O le Soifuaga o Iesu ma Lana Faiva

Loimata na Liua i Le Fiafia Tele

INA ua vaai atu Iairo i le fafine na i ai le puna toto ua faamalōlōina, e leʻi taumate le matuā faateleina o lona talitonu i le mana o Iesu e fai ai vavega. I le taeao lava o lea aso, na talosaga atu ai Iairo ia Iesu ina ia maliu mai e fesoasoani i lona afafine pele e 12 tausaga, ua tali oti. Peitaʻi a o la agaʻi atu i le aiga o Iairo, e latalata atu pe o loo i ai foi i kapanaumi, na faamalōlōina ai se fafine sa na ona paʻi atu lava i tuupao o le ofu tele o Iesu.

Peitaʻi, i le taimi lava lea, na tupu ai le mea sa sili ona mataʻu i ai Iairo. A o fetalai atu pea Iesu i le fafine, na taunuu mai ai ni tamaloloa ma taʻu lemu atu ia Iairo: “Ua oti lou afafine; se a le mea e te faalavelave ai pea i le aʻoaʻo?”

Maeu se tala faanoanoa! Seʻi manatu: O lenei tamaloa e faaaloalogia tele e le nuu, a o leneu ua matuā lē mafesoasoania lava ina ua ia iloa e uiga i le oti o lona afafine. Peitaʻi, ua lagona atu e Iesu le talanoaga. O lea, ua ia faliu atu nei ia Iairo ma faalototele atu: “Aua e te mataʻu; tau lava ina e faatuatua.”

Ona maliu atu lea o Iesu faatasi ma le tamaloa faanoanoa i lona fale. Ina ua ia taunuu atu, ua la iloa atu ai le pa o le lauaitu ma le tagituʻi. O loo faapotopoto ai le motu o tagata o loo tagituʻi ma taufaitagiauē i latou. Ona maliu atu lea o Iesu i totonu ma fesili atu: “Se a le mea ua outou pisaō ai, ma outou fetagisi ai? e le oti le teine, ua na ona moe.”

Ina ua faalogo tagata i lenei mea, ona amata lea ona latou toē ma aamu ia Iesu, auā ua latou iloa ua oti moni lava le teine. Peitaʻi, ua fetalai atu Iesu, o loo na ona moe o ia, ina ia faaalia ai e faapea, e mafai e lona mana na le oti, e pei lava ona faigaofie ona fafagu o i latou mai se moe gase.

Ua tulia nei e Iesu tagata uma i fafo seʻi vagana ai Peteru, Ioane, Iakopo, ma mātua o le teine ua oti. Ona ia ave ai lea o i latou nei e toalima i le potu o loo taoto ai le teine. Ona tago atu lea o Iesu i le lima o le teine, ma ia fetalau atu i ai: “Talita Kumi,” o lona faamatalaga lenei: “Funa e, ou te fai atu ia te oe, ia e tulaʻi.” Ona tulaʻi loa lea o le teine ua savali! Ua matuā seia mauli o mātua o le teine i lenei vaaiga ma ua matuā fiafia tele ai.

Ina ua uma ona faatonu atu ia avane se mea e ʻai ma le teine, ona vavao atu lea e Iesu ia Iairo ma lana avā ina ia aua neʻi taʻu atua i se tasi le mea ua tupu. A e peitaʻi, e ui lava ina fetalai atu faapena Iesu, a e ua salalau atu pea le tala i lena itumalo atoa. O le toetu lona lua lenei ua faatinoina e Iesu. Mataio 9:18-26; Mareko 5:35-43; Luka 8:41-56.

◆ O le ā le tala ua maua e Iairo, ma ua faapefea ona faalototeleina o ia e Iesu?

◆ O le ā le tulaga ua i ai le aiga o Iairo ina ua taunuu atu i laua ma Iesu?

◆ Ai se ā ua faapea atu ai Iesu o le teine oti o loo na ona moe o ia?

◆ O ai le toalima lea o loo faatasi ma Iesu ma molimauina le toetu?