Auala e Feutagaʻi ai Molimau a Ieova ma i Latou na Avea ma Sui o la Latou Tapuaʻiga

E matou te taumafai e feutagaʻi ma tagata uma i se auala alofa, agalelei ma faaaloalo. Pe afai ua faavaivai pe ua lē toe auai se tasi o Molimau a Ieova i le tapuaʻiga, e matou te taumafai e fesoasoani iā te ia ma faamautinoa i ai e matou te alolofa iā te ia, ina ia toe faamalosia ai lona itu faaleagaga.—Luka 15:4-7.

I nisi tulaga, e ono aveesea se tasi mai i le faapotopotoga ona o ana gaoioiga. (1 Korinito 5:13) E ui i lea, o le alofa i lo matou uso e matou te taumafai ai e fesoasoani iā te ia ina ia ʻalofia le aveesea mai le faapotopotoga. E tusa lava foʻi pe e aveesea, e matou te faaalia pea i ai le alofa ma le faaaloalo, e pei ona faalaeiauina i matou e le Tusi Paia e fai.—Mareko 12:31; 1 Peteru 2:17.

Aiseā e ono aveesea ai se tasi mai i le faapotopotoga?

Ua taʻua manino mai i le Tusi Paia, pe a faia e se Kerisiano se agasala matuiā ae e lē salamō, e tatau la ona aveesea o ia mai le faapotopotoga.a (1 Korinito 5:11-13) O loo faailoa mai i le Tusi Paia agasala matuiā e ono aveesea ai se tasi. O se faataʻitaʻiga, o le mulilua, onā, fasioti tagata, sauāga i totonu o aiga ma le gaoi.—1 Korinito 6:9, 10; Kalatia 5:19-21; 1 Timoteo 1:9, 10.

Peitaʻi, e lē vave faia se faaiʻuga e aveesea mai i le faapotopotoga se tasi ua faia se agasala matuiā. E taumafai muamua le ʻautoeainab e fesoasoani iā te ia ina ia suia ona ala. (Roma 2:4) E latou te taumafai ina ia pāʻia lona loto i se auala alofa, agalelei ma māfana. (Kalatia 6:1) O le faia faapea, atonu e na te iloa ai lana gaoioiga sesē na fai ma uunaʻia ai o ia e faaalia le salamō. (2 Timoteo 2:24-26) Pe afai e faaauau pea ona ia solia tapulaa tauamio a le Tusi Paia ma lē faaalia le salamō, e ui i taumafaiga faifai pea a toeaina ina ia fesoasoani iā te ia, ua tatau la ona aveesea o ia mai i le faapotopotoga. E faasilasila atu e le ʻau toeaina i le faapotopotoga, ua lē toe avea lenā tagata ma Molimau a Ieova.

O toeaina e toʻalua o loo faitau atu ma le agalelei se mau i se uso talavou. O loo tuu atu le lima o le isi toeaina i le tauʻau o le talavou ma talanoa atu iā te ia. — E taumafai toeaina ina ia pāʻia le loto o le tagata fai mea sesē i se auala alofa, agalelei ma māfana

O ā aogā o le aveesea o se tasi o loo faaauau pea ona faia se agasala matuiā? E faaalia ai le usiusitaʻi o le faapotopotoga i tapulaa tauamio mamā a le Atua ma puipuia ai i latou mai i taaʻiga lē lelei a lenā tagata. (1 Korinito 5:6; 15:33; 1 Peteru 1:16) E lē gata i lenā, e ono uunaʻia ai foʻi le tagata fai mea sesē e lafoaʻi ona ala leaga ma faia ni suiga.—Eperu 12:11.

Auala e feutagaʻi ai Molimau a Ieova ma i latou ua aveesea mai i le faapotopotoga

Ua faatonuina e le Tusi Paia Kerisiano ina ia ʻaua nei toe faifaimea faatasi’ ma sē ua aveesea mai i le faapotopotoga, ma “aua foʻi neʻi aai faatasi ma se tagata faapena.” (1 Korinito 5:11) E matou te lē faifaimea faatasi la ma se tasi ua aveesea. Peitaʻi, e lē faapea ai o le a matou matuā ʻalofia lenā tagata. E matou te feutagaʻi ma ia i se auala faaaloalo. E mafai lava ona ia auai i a matou sauniga ma e mafai ona filifili se Molimau a Ieova e faafeiloaʻi o ia.c E mafai foʻi ona ia talosaga atu i toeaina mo se fesoasoani faaleagaga.

O loo faafeiloaʻi ma le māfana e se ulugalii i le Maota mo Sauniga se tagata na aveesea mai i le faapotopotoga. — E mafai ona auai i latou ua aveesea mai i le faapotopotoga i a matou sauniga

Ae faapefea pe a aveesea se tasi ae o loo avea pea lana paaga faaipoipo ma lana fanau ma Molimau a Ieova? E ui o le a suia la latou faasologa faaleagaga, ae e tumau pea la latou faiā o se aiga. Talu ai o loo latou nonofo faatasi, o le a faaauau pea feutagaʻiga masani o se aiga.

E mafai e se tasi ua aveesea ona talosaga se asiasiga a toeaina. O lenā asiasiga o le a avatu ai fautuaga alofa mai i le Tusi Paia, ma faalaeiau le tagata ina ia faaalia le salamō ma toe foʻi iā Ieova. (Sakaria 1:3) Pe afai e na te faaalia le salamō moni, ma naunau e ola e ōgatusa ma tapulaa tauamio a le Tusi Paia, e mafai ona toe avea o ia ma sui o le faapotopotoga. E tatau i le faapotopotoga ona “faamagalo atu ma le agalelei ma faamāfanafana atu iā te ia,” e pei ona faia e Kerisiano i le faapotopotoga i Korinito, ina ua suia e le tagata fai mea sesē ona ala.—2 Korinito 2:6-8.

Manatu o i latou na aveesea

Mātau faamatalaga a nisi o Molimau a Ieova na aveesea, ma mulimuli ane toe foʻi mai iā Ieova.

“Ina ua ou toe foʻi iā Ieova, na ou mafaufau o le a mananaʻo toeaina e faailoa atu mea uma na ou faia i le taimi na aveesea ai aʻu. Peitaʻi, na latou faapea mai, ʻIa uaʻi i le faaleleia o le lua faiā ma Ieova i le taimi lenei.’ Na ou lagona ai le toʻafilemu.”—Maria, Iunaite Setete.

“Na faafeiloaʻi ma le fiafia aʻu e le faapotopotoga, ma na ou lagona ai le alofagia. Na latou fesoasoani mai ina ia ou mautinoa ua faamagalo aʻu e Ieova, ma ia aua neʻi lofitūina aʻu i mea na tutupu. Na fesoasoani mai toeaina ina ia toe faaleleia le ma faiā ma Ieova. Na latou faamautinoa mai, e tāua ma e alofa Ieova iā te aʻu.”—Malcom, Sierra Leone.

“Ou te talisapaia le auala o loo tausia ai e Ieova le mamā o lana faalapotopotoga. E ono manatu nisi e lē alofa le aveesea o se tasi, ae ua ou iloa o se faatulagaga talafeagai ma e faaalia ai le alofa. Ou te faafetai ona o loo tatou tapuaʻi i se Atua alofa ma lotofaamagalo.”—Sandi, Iunaite Setete.

Manatu o tagata atamamai i tulafono, e lē o ni Molimau a Ieova

Mātau manatu o nisi o tagata atamamai i tulafono ma faamasinoga e faatatau i le faatulagaga a Molimau a Ieova, o le aveesea o tagata faimea sesē e lē salamō mai i le faapotopotoga.

“E iai le malosiaga i se faalapotopotoga faalelotu o loo taumafai e faatatau mataupu silisili o le Tusi Paia, e aveesea ai se tagata faimea sesē mai le faalapotopotoga. E talafeagai lenā faatulagaga, auā pe a lē manaʻo se tasi e mulimuli i mataupu silisili o le Tusi Paia, e lē gata ua lē avea ai o ia ma vaega o le faalapotopotoga, ae o le a taaʻina ai foʻi isi tagata.”—The High Court of Justice, Egelani ma Uelese, Iuni 7, 2019.
“Ua ioe faamasinoga i Europa ma isi atunuu, e talafeagai ma e faaletulafono le faatulagaga a Molimau a Ieova e aveesea ai se tasi mai i la latou faalapotopotoga, pe e manatu foʻi e lē aiāina e le faamasinoga mataupu e fitoitonu i Molimau a Ieova.”—Polofesa o Paulo Pinto de Albuquerque, sa avea ma faamasino o le Faamasinoga o Aiā Tatau a Tagata i Europa.

a I le taimi muamua, na matou faaaogāina le faaupuga faateʻaina mo i latou e fai mea sesē ae e lē salamō. Ae ua matou faaaogāina i le taimi lenei le faaupuga o loo i le Tusi Paia, o le aveesea mai i le faapotopotoga.

b O le ʻautoeaina o ni tane Kerisiano taʻumatuaina e aʻoaʻo atu mai i Tusitusiga Paia, ma leoleo tagata o Ieova e ala i le fesoasoani ma faalaeiau iā i latou. E lē totogia la latou galuega.—1 Peteru 5:1-3.

c E iai taimi e taumafai ai se tasi ua aveesea e faaleagaina le talaaga o le faapotopotoga, pe uunaʻia isi ia faia amioga sesē. Pe a tupu lenā mea, e matou te mulimuli i le faatonuga a le Tusi Paia ina ia aua neʻi “faatalofa atu” iā te ia.—2 Ioane 9-11.