Ia Avea Oe o se Tagata Talaʻi e Agaʻigaʻi i Luma

¹ E olioli lo tatou Tamā o i le lagi pe a agaʻigaʻi i luma faaleagaga ana auauna. E aofia i lenei mea le agaʻigaʻi i luma i le avea ma tagata taʻumatuaina ma lelei i le talaʻia o le tala lelei. Na faalaeiau e Paulo le toeaina o Timoteo e faaauau ona ia faia ni taumafaiga ina ia iloa ai e tagata lona agaʻigaʻi i luma. (1 Timo. 4:13-15) E tatau iā i tatou ona taumafai malosi e faaleleia le tulaga o la tatou auaunaga, e tusa lava po o i tatou o ni tagata talaʻi ua iai le poto masani.

² Ia Faatulaga ni Ou Sini: Pe a fia agaʻigaʻi i luma, e tatau ona iai ni ou sini totino. O ā sini e mafai ona faatū mo i tatou lava? Atonu tatou te taumafai e faaleleia atili le auala e faaaogā ai la tatou pelu faaleagaga, le Tusi Paia. (Efe. 6:17) E ono iai se vala o la tatou auaunaga e manaʻomia ona faaleleia, e pei o le molimau atu i alatetele, i telefoni, po o le galueaʻiina o oganuu pisinisi. Atonu foʻi tatou te galulue i le faaleleia o le faia o toe asiga. O se isi sini manaia o le faaleleia lea o lo tatou tomai i le amataina ma le faaauau ona faia o suʻesuʻega faale-Tusi Paia.

³ Faatulagaga: O sauniga a le faapotopotoga, aemaise lava le Aʻoga o le Faiva Faatiokarate ma le Sauniga o le Auaunaga, ua faatulaga e fesoasoani iā i tatou ia agaʻigaʻi i luma o ni tagata talaʻi. O le tele o le taimi e te faaalu e sauniuni ai ma auai atu i nei sauniga, ma faatatau fautuaga e maua mai ai, o le tele foʻi na o aogā o le a tatou maua mai ai.—2 Kori. 9:6.

⁴ E manaʻomia ona fesoasoani le tasi i le isi e agaʻigaʻi i luma. (Faata. 27:17) O le faalogologo lelei i taulimaga a i latou tatou te galulue faatasi i le auaunaga, o le a fesoasoani e faaleleia ai a tatou taulimaga. E lē gata i lea, e ono faatulaga e le ovasia o la tatou suʻesuʻega tautusi se fesoasoani patino mo i tatou. O se faamanuiaga pe a iai se paeonia e lava le poto masani po o se tagata talaʻi e fesoasoani iā i tatou ia uigā, ma olioli tele ai i le auaunaga! Po o iai se tagata talaʻi fou i la tatou suʻesuʻega tautusi? Ia tausolomua ona valaaulia lea tagata tatou te galulue faatasi.

⁵ O le galuega aupito i tāua i aso nei, o le faiva faa-Kerisiano. Pe a avatu iā Ieova a tatou “taulaga o viiga,” e tatou te mananaʻo e avatu iā te ia mea e aupito i silisili ona lelei. (Epe. 13:15) Pe a tatou taumafai e agaʻigaʻi i luma i le auaunaga, o le a avea i tatou ma tagata faigaluega “e leai se mea e mā ai, e na te taulimaina ma le saʻo le upu moni.”—2 Timo. 2:15.