Fesoasoani iā i Latou e Lē Taliaina i le Uluaʻi Asiasiga le Tusi O ā Aʻoaʻoga Moni a le Tusi Paia?
1. Pe e faigofie ona talia e tagata uma i le uluaʻi asiasiga le tusi O ā Aʻoaʻoga Moni a le Tusi Paia? Faamatala.
1 Ina ia avea se tasi o se tagata tapuaʻi o Ieova, e tatau ona ia aʻoaʻoina mea o loo taʻua i le Tusi Paia. Peitaʻi, e iai i latou e auai i lotu e lē faa-Kerisiano, ma e latou te manatu i le Tusi Paia e lē o le Afioga a le Atua. O isi e lē talitonu i le Atua ma e lē faatāuaina foʻi le Tusi Paia. O ā nisi o meafaigaluega e mafai ona fesoasoani iā i latou e lē taliaina i le uluaʻi asiasiga le tusi, O ā Aʻoaʻoga Moni a le Tusi Paia? O fautuaga o loo mulimuli mai e faavae mai i faamatalaga a tagata talaʻi mai i nisi o atunuu e 20.
2. Pe a faapea mai se tasi e lē talitonu i le Atua, o le ā e tatau ona tatou iloa, ma aiseā e tāua ai ona tatou malamalama i le māfuaaga?
2 O i Latou e Lē Talitonu i le Atua: Pe a faapea mai se tasi e lē talitonu i le Atua, e tāua ona iloa po o le ā le māfuaaga. Pe e māfua ona e talitonu o ia i le faaevolusione? Pe e māfua ona o faiga lē tonu i le lalolagi po o le faimea piʻopiʻo o lotu? Pe na ola aʻe o ia i se atunuu e faasā ona talitonu i le Atua? Pe atonu foʻi e talitonu o loo soifua le Atua, ae e lē manaʻomia ona faatuatua iā te Ia. Ua iloa e le toʻatele o le ʻautalaʻi le aogā o le fesili i le tagata e ona le fale i le fesili lenei: “Pe e masani ona e manatu faapena?” Ia faalogologo lelei ma aua le lave tala atu. Pe a tatou malamalama i le māfuaaga e lē talitonu ai se tasi i le Atua, o le a tatou iloa la le auala e tali atu ai ma le lomiga e faaaogā.—Faata. 18:13.
3. E faapefea ona tatou faaalia le faaaloalo i le tagata faapea ona talitonuga?
3 Pe a tatou avatu se tali, ia faaeteete i le faia o faamatalaga e ono manatu ai le tagata e ona le fale, o loo e faapea atu e sesē ona talitonuga. O le fautuaga lenei a se tasi mai i le Iunaite Setete: “E tāua tele ona faaaloalogia le aiā a le tagata e filifili ai lona lava talitonuga. Nai lo o le faia o ni fefinauaʻiga po o ai e saʻo, e lelei ona fai atu ni fesili faatupu manatu ina ia faia ai e le tagata lana lava faaiʻuga.” Pe a uma ona faailoa mai e le tagata e ona le fale sona manatu, e masani ona tali atu se tasi o ovasia femalagaaʻi e ala i le fai atu o se fesili e faapea: “Pe e te manatu e mafai ona tupu moni lenei mea?”
4. E faapefea ona tatou fesoasoani i tagata lotu Puta?
4 E fou i le toʻatele o tagata lotu Puta le talitonuga e faatatau i le Atua. E fiafia nisi o le ʻautalaʻi i Peretania e faaaogā le polosiua Lasting Peace and Happiness—How to Find Them pe a talaʻi atu i tagata Saina ma tagata lotu Puta. Pe a māeʻa ona iloilo le faatomuaga, ona talanoaina lea o le vaega ua faaulutalaina “Is There Really a Most High Creator?” faapea le vaega “A Guidebook for the Blessing of All Mankind.” Pe a māeʻa lenā, ona ofo atu lea o le tusi Aʻoaʻoga Moni ma fai atu i lē e ona le fale, “E tusa pe e te lē talitonu i le Atua, ae e tāua lou suʻesuʻeina o le Tusi Paia auā e tele taʻiala aogā o loo maua ai.” Na faapea mai se paeonia mai le Iunaite Setete o loo galue i se oganuu e tautatala i le gagana Saina: “O le toʻatele o tagata o la matou oganuu e fiafia e faitau. O lea, e masani ona latou faitauina le lomiga atoa a o leʻi toe asia i latou, ae atonu e latou te lē malamalama i le auala e faia ai se suʻesuʻega faale-Tusi Paia. O lea, e masani ona ou ofoina le polosiua o le Tala Lelei i le uluaʻi asiasiga, ona o loo tusia i se auala e faigofie ona amata ai se talanoaga.” Ua faapea mai se ovasia matagaluega o loo galue i se matagaluega mo le gagana Saina i le Iunaite Setete, e mafai lava ona ofo le tusi Aʻoaʻoga Moni i le uluaʻi asiasiga. Peitaʻi, atonu e sili ona lelei le amata o le suʻesuʻega i le mataupu e 2, lea e faatatau i le Tusi Paia, nai lo o le mataupu 1 lea e talanoa e faatatau i le Atua.
5. Aiseā e tāua ai le onosaʻi?
5 E umi se taimi e atiaʻe ai e se tasi le faatuatua i le Atua, o lea e tāua tele ai le onosaʻi. Atonu e lē otometi ona talitonu se tasi o loo soifua Lē na foafoaina i tatou i le uluaʻi asiasiga. Peitaʻi, a o faagasolo taimi o le a ia faapea mai atonu e iai lava se tasi na foafoaina i tatou, pe faapea mai foʻi ua ia malamalama i le māfuaaga e ono talitonu ai faapena se tasi.
6. Faamata o ā māfuaaga e itiiti ai le fiafia o nisi tagata i le Tusi Paia?
6 O i Latou e Itiiti le Fiafia pe Lē Maufaatuatuaina le Tusi Paia: E masani lava o se tasi e faapea mai atonu o loo soifua le Atua, e lē naunau i mea o loo aʻoaʻoina i le Tusi Paia, ona e talitonu e lē o le Afioga lea a le Atua. Atonu e nofo i se atunuu e leai ni lotu Kerisiano, ma e manatu o le Tusi Paia e mo na o i latou ua faapea mai o Kerisiano. Pe nofo foʻi i se atunuu e faapea mai o i latou o Kerisiano, ae sili atu ona latou faatāua galuega, aʻoga ma faafiafiaga, ma manatu ai e leai se aogā o le Tusi Paia. E faapefea la ona tatou fesoasoani iā i latou na ina ia atiaʻe le naunau i le Tusi Paia, ma amata se suʻesuʻega i le tusi Aʻoaʻoga Moni?
7. O le ā se auala e faaosofia ai le naunau o le tagata i le Tusi Paia?
7 Na tusi le ofisa o le lālā i Eleni e faapea: “O le auala sili e fesoasoani ai iā i latou e itiiti le fiafia i le Tusi Paia, o le tatala lea o le Tusi Paia ma faaali iā i latou faamatalaga o loo taʻua ai. Ua iloa e le toʻatele o le ʻautalaʻi le aafiaga malosi o le feʻau o le Tusi Paia i le loto o le tagata, nai lo o o tatou lava manatu. (Epe. 4:12) O lo latou vaai i le suafa o le Atua i totonu o le Tusi Paia, ua fesoasoani iā i latou e atiaʻe ai se faanaunauga e matuā iloiloina le Tusi Paia.” Na tusi le ofisa o le lālā i Initia e faapea: “O le toʻatele o tagata Hinitū e fiafia e talatalanoa i le mea moni e faatatau i le olaga ma le oti. E latou te fiafia foʻi i le folafolaga mai le Tusi Paia e faatatau i se lalolagi e aunoa ma le faailogatagata.” O le taʻua o faafitauli o loo popole ai tagata, e masani ona maua ai e le ʻautalaʻi le avanoa e faailoa atu ai le faamatalaga a le Tusi Paia, i le auala e aveesea ai e le Malo o le Atua na faafitauli.
8. O le ā se faamatalaga e tatou te ono fai atu iā i latou e iai se manatu sesē e faatatau i le Tusi Paia, ona o aʻoaʻoga a lotu ua faapea mai o Kerisiano?
8 Pe afai e iai i le tagata se manatu sesē e faatatau i le Tusi Paia ona o aʻoaʻoga a lotu ua faapea mai o Kerisiano, ia faailoa atu iā te ia, ua faauigasesē e na lotu le Tusi Paia ma aʻoaʻoga o loo iai. Na tusi le ofisa o le lālā i Initia e faapea: “E iai taimi e manaʻomia ai ona tatou fesoasoani i tagata ina ia malamalama e lē o lotu e ana le Tusi Paia.” Na faapea atili mai le ofisa o le lālā, e masani ona fiafia tagata Hinitū i le vaega e 4 o le polosiua What Is the Purpose of Life? How Can You Find It?, lea e faamatala ai le auala ua taumafai ai lotu e faauigasesē ma tafiesea le Afioga a le Atua. O le faamatalaga lenei a se paeonia i Pasili e masani ona fai atu i se tagata e manatu faapena: “Aiseā e le suʻesuʻe atili ai e faatatau i mea o loo taʻua i le Tusi Paia? O loo faia e le toʻatele lenei mea e aunoa ma le manatu e tatau ona auai i se lotu. E ono faateʻia oe i mea o le a e aʻoaʻoina mai ai.”
9. Aiseā e lē tatau ai ona tatou fiu pe afai e lē faaalia e tagata le fiafia, i le uluaʻi taimi e talanoa atu ai i le Tusi Paia?
9 E silasila Ieova i loto o tagata taʻitoʻatasi. (1 Samu. 16:7; Faata. 21:2) O loo ia tosina mai i latou e saʻo uunaʻiga o o latou loto i le tapuaʻiga moni. (Ioa. 6:44) O le toʻatele o i latou na, e leʻi aʻoaʻoina lava e faatatau i le Atua, pe itiiti foʻi lo latou iloa o le Tusi Paia. O la tatou faiva ua latou maua ai le avanoa ʻina ia faaolaina ma maua le poto saʻo i le upu moni.’ (1 Timo. 2:4) O lea, aua le fiu pe afai e lē fiafia tagata i le uluaʻi taimi e talanoa atu ai e faatatau i aʻoaʻoga mai le Tusi Paia. Faaaogā nisi o meafaigaluega o loo maua e faaosofia ai lo latou naunau. Mulimuli ane, o le a mafai ona e faaaogā la tatou meafaigaluega autū mo le amataina o suʻesuʻega faale-Tusi Paia, o le tusi O ā Aʻoaʻoga Moni a le Tusi Paia?
[Pusa i le itulau 4]
Faataʻitaʻi le mea lenei pe afai e lē talitonu le tagata i le Atua:
• Ina ia iloa le māfuaaga o lona talitonuga, ia fesili atu: “Pe e masani ona e manatu faapena?”
• Pe afai o ia o se tagata lotu Puta, faaaogā le polosiua Lasting Peace and Happiness—How to Find Them, itulau 9-12.
• Pe afai e talitonu i le faaevolusione, atonu e aogā meafaigaluega nei:
Le faasologa o mataupu ua faaulutalaina “Pe na Teʻi Lava ua Iai?” o loo i le Ala Mai!
Le vitiō The Wonders of Creation Reveal God’s Glory
Polosiua o le A Satisfying Life—How to Attain It, vaega 4; Was Life Created?; ma le The Origin of Life—Five Questions Worth Asking
• Pe afai ua mou atu lona faatuatua i le Atua ona o faiga lē tonu ma mafatiaga, atonu e aogā lomiga nei:
Le tusi o le Is There a Creator Who Cares About You?, mataupu e 10
Polosiua o le Po o Silasila Alofa Mai ea le Atua iā i Tatou? vaega 6, ma le What Is the Purpose of Life? vaega 6
• Sui i le tusi O ā Aʻoaʻoga Moni a le Tusi Paia? pe afai ua amata ona talitonu le tagata e iai le Atua. Atonu e lelei ona amata i le mataupu e 2, po o se isi mataupu e fetaui ma le tulaga o lē e ona le fale.
[Pusa i le itulau 5]
Faataʻitaʻi le mea lenei pe afai e lē talitonu le tagata i le Tusi Paia:
• Iloilo le mataupu e 17 ma le 18 o le tusi Life—How Did It Get Here? By Evolution or by Creation?
• Mo tagata lotu Hinitū, faaaogā le polosiua Why Should We Worship God in Love and Truth?
• Mo tagata lotu Iutaia, faaaogā le polosiua Will There Ever Be a World Without War? itulau e 3-11.
• Talanoa i aogā o le usitaʻia o mataupu silisili o le Tusi Paia. O lomiga e mafai ona e faaaogāina e faailoa atu ai i tagata le aogā o le Tusi Paia:
Le faasologa o mataupu ua faaulutalaina “Fesoasoani mo le Aiga” o loo i le Ala Mai!
Le vitiō The Bible—Its Power in Your Life
Polosiua o le Tala Lelei Mai i le Atua! lesona 9 ma le 11; A Book for All People itulau e 22-26; ma le A Satisfying Life—How to Attain It vaega 2
Mo tagata lotu Puta, faaaogā le polosiua The Pathway to Peace and Happiness itulau e 3-7.
Mo tagata lotu Musalimi, faaaogā le polosiua Real Faith—Your Key to a Happy Life vaega 3.
Pe afai e te talaʻi i se vaipanoa e lē fiafia ai tagata i le Tusi Paia, atonu e sili ona lelei le aua neʻi faailoa atu le puna o faamatalaga o loo e taʻuina atu, seʻi oo i le taimi e toe asia ai i latou.
• Faamatala pe na faapefea ona faataunuuina valoaga o le Tusi Paia. O meafaigaluega nei e mafai ona e faaaogāina:
Le vitiō The Bible—Accurate History, Reliable Prophecy
Le polosiua A Book for All People itulau e 27-29
• Sui i le tusi O ā Aʻoaʻoga Moni a le Tusi Paia? pe afai ua amata ona fia iloa e le tagata aʻoaʻoga a le Tusi Paia e faatatau i le tele o mataupu.
[Pusa i le itulau 6]
Pe a faapea mai le tagata e ona le fale: “Ou te lē talitonu i le Atua,” e te ono faapea atu:
• “Pe e mafai ona ou faamatala puupuu atu le māfuaaga na uunaʻia ai aʻu e talitonu e iai Lē na foafoaina i tatou?” Ona faasoa atu lea o ni manatu mai le polosiua Po o Silasila Alofa mai ea le Atua iā i Tatou? vaega 3, itulau 4-8, pe fai foʻi se fuafuaga e toe foʻi e asi le tagata ma ave i ai se lomiga na e fiafia i ai.
• “Pe afai e iai se Atua, o ā ni uiga e te manaʻo e iai iā te ia?” O le toʻatele e faapea mai e latou te tosina i se Atua e alofa, faamasinotonu, alofa mutimutivale, ma e lē faailogatagata. Ona suʻe lea i le Tusi Paia ma faaali i ai e iai uiga faapena o le Atua. (Atonu e lelei foʻi ona faaaogā le mataupu 1 o le tusi O ā Aʻoaʻoga Moni a le Tusi Paia? ae amata i le palakalafa e 6.)
Pe a faapea mai le tagata e ona le fale: “Ou te lē talitonu i le Tusi Paia,” e te ono faapea atu:
• “O le manatu foʻi lenā o le toʻatele. E manatu nisi e lē saʻo faamatalaga faasaienisi o loo iai i le Tusi Paia, pe e leai foʻi se aogā o tapulaa o le Tusi Paia. Pe na e faaaluina se taimi e faitau ai le Tusi Paia? [Faatali mo se tali. Ona suʻe lea i le mataupu e 2 o le tusi O ā Aʻoaʻoga Moni a le Tusi Paia? ma ofo le tusi.] Ua taʻufaatauvaa e le toʻatele le Tusi Paia ona ua faauigasesē e lotu aʻoaʻoga o loo iai. Pe a ou toe asiasi mai i se isi taimi, o le a ta talanoa atili ai i le mataupu e 2.”
• “E tutusa lou manatu ma le toʻatele o tagata. Pe e mafai ona ou faaali atu iā te oe se vala e mataʻina ai iā te aʻu le Tusi Paia? [Faitau le Iopu 26:7 po o le Isaia 40:22, lea e faaalia ai le saʻo aʻiaʻi o faamatalaga faasaienisi o le Tusi Paia.] O loo iai foʻi i le Tusi Paia taʻiala atamai e fesoasoani i aiga. Ou te fiafia e faaali atu iā te oe se faataʻitaʻiga o lenā manatu, pe a ou toe asiasi mai.”
• “Faafetai lava mo lou manatu faaalia. Pe afai na tusia e le Atua se tusi mo le fanau a tagata, faamata o ā ni faamatalaga e iai?” Ona faaali lea i le tagata se manatu mai le Tusi Paia e faamaonia ai lana faamatalaga.