E Mafai ona E Saoloto Mai Nei Taofiofiga!

E MAFAI e se vaalele telē ona ia aveina le faitau selau o se pasese ma le tele o ni tone o se uta. E mafai faapefea e sea vaalele mamafa ona lele ese atu mai le laueleele? E ala i se malosi o loo uunaia e le ea.

A o alu saoasaoa atu le vaalele i lona auala, e feasuaʻi solo le ea i luga ma lalo o apaapa ia ua amata ona faamomoe ifo. O lena faiga e maua ai se malosi e siitia ai i luga ua taʻua o le malosi o loo uunaia e le ea. Pe a oo loa ina lava le malosi lea o loo uunaia e le ea, ona mafai lea e le vaalele ona masii ese ma le laueleele, ma lele atu ai. O le mea moni, pe a ova le uta a se vaalele, e lē mafai ona lava le malosi o loo uunaia e le ea na te mauaina ina ia masii ese ai mai le laueleele.

E mafai foi ona ova la tatou uta. I senituri ua mavae, na faapea mai ai le tupu o Tavita, o ana ‘agasala sa pei o se uta ua matuā mamafa atu ia te ia.’ (Salamo 38:4) I se tulaga tutusa, na lapataia foi i tatou e Iesu Keriso e faatatau i le mafatia i popolega o le olaga. (Luka 21:34) O mafaufauga ma faalogona sese e mafai ona tatou mafatia ai ma oo ai lava ina foliga mai ua faafaigata ona tatou “masii ese atu.” Po o e mafatia ea i lena tulaga? Po ua e tofo ea i se mea e taofiofia ai lou tuputupu aʻe atili faaleagaga? Pe afai o le tulaga lena, o le ā e mafai ona fesoasoani atu?

Po ua E Fiu Ea?

Ua fiu—o se faitioga masani i aso nei—e mafai ona avea o se taofiofiga faalemafaufau, ua oo foi i nisi o tagata o Ieova. A e maise lava, o tagata talavou e mātele ina lē amanaia nisi gaoioiga ua latou manatu ua fiu ai. Pe oo ia te oe lena lagona i nisi taimi e faatatau i sauniga faa-Kerisiano? Pe afai o le tulaga lena, o le ā e mafai ona e faia ina ia avea ai lou auai i sauniga o se mea fiafia?

O le faia o se sao o le ki autū lena. Na tusi atu Paulo i le taulealea o Timoteo e faapea: “Ia fai ma ou sini le tuutoina i le Atua. Auā e itiiti le aogā o le faamasani i la le tino; a o le tuutoina i le Atua e aogā lea i mea uma lava, auā o loo i ai le mea ua folafolaina mai i la le olaga nei atoa ma lē atali.” (1 Timoteo 4:7, 8, NW) Tatou te ono fiu i se tusi mo toleniga faaletino ma e itiiti foi sona aogā pe a tatou lē faatinoina faamalositino o loo taʻu mai ai. Ua fuafuaina sauniga faa-Kerisiano e toleniina ai o tatou mafaufau ma o le a faia faapea pe a tatou sauniuni ma faia se sao. O le faia o nei sao o le a avea ai sauniga o ni mea e sili ona tauia ma faafiafia loto.

E tusa ai o lenei mea, na faapea mai se tasi teine talavou Kerisiano e igoa ia Mara: “Pe afai ou te lē sauniuni mo sauniga, ou te lē maua mai ai foi se olioli. Peitai, pe afai ou te muai sauniuni, o le a sili atu ai ona ia te au le mafaufau ma le loto e talisapaia. Ua atili ai ona uigā sauniga, ma ou te tulimatai foi e fai ai ni aʻu tali.”

O le taumafai e faalogologo o se isi foi lena fesoasoani. O le faalogologo atu i musika lelei e faigofie ma e vave foi ona fiafia i ai. Peitai e lē o faamaliega uma o le loto e vave ona maua. E faatoʻā tatou maua le faamalieina mai le polokalama o sauniga, pe a tatou faalogologo lelei i mea o loo talanoaina ai. Na taʻua mai e se Kerisiano e igoa ia Rasela e faapea: “Pe a lē ola mai le lauga a se failauga, ona manaomia lea ona ou matuā uai atu. O laʻu taʻiala lava o le, ‘Afai e lē ola tele mai le lauga, ona manaomia tele lea o loʻu uai atu.’ . . . E matuā uai atu oʻu manatu i mau, ma taumafai e maua mai ai ni mea se tele ou te mafaia.” E manaomia ona tatou aʻoaʻiina i tatou lava, e pei ona faia e Rasela, ina ia mafai ai ona faalogologo. Ua faapea mai le tusi o Faataoto: “Loʻu atalii e, ia e faalogo mai i loʻu poto; ia uai mai ou taliga i loʻu faautauta.”—Faataoto 5:1.

E i ai nisi faamatalaga e tauaaoina mai i sauniga atonu e aumai soo. O se tulaga talafeagai lena! E manaomia e auauna uma a le Atua ni faamanatuga. O le tino lē lelei atoatoa, ma ona faanaunauga lē lelei ma mafaufauga sese, e manaomia ai le fesoasoani uma e mafai ona maua. Sa faanaunau le aposetolo o Peteru ‘e faamanatu atu nisi o mea i ona uso talitonu, e ui lava o ni mea ua uma ona latou iloa ma ua latou mautū foi i le upu moni.’ (2 Peteru 1:12) Na faamatala mai foi e Iesu e faapea “o tusiupu uma . . . e tusa i latou ma le matai o le aiga, ua au mai mea fou ma mea tuai mai lona tuugāoloa.” (Mataio 13:52) O lea, e ui lava ina tatou maua mai i a tatou sauniga manatu faale-Tusi Paia ua masani ai, po o ‘oloa tuai,’ a e o loo i ai pea lava ma ‘oloa fou’ tatou te fiafia ai.

O le filifili ina ia faaaogā atoatoa aogā o sauniga e mafai ona iu ai i se faalaeiauga moni faaleagaga. Na fetalai Iesu: “Amuia i latou o ē magafagafa i o latou manaoga faaleagaga [i latou o ē augani atu mo le agaga].” (Mataio 5:3, faaopoopoga i lalo i le NW) O se vaaiga faapena i meaʻai aogā faaleagaga ua saunia mai i sauniga o le a tafiesea ai lagona fiu.—Mataio 24:45-47.

Pe ua Faavaivaia ea Ona o se Faaaʻoaʻoga Leaga?

Po o e lē malie ea ona o se amioga a se tasi o i lau faapotopotoga? Atonu o loo e tau mānatu, ‘E mafai faapefea e se uso ona amio faapea a e o loo i ai pea sona talaaga lelei?’ O na manatunatuga e mafai ona avea o se taofiofiga faalemafaufau, e punitia ai lo tatou mafaufau i le tāua o le faauooga manaia e mafai ona tatou maua mai i tagata o le Atua.—Salamo 133:1.

Atonu o se faafitauli faapena sa i ai i nisi o le faapotopotoga i Kolose. Na timai atu Paulo ia i latou: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi.” (Kolose 3:13) Na matauina e Paulo atonu sa leaga ni amioga a nisi Kerisiano i Kolose, ma ua faapogai moni ai le faitio o isi. E lē tatau ai la ona faateʻia i tatou pe afai e i ai ni taimi e lē faa-Kerisiano ai se amio a se tasi o o tatou uso po o se tuafafine. Na aumaia e Iesu se fautuaga aogā i le foiaina o faafitauli matuiā. (Mataio 5:23, 24; 18:15-17) A e o le tele o taimi, e mafai lava ona tau ina tatou onosaia vaivaiga o o tatou uso ma faamagalo atu i ai. (1 Peteru 4:8) O le mea moni, o lena auala e mafai ona lelei mo i tatou lava ma lelei foi mo isi. Aisea o le a iu ai i lenei mea?

Ua faapea mai le Faataoto 19:11: “O le mafaufau o le tagata e faagesegese ai lona ita; o lona viiga foi lea, ina ua le manatua lona agaleagaina.” Maeu le lelei o le faamagalo atu nai lo le faatagaina o le ita ma le loto tiga e tuputupu aʻe! Na faapea mai Salvador, o se toeaina ua lauiloa i lona uiga alofa: “Pe a lē lelei mai se uiga o se uso ia te au, pe fai mai se faamatalaga lē lelei, ou te fesili ifo ia te au lava: ‘E faapefea ona ou fesoasoani atu i loʻu uso? E faapefea ona ou alofia le motusia o le ma faiā tautele ma ia?’ Ou te magafagafa pea i le faigofie ona tautala atu i se mea sese. Pe a tautala lē mafaufau se tasi, o le vaifofo saʻo lava o lona toe faafoi o sana tala na fai ma toe sologa lelei ai. Peitai e faigata lena mea, ona ou faia loa lea o le laasaga e sili ona lelei o loo sosoo mai ma faagalo i le faamatalaga. Ou te faauigaina i se faaleoga o lagona ita ona o le tino lē lelei atoatoa, nai lo le manatu i ai o se faaatagia maia o uiga moni o loʻu uso.”

Atonu e te manatu o le faia o lenei mea e faigofie lava ona tautala i ai nai lo le faatinoina. Peitai o le tele o mea e faalagolago i le auala o loo tatou mafaufau ai. Na fautua mai Paulo: “O mea uma ua matagofie, . . . ia outou manatunatu i ia lava mea.” (Filipi 4:8) O le “matagofie” i sona faauigaga faaletino o le “faatupu alofa.” E finagalo Ieova ina ia tatou manatunatu i uiga lelei o tagata, ia tulimataia uiga na e faatupu ai le alofa nai lo uiga e faatupu ai le tiga. O ia lava foi na aumaia ia i tatou le faaaʻoaʻoga silisili i lenei tulaga. Na faamanatu mai e le faisalamo ia i tatou lenei mea i lona faapea mai: “Ioa e, afai e te mataulia le amio leaga, le Alii e [Ieova], o ai se na te mafaia ona tulai?”—Salamo 103:12; 130:3.

E moni atonu e i ai se taimi e faaoso lē fiafia ai se amio a se uso, peitai o le vaega tele lava o o tatou uso talitonu ua avea i latou ma faaaʻoaʻoga matilatila o le olaga faa-Kerisiano. Pe afai tatou te manatuaina lenei mea, o le a tatou fiafia ai e pei o Tavita ‘e matuā faaneenee atu ia Ieova, ma vivii atu ia te ia faatasi ma isi tagata e toatele.’—Salamo 109:30.

Pe ua Faigata Naʻuā ea le Avea o se Molimau?

E faanoanoa, ona e lē vivii atu nisi ia Ieova, talu ai le isi taofiofiga faalemafaufau. E toatele tane e lē o ni Molimau a Ieova latou te faatinoina le tiute o le sauniunia o mea mo o latou aiga ma lagolagosua foi i a latou avā i le faiva faa-Kerisiano. E faaleuo mai ma atonu e i ai foi sina o latou fiafia i le faapotopotoga, peitai e mumusu e avea ma auauna tuuina atu a le Atua. O le ā o loo taofiofia i latou?

O se tasi o faafitauli atonu o nei tane o loo latou matauina le tele o mea e fai i gaoioiga faatiokarate a a latou avā ma latou manatu ai, o le avea o se Molimau e tele naʻuā mea e manaomia ai. E mafai foi ona latou fefefe ina neʻi lē taitai mafai ona latou auai i le galuega talaʻi mai lea fale i lea fale. E tusa ai o o latou manatu, e foliga mai ai ua lilofia faamanuiaga ona o tiute tauave. Aisea ua tupu aʻe ai lena taofiofiga faalemafaufau? O le toatele o tagata aʻoga o le Tusi Paia e faasolosolo mālie ona latou aʻoaʻoina ma faatatauina le upu moni. Peitai o tane lē talitonu, e masani ona tele ina latou mātauina uma tiute tauave faa-Kerisiano a o latou lei faatupuina se uunaiga o o latou loto e taliaina na tiute tauave.

O Manuele, o lē sa oo i lena tulaga, ua ia faamatala mai e faapea: “Pe tusa ma le sefulu tausaga, sa ma ō atu ai ma laʻu avā i fonotaga ma sauniga. O le tala moni lava, sa ou fiafia atu i le auaufaatasiga ma Molimau nai lo o tagata o le lalolagi, ma sa ou fiafia foi e fesoasoani ia i latou i ni mea ou te mafaia. Sa ou ofo i le alofa na i ai ia i latou. Peitai o le tulaga i le alu atu mai lea fale i lea fale sa avea o se toʻatugā tele ia te au, ma na ou fefe ai ina neʻi ula mai aʻu uo faigaluega ia te au.

“E ese le onosai o laʻu avā ia te au, ma e lē taitai taumafai e faamalosi aʻu ou te suesueina le Tusi Paia. O ia ma le fanau sa tele lava ina ‘talaʻi’ mai e ala i a latou faaaʻoaʻoga lelei. Sa naunau faapitoa mai ia te au se toeaina o le faapotopotoga e suafa ia José. Ou te manatu o ana faamalosiauga na iu ina ou manao ai loa e amata ona ou matuā suesue. Ina ua uma ona ou papatiso, sa ou iloa ai o le toʻatugā autū lava o le taofiofiga faalemafaufau. Ina ua faia laʻu filifiliga e auauna atu ia Ieova, sa ou lagona ai lona fesoasoani mai ina ia foia mea sa ou fefe ai.”

E mafai faapefea e avā ma toeaina Kerisiano ona fesoasoani atu i tane e pei o Manuele ina ia foia o latou taofiofiga faalemafaufau? O se suesuega faale-Tusi Paia atonu e atiina aʻe ai se talisapaia ma se faanaunauga ina ia faia le finagalo o le Atua. O le mea moni, o le faateleina o le poto faale-Tusi Paia o le faavae lea mo le faaalia o le faatuatua ma le mautinoa i le faamoemoe i le lumanai.—Roma 15:13.

O le ā o le a faalaeiauina ai na tane ina ia talia se suesuega faale-Tusi Paia? E masani lava, o se faauooga ma se uso e faaalia le malamalama i le faapotopotoga e mafai ona avea ma vala o le a fesoasoani ai i lea tane e faia sana filifiliga. O se toeaina po o se isi uso agavaa atonu e mafai ona faamasani atu i le tane. Pe afai o le a mauaa se faiā lelei, e pau la le mea na te manaomia o se tasi e ofo atu i ai la te suesue. (1 Korinito 9:19-23) A e i le taimi lava lea, e mafai ai e le avā Kerisiano faautauta, ona fafaga mālie atu ni nai manatu faaleagaga i lana tane lē talitonu, i lona mautinoa o le a lē talilelei mai le tane pe a soona uunai malosi.—Faataoto 19:14.

E pei ona aʻoaʻoina Manuele mai i ni mea na tutupu, ua iloa ai, e maua loa e se tagata le malosi faaleagaga, ona avea ai lea o toʻatugā pei ni mauga, ua pei o ni tamaʻi aʻega. E foai atu e Ieova le malosi ia i latou o ē faanaunau ina ia auauna ia te ia. (Isaia 40:29-31) O le malosi o le Atua faatasi ai ma le lagolagosua a Molimau taʻumatuaina, e mafai ai ona tafiesea ni taofiofiga. O le a lē meia ai ona o le galuega mai lea fale i lea fale ma o le a lē toe matamuli foi i uo faigaluega, a e o le a sili ona fiafia i le auaunaga e faia ma le loto atoa.—Isaia 51:12; Roma 10:10.

Le Tausisia o le Agaigai i Luma

E faigofie lava ona saoloto mai taofiofiga e pei o taofiofiga e tolu ua uma ona tatou talanoaina. Pe a lele ese atu le vaalele, e masani o mea e manaomia o se malosi tele mai le afi, faapea foi le uaʻi atoa atu o le auvaa. O le taimi o le amata ona lele ese atu o le vaalele, e sili ai ona tele le suauu e faaaogaina e le afi nai lo isi uma taimi a o alu le faigamalaga. I se tulaga tutusa, o le teteeina o mafaufauga ma faalogona sese e manaomia ai ni taumafaiga tele ma se uaʻi tele atu. O le tau amatamataga, atonu o le taimi sili lea ona faigata, nai lo le taimi ua faasolosolo i luma o lena ua amata faigofie pe a oo ina agaigai i luma.—Faatusatusa i le 2 Peteru 1:10.

E faatumauina le agaigai pea i luma e ala i le utagia vave o faalaeiauga faale-Tusi Paia. (Salamo 119:60) E mafai ona tatou mautinoa o le a fiafia le faapotopotoga e fesoasoani mai. (Kalatia 6:2) Peitai o le mea e sili ona tāua, o le lagolago mai a Ieova le Atua. E pei ona fai mai Tavita, “ia faafetaia Ieova, o lē na te tauaveina i lea aso ma lea aso le avega mo i tatou.” (Salamo 68:19, NW) Pe a tatou lafoai atu a tatou avega e ala i le tatalo, ona māmā ai lea o la tatou avega.

I nisi taimi, e lele ese ai se vaalele ma alu ese atu mai se nofoaga o loo matuā maligi ai timuga, e pasi atu i ni ao mafiafia, ma lele atu i le vanimonimo o loo susulu malosi ai le la. E mafai foi ona tatou lafoaia mafaufauga sese. O le fesoasoani mai le Atua, e mafai ai ona tatou foia se taofiofiga e pei o le sao ese atu i se ao mafiafia, ma olioli ai i le siomaga o loo susulu manaia, ma le fiafia a le aiga i le lalolagi aoao o tagata tapuai ia Ieova.

[Ata i le itulau 23]

O le fesoasoani mai a Ieova, e mafai ai ona tatou saoloto mai taofiofiga faalemafaufau