Le Fiafiaga e Maua i le Auaunaga Faataimi Atoa
1 Talu ai o oe o se tagata talavou, e lē taumatea sa e taumanatu i lou lumanaʻi. Ua taʻu mai e le Faataoto 21:5 iā i tatou e faapea “o mafaufauga o e filigā i galuega, na o le mau mea e iu i ai.” O le a lelei mo oe le manatunatu mamafa i ou sini i le olaga. A o faia au fuafuaga mo le lumanaʻi, ia iloilo le iai i le auaunaga faataimi atoa. Aiseā?
2 A e fesili atu i nisi o tagata matutua sa paeonia a o talavou i so latou manatu, o le a tali tutusa uma mai e faapea: “O aso sili na ona lelei o loʻu olaga!” Mulimuli ane i lona soifuaga, sa faapea mai se uso na tofo i le fiafiaga sa maua mai i le auaunaga faataimi atoa talu ona talavou: “E matuā faamalieina loloto aʻu i le toe tepa i tua i le taimi o loʻu talavou ma mafai ona faapea atu sa ou utagia le fautuaga atamai e faapea: ‘O lenei, ia e manatua le na faia oe i ona po o lou taulealea.’” (Fai. 12:1) E manaʻomia le faia nei o ni fuafuaga lelei, e oe ma ou mātua, ina ia faatulaga se auala e te tofo ai i lenei ituaiga o fiafiaga a o e iai i lou tulaga talavou o se tama po o se teine.
3 Mātua e, Faalaeiau le Iai i le Auaunaga Faataimi Atoa: Ona o Ieova o se Tamā alofa, o loo ia faailoa mai iā te outou le auala tonu e ui ai. (Isa. 30:21) I le saunia o lenei taʻiala agaalofa, ua ia faataatia ai se faaaʻoaʻoga mo outou o ni mātua Kerisiano. Na i lo le tuu atu i le faitalia a le fanau e filifili po o lē fea auala e sili ona lelei mo i latou, toleni ma le atamai i latou i le auala e tatau ona ui ai ina ia mauaina ai le faamanuiaga a Ieova. I se taimi mulimuli ane pe a matutua aʻe, o le a fesoasoani la outou toleniga iā i latou “e iloa ai le lelei ma le leaga.” (Epe. 5:14) Ua iloa e tagata matutua mai lo latou poto masani e faapea e lē mafai ona latou faatuatua i o latou lava manatu; e ao ona faalagolago iā Ieova ina ia faatonutonuina o latou ala. (Faata. 3:5, 6) O loo sili atu ona iai lenei manaʻoga i talavou, o ē itiiti lo latou poto masani i le olaga.
4 Mātua e, a o agaʻi atu o outou alo i le 13 ma ona tupu tausaga, pe i lalo ifo foʻi, ia talanoa saʻo i ai e uiga i galuega o loo avea ma o latou sini. O le a taumafai le ʻaufaufautua i aʻoga, o faiaʻoga, ma aumea i aʻoga e taaʻina i latou ina ia filifilia galuega faalelalolagi ma meafaitino. Fesoasoani i o outou alo ina ia filifili mataupu i le aʻoga o le a maua ai ni toleniga aogā, lea o le a faaauupegaina ai i latou ina ia tausia o latou manaʻoga faaletino e aunoa ma le faataulagaina o manaʻoga o le Malo. (1 Timo. 6:6-11) I le tele o tulaga, o le aʻoaʻoina i se aʻoga maualuga faatasi ai ma se aʻoaʻoga i se matātā patino ma/po o le mauaina o le toleniga a o faigaluega, atonu e na o le pau lea o le mea e manaʻomia ina ia tausia ai ma le talafeagai manaʻoga o se tasi a o amata i le faiva o le paeonia sauatoa.
5 Faalaeiau talavou ia uumau i le meaalofa o le nofofua. Afai e latou te faaipoipo mulimuli ane, o le a iai i latou i se tulaga e sili atu ona lelei e tauaveina ai avega tauave mamafa o se faaipoipoga. (Tagaʻi i le palakalafa e 19 o le faaopoopoga “Pe Mafai Ona E Faaavanoaina Oe?” i La Tatou Faiva o le Malo o Iuni 2001.”) E ala i le talanoa mautinoa e uiga i le paeonia, le auauna i nofoaga o loo tele ai le manaʻoga, auaunaga i Peteli, ma le auaunaga faamisionare, o le a totōina ai i fanau talavou, e oo lava i taimi a o laiti se faanaunauga ina ia faaaogā o latou olaga i se auala o le a faamalieina ai Ieova, maua ai e isi ia aogā ma aumaia ai iā i latou lava le fiafiaga.
6 Talavou e, Faamuamua le Auaunaga Faataimi Atoa: E lē manaʻomia e tagata talavou ona taumasalosalo pe faapeʻī le galuega faapaeonia. E mafai ona e faataʻitaʻia faavaitaimi e ala i le paeonia lagolago i avanoa uma e mafai ai a o faagasolo le aʻoga ma vaitaimi o mālōlōga. O le faia faapea, o le a e iloa moni ai le matuā faamalieloto o le auaunaga faapaeonia! Pe mafai ona e fuafua mamao e paeonia lagolago a o faagasolo mālōlōga mai aʻoga?
7 Afai o oe o se uso talavou i le faalapotopotoga a le Atua, ia mafaufau mamafa e uiga i le aapa atu ina ia agavaa e avea o se auauna o le faiva. (1 Timo. 3:8-10, 12) E lē gata i lenā, filifili pe faamata o le a e manaʻo e talosaga atu mo le auaunaga i Peteli po o le auai i le Aʻoga mo Toleniga i le Faiva, pe a atoa ou tausaga e te agavaa ai. O le a e aʻoaʻoina ni lesona tautele mai mea e oo iā te oe i le faiva faapaeonia, e pei o le auala e ola ai e tusa ma se faasologa, le auala e faaleleia ai le faamaopoopoina o oe lava, le auala e lelei ai lau faiā ma isi, ma le auala e ati aʻe ai le tomai e feagai ai ma avega tauave. O nei mea uma o le a sauniunia ai oe mo faaeaga tetele o le auaunaga e mulimuli mai.
8 O se vala autū i le taulau manuia i le auaunaga faataimi atoa, o le iai lea o se agaga maelega agaʻi i mataupu faatiokarate. Na uunaʻia e le aposetolo o Paulo lenei uiga, ma sa ia faailoa mai faamanuiaga o le a iʻu i ai: “O mea uma lava tou te faia, ia faia ma le loto, peiseai ua faia i le Alii, . . . auā ua outou iloa, e maua e outou mai le Alii o le taui.” (Kolo. 3:23, 24) Tau ina ia faamanuiaina oe e Ieova i le fiafiaga tele a o iai i le auaunaga faataimi atoa!