“O Fea e Mafai Ona Ou Maua ai le Taimi?”
1 O le faitioga lava lenā a le toʻatele o i tatou, talu ai le tele o a tatou mea e fai i le olaga. Ua faapea mai le upu, o le taimi, o se tasi o mea e aupito sili ona tāua ma e sili foʻi ona vave mou atu mai iā i tatou. O lea, o fea la e mafai ona maua ai le taimi mo mea e sili ona tāua, e pei o le faitauina ma le suʻesuʻeina o le Afioga a le Atua?—Fili. 1:10.
2 O le manatu autū, e lē o le taumafai e saʻilia nisi taimi, ae o le filifilia o mea e tatou te mananaʻo e fai i taimi ia tatou te maua. E tofu uma lava i tatou ma le 168 itula i le vaiaso, o le 100 o na itula atonu o loo faaalu i le moe ma le faigaluega. O lea, e mafai faapefea ona tatou faaaogā tatau itula ia e totoe? Ua fautua mai le Efeso 5:15-17 (NW) e faapea, ia tatou savavali “aua neʻi faapei o e valelea, a ia faapei o e popoto; i le faatauina mai o le taimi tatau, . . . ia iloa le finagalo o le Alii.” Ua faaalia i lenei mea se manaʻoga ina ia faaaogā atoatoa avanoa uma e faia ai mea ia e fetalai mai ai Ieova e tatau ona fai.
3 Sa faatusatusa e Iesu o tatou aso i aso o Noa. (Luka 17:26, 27) O tagata i tuā i inā sa pisi i mea e fai i aso uma o le olaga. Ae peitaʻi, sa faaavanoa e Noa le taimi e fau ai se vaa telē ma talaʻi atu. (Epe. 11:7; 2 Pete. 2:5) E faapefea? E ala i le faamuamua o le finagalo o le Atua ma usiusitai atu iā te ia i le faia o mea i le ‘faapea lava ona faia.’—Kene. 6:22.
4 O le ā e Ao Ona Faamuamua? Na fetalai Iesu: “E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mata. 4:4) I vaiaso uma lava, e tatou maua ai ‘mea e ʻai faaleagaga i ona itu aso.’ (Luka 12:42) O lenei mea e manaʻomia ai le faia o se faasologa o le faitauina ma faia suʻesuʻega totino e lē aunoa ina ia ave i fale nei mea uma pe afai e tatou te maua ai aogā moni. Ona o lo tatou lotofaafetai mo meaʻai faaleagaga, e tatou te lē manatu i ai e pei o ni taumafa e ʻai faatopelau, e na ona ʻati ma folo e pei o se tasi e taumafa faavave meaʻai faaletino. Na i lo o lea, o le talisapaia ma le lotofaafetai ua faalaeiauina ai i tatou ina ia faaalu le taimi e suʻesuʻe ma olioli ai i meaʻai faaleagaga.
5 O le ave i fale o meaʻai faaleagaga e mafai ona taʻitaʻiina ai i tatou i le ola e faavavau. (Ioa. 17:3) Ua tatau ai ona faamuamua ia mea i a tatou faasologa i aso taʻitasi. Pe e mafai ona tatou maua le taimi e faaavanoa mo le faitauina o le Tusi Paia i aso taʻitasi ma sauniuni mo sauniga faa-Kerisiano? Ioe, e mafai. I lea, o le a tatou maua ai le ‘tele o le taui’ mai le iloa ma le faia o le finagalo o le Atua.—Sala. 19:7-11.