Ia Faafetaia le Alofa o Ieova
Ia Faamanatu le Maliu o Iesu iā Mati 24
1. Ua faapefea ona faaalia e Ieova lona alofa mo i tatou?
1 Na alaga le faisalamo e faapea: “Ia vivii atu i latou iā Ieova ona o lona alofa, ma ona vavega na fai i le fanau a tagata.” (Sala. 107:8) O le alofa o le Atua, e sili atu i se lagona agalelei mo tagata. Ua faailoa manino mai i le faaupuga lenei o viiga, lenā mea moni e faapea: “Ona taofi aʻe lea o aʻu e lou alofa, Ieova e.” (Sala. 94:18) Maʻeu le alofa uiga ese o Ieova i le aumaia o lona Alo pele e toʻatasi e fai ma o tatou sui!—1 Ioa. 4:9, 10.
2. E faapefea ona faaalia lo tatou lotofaafetai iā Ieova?
2 A o latalata mai le Faamanatuga o le maliu o Keriso, e faapefea ona tatou faafetaia ‘le Atua o le alofa’? (Sala. 59:17) O le a tatou mananaʻo uma e sema se taimi e manatunatu loloto ai i toe aso o Iesu i le lalolagi. (Sala. 143:5) O le a aogā foʻi le mulimuli i le faasologa o le faitau Tusi Paia i le vaitaimi o le Faamanatuga, o loo faatulaga mai i le Iloiloina o le Tusi Paia i Aso Taʻitasi 2005 ma pe a mafai, ia fai nisi faitau tusi faaopoopo ma fai ni saʻiliʻiliga loloto i le mataupu e 112-116 o le tusi, Le Tagata Silisili, faapea ma isi lomiga faale-Tusi Paia. Ia mafaufau loloto i fuaiupu o loo e faitauina ma faamasani i ai. (1 Timo. 4:15) O le mafaufau loloto i le Afioga a le Atua faatasi ma le tatalo, e lē gata e faamalosia ai o tatou loto, ae e faaalia ai foʻi lo tatou alofa mo Ieova.—Mata. 22:37.
3, 4. (a) E faapefea ona tatou faaaʻoaʻo i le agaga na faaalia e o tatou uso i Liberia? (e) O ai o e fuafua e valaaulia i le Faamanatuga?
3 Ia Uunaʻi Isi e Faafetai Atu i le Atua: I le tausaga ua mavae, e 16,760,607 i latou na auai i le Faamanatuga i le lalolagi. I se aai i Liberia, na tusi atu ai uso i le alii sili o le aai e faailoa atu i ai la latou fuafuaga, e faamanatuina le Talisuaga Afiafi a le Alii i lo latou aai. Na faataga e le alii uso ina ia faaaogā le malae lakapi e faia ai la latou sauniga, ma sa faalauiloa atu foʻi i le aai atoa e uiga i lea sauniga ma valaaulia tagata ina ia auai. E ui lava e na o le lima le ʻautalaʻi sa iai i inā, ae e 636 i latou na auai i le Faamanatuga!
4 E tatou te fia fesoasoani atu faapena i le toʻatele e mafai ona tatou oo atu i ai, ina ia aufaatasi mai ma i tatou i le Faamanatuga. E lelei pe a fai sau lisi o i latou e te manaʻo e valaaulia. O le ata i le faavaa i tua o le Olomatamata o Mati 15, o loo ave atu ai se valaaulia. E mafai foʻi ona faaaogā ia tusi valaaulia ua saunia. Ia tusia manino ai le taimi ma le nofoaga e fai ai le Faamanatuga, ma avatu se tusi valaau mo tagata taʻitoʻatasi e te valaaulia. A o latalata mai Mati 24, ia toe alu e faamanatu i tagata taʻitoʻatasi uma ma faamautū ai nisi fuafuaga.
5. E faapefea ona tatou faalaeiauina tagata suʻesuʻe o le Tusi Paia ina ia auai i le Faamanatuga?
5 E faapefea ona tatou fesoasoani i tagata suʻesuʻe o le Tusi Paia o ē e leʻi auai i sauniga, ina ia auai ma maua aogā mai le Faamanatuga? Ia talanoa mo ni nai minute i taimi e fai ai suʻesuʻega taʻitasi ina ia atiaʻe le talisapaia mo le tāua o le Faamanatuga. E maua manatu lelei i le Olomatamata o Mati 15, 2004, itulau e 3-7, ma le tusi Reasoning, itulau e 266-269.
6. Aiseā e tāua ai ona faafeiloaʻi tagata e asiasi mai i le Faamanatuga?
6 Ia Faafeiloaʻi Tagata Asiasi Mai: I le aso o le Faamanatuga, ia faafeiloaʻi tagata asiasi mai ma talanoa atu iā i latou. (Roma 12:13) Ia fuafua e nonofo faatasi ma i latou na e valaaulia, ma ia faamautinoa ua iai ni a latou Tusi Paia ma ni tusi pese. Ae faapitoa lava ona tatou tausolomua ona faafeiloaʻi atu i uso ma tuafāfine o ē ua lē toe talaʻi, ae na faia ni taumafaiga ina ia auai mai. O lo tatou naunau ma le alofa, e ono toe faatupu ai lo latou fiafia e aufaatasi mai e lē aunoa ma le faapotopotoga. (Luka 15:3-7) Seʻi o tatou faia mea uma lava e faalaeiau ai isi ina ia auai ma i tatou i lenei sauniga mamalu, ina ia avatu ai le faafetai iā Ieova ona o le “faasilisili o lona alofa” iā i tatou.—Sala. 31:21.