Pe e Telē se Oganuu a la Outou Faapotopotoga?
1 E amata mai lava i aai o Iutaia e oo i nuu i tua o Kalilaia, na avatu ai e Iesu se molimau mae’ae’a i le oganuu telē o Isaraelu anamua. (Mare. 1:38, 39; Luka 23:5) E tatau foʻi iā i tatou ona talanoa atu i le toʻatele o tagata e mafai ona tatou oo atu i ai ma le tala lelei. (Mare. 13:10) Ae peitaʻi, e lē faigofie lenei mea. Aiseā?
2 E tele faapotopotoga i Samoa e iai oganuu e tele lava i nuu i tua, e matuā tetelē lava. O le ā se mea e mafai ona tatou faia e fesoasoani ai i tagata e nonofo i na oganuu tetelē, ina ia aʻoaʻoina le upu moni e uiga iā Ieova, Iesu, ma le Malo?
3 Ia Fuafua Lelei: E manaʻomia ona vaai lelei e le ovasia o le auaunaga ma le auauna o le oganuu taumafaiga a le faapotopotoga i le faia o le mea e aupito sili ona lelei. Atonu e mafai ona faia se faasologa mo ni Aso Toonaʻi faapitoa auā e mafai ai e le toʻatele ona galulue mo le aso atoa. Pe a galueaʻiina oganuu mamao, ia fuafua e faaalu le aso atoa i le auaunaga pe afai e mafai, ma ave se mea taumafa e faamalosi ai le tino i le aoauli. E mafai ona outou vave feiloaʻi i le taeao nai lo le taimi masani ina ia lava ai le taimi e faimalaga atu ai i le oganuu, po o le faia o le feiloaʻiga mo le auaunaga i le fanua i se oganuu e latalata i le vaipanoa lea o le a galueaʻiina. Ia faatoʻa laʻitiiti ia vaega e ō i taavale ina ia lava ai le avanoa mo tagata uma e talanoa atu ai i ni aiga. Ia fuafua e galueaʻiina vaipanoa maotua i vaitaimi o le tausaga e lelei ai le tau ma tulaga o auala.
4 Ia faamautinoa ua lava ni lomiga e ave. Afai e seāseā ona galueaʻiina le oganuu, e mafai la ona tuu ai se sāvali po o se mekasini tuai i fale e lē o maua i ai ni tagata. Pe afai ua uma ona faaliliuina i lau gagana le sāvali, Pe E te Manaʻo e Fia Iloa Atili e Faatatau i le Tusi Paia?, ona ofo lea i so o se tagata lava e te feiloaʻi i ai ma tuu se kopi i fale e lē maua atu i ai se tagata.
5 Ia Felagolagomaʻi Lelei: O le galueaʻiina o se oganuu telē, e manaʻomia ai le felagolagomaʻi o tagata uma i le faapotopotoga. Pe afai e mamao le mea e ō i ai, e mafai e i latou e ō faatasi i lenā taavale ona saosao tupe mo le penisini. E manaʻomia ona faautauta lelei pe afai e te feiloaʻi i ni tagata i se aiga e fiafia e talanoa. Ia mataalia mo le manaʻoga ina ia galueaʻiina atoa le oganuu, ma ia magafagafa mo i latou o la outou vaega o loo faatali mai i le taavale. Afai e te manaʻo e faaumiumi atu le talanoaga ma se tagata fiafia, pe mafai ona faia se fuafuaga ina ia ʻaua neʻi taofia le galulue o le ʻautalaʻi atoa?
6 Ia fai ni fuafuaga maʻoti ina ia toe asia tagata fiafia uma na maua. E lē gata i tuatusi, ae taumafai ia maua le numera o le telefoni a le tagata fiafia ina ia mafai ai ona e faafesootaʻia ma molimau atili atu i ai e ala i le telefoni. Talu ai e lē faaigoaina le tele o auala ma e lē faanumeraina foʻi fale i oganuu maotua, ia tusi faalelei se faafanua pe tusi se faamatalaga i le auala e maua ai tagata fiafia pe a toe foʻi atu e asia i latou.
7 Maʻeu se faaeaga mo i tatou i le faataunuuina o le poloaʻiga a Iesu e faapea: “O se aai po o se faoa aai tou te oo atu i ai, ia fesili po o ai se i ai ua tatau”! (Mata. 10:11) E mautinoa lava, o le a tauia e Ieova a outou taumafaiga a o outou lotomalilie e faia lenei galuega e sili ona tauia!