O le ā o le a E Fai Atu ai i se Tagata Siū?

¹ I le uluaʻi senituri, o le toʻatele o le “fanauga a Isaraelu” sa tali atu ma le talisapaia i le talaʻiga a Iesu ma ona aposetolo. (Galu. 10:36) I le pei lava o aso na, e toʻatele tagata Siū loto faamaoni i aso nei ua taliaina ma le loto atoa le upu moni—e lē gata i Isaraelu ae i Rusia foʻi, le Iunaite Setete, ma isi atunuu. Pe e te manaʻo ina ia sili atu ona e taulau manuia i le molimau atu i tagata Siū? O le a fesoasoani ia te oe fautuaga ia o loo mulimuli mai e avatu ai se molimau fuafua lelei e lē gata i tagata Siū e lolotu a o ē foʻi e lē toaaga i lotu.

² Molimau Atu i Tagata Siū e Lolotu: E tatau ona iloa e faapea o tagata Siū e lolotu, e masani lava ona manatu mamafa i le tausisia o uputuu faarapi na i lo le faamatalaina o ni aʻoaʻoga patino. O le mea moni, e masani ona latou manatu i uputuu e faapea o loo iai le pule e tutusa ma le Tusi Paia. I lea, e lē matuā fiafia ai i latou e talanoa i ni mataupu loloto faale-Tusi Paia. E tele foʻi ina latou manatu i le Tusi Paia o se tusi faa-Kerisiano. O le māfuaaga lena, e sili atu ai ona lelei le faaaogā o faaupuga e pei o “Tusitusiga Eperu,” “le Torah,” po o “Tusitusiga,” pe a faasino atu i le Tusi Paia. O se lomiga e sili ona lelei ua saunia faapitoa mo tagata Siū, o le polosiua Will There Ever Be a World Without War?

³ O ā ni mataupu e ono fiafia i ai tagata Siū e lolotu? Latou te talitonu e toʻatasi le Atua, o lē o loo matuā naunau mai i tagata. Latou te talitonu foʻi o loo faalaa mai le Atua i mataupufai a tagata. E te ono mafai ona faaaogā nei manatu e faavae ai se mataupu e tau fai ioe uma i ai tagata Siū. E lē gata i lea, o le toʻatele o tagata Siū latou te malamalama lelei i mafatiaga na oo i o latou tagata i le taimi o le Taua Lona Lua a le Lalolagi. Latou te tau mānatu pe aisea ua faataga ai e le Atua na faiga lē tonu ma po o afea o le a faaiʻuina ai le amioleaga. Ua faaauupegaina lelei i tatou e tali atu i na fesili, i le faasino atu, mo se faaaʻoaʻoga, i mea na oo i o tatou uso i le vaitaimi o le Fasiotiga Tagata a le ʻau Nasi.

⁴ O le mea moni, ina ia ʻalofia le faaesea o lē ona le fale, e sili atu ona lelei pe a aua le vave faailoaina atu i le talanoaga le mataupu i le Mesia. Ae peitaʻi, e mafai ona e talanoa i le vaega na faia e Mose i le talafaasolopito o Isaraelu, ma fesili atu i lē ona le fale pe talitonu o loo aogā pea i aso nei aʻoaʻoga a Mose. Pe afai e foliga mai ua talafeagai ona talanoaina faailoaga o le Mesia, e mafai ona e faitauina muamua le Teuteronome 18:15, lea e faapea mai: “E faatuina e Ieova lou Atua mai ia te oe, o so lou au uso, se perofeta mo oe e pei o aʻu nei; tou te faalogo ia te ia.” Fesili i lē ona le fale po o ai lea sa manatu i ai Mose i lona faapea mai o se perofeta e pei o ia lava. Ona talanoa loa lea o ni nai manatu i le polosiua o le World Without War, itulau 14, palakalafa 17 ma le 18.

⁵ E Ese Manatu o Tagata Siū e Lē Lolotu i le Mataupu: E lē o tagata uma e faapea mai o ia o se Siū, e talia aʻoaʻoga i faiga faa-Iutaia. E toʻatele tagata Siū e lē faalelotu o latou manatu. E sili atu ona latou fiafia i le faaauilumaina o se faailoaga e faaesea ai tagata Siū, i ana aganuu, uputuu, ma aʻoaʻoga, na i lo le faatinoina o faiga faalotu a Iutaia. O nisi tagata Siū e lē lolotu latou te lē mautinoa i le iai o se Atua—e toʻalaiti foʻi nisi e matuā lē talitonu lava i le iai o se Atua. I le amataga lava, e itiiti sina mea o le a faataulauina pe afai e tele ina sii mai Tusitusiga Eperu. O le a sili atu ona aogā pe a fai le talanoaga e pei ona e talanoa ma se tagata e lē lotu. Mo se faaaʻoaʻoga, e mafai ona e faamatala atu le auala ua aogā ai le Tusi Paia mo o tatou aso. Afai e lē talitonu lē ona le fale i le faagaeeina o le Tusi Paia, atonu o le a aogā nisi o manatu mai le polosiua o le World Without War, ae maise lava manatu na e i le vaega i le itulau e 3 o loo faaulutala mai “The Bible—Inspired by God?”

⁶ Pe a molimau atu i se tagata Siū, e mafai ona e faapea atu:

◼ “O le toʻatele o i tatou sa tofo i faanoanoaga ona o le maliu o se tasi e pele ia i tatou. O le ā sou manatu i le mea e tupu ia i tatou pe a tatou oti?” Faatali mo se tali. Ona faasino saʻo lea o lē ona le fale i le pusa ua faaulutalaina “Death and the Soul—What Are They?” i le itulau e 22 o le polosiua, World Without War. I le pusa, o loo faatusatusa ai mea o fai mai ai le Tusi Paia e uiga i le ola pe a mavae le oti ma mea o aʻoaʻo e rapi. Ona suʻe lea i le palakalafa e 17 i le itulau e 23, ma faaali i ai faapea, e tusa ai ma faamatalaga a le Tusi Paia, o ē ua oti, o le a toe faatutūina mai i le ola i se lalolagi parataiso. Ofo le polosiua. I le sauniuni atu mo le toe asiga, e mafai ona e taʻua e faapea, sa iai i le augātamā o Iopu le faamoemoe i le toetū. Faasino i mau na o loo taʻua i le faaiʻuga o le palakalafa e 17, ma fai i ai e mafai ona e toe foʻi atu ma talanoa ma i latou.

⁷ I tusi o Mataio, Mareko, Luka, Ioane, ma Galuega, o loo faamaumauina ai mea na tutupu i tagata Iutaia o ē na faalogo ma gaoioi e tusa ai ma le upu moni. O loo faaavanoa mai pea e Ieova le ala i le ola e faavavau. E toʻatele tagata Siū loto faamaoni o ē atonu e leʻi oo ina latou aʻoaʻoina mea e uiga ia Ieova, le Atua moni, ina ia mafai ai foʻi e i latou ona ola e faavavau i le lalolagi fou a le Atua.—Mika 4:1-4.