Le Aʻoga o le Faiva Faatiokarate mo le 2002
1 O le tomai e tautala ai, o se mea e manatu māmā i ai le toʻatele o tagata. Ae peitaʻi, o le tautala o se meaalofa lea mai iā Ieova, lea ua mafai ai ona tatou fetalanoaaʻi ma faailoa atu ai o tatou manatu ma faalogona i isi. O le mea aupito sili ona tāua, o le tautala, ua mafai ai ona tatou vivii atu i lo tatou Atua.—Sala. 22:22; 1 Kori. 1:4-7.
2 Ua mafai e le Aʻoga o le Faiva Faatiokarate ona toleniina ai ia tane, fafine ma tamaiti, ina ia faalauiloa atu le suafa o Ieova. (Sala. 148:12, 13) O le polokalame o le aʻoga mo le 2002, o loo aofia ai le tele o mataupu eseese o le Tusi Paia na e mafai ona aogā totino mo i tatou ma faaaogā foʻi i le faiva. O le sauniuni la mo le aʻoga ma faia ai se sao, e mafai ona faateleina ai lo tatou poto ma o tatou tomai i le avea o ni faiaʻoga o le Afioga a le Atua.—Sala. 45:1.
3 Faitau le Tusi Paia i Aso Uma: Afai e masani ona iā i tatou le Tusi Paia, e mafai la ona tatou faaaogā so o se taimi avanoa e tatou te maua e faitau ai. O le toʻatele o i tatou, e maua lava nai taimi avanoa o le aso e mafai ona tatou faaaogā i lenā auala. Maʻeu le aogā o le faitauina a itiiti mai o le tasi se itulau o le Tusi Paia i aso taʻitasi, ma e lava ma totoe lenā e mulimuli ai i le polokalame faitau-Tusi Paia lea e otooto mai i le faasologa o le aʻoga!—Sala. 1:1-3.
4 O le tomai e faitau lelei ai le Tusi Paia, e mafai ona fesoasoani iā i tatou e pāʻia ai loto o la tatou ʻaufaalogologo ma uunaʻia ai i latou e vivii atu iā Ieova. O uso e taulimaina le Lauga Nu. 2 i le aʻoga, e ao ona faataʻitaʻi, ma faataʻitaʻi, ma toe faataʻitaʻi le faitauina leotele o le tofiga. O le ovasia o le aʻoga e na te avatua le faamālō ma ni fautuaga ina ia faaleleia ai le faitau.
5 Faaaogā le Tusi o Le Poto: O le Lauga Nu. 3 ma le Nu. 4 e faavae mai i le tusi o Le Poto. O le toʻatele o i tatou atonu e tatau ona mataala i le faaaogāina o lenei fesoasoani aogā i le faiva i le fanua. E ao i tuafāfine ona filifili ni faatulagaga e aogā mo le oganuu. O le ovasia o le aʻoga e tatau ona uaʻi faapitoa atu i le auala o loo aʻoaʻo ai le Tusi Paia faapea ma lona faaaogāina.
6 Tau ia ina ia fesoasoani le Aʻoga o le Faiva Faatiokarate iā i tatou uma, ina ia faaauau pea ona faaaogā le meaalofa o le tautala lea ua tuuina mai e le Atua iā i tatou, e folafola atu ai le tala lelei ma vivii atu ai i lo tatou Atua sili o Ieova!—Sala. 34:1; Efe. 6:19