O Faamanuiaga Silisili e Ala Mai i le Feagaiga Fou

“Ua . . . faia [Iesu] ma puluvaga o le feagaiga e sili ona lelei.”—EPERU 8:6.

1. O ai na faamaonia le avea ma ‘fanau a le fafine’ lea na folafolaina i Etena, ma na faapefea ona ‘tuʻimomomoina lona mulivae’?

INA ua mavae ona agasala Atamu ma Eva, sa faasilasila atu ai e Ieova le faasalaga o Satani, o lē na faaseseina Eva, i le fetalai atu: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) I le papatisoga o Iesu i le Vaitafe o le Ioritana i le 29 T.A., na aliaʻe ai loa le Fanau lea na folafolaina i Etena. I lona maliu i luga o le laau faaoosala i le 33 T.A., na faataunuuina ai se vaega o lena valoaga anamua. Sa ‘tuʻimomomoina’ e Satani ‘le mulivae’ o le Fanau.

2. E tusa ai ma afioga a Iesu lava ia, ua faapefea i lona maliu ona aogā mo le fanau a tagata?

² O le mea e lelei ai, o lena manuʻa, e ui sa matuā tiga matuitui, ae sa lei tumau ona iai. Na toe faatuina aʻe Iesu mai le oti o se agaga e lē mafai ona oti ma afio aʻe i lona Tamā i le lagi, o iina na ia ofoina atu ai le tāua o lona toto maligi e fai “ma togiola e sui aʻi tagata e toatele.” O lea, na moni ai ana lava afioga: “E ao ina faapea ona siitia i luga o le Atalii o le tagata; ina ia maua le ola faavavau e i latou uma o e faatuatua ia te ia. ‘Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.’” (Mataio 20:28; Ioane 3:14-16; Eperu 9:12-14) Ua faia e le feagaiga fou se matafaioi autū i le faataunuuga o le valoaga a Iesu.

Le Feagaiga Fou

3. O anafea na muai vaaia ai le faagaoioia o le feagaiga fou?

³ A o toeitiiti lava oo i lona maliu, na fetalai atu ai Iesu i ona soo e faapea, o lona toto maligi o le a avea ma “toto o le feagaiga [fou].” (Mataio 26:28; Luka 22:20) I le sefulu o aso talu ona mavae lona afio aʻe i le lagi, na vaaia ai le faagaoioia o le feagaiga fou ina ua liligiina ifo le agaga paia i luga o le tusa ma le 120 soo o ē na faapotopoto i le afeafe aupito a luga i Ierusalema. (Galuega 1:15; 2:1-4) O le aumaia o nei soo e 120 i totonu o le feagaiga fou na faaalia ai ua lē toe aogā nei le feagaiga “muamua,” le feagaiga lea o le Tulafono.—Eperu 8:13.

4. Pe sa lē taulau ea le feagaiga tuai? Ia faamatala.

⁴ Pe sa lē taulau ea le feagaiga tuai? E matuā leai lava. O le mea moni, ona o lea ua suia le feagaiga tuai, sa lē toe avea ai loa Isaraelu faaletino ma nuu faapitoa o le Atua. (Mataio 23:38) Peitai na māfua lena mea ona o le lē usiusitai o Isaraelu ma lo latou teena o Lē ua Faauuina e Ieova. (Esoto 19:5; Galuega 2:22, 23) Peitai, a o lei suia le Tulafono, e tele mea na faataulauina ai. Mo le tele o senituri, na saunia ai se auala e faalatalata atu ai i le Atua ma avea ai ma puipuiga mai lotu sese. Sa iai i le Tulafono vala na faaāta mai ai le feagaiga fou, ma faatasi ai ma ona taulaga sa faia pea, na faaalia ai le matuā manaomia e le tagata o se togiolaina mai le agasala ma le oti. E mautinoa lava, na avea le Tulafono o se “taʻitaʻitama . . . na te taʻitaʻiina i tatou ia Keriso.” (Kalatia 3:19, 24; Roma 3:20; 4:15; 5:12; Eperu 10:1, 2) Ae peitai, e ala i le feagaiga fou, o le a mafai ai ona matuā iloatino atoatoa le faamanuiaga lea na folafolaina atu ia Aperaamo.

Ua Faamanuiaina Atunuu e Ala i le Fanau a Aperaamo

5, 6. I le faataunuuga autū faaleagaga o le feagaiga faa-Aperaamo, o ai le Fanau a Aperaamo, ma o ai le nuu na uluai maua le faamanuiaga e ala mai i lea Fanau?

⁵ Na folafola atu e Ieova ia Aperaamo: “Ona o lau fanau foi e faamanuia ai e atunuu uma lava o le lalolagi i latou lava.” (Kenese 22:18, NW ) I lalo o le feagaiga tuai, e toatele tagata ese agamalu sa faamanuiaina e ala i a latou auaufaatasiga ma Isaraelu, le fanau faaleatunuu a Aperaamo. Peitai, i lona faataunuuga autū faaleagaga, o le Fanau a Aperaamo o se tagata lelei atoatoa se toatasi. Na faamatala e Paulo lenei mea ina ua faapea mai: “Na fetalaia mai folafolaga ia Aperaamo, ma so lana fanau; e lei faapea mai, ‘O le fanau, peiseai e toatele,’ a e toatasi, ‘O so lau fanau’, o Keriso lava lea.”—Kalatia 3:16.

⁶ Ioe, o Iesu o le Fanau lea a Aperaamo, ma e ala mai ia te Ia ua maua ai e atunuu se faamanuiaga e silisili atu nai lo se isi lava mea e mafai ona maua mo Isaraelu faaletino. O le mea moni, o le uluai nuu na latou maua lenei faamanuiaga o Isaraelu lava ia. E lei pine talu ona mavae atu le Penetekoso i le 33 T.A., na faapea atu ai le aposetolo o Peteru i se vaega o tagata Iutaia: “O fanau outou a le au perofeta, ma le feagaiga sa faia e le Atua ma o outou tamā, ua faapea mai ia Aperaamo, O so lau fanau foi e manuia ai aiga uma lava o le lalo-lagi. O le Atua foi, ua na faatuina mai lana auauna o Iesu, ua auina mai o ia e muamua mai ia te outou, e faamanuia mai ia te outou i le faaliliueseina o outou taitasi i a outou amioleaga.”—Galuega 3:25, 26.

7. O ā atunuu na faamanuiaina e ala mai ia Iesu, le Fanau a Aperaamo?

⁷ E lei pine ae faasalafa atu le faamanuiaga i tagata Samaria ma faasolo atu i tagata o Nuu Ese. (Galuega 8:14-17; 10:34-48) I se vaitaimi i le va o le 50 ma le 52 T.A., na tusi atu ai Paulo i Kerisiano i Kalatia i Asia Itiiti: “Na iloa foi anamua i le Tusi, o le faatuatua e taʻuamiotonuina ai nuu ese e le Atua, na ia folafolaina ai anamua le tala lelei ia Aperaamo, ua faapea, E manuia nuu uma lava ia te oe. O lenei, ua manuia e ua faatuatua faatasi ma Aperaamo le na faatuatua.” (Kalatia 3:8, 9; Kenese 12:3) E ui lava e toatele Kerisiano i Kalatia sa o ni ‘tagata o nuu ese,’ ae na faamanuiaina i latou e ala ia Iesu ona o lo latou faatuatua. I le ā le auala?

8. Mo Kerisiano i aso o Paulo, o ā mea sa aofia ai i lo latou faamanuiaga e ala mai le Fanau a Aperaamo, ma e toafia le aofaiga atoa ua mauaina lena faamanuiaga?

⁸ Na taʻu atu e Paulo i Kerisiano Kalatia mai so o se talaaga lava e faapea: “Afai foi e o Keriso outou, e moni, o le fanau outou a Aperaamo, o suli foi e tusa ma le mea na folafolaina.” (Kalatia 3:29) Mo na Kerisiano Kalatia, sa aofia ai i le faamanuiaga e ala mai le Fanau a Aperaamo, lo latou avea o ni ē faia se vaega i le feagaiga fou ma avea ai foi ma suli faatasi ma Iesu, e iai faatasi ma Iesu i le fanau a Aperaamo. Tatou te lē iloa le aofaiga o tagata o Isaraelu anamua. E pau le mea tatou te iloa na avea i latou e “pei o le oneone i le matafaga ona toatele.” (1 Tupu 4:20) Peitai, ua tatou iloa le aofaiga atoa o aumea ua iai faatasi ma Iesu i le fanau faaleagaga—144,000. (Faaaliga 7:4; 14:1) O lena 144,000 ua ō mai “mai ituaiga uma, ma gagana eseese, ma nuu, atoa ma atunuu” o tagata, ma ua latou auai i le tuuina atu i isi tagata o faamanuiaga o le feagaiga faa-Aperaamo.—Faaaliga 5:9.

Se Valoaga ua Faataunuuina

9. Ua faapefea ia i latou o i le feagaiga fou ona iai le tulafono a Ieova i totonu o i latou?

⁹ Ina ua valoiaina le feagaiga fou, na tusi mai Ieremia: “O lenei le feagaiga ou te osia ma le aiga o Isaraelu, pe a mavae ia aso, o loo fetalai mai ai Ieova, ou te tuuina laʻu tulafono i totonu ia te i latou, ma ou tusi ai i o latou loto.” (Ieremia 31:33) O le uiga lena o i latou o i le feagaiga fou, e faapea o loo latou auauna ia Ieova ona o le alofa. (Ioane 13:35; Eperu 1:9) Ua tusia le tulafono a Ieova i o latou loto, ma ua latou matuā faanaunau lava e faia lona finagalo. E moni, i Isaraelu anamua sa naunautai lava le alofa o nisi tagata faatuatua i tulafono a Ieova. (Salamo 119:97) Peitai e toatele sa lei faapena. E ui i lea sa avea pea i latou ma vaega o le atunuu. Peitai, e leai se tasi e mafai ona tumau pea i totonu o le feagaiga fou pe afai e lē o tusia le tulafono a le Atua i totonu o lona loto.

10, 11. Mo i latou o i le feagaiga fou, o le ā le auala ua avea ai Ieova ‘e fai mo latou Atua,’ ma o le a faapefea ona latou iloa uma o ia?

¹⁰ Na fetalai atili Ieova e faatatau ia i latou o i le feagaiga fou: “E fai foi aʻu mo latou Atua, o i latou foi e fai moʻu nuu.” (Ieremia 31:33) I Isaraelu anamua e toatele sa tapuai atu i atua o nuu ese, ae na tumau pea o ni tagata Isaraelu. E faavae i le feagaiga fou, na foafoaina ai e Ieova se nuu faaleagaga, “le Isaraelu [a] le Atua,” e suia le Isaraelu faaletino. (Kalatia 6:16; Mataio 21:43; Roma 9:6-8) Peitai, e leai se tasi e tumau ona avea o se vaega o le nuu faaleagaga pe afai na te lafoaia le tapuai atu ia Ieova ma ua na o ia lava.

¹¹ Na fetalai foi Ieova: “E iloa aʻu e i latou uma lava, o tagata nuu atoa ma alii.” (Ieremia 31:34) I Isaraelu, e toatele sa latou faagaloina Ieova, i le faapea mai: “E le faia e Ieova se mea lelei, na te le faia foi se mea leaga.” (Sefanaia 1:12) E leai se tasi e tumau ona avea ma vaega o le Isaraelu a le Atua pe afai na te lē amanaia Ieova pe na te faafilogia le tapuaiga mamā. (Mataio 6:24; Kolose 3:5) O Isaraelu faaleagaga o i latou “o le nuu o e ua iloa lo latou Atua.” (Tanielu 11:32) Latou te fiafia e ‘aʻoaʻoina le poto e uiga i le Atua moni e toatasi ma le poto e uiga ia Iesu Keriso.’ (Ioane 17:3) O le iloaina o Iesu e faalolotoina ai lo latou poto e uiga i le Atua talu ai, i se uiga tutasi, o Iesu “o ia ua na faailoa mai [le Atua].”—Ioane 1:18; 14:9-11.

12, 13. (a) I luga o le ā e faavae aʻe ai le faamagaloina e Ieova o agasala a i latou o i le feagaiga fou? (e) E tusa ai o le faamagaloina o agasala, ua faapefea ona sili atu le tāua o le feagaiga fou nai lo le feagaiga tuai?

¹² I le faaiuga, na folafola ai e Ieova: “Ou te faamagalo i a latou amio leaga, ma ou le toe manatua a latou agasala.” (Ieremia 31:34e) O le Tulafono na tuuina ia Mose sa aofia ai le faitau selau o tulafono tusitusia sa faatonuina le fanauga a Isaraelu ina ia usitaia. (Teuteronome 28:1, 2, 15) O i latou uma na solia le Tulafono sa latou ofoina atu taulaga e faamagalo ai a latou agasala. (Levitiko 4:1-7; 16:1-31) E toatele tagata Iutaia na oo ina latou talitonu e mafai ona taʻuamiotonuina i latou e ala i a latou galuega o le Tulafono. Peitai, o Kerisiano, ua latou iloa e lē tāitai mafai ona latou maua le taʻuamiotonuina e ala i a latou lava galuega. E lē mafai ona latou alofia le agasala. (Roma 5:12) I le feagaiga fou, e faatoʻā mafai ona maua se tulaga taʻuamiotonuina i luma o le Atua, e faavae aʻe i le taulaga a Iesu. Peitai, o lena tulaga o se meaalofa, o le alofa fua mai le Atua. (Roma 3:20, 23, 24) O loo tāpā mai pea e Ieova le usiusitai o ana auauna. Ua faapea mai Paulo o i latou o ē o i le feagaiga fou ua iai i latou “i le tulafono ia Keriso.”—1 Korinito 9:21.

¹³ Mo Kerisiano la, ua iai foi mo i latou se taulaga mo agasala, ae o se taulaga e sili atu lona tāua nai lo taulaga sa faia i le feagaiga o le Tulafono. Na tusi mai Paulo: “Ua tutū foi ositaulaga uma [i lalo o le feagaiga o le Tulafono] ua auauna i lea aso ma lea aso, o loo avatu soo ia lava taulaga e le mafaia lava ona aveeseina ai o agasala. Peitai ane o [Iesu], na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau.” (Eperu 10:11, 12) Talu ai o loo faaalia e Kerisiano o i le feagaiga fou lo latou faatuatua i le taulaga a Iesu, ua taʻuamiotonuina ai i latou e Ieova, e aunoa ma ni agasala, ma ua latou iai i se tulaga e faauuina ai e avea o ni ona atalii faaleagaga. (Roma 5:1; 8:33, 34; Eperu 10:14-18) Pe a latou agasala ona o le lē lelei atoatoa faaletagata, e mafai ona latou ole atu mo le faamagaloga a Ieova, ma e faavae i le taulaga a Iesu, e faamagaloina ai i latou e Ieova. (1 Ioane 2:1, 2) Ae peitai, pe afai latou te filifili e faia ma le loto i ai le agasala, ona latou lē toe maua lea o lo latou tulaga taʻuamiotonuina ma le faaeaga o le faia o sa latou vaega i totonu o le feagaiga fou.—Eperu 2:2, 3; 6:4-8; 10:26-31.

Le Feagaiga Tuai ma le Feagaiga Fou

14. O le ā le peritomeina sa manaomia i le feagaiga o le Tulafono? i le feagaiga fou?

¹⁴ Sa peritomeina tane i le feagaiga tuai e avea o se faailoga o lo latou iai i lalo o le Tulafono. (Levitiko 12:2, 3; Kalatia 5:3) Ina ua amata le faapotopotoga Kerisiano, sa manatu nisi faapea e tatau foi i Kerisiano e lē o ni Iutaia ona peritomeina. Peitai, e ala i le taitaiga a le Afioga a le Atua ma le agaga paia, na iloa ai e aposetolo ma toeaina i Ierusalema le lē talafeagai o lena mea. (Galuega 15:1, 5, 28, 29) I ni tausaga mulimuli ane, na faapea mai ai Paulo: “E le o le Iutaia le ua vaaia, e le o le peritome foi le ua vaaia i le tino; a e peitai o le ua le vaaia, o le Iutaia lava lea; o le peritome foi, ua i le loto lea, o loo i la le agaga lea, e le o i la le tusi.” (Roma 2:28, 29) O le peritomeina faaletino, e tusa lava pe faia mo tagata Iutaia moni, sa lē toe iai sona tāua faaleagaga i le silafaga a Ieova. Mo i latou o i le feagaiga fou, e tatau ona peritomeina o latou loto, ae lē o le tino. O so o se mea lava i o latou mafaufauga, o latou faanaunauga, ma uunaiga o a latou gaoioiga e lē faafiafiaina pe e lē mamā i le silafaga a Ieova e tatau ona aveesea.a E toatele tagata i aso nei ua avea o ni molimau ola i le mana o le agaga paia lea na te liliuina mafaufauga i lenei auala.—1 Korinito 6:9-11; Kalatia 5:22-24; Efeso 4:22-24.

15. E faapefea ona fefaatusatusaai le Isaraelu faaletino ma le Isaraelu a le Atua, e tusa ai o le pulega tautupu?

¹⁵ I le faatulagaga o le feagaiga o le Tulafono, na avea ai Ieova o le Tupu o Isaraelu, ma a o faagasolo le taimi sa ia faatino ai lana pule silisili ese e ala mai i tupu faaletagata i Ierusalema. (Isaia 33:22) O Ieova foi le Tupu o le Isaraelu a le Atua, le Isaraelu faaleagaga, ma talu mai le 33 T.A., ua pule ai o ia e ala mai ia Iesu Keriso, o lē ua mauaina “le pule uma . . . i le lagi ma le lalolagi.” (Mataio 28:18; Efeso 1:19-23; Kolose 1:13, 14) I aso nei, ua amanaia ai e le Isaraelu a le Atua le avea o Iesu ma Tupu o le Malo faalelagi o le Atua, lea na faavaeina i le 1914. O Iesu o ia o le Tupu e sili mamao atu nai lo o Esekia, Iosia, ma isi tupu faamaoni o Isaraelu anamua.—Eperu 1:8, 9; Faaaliga 11:15.

16. O le ā le ituaiga faatulagaga faaositaulaga e iai le Isaraelu a le Atua?

¹⁶ Sa lē gata ina avea Isaraelu o se malo ae sa iai foi lana faatulagaga faaositaulaga ua faauuina. I le 33 T.A., na suia ai e le Isaraelu a le Atua le Isaraelu faaletino ma avea ai o le “auauna” a Ieova, o ana “molimau.” (Isaia 43:10) O fetalaiga a Ieova ia Isaraelu o loo faamauina i le Isaia 43:21 ma le Esoto 19:5, 6 ua faapena ona faatatauina i le Isaraelu faaleagaga a le Atua. O le nuu fou faaleagaga o le Atua ua avea nei o “le tupulaga ua filifilia . . . o tupu ma ositaulaga, o le nuu paia, ma le nuu na faatauina mai,” ua tofia mo le ‘taʻutaʻuina atu o galuega lelei a Ieova.’ (1 Peteru 2:9) O ē uma lava o i le Isaraelu a le Atua, o tane ma fafine, ua faia aʻe ai se auositaulaga tuufaatasi. (Kalatia 3:28, 29) I le avea o se vaega lona lua o le fanau a Aperaamo, ua latou faapea atu ai nei: “Outou nuu ese e, ina olioli ia faatasi ma lona nuu.” (Teuteronome 32:43) O i latou o le Isaraelu faaleagaga o loo iai pea i le lalolagi ua faia aʻe ai “le auauna faamaoni ma le mafaufau.” (Mataio 24:45-47) E na o le auaufaatasi atu ia i latou e mafai ai ona tuuina atu i le Atua se auaunaga paia e talileleia mai e ia.

Le Malo o le Atua—Le Faataunuuga Faaiu

17. O le ā le fanauina mai ua tofo i ai i latou o i le feagaiga fou?

¹⁷ O tagata Isaraelu o ē na fananau ina ua mavae le 1513 T.L.M. na iai i latou i totonu o le feagaiga o le Tulafono ina ua fananau mai. O i latou ua aveina atu e Ieova i totonu o le feagaiga fou ua fanauina foi i latou—ae i lo latou tulaga, o se fanauina faaleagaga. Na taʻua e Iesu lenei mea i le Faresaio o Nikotemo ina ua ia fetalai atu: “E moni, e moni, ou te fai atu ia te oe, a le toe fanau le tagata, e le mafai ona iloa e ia o le malo o le Atua.” (Ioane 3:3) O soo e toʻa 120 sa iai i le Penetekoso 33 T.A. o uluai tagata lē lelei atoatoa na sa latou tofo i lenei fanaufouina mai. I le taʻuamiotonuina e ala i le feagaiga fou, na latou mauaina ai le agaga paia e avea o ‘se faamaoniga’ o lo latou tofi tautupu. (Efeso 1:14) Sa “fanau mai foi i la le Agaga” i latou e avea o ni ataliifai o le Atua, lea ua taʻua ai i latou o uso o Iesu ma avea ai ma “suli faatasi ma Keriso.” (Ioane 3:6; Roma 8:16, 17) O lo latou “toe fanau” mai ua saunia ai le avanoa mo ni faamoemoega ofoofogia.

18. O le toe fanau mai ua saunia ai le avanoa mo ā faamoemoega ofoofogia mo i latou o i le feagaiga fou?

¹⁸ A o avea ma puluvaga i le osia o le feagaiga fou, na faia ai e Iesu se isi feagaiga faaopoopo ma ona soo, i le fetalai atu: “E faapei ona tofia mai e loʻu Tamā o le malo ia te au, e faapea foi ona ou tofia outou.” (Luka 22:29) O lenei feagaiga o le Malo ua sauniunia ai le ala mo le faataunuuga o se vaaiga mataina, o loo tusia i le Tanielu 7:13, 14, 22, 27. Na vaaia e Tanielu “Lē e pei o le Atalii o le tagata,” ua tuuina atu i ai le pule tautupu e “Lē ua mai anamua ona aso,” o Ieova le Atua. Ona vaaia lea e Tanielu faapea “ua maua mai . . . le malo e le au paia.” O Iesu o ia “Lē e pei o le Atalii o le tagata” o lē na ia mauaina mai ia Ieova le Atua le Malo faalelagi i le 1914. O ona soo faauuagagaina o “le au paia” lena o ē ua auai faatasi ma ia i lena Malo. (1 Tesalonia 2:12) E faapefea?

19, 20. (a) Mo i latou o i le feagaiga fou, o le ā le faataunuuga mulimuli, matagofie o le a latou maua mai le folafolaga a Ieova ia Aperaamo? (e) O le ā le isi fesili e manaomia ona talanoaina?

¹⁹ Pe a mavae ona latou maliliu, ona pei lea o i latou nei faauuina o Iesu o le a toe tutū aʻe o ni foafoaga agaga e lē mafai ona toe oti, ma o le a latou auauna faatasi ma ia o ni tupu ma ositaulaga i le lagi. (1 Korinito 15:50-53; Faaaliga 20:4, 6) Maeu se faamoemoe pupula! “E fai foi i latou ma tupu i le lalolagi,” ae lē na o le laueleele o Kanana. (Faaaliga 5:10) Po o le a latou ‘mauaina ea faitotoa o ē ita ia i latou’? (Kenese 22:17) Ioe, ma i se uiga mautinoa, o le latou faia faapea pe a oo ina latou molimauina le faaumatiaga o le fafine talitane inosia faalotu, o Papelonia le Aai Tele, ma pe a auai atu ia Iesu i latou nei faauuina ua faatutūina aʻe, ina ia latou leoleo i atunuu uma “i le tootoo uamea” ma i le tuʻimomomoina o le ulu o Satani. Ona faia ai lea o sa latou vaega i le faataunuuina o le vaega faaiu o le valoaga i le Kenese 3:15.—Faaaliga 2:26, 27; 17:14; 18:20, 21; Roma 16:20.

²⁰ Peitai, tatou te ono fesili, Po o le feagaiga ea faa-Aperaamo ma le feagaiga fou, e aofia ai na o nei tagata faamaoni e 144,000? E leai, o isi o ē e lē o iai patino i totonu o nei feagaiga, o le a faamanuiaina e ala mai ia i latou, e pei ona o le a tilofaia i le mataupu o loo sosoo mai.

[Faaopoopoga i lalo]

E te Manatua?

◻ O anafea na muai vaaia ai le faagaoioia o le feagaiga fou?

◻ O le ā na faataulauina e ala mai le feagaiga tuai?

◻ O ai le Fanau autū a Aperaamo, ma i le ā le faasologa na faamanuiaina ai atunuu e ala mai i lena Fanau?

◻ Mo le 144,000, o le ā le faataunuuga mulimuli o le feagaiga faa-Aperaamo ma le feagaiga fou?

[Ata i le itulau 15]

O le faamagaloga o agasala e iai se uiga e sili ona loloto mo i latou o i le feagaiga fou, nai lo i latou i le feagaiga tuai