Pe a Osofai Mai ni Tagata Faomea Faaauupegaina

I IKOYI, o se vaipanoa i Aferika i Sisifo e taulalata i le taulaga e nonofo ai tagata mauoa, ua avea ona fale tetele ma ʻolo. O le tele o na fale e iai pa maualuluga e taisefulu futu (3 mita) le maualuluga, e tuu ai i tumutumu mea maamaai, o tioata taʻei, po o taaiga uaea talatala maamaai. E iai leoleo e leoleoina ia ala tatala uamea e faamauina i faamau uamea, faamau faalava uamea, filifili ma loka lapopoa. O faamalama e puipuia i uaea uamea. E iai faitotoa uamea e vavae ese ai potumoe mai le fale atoa. I le po, e tatala ai taifau lapopoa—o Alsatians ma Rottweilers—mai mea e loka ai. E iai molī sulu e matuā malamalama lava pe a oo i le po, ma faiga faakomepiuta e pei o ni leoleo nanā e tagitagi lemū pe a sologa lelei mea uma.

E leai se tasi e faaletonu i le manaomia ona malupuipuia o latou fale. Ua taʻua ma le faanoanoa lava i ulutala o nusipepa e faapea: “Ua Matuā Vetea e Tagata Faomea Faaauupegaina le Nuu”; “Ua Lē Mataofiofia le Gāoi o Tamaiti”; ma “Le Mataʻu, a o Faoa e Kegi [se Taulaga].” O le tulaga lena o loo iai le tele o atunuu. E pei ona valoia e le Tusi Paia, ua tatou ola moni lava i aso faigata.—2 Timoteo 3:1.

I le lalolagi aoao, ua matuā oso maualuga le tulaga o solitulafono, e aofia ai ma tagata faomea faaauupegaina. Ua faateleina le lē mafai po o le lē mananao foi o faiga malo e puipuia o latou lava tagatānuu. I nisi o atunuu, e lē o lava leoleo ma e lē o lava foi a latou auupega, ua lē lelei ai ona faaauupegaina leoleo e tali atu ai i valaau mai mo ni fesoasoani. O le toatele o tagata e tutū latalata ane, e lē mananao e aafia ai.

Ua lē mafai e tagata o loo afaina ai i solitulafono ona faalagolago atu i se fesoasoani mai leoleo po o tagata lautele, ua tuu atu ai e puipui e i latou i latou lava. Na taʻua e se toeaina Kerisiano i se atunuu tauatiae e faapea: “Afai e te saili atu mo se fesoasoani, o le a matuā faamanualia pe fasiotia ai oe e tagata faomea. Aua e te faalagolago i se fesoasoani mai fafo. Afai e sau se fesoasoani, lelei, ae aua e te faatalitalia pe saili atu foi i ai, o le saili atu mo se fesoasoani e na ona oo mai ai o nisi faalavelave e sili atu.”

Le Puipuiga ma le Afioga a le Atua

E ui o Kerisiano e lē ni ō le lalolagi, ae o loo iai i latou i le lalolagi. (Ioane 17:11, 16) E pei foi o isi tagata uma lava, e latou te faia ni sauniuniga talafeagai mo lo latou saogalemu. Ae peitai, e lē pei o le toatele o tagata o ē e lē auauna ia Ieova, e saili e tagata o le Atua le puipuiga e talafeagai ma mataupu silisili faa-Kerisiano.

I se faaeseesega, o tagata i nisi o atunuu i Aferika, e latou te faaaogaina faiga faataulaitu e saili ai se puipuiga mo i latou mai tagata faomea. E ono fai e se fomai faataulaitu se maʻosi i le tapulima, fatafata, po o le papatua o le tagata na alu atu mo se fesoasoani. Ona nini lea o le maʻosi i se vaiaitu, ona fai atu lea o ni upu faataulaitu ma manatu ai e faapea, e lē taitai osofaia lea tagata i osofaiga a tagata faomea. O isi latou te tuu ai mea faalauatau po o vaiaitu i o latou fale, ma le talitonuga e faapea o “puipuiga” faapena o le a faapogaia ai ona ō ese tagata faomea e aunoa ma le faaleagaina o i latou.

E leai se vaega a Kerisiano moni e faia i so o se faiga faataulaitu. E tausalaina e le Tusi Paia ituaiga uma o faiga faaagaga, ma o le mea saʻo lena e tatau ona fai, talu ai o na faiga e mafai ona fesootai atu ai tagata i temoni, i latou tonu lava na o loo faatuputupulaia faiga sauā i le lalolagi. (Kenese 6:2, 4, 11) Ua taʻua manino mai e le Tusi Paia e faapea: “Aua foi le fai togafiti faataulāitu.”—Levitiko 19:26.

Ona o le popole tele, ua saili ai e nisi tagata le saogalemu i le faaauupegaina o i latou i fana. E ui i lea, e manatu mamafa Kerisiano i upu a Iesu, o lē na faapea mai: “O i latou uma o e tago i le pelu, e oti i latou i le pelu.” (Mataio 26:52) O tagata o le Atua, ua ‘tuʻi a latou pelu e fai ma uamea o suo tosina,’ ma e latou te lē faatauina mai ni fana e puipuia ai i latou mai gaoiga po o ni osofaiga.—Mika 4:3.

Ae faapefea le fuafuaina mo ni leoleo faaauupegaina? Ona o lenei mea o se filifiliga totino a le tagata, ae ia manatua, o se fuafuaga faapena, ua tuu atu ai se fana i se isi tagata e na te faaaogaina. O le ā e faatalitalia e le pule e faia e leoleo pe a sau se tagata faomea? Po o le a ia faatalitalia leoleo e fanaina le gaoi pe afai e tatau ai ina ia puipuia ai tagata ma mea ia latou te leoleoina?

O le tulaga lea e faia e Kerisiano i le teena o faiga faataulaitu ma auupega, atonu e foliga mai o se mea valea i manatu o i latou e lē iloa le Atua. Ae peitai, ua faamautinoa mai ia i tatou e le Tusi Paia e faapea: “O lē faatuatua ia Ieova e puipuia o ia.” (Faataoto 29:25, NW) A o puipuia e Ieova ona tagata e avea o se nuu atoa, e lē o taimi uma e faalaa mai ai Ieova e puipuia ana auauna mai le faoa o a latou mea. Sa mataina le faamaoni o Iopu, ae na faatagaina e Ieova tagata faomea e gaoia lafu manu a Iopu, ma maliliu ai foi ana auauna. (Iopu 1:14, 15, 17) Sa faatagaina foi e le Atua le aposetolo o Paulo e oo i ai ‘tulaga lamatia mai ē fao mea.’ (2 Korinito 11:26) Ae peitai, ua aʻoaʻoina e le Atua ana auauna ina ia ola e tusa ma mataupu silisili e mafai ona faaitiitia ai le tulaga lamatia o le faoa o a latou mea. Ua ia saunia foi mo i latou le poto lea e mafai ona fesoasoani ia i latou e tali atu ai i osofaiga a tagata faomea i ni auala o le a faaitiitia ai se manuaga e ono tupu mai.

Faaitiitia le Lamatia o le Faoa o Mea

Ua leva ona matauina e se tagata poto e faapea: “O le tele o mea a le mauoa e lē mafai ai ona moe o ia.” (Failauga 5:12, NW) I se isi faaupuga, o i latou e tele oa faitino e ono oo ina matuā faapopoleina ina neʻi leiloa a latou oa, o lea ua lē mafai ai ona momoe ona o le popole i oa.

O lea, o le tasi o auala e faaitiitia ai e lē gata i le popole a o le ono faoa o mea, o le alofia lea o le soona faaputuina o le anoanoai o mea taugata. Na tusia e le aposetolo faagaeeina e faapea: “O mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi.” (1 Ioane 2:16) O le tuinanauga lava lea e tasi e uunaia ai tagata e faatau mai mea taugata, o lea e uunaia ai foi isi e gāoi. Ma o le faalialiavale o se tasi i mea ua ia maua i le olaga e mafai ona tosina atu ai i latou o ē o mananao e gaoi.

E lē gata i le aua le fia faalialia, ae o se tasi o puipuiga malu faasaga i le faoa o mea, o le faailoa atu lea o oe o se Kerisiano moni. Afai e te faaalia le alofa i isi, ma e faamaoni i au feutagaiga ma i latou, ma maelega i le faiva faa-Kerisiano, e mafai ona e ati ae se talaaga i lou nuu i le avea o se tagata amiotonu, o sē e tatau ona faaaloalo i ai. (Kalatia 5:19-23) O le talaaga lelei faa-Kerisiano faapena e mafai ona sili atu ona puipuia ai oe na i lo o se auupega.

Pe a Ō Mai Tagata Faomea Faaauupegaina

O le ā e tatau ona e faia pe afai ua mafai e tagata faomea ona ulu atu i lou fale ma tou faafesagai? Ia manatua e sili atu ona tāua lou ola na i lo oa. Na fetalai Iesu Keriso: “Aua neʻi outou tetee atu i le [tagata] leaga; ai se na te po mai i lou alafau taumatau, ia e liliu atu ia te ia le isi. O lē fia . . . ave lou ofu tino, ia e tuu atu foi i ai ma lou ofu tele.”—Mataio 5:39, 40.

O se fautuaga atamai lenei. E ui lava e lē se tiute o Kerisiano le tuuina atu i tagata solitulafono ni faamatalaga e faatatau i alamanuia, e foliga mai e sili atu ona sauā tagata faomea pe a latou lagona o loo e tetee, lē felagolagomai, pe tau faasese. O le toatele o i latou, “ua latou lē lagona se mea,” e faigofie lava ona oo ina matuā sauā ma leai se alofa.—Efeso 4:19.

O Samuelu e nofo i se fale mautotogi telē. Na poloka e tagata faomea le fale atoa ma ō atu mai lea potu i lea potu e vetea mea. Sa faalogoina e Samuelu le pāpā o fana, talepeina o faitotoa, ma le feei, fetagisi, ma le lauē o tagata. Sa lē mafai ona sosola ese. Na fai atu Samuelu i lana avā ma ona atalii e toatolu ina ia tootutuli i lalo ma sisii i luga o latou lima, moeiini o latou mata, ma faatalitali. Ina ua osofai mai le au faomea i totonu o le potu, na talanoa atu Samuelu ia i latou o loo punou i lalo, ona sa ia iloa faapea, afai e vaai atu o ia i o latou mata, atonu o le a latou manatu ai e mafai e Samuelu ona mataulia i latou i se taimi mulimuli ane. Na ia faapea atu: “Ō mai i totonu. Ave so o se mea lava tou te mananao ai. E pule lava outou i mea e ave. O matou o Molimau a Ieova, ma e matou te lē teena outou.” Na faateia le au faomea i lenei mea. I le sili atu i se itula pe ā na sosoo ai, na ō mai vaega ai ni tagata faomea faaauupegaina se toʻa 12. E ui sa gaoia ni mea na faia i maa tāua, tupe, ma meafale faaeletise, ae sa lei fasia pe faamanualia foi le aiga i ni sapelu e pei ona faia i isi tagata i le fale lava lena. Na faafetai atu le aiga o Samuelu ia Ieova mo o latou ola.

Ua faaalia i lenei mea e faapea, pe a oo i mea tautupe ma isi mea faitino, o i latou o loo gaoia a latou mea o ē e lē tetee atu, e mafai ona faaitiitia le ono faamanualia.a

I nisi taimi, o le tuuina atu e se Kerisiano o se molimau e mafai ona avea o se puipuiga mai le faamanualia. Ina ua osofaia e tagata faomea le fale o Ade, na ia taʻu atu ia i latou: “Ou te iloa le faigata tele o mea mo outou, o le mafuaaga lena ua outou faia ai lena faiga. O matou o Molimau a Ieova, e matou te talitonu e faapea, i se aso, o le a maua ai e tagata uma meaʻai e lava mo ia ma lona aiga. O tagata uma, o le a ola filemu ma fiafia i lalo o le pulega a le Malo o le Atua.” O le mea lena na faiifo ai le sauā a le au faomea. Na faapea atu le tasi o i latou: “E matou te faamalie atu ona ua matou ō mai i lou fale, ae e tatau ona e malamalama ua matou fia aai.” E ui lava na latou aveesea mea totino a Ade, ae latou te lei faaoolima ia te ia po o lona aiga.

Ia Toafilemu Pea

E lē o se mea faigofie ona toafilemu pe a oo i se tulaga matautia, ae maise lava ona o le sini autū o tagata faomea o le faafefeina lea o tagata o latou osofaia ina ia gauai ai. O le a fesoasoani ia i tatou le tatalo. O lo tatou alaga atu mo se fesoasoani, e ui e fai lē leoa ma puupuu, ae e mafai ona faafofogaina e Ieova. Ua faamautinoaina i tatou e le Tusi Paia e faapea: “O fofoga o Ieova o loo faasaga i e amiotonu, e liliu mai foi ona taliga i a latou alaga.” (Salamo 34:15) E faafofoga mai Ieova ia i tatou ma mafai ona aumaia ia i tatou le atamai e feutagai ai ma le toafilemu ma so o se tulaga.—Iakopo 1:5.

E lē gata i le tatalo, ae o le isi fesoasoani e toafilemu ai, o le muai mafaufau mamao lea i le mea o le a e faia ma le mea e lē faia pe afai e faoa au mea. O le mea moni, e lē mafai ona muai iloa mamao po o le ā le tulaga o le a oo ia te oe. O se fautuaga, e lelei pea ona e manatua ni mataupu silisili, e pei lava ona atamai lou manatuaina o ni taualumaga o le saogalemu ina neʻi teʻi ua e iai i totonu o se fale ua mu. O le muai mafaufau loloto, o le a fesoasoani ia te oe e tumau ona e toafilemu, e alofia ai le fefe, ma ia sao ai mai le faamanualia.

Ua taʻua manino mai le silafaga a le Atua e uiga i ē faomea: “Auā o aʻu o Ieova, ou te fiafia i le faamasinoga tonu, ou te ʻinoʻino i mea ua faoa ma le amioletonu.” (Isaia 61:8, NW) Na faagaeeina e Ieova lana perofeta o Esekielu ina ia tusia o le faomea o se agasala mamafa. (Esekielu 18:18) Peitai, ua faaalia mai i le tusi lava lea o le Tusi Paia e faapea, o le a faamagaloina ma le alofa mutimutivale e le Atua le tagata ua salamō ma toe avatu mea na faoa.—Esekielu 33:14-16.

E ui lava o loo ola i se lalolagi ua matuā taatele ai le solitulafono, ae e olioli Kerisiano ona o le faamoemoe o le ola i lalo o le pulega a le Malo o le Atua, o le a aveesea ai e faavavau le faomea. Ua folafola mai e le Tusi Paia e faatatau i lena taimi: “[O tagata o le Atua] e taitasi ma nofo i lalo o lona vine, ma lalo o lona mati; e leai foi se na te faamatau mai; auā ua faapea ona tulei mai ai le siufofoga o Ieova o ʻau.”—Mika 4:4.

[Faaopoopoga i lalo]