Ofo Atu i Tatou ma le Loto Malie mo Galuega Lelei Uma
1 Na faia e se lomiga faalelalolagi se faamatalaga e faasino i Molimau a Ieova, i le faapea mai: “E matuā faigatā lava ona maua ni sui o se isi lava vaega o tagata o ē e galulue mamafa e tusa ai ma la latou lotu e pei ona faia e Molimau.” Aiseā e matuā galulue mamafa ai Molimau a Ieova faatasi ma sea agaga loto malie?
2 O le tasi o māfuaaga, ona ua mauaa ia i latou le agaga o le faanatinati. Na silafia e Iesu ua puupuu le taimi mo ia e faaiʻuina ai lana galuega i le lalolagi. (Ioa. 9:4) A o pule le Alo faamamaluina o le Atua i totonu o ona fili i aso nei, ua iloa ai e tagata o Ieova ua puupuu le taimi o totoe mo i latou e faia ai la latou galuega. O le mea lea, ua ofoina atu ai pea i latou ma le loto malie mo le auaunaga paia. (Sala. 110:1-3) Ona o loo manaʻomia se aufaigaluega e toʻatele e faia le seleselega, e lē mafai foʻi la ona mapu i latou mai a latou taumafaiga. (Mata. 9:37, 38) I lea, ua latou taumafai malosi ai e faaaʻoaʻo ia Iesu, o lē na faataatiaina se faaaʻoaʻoga lelei atoatoa o le loto malie ma le filigā i lana galuega.—Ioa. 5:17.
3 O le isi māfuaaga e galulue ai ma le loto atoa Molimau a Ieova e pei o loo faia ia Ieova, ona o la latou faalapotopotoga i le lalolagi aoao, e ese mai i isi vaega uma lava. O faalapotopotoga faalelotu i le lalolagi, e masani lava i lo latou mananaʻo i na o sina taimi ma ni taumafaiga itiiti mai o latou tagata. O mea o latou talitonu i ai e itiiti pe leai foʻi ni āuga lelei i o latou olaga i aso faisoo, i a latou feutagaʻiga ma isi tagata, po o mea o latou tuliloaina i le olaga. Ona o le leai o se malosi o le faatuatua moni e uunaʻia ai, ua latou tausisi mai ai e faapea, o o latou leoleo mamoe ua ‘tautala atu i upu mālie ia i latou,’ e faamautinoa atu ai ia i latou e faapea, ua lava ma totoe nai a latou taumafaiga. (Isa. 30:10) Ua faafiafiaina e o latou taʻitaʻi lotu i latou e ala i le ‘fai atu o upu mālie ia i latou,’ ma totōina ai i o latou loto le agaga o le lē manatu mamafa ma le paiē faaleagaga.—2 Timo. 4:3
4 Pagā se eseesega ma tagata o Ieova! O mea uma lava e faatatau i la tatou tapuaʻiga e aofia ai se taumafaiga, le faamalosi, ma galuega. I aso uma lava ma i mea uma lava tatou te faia, tatou te faatinoina ai mea ua tatou talitonu i ai. A o aumaia e le upu moni ia i tatou le olioli tele, e aofia ai foʻi le “finafinau tele lava” ina ua tatou faataunuuina le mea o manaʻomia. (Faatusatusa i le 1 Tesalonia 2:2.) I le na o le tausia o tiute tauave o le olaga i aso faisoo, ua lava lena e faapisi ai le toʻatele o tagata. Ae peitaʻi, tatou te lē faatagaina na popolega e taofia ai i tatou mai le tuu faamuamua o manaʻoga o le Malo.—Mata. 6:33.
5 O mea ua tuuina mai ia i tatou e fai i le auaunaga ia Ieova, e matuā aogā ma faanatinati, o lea ua uunaʻia ai i tatou ina ia ‘sema’ se taimi mai isi gaoioiga ma faaaogā i se auala e sili atu e maua ai aogā faaleagaga. (Efe. 5:16) I le iloa o lo tatou tuutōina i le Atua ma le agaga o le loto malie e fiafia i ai Ieova, ua oo ai ia i tatou se uunaʻiga sili ina ia faaauau pea i la tatou galuega fitā. Faatasi ma le ʻoa o faamanuiaga ua tatou maua i le taimi nei ma le faamoemoe mo le ola i le lumanaʻi, o lo tatou faanaunauga la, o le faaauau ona “galulue mamafa ma ia tatou faamalolosi” ona o manaʻoga tau i le Malo.—1 Timo. 4:10, NW.
6 Tuutōina ma le Agaga o le Faataulagaina Totino: E toʻatele tagata i aso nei ua faamuamua mea faitino ma fiafiaga i lo isi mea uma lava. Ua latou lagona le aogā o le uaʻi totoʻa atu i mea o le a latou aai ai, feinu ai, pe oofu ai. (Mata. 6:31) Ona o le lē faamalieina i mea ua maua, ua uunaʻia ai i latou e le sini o le manaʻo ina ia olioli atoatoa i se olaga lelei i le taimi nei ma ia ‘maua mea lelei e tele ua teuina mo tausaga e tele, o lea ua latou nonofo fifilēmū ai, ua aai, feinu, ma faafiafia i latou.’ (Luka 12:19) Ua lagona e le tagata e toaga i le lotu e faapea, so o se taumafaiga lava e manaʻomia mai ia te ia e lana lotu, o le solia lea o ana aiā tatau. O le manatu ia lafoaʻia pe faaitiitia mea faitino e maua po o le lafoaʻia o ni mea e fiafia i ai, e matuā lē talafeagai. O le manatu mamafa ia te ia lava, le atiina aʻe o se agaga o le faataulagaina, o se mea e lē moni, ma e lē aogā.
7 E ese la tatou vaai i lenei mataupu. Ua siitia e le Afioga a le Atua o tatou mafaufauga, o lea ua tatou manatu ai i manatu o le Atua ae lē o manatu o tagata. (Isa. 55:8, 9) E iai o tatou sini o le olaga e sili mamao atu i mea faaletino. O le faamamaluina o le pule silisili ese a Ieova ma le faapaiaina o lona suafa, o ni mataupu sili ia ona tāua i le vateatea aoao. O le tāua o nei mataupu e matuā silisili lava, pe a faatusatusa atu i ai, o atunuu uma e peiseaī “ua leai i ona luma.” (Isa. 40:17) So o se taumafaiga e ola o tatou olaga i se auala e faalēamanaʻia ai le finagalo o le Atua, e tatau ona manatu i ai o se mea valea.—1 Kori. 3:19.
8 O lea, a o manaʻomia isi mea faitino ma isi mea o loo aogā i le faaauauina o a tatou gaoioiga o le Malo, ua tatou iloa ai o nei mea, e lē o “mea ia e sili ona tāua.” (Fili. 1:10, NW) Ia tatou usiusitaʻi i le agaga i le 1 Timoteo 6:8 e faatapulaa ai o tatou faanaunauga i mea faitino ma taumafai ai ma le atamai e taulaʻi atu o tatou loto ‘i mea e lē vaaia e tumau ia e faavavau.’—2 Kori. 4:18.
9 O le tele tatou te manatu ai i manatu o le Atua, o le itiiti foʻi lea o lo tatou popole i mea faitino. Pe a tatou mafaufau loloto i mea ua faia e Ieova mo i tatou faapea ma faamanuiaga ofoofogia ua ia folafola mai mo le lumanaʻi, ua tatou loto malilie ai e faia so o se faataulagaina ua ia faafinagaloina mai ia i tatou. (Mare. 10:29, 30) O loo tatou nofo aitalafu ia te ia i lo tatou ola. Pe ana lē seanoa lona alofa mutimutivale ma lona alofafua, semanū tatou te lē mafai ona olioli i le ola i le taimi nei, ma e leai foʻi se faamoemoe mo le lumanaʻi. Ua tatou lagona e tatau ona tuuina atu i tatou lava, talu ai o mea uma lava o tatou faia i lana auaunaga, ‘o mea ia e tatau ona tatou faia.’ (Luka 17:10) So o se mea e manaʻomia mai ia i tatou e toe faafoʻi atu ia Ieova, tatou te avatu ma le loto fiafia, i le iloa o le a tatou “selesele mai mea e tele.”—2 Kori. 9:6, 7.
10 E Manaʻomia se Aufaigaluega e Galulue ma le Loto Malie i le Taimi Nei: E mai lava i lona amataga, na ulu atu ai le faapotopotoga Kerisiano i se vaitaimi o galuega maelegā. Sa manaʻomia ona tuuina atu se molimau maeʻaeʻa a o leʻi faatoʻilaloina Ierusalema i le 70 T.A. I lena vaitaimi, na “matuā tinoū ai i le upu” soo o Iesu. (Galu. 18:5, NW) O le vave ona salalau atu, na mafai ai ona aʻoaʻoina nisi faievagelia e toʻatele ma ni leoleo mamoe agavaa ma faaaogā la latou fesoasoani. Sa manaʻomia ni tane e iai le poto masani i feutagaʻiga ma faipule silisili faapea ma nisi ua iai le tomai e mafai ona latou vaavaaia le aoaoina ma le tufatufaina atu o mea faitino na manaʻomia. (Galu. 6:1-6; Efe. 4:11) A o auauna se toʻaitiiti i se tulaga iloga, o le toʻatele lava sa tautua mai tua. Ae sa ‘faamalolosi ma tinoū’ i latou uma e galulue faatasi ma le loto atoa ina ia faaiʻuina le galuega.—Luka 13:24.
11 E ui lava sa iai se manaʻoga laitiiti faatapulaa mo se galuega tinoū i le lalolagi aoao mo le tele o senituri mulimuli ane, ae na amata ona matuā toe faaolaolaina le galuega o le Malo ina ua pule Iesu i le mana o le Malo i le 1914. E toʻaitiiti lava na iloa i le taimi muamua e faapea, o le manaʻoga mo se aufaigaluega mo manaʻoga o le Malo, o le a oo ina matuā faateleina, e manaʻomia ai le fesoasoani a le faitau miliona o ē loto naunau i le lalolagi aoao.
12 I aso nei, ua matuā aafia ai le faalapotopotoga i le matuā tele o atinaʻe eseese ua oo ai ina faatapulaa mea e mafai ona maua i a tatou ālāmanuia. O loo agaʻi i luma le galuega o le Malo i se tulaga e matuā sili ona tele. O le faanatinati o o tatou taimi ua uunaʻia ai i tatou e matuā faamalolosi ma faaaogā mea uma ua tatou maua ina ia faaiʻuina ai le galuega o loo faia nei. A o latalata tele mai le iʻuga o le faiga amioleaga aoao o mea, ua tatou āloālo atu ai i se galuega e sili atu ona telē i aso o i luma. Ua valaauina auauna uma tuuina atu a Ieova ina ia ofoina atu ma le loto malie i latou lava i le galuega faanatinati o le aoaoina.
13 O le ā e Manaʻomia Ona Faia? E mafai ona tatou faapea atu ma le faamaoni, e “tele mea e fai i le galuega a le Alii.” (1 Kori. 15:58, NW) I le tele o oganuu, e tele le saito e seleseleina, a o le aufaigaluega e toʻaitiiti. Ua valaaulia i tatou ina ia faia la tatou vaega e lē gata ina ia maeʻaeʻa i le molimau atu i a tatou lava oganuu, ae i le faafetaiaʻia foʻi o le luʻi e auauna i nofoaga o loo manaʻomia tele ai le fesoasoani.
14 E faamālō i le vaai atu i le auala o loo ofo atu ai ma le loto malie e Molimau i vaega uma o le lalolagi i latou lava mo isi gaoioiga. E amata mai lava i le tauofo mo le fausiaina o nofoaga mo le tapuaʻiga, auauna i tauaofiaga, ma taumafaiga e tuuina atu le fesoasoani i taimi o mala, e oo lava i le faamamāina o le Maota o le Malo i se tulaga faifai pea. E tusa ai ma le gaoioiga mulimuli, o le faamautinoa pea lea ua tuua le Maota o le Malo i se tulaga mamā ma maopoopo pe a maeʻa sauniga taʻitasi. O le faataunuuina o galuega e manatu i ai faapea o galuega maulalo, e faaalia ai se malamalamaga saʻo i upu a Iesu i le Luka 16:10: “O le faamaoni i le mea itiiti, e faamaoni foi o ia i mea e tele; o lē amioletonu i le mea itiiti, e amioletonu foi o ia i mea e tele.”
■ Lagolagosua i Galuega a le Faapotopotoga: A o galulue faapotopotoga taʻitasi e avea o se vaega o le faalapotopotoga atoa ma maua le taʻitaʻiga mai le “auauna faamaoni ma le mafaufau,” ae ua faia aʻe i tagata talaʻi taʻitoʻatasi o le Malo. (Mata. 24:45) O lona faataulauina e faalagolago tele atu i le tele e mafai ai e Molimau taʻitoʻatasi ona faia ma le loto malie. E taulaʻi atu le faapotopotoga i le talaʻia o le tala lelei i ona oganuu, i le faia o soo fou ma faamalosia faaleagaga i latou. E mafai e i tatou taʻitoʻatasi ona saosaolaumea i lenei galuega. E mafai foʻi ona tatou faatutū ni sini mo i tatou lava i suʻesuʻega totino, auai ma le uigā i sauniga, ma fesoasoani i isi i le faapotopotoga o loo manaʻomia se fesoasoani. O nei galuega ua maua ai le tele o avanoa lelei mo i tatou e faatino ai lo tatou loto malie.
■ Ia Taʻimua i le Avea o ni Ovasia: Ua tuuina mai e Ieova le vaavaaiga o faapotopotoga i ona toeaina tofia. (Galu. 20:28) O nei tane, o i latou ia ua aapa atu ina ia taʻuagavaaina mo lenei faaeaga. (1 Timo. 3:1) O lea la, o uso uma lava i le faapotopotoga ua tofu ma ni tomai e taʻuagavaaina ai mo tiute tauave e sili atu. E toʻatele lava uso ua agaʻigaʻi i luma faaleagaga ma mananaʻo ina ia tutupu pea i le taʻitaʻiga ma le fesoasoani alofa a toeaina o le faapotopotoga. O nei tane e ao ona avea o ni tagata aʻoga filigā o le Tusi Paia ma a tatou lomiga. E mafai ona latou faaalia lo latou loto malilie e ala lea i le gauaʻi atu i toeaina ua tofia e le agaga, i le faataʻitaʻi atu i lo latou faatuatua, ma ia atiina aʻe uiga ia o loo moomia mai ovasia.—Epe. 13:7, 17.
■ Faia le Auaunaga Faataimi Atoa: O le galuega autū a le faapotopotoga, o le talaʻia lea o le tala lelei. (Mata. 24:14) Maʻeu se faamanuiaga pe a faateleina e i latou o ē maelegā a latou taumafaiga e ala i le tusia o o latou igoa e avea o ni paeonia! E masani ona aafia ai i lenei mea le faia o ni suiga i o latou olaga totino. Atonu e manaʻomia ai ni fesuiaʻiga faaopoopo mo i latou ina ia faaauau ai i lenei vala faapitoa o le auaunaga. Ae peitaʻi, o i latou o loo taofi mau pea i lenei faaeaga na i lo le faamaamulu, pe a mavae se tausaga pe ā, e mautinoa le mauaina o le tamaoaiga o faamanuiaga a Ieova ona o le lē faavaivai. E mafai e toeaina alolofa ma isi ua taʻumatuaina ona saosaolaumea mo le manuia o paeonia, i le faalaeiʻau ia i latou e ala i upu ma galuega. Maʻeu se agaga lelei ua faaalia e tagata talavou o ē na ō atu saʻo lava i le galuega paeonia ina ua uma aʻoga! E faapena foʻi i tagata matutua o ē ua tusia o latou igoa e avea o ni paeonia sauatoa ina ua faaitiitia o latou tiute tauave masani. Maʻeu se loto malie ua aumaia ai e lea mea i se auauna Kerisiano pe afai na te lagolagosua i le faavaveina e Ieova o le galuega o le aoaoina!—Isa. 60:22.
■ Auai i Faugāfale ma le Faaleleia o Nofoaga mo Sauniga: O le mea moni, e faitau selau Maota o le Malo faaonaponei faapea ma le tele o Maota Fono ua fausia. O le mea e ofo ai ona e toetoe lava o le galuega uma na faia e o tatou uso ma tuafāfine o ē na tauofo atu ma le loto malie o latou taimi ma tomai. (1 No. 28:21) E faitau afe le aufaigaluega o ē na latou toe faafouina lelei nei fale e ala i le faatinoina po o ā lava ni galuega na manaʻomia ona faia. (2 No. 34:8) Ona o lenei galuega o se tasi o vala o le auaunaga paia, o i latou la o fesoasoani ai, ua ofoina atu i latou ma le loto malie, e lē o talosaga atu mo se totogi o la latou auaunaga e pei foʻi ona lē talosagaina se totogi mo le talaʻiga mai lea fale i lea fale, fofogaina atu o lauga lautele i faapotopotoga, po o le fesoasoani i galuega tau i fonotaga po o tauaofiaga. O nei tagata tauofo, ua ofo fua atu la latou auaunaga i le fuafuaina ma le fausia o nofoaga o le tapuaʻiga mo le viiga o Ieova. Ua latou tinoū e fesoasoani atu i mea e pei o le faamaeʻaina o faamaumauga faaletulafono, tausia faamaumauga o tupe, faia fesootaʻiga o faatauga, ma fuafuaina le aofaʻi o mea e manaʻomia. O nei auauna faamaoni a Ieova latou te lē faaopoopo se totogi faasili, pe saili i so o se auala tuusaʻo pe lē tuusaʻo e maua ai ni tupe faasili mai auaunaga o loo latou tuuina atu, talu ai o a latou taleni uma ma ālāmanuia ua tuuina atu uma ia Ieova. (Tagaʻi i La Tatou Faiva o le Malo o Fepuari, 1992 itulau e 4, palakalafa 10.) O lenei galuega, e manaʻomia ai se aufaigaluega filigā o ē faia la latou auaunaga ma “le loto atoa e peiseaī o faia ia Ieova.”—Kolo. 3:23, NW.
15 O le ā la le mea ua tutasi ai le loto malie o tagata o Ieova? O le agaga foaʻi. O lo latou foaʻi ma le matamau e aofia ai e sili atu na i lo tupe po o mea faitino—ua latou “ofoina atu i latou lava ma le loto malie.” (Sala. 110:3, NW) O le uiga moni lenei o lo tatou tuuina atu ia Ieova. Ua tauia i tatou i se auala faapitoa. Ua tatou tofo i le “manuia sili” ma ua tatou “selesele mai mea e tele” auā o mea tatou te faia e talisapaia e isi, o ē e toe foaʻiina mai mea ia i tatou. (Galu. 20:35; 2 Kori. 9:6; Luka 6:38) O Lē Agalelei silisili mai ia i tatou, o lo tatou Tamā faalelagi o Ieova, o lē e “alofa . . . i le ua foai ma le loto malie.” (2 Kori. 9:7) O le a ia tauia i tatou i faamanuiaga e taʻi sautuaselau o le a tumau e faavavau. (Mala. 3:10; Roma 6:23) O lea, afai e ofo mai ni faaeaga i le auaunaga a Ieova ia te oe, po o le a e ofoina atu ea oe ma le loto malie ma tali atu e pei ona sa faia e Isaia: “O aʻu lenei, ina auina atu aʻu”?—Isa. 6:8