ʻIa Susulu Atu Lo Outou Malamalama’
1. O le ā le faaeaga ua tatou maua e tatau ona faasusulu atu i isi?
1 E mai le vaveao e oo i le afiafipō, o le matagofie o le susulu mai o le malamalama, e viia ai Ieova le Atua. Peitaʻi, e iai se isi malamalama na finagalo Iesu ia maua e ona soo—o “le malamalama o le ola.” (Ioa. 8:12) O le mauaina o lenei malamalama faaleagaga, o se faaeaga faapitoa e aofia ai ni tiute tauave tāua. Na faatonuina e Iesu: ʻIa susulu atu lo outou malamalama i luma o tagata,’ ina ia maua ai e isi aogā. (Mata. 5:16) A o i ai lenei lalolagi i se tulaga matuā pogisa faaleagaga, e tatau ona faasusulu atu lenei malamalama, ma ua matuā sili atu ona manaʻomia i le taimi nei! E faapefea ona faasusulu atu lo tatou malamalama, e pei ona faia e Keriso?
2. Na faapefea ona faaalia e Iesu le tāua o le tufa atu o le malamalama faaleagaga?
2 E Ala i le Talaʻi: Na faaaogā e Iesu lona taimi, malosi, ma alaʻoa e faasusulu atu ai le malamalama o le upu moni, i tagata i o latou aiga, nofoaga faitele ma atumauga, i so o se mea na maua i ai tagata. Na ia silafia le aogā tumau o le saunia o le malamalama moni faaleagaga. (Ioa. 12:46) Ina ia oo atu i le toʻatele o isi tagata, na saunia ai e Iesu ona soo ina ia avea ma “malamalama o le lalolagi.” (Mata. 5:14) E latou te faasusulu atu lo latou malamalama e ala i le faia o galuega lelei i tuaoi, ma le tufaina atu o upu moni faaleagaga.
3. E faapefea ona faaalia lo tatou talisapaia moni o le malamalama o le upu moni?
3 E manatu mamafa tagata o le Atua i le matafaioi o le “savavali e faapei o le fanau o le malamalama,” ma e latou te talaʻi i so o se mea e maua ai tagata. (Efe. 5:8) O le faitau o le Tusi Paia po o isi lomiga faale-Tusi Paia i nofoaga e mafai ona iloa mai ai oe e isi tagata, i taimi e mālōlō ai i le galuega po o le aʻoga, e mafai ona maua ai le avanoa mo se talanoaga faale-Tusi Paia. O le auala lea na amata ai e se tuafafine talavou se suʻesuʻega faale-Tusi Paia, ma tufa atu tusi i tamaiti e toʻa 12 o lana vasega!
4. Aiseā e aofia ai amioga lelei i le ʻfaasusuluina atu o lo tatou malamalama?’
4 E Ala i Amioga Lelei: O le susulu atu o lo tatou malamalama e aofia ai foʻi ma a tatou amio i aso taʻitasi. (Efe. 5:9) E masani ona matilatila amioga a Kerisiano i galuega, aʻoga, ma isi nofoaga faitele, ma e maua ai avanoa e talanoa atu ai e uiga i upu moni o le Tusi Paia. (1 Pete. 2:12) Mo se faaaʻoaʻoga, o amioga lelei a se tamaitiiti e lima tausaga, na māfua ai ona vili atu le faiaʻoga i ona mātua. Na ia faapea atu: “Ou te leʻi iloa se tamaitiiti ua matuā malosi lona talitonuga i tulaga mamā tau amio!” Ioe, o la tatou talaʻiga ma amioga lelei, e tosina mai ai tagata i “le malamalama o le ola” ma viia ai lo tatou Atua.