le tulaga tau i amioga tatau ma le faaleagaga. Ua faaalialia e le malamalama o le upu moni “galuega le aoga” a le pouliuli ina ia mafai ai ona ʻalofia nei mea faatausuai e oti ai. O le mea lea, na uunaʻia ai e le aposetolo o Paulo Kerisiano e faapea: “Ina savavali ia pei o e ua malamalama.”—Efe. 5:8, 11.
2 “O le fua o le malamalama” e matuā eseese mamao lava ma le pouliuli o le lalolagi. (Efe. 5:9, LF) Ina ia fuaina mai lenei fua, e manaʻomia ai ona avea i tatou o ni faaaʻoaʻoga matilatila o le olaga faa-Kerisiano, o ni ituaiga o tagata ua faamaonia e Iesu. E tatau foʻi ona tatou faaalia uiga e pei o le lotoatoa, faamaoni, ma le aasa mo le upu moni. O lenei fua e manaʻomia ona faaalia i o tatou olaga i aso uma ma i la tatou faiva.
3 Ia Susulu Atu i Avanoa Uma: Na taʻu atu e Iesu i ona soo e faapea: “Ia . . . pupula atu lo outou malamalama i luma o tagata.” (Mata. 5:16) I le faataʻitaʻi ia Iesu, ua tatou faaatagia atu ai le malamalama o Ieova e ala i le talaʻia o le Malo o le Atua ma ana fuafuaga. E tatou te susulu atu e pei o mea e faamalamalama aʻi pe a tatou asiasi atu i fale o tagata ma pe a tatou faalauiloa atu le upu moni i nofoaga e faigaluega ai, i le aʻoga, i o tatou tuaoi, pe i so o se isi lava mea e tatou te maua ai se avanoa.—Fili. 2:15.
4 Na fetalai Iesu e faapea, o le a ʻinoʻino nisi i le malamalama. (Ioa. 3:20) O lea, e tatou te lē faavaivai ai pe afai e mumusu le toʻatele o tagata e faataga “le malamalama o le tala lelei i le mamalu o Keriso” e susulu atu ia te i latou. (2 Kori. 4:4) E silafia e Ieova loto o tagata ma e lē finagalo o ia ia iai i ona tagata i latou e faia amioga lē tonu.
5 Pe a tatou mulimuli i ala o Ieova ma olioli i le malamalama faaleagaga, ona mafai ai lea ona tatou faaatagia atu lena malamalama i isi. Afai e latou te iloa mai e ala i a tatou amio o loo ia te i tatou “le malamalama o le ola,” atonu o le a uunaʻia ai foʻi i latou e faia ni suiga ina ia avea ai i latou ma ē tauaveina le malamalama.—Ioa. 8:12.
6 E ala i le faasusulu atu o lo tatou malamalama, ua viia ai Lē na Foafoaina i tatou ma fesoasoani ai i tagata lotofaamaoni ina ia iloa o ia ma maua ai le faamoemoe o le ola e faavavau. (1 Pete. 2:12) Talu ai o loo ia te i tatou le malamalama, seʻi o tatou faaaogāina la e fesoasoani atu ai i isi ia iloa le ala e ō ese mai ai i le pouliuli faaleagaga ma fuaina mai galuega o le malamalama.