O Taʻiala mo Ovasia o le Aʻoga

I FAAPOTOPOTOGA taʻitasi, ua tofia se toeaina e fai ma ovasia o le Aʻoga o le Faiva Faatiokarate. Afai ua faatuatuaina oe i lenei avega tauave, e mafai la ona avea lou aasa i le aʻoga, atoa ma lou naunau totino i le agaʻigaʻi i luma o tagata aʻoga taʻitoʻatasi, o se vala iloga i mea o loo faataulauina e le aʻoga i la outou faapotopotoga.

O se vaega tāua o lou tofiga o le faafoeina lea o le Aʻoga o le Faiva Faatiokarate a la outou faapotopotoga i vaiaso taʻitasi. Teu i manatu e faapea, e faaopoopo i tagata aʻoga o ē o loo iai tofiga i so o se taimi atofaina, o loo iai foʻi isi i le aofia. Ia taulima le aʻoga i se auala o le a maua ai e le faapotopotoga atoa ia faamanatu aogā e uunaʻia ai, e fesootaʻi atu i se tasi o sini o le aʻoga o loo taʻua i le itulau e 5 e oo i le 8 o lenei tusi aʻoga.

Ia naunau i tagata aʻoga uma, e tusa lava pe o faatulaga e faia le faitau tusi, o taulimaga e pei ni faataʻitaʻiga, po o le avatu foʻi o lauga. Fesoasoani iā i latou e manatu i mea o loo latou faia ua lē na o se tofiga, ae o se avanoa e agaʻigaʻi ai i luma i la latou auaunaga iā Ieova. O le taumafaiga o loo latou faia totino, o le mea moni, o se vala autū lea i lo latou agaʻigaʻi i luma. Ae tāua foʻi ona e faaalia i ai le naunau alofa, fesoasoani iā i latou na ia malamalama i le aogā o manatu o fautuaga, ma faamatala i ai le auala e faatatau ai na fautuaga. Ina ia ausia lenā mea, ia faalogologo ma le faaeteete i lauga taʻitasi ina ia mafai ai ona e saunia ni faamatalaga aogā.

Ia faamautinoa ua amata ma faaiʻu le aʻoga i le taimi tonu. Ia faataatia se faaaʻoaʻoga lelei e ala i le faatapulaaina o au lava fautuaga i totonu o le taimi faatagaina. Pe a ova le taimi o le lauga a se tagata aʻoga, e ao iā te oe po o lau fesoasoani ona avatu se faailoilo. E tatau loa i le tagata aʻoga ona faauma lana fuaiupu ma tuua le pulelaa. Afai e iai nisi vaega o le polokalame ua ovataimi, ia faapupuu au faamatalaga, ona talanoaina lea o le mataupu ma le uso pe a māeʻa le sauniga.

Pe afai o loo e auai, e ao ona e taulimaina le aʻoga. Afai e iai nisi taimi e lē mafai ona e auai, e ao i se isi toeaina sa muaʻi tofia e le ʻautoeaina ona faia le aʻoga. Afai e te manaʻomia se fesoasoani i le sauniunia o faasologa, le tusia ma le tufatufaina o pepa o tofiga, po o le fuafuaina o ē suitulaga i le polokalame, e mafai ona fesoasoani atu se auauna o le faiva ua tofia e le ʻautoeaina i le faia o na mea.

Tusia o Suafa o Tagata Aʻoga. Ia faalaeiau tagata talaʻi uma ia tusia o latou suafa i le aʻoga. O isi o loo aufaatasi e lē aunoa ma le faapotopotoga e mafai ona tusia o latou igoa, pe afai latou te ioe i aʻoaʻoga a le Tusi Paia ma o loo ōgatasi o latou olaga ma mataupu silisili faa-Kerisiano. A faaalia e se tasi le faanaunauga e tusia lona suafa, ia faamālō ma le māfana iā te ia. Afai e leʻi avea o ia ma tagata talaʻi, e ao iā te oe le ovasia o le aʻoga ona talanoa ma ia i mea manaʻomia mo le tusia o le suafa i le aʻoga, e sili ona lelei pe a auai lē o loo taulimaina le suʻesuʻega faale-Tusi Paia ma ia (po o luma o se mātua talitonu). O nei mea manaʻomia e faatatau foʻi i se tagata o loo fia avea ma tagata talaʻi e leʻi papatiso. O loo maua i itulau e 97 e oo i le 99 o le Ua Faamaopoopo e Faaiʻuina la Tatou Faiva. Ia teu ma faafou le lisi o ē uma o loo tusia suafa i le aʻoga.

Faaaogāina o le Pepa mo le Faatonutonuina. O le pepa mo le faatonutonuina mo tagata aʻoga taʻitoʻatasi o loo iai lea i lana ia lava tusi aʻoga, i itulau e 79 e oo i le 81. E pei ona faaalia i lanu o loo faailogaina ai, so o se manatu mo le faatonutonuina mai le 1 e oo i le 17 e mafai ona faaaogā pe a avatu e se tagata aʻoga se tofiga faitau tusi. Mo taulimaga e fai pei o se faataʻitaʻiga, e mafai ona faaaogā so o se manatu mo le faatonutonuina seʻi vaganā ai le 7, 52 ma le 53. O fautuaga mo le faatonutonuina o lauga, e aofia ai manatu uma seʻi vaganā ai le 7, 18 ma le 30.

Pe a tofia se manatu mo le faatonutonuina, e ao i le ovasia o le aʻoga ona tusia i se penitala i lalo o le “Aso Tofia” i le avanoa ua saunia i autafa o lenā manatu, i le pepa mo le faatonutonuina i le tusi a le tagata aʻoga. A māeʻa ona faia e le tagata aʻoga lona tofiga, ia fesili atu i ai tau o ia pe sa ia faia le (po o) mea e ao ona fai o loo i le faaiʻuga o le talanoaga o le manatu mo le faatonutonuina. Afai o lea, e ao la ona tuu se faailoga i le pusa o loo i le pepa. Afai e te fautuaina e faaauau ona galue i lenā lava manatu mo le faatonutonuina, e leai se isi faamatalaga faaopoopo e tusia i le pepa mo le faatonutonuina; o lona uiga aua le faatumuina le avanoa mo le “Aso na Māeʻa” ai. E faatoʻā faailoga lava le vaega lenā pe afai ua sauni le tagata e see atu i le isi manatu. E lē gata i lenā, i le itulau e 82 o le tusi a le tagata aʻoga, i le ituagavale o le faatulagaga sa faaaogā, e ao ona tusia ai le aso pe a uma lauga taʻitasi a le tagata aʻoga. O loo iai avanoa i le pepa mo le faatonutonuina ma le lisi o faatulagaga ina ia mafai ai ona faaaogā faalua. E ao i tagata aʻoga ona iai a latou tusi a o faagasolo le polokalame.

Ia tofia na o le tasi se manatu mo le faatonutonuina o le tautala i taimi taʻitasi. O le mea masani, e sili atu ona lelei le tofia o manatu mo le faatonutonuina i le faasologa o loo lisiina ai. Peitaʻi, afai e faaalia e nisi tagata aʻoga le matilatila i nisi tomai, e mafai ona e faalaeiau i latou e suʻesuʻe ma faatatau nisi o lesona patino e i latou lava. Mulimuli ane, e mafai ona e fesoasoani iā i latou i manatu na e te talitonu, o le a sili ona saosaolaumea i lo latou tuputupu aʻe o ni failauga ma ni faiaʻoga uigā.

E tusa pe sa tusia le suafa o le tagata i le aʻoga mo le tele o tausaga, e mafai ona ia maua aogā e tele mai le suʻesuʻe ma le faatatauina o lesona taʻitasi. Ina ia fesoasoani i tagata aʻoga o loo iai manaʻoga faapitoa, e mafai ona e filifilia nisi o uiga o le tautala latou te galulue ai na i lo le faasolosolo i le pepa mo le faatonutonuina e pei ona masani ai.

Avatuina o Manatu mo le Faatonutonuina. Pe a avatu manatu mo le faatonutonuina, ia faaaogā lelei faaaʻoaʻoga ma mataupu silisili o le Tusi Paia. E ao i tagata aʻoga ona lagona, o manatu mo le faatonutonuina o loo avatu ma le agaga o loo ofo atu ai, o loo pulea i mataupu silisili maualuluga o le Afioga a le Atua.

Ia teu i manatu o oe o se ‘ʻaufaigaluega faatasi’ ma ou uso ma tuafafine. (2 Kori. 1:24, NW) I le pei o i latou, e manaʻomia ona e uaʻi atu pea ina ia faaleleia o se failauga ma se faiaʻoga. Ia suʻesuʻe lava oe i le tusi Ia Maua Aogā Mai le Aʻoga o le Faiva Faatiokarate, ia faatatau manatu mo le faatonutonuina o loo i ai, ma faataatia se faaaʻoaʻoga lelei mo isi ina ia faia foʻi faapena.

A o e faia faapea, ia fai ma ou sini le fesoasoani atu i tagata aʻoga ina ia avea ma ē e lelei le faitau, failauga agavaa, ma faiaʻoga uigā. Ina ia ausia lenā mea, ia taumafai e saunia so o se fesoasoani e manaʻomia ina ia malamalama ai tagata aʻoga po o ā uiga eseese o le tautala, aiseā e tāua ai, ma le auala e atiina aʻe ai. O lenei tusi aʻoga ua saunia lea i se auala o le a faapea ona fesoasoani ai iā te oe ina ia faia lenā mea. Peitaʻi, e masani ona sili atu mea e manaʻomia mai iā te oe na i lo le na ona faitau o upu o loo i le tusi. Iloilo le manatu o loo faauiga i ai ma le auala e faatatau ai.

Afai sa lelei ona taulimaina e se tagata aʻoga se manatu, ia faamālō iā te ia. Ia taʻua puupuu le mea na uigā ai po o le pogai na tāua ai le mea na ia faia. Afai e iai se isi mea sa ono aogā ona ia uaʻi atili atu i ai, ia faamautinoa ua ia malamalama i le māfuaaga. Ia talanoa i le auala e fai ai. Ia patino, ma i le taimi e tasi, ia agalelei.

Ia manatua o le toʻatele o uso, e ese le faigatā o le tū mai luga e faia se taulimaga i luma o ni tagata. Afai e lagona e se tagata sa lē lelei lana lauga, atonu o le a ia taumanatu pe ao ona ia toe taumafai pea. Ia faataʻitaʻi iā Iesu, o lē na te leʻi gagauina le “u ua gapēpē” pe tineia le “vavae ua mu itiiti.” (Mata. 12:20) Ia manatu mamafa foʻi i le tulaga tau faalogona o le tagata aʻoga. A ofoina atu se manatu mo le faatonutonuina, ia fuafua i le tagata aʻoga pe faatoʻā auai mai po o se tagata talaʻi ua iai le poto masani. O se faamālō ma le māfana moni e mafai ona faamalosia ai tagata ina ia faaauau ona faia le mea silisili latou te mafaia.

Ia feutagaʻi ma tagata aʻoga taʻitoʻatasi i se auala e aloaʻia ai i latou. Ua taʻu mai iā i tatou e le Roma 12:10 e faapea: “Ia tausolomua ona ava o le tasi i le tasi.” Maʻeu se fautuaga talafeagai mo se faufautua o le Aʻoga o le Faiva Faatiokarate! Afai e matua le tagata aʻoga iā te oe, ia faatatau ma le faaeteete le taʻiala o loo aumaia i le 1 Timoteo 5:1, 2. (LF) Peitaʻi, e tusa po o le ā le matua o se tagata, a ofoina atu i se uiga agalelei se manatu mo le faatonutonuina e aofia ai se fetuutuunaʻiga i le auala o loo ia faia ai mea, e masani lava ona sili atu le talileleia.—Faata. 25:11.

A avatu se manatu mo le faatonutonuina, ia malamalama le tagata aʻoga i le sini autū o le toleniga. O lenā sini autū e lē tau ina fai ia lelei ina ia maua ai le faamālō ma taʻu atu e see i le isi manatu mo le faatonutonuina e sosoo ai. O le sini e lē ia avea o se failauga po o se faiaʻoga o lē e mataʻina e isi. (Faata. 25:27) O lo tatou faanaunauga ia faaaogā la tatou meaalofa o le tautala ina ia vivii ai iā Ieova ma fesoasoani ai i isi ina ia latou iloa ma alolofa iā te ia. O lo tatou toleniga e faaaupega ai i tatou ina ia faia ma le uigā le galuega ua folasia i le Mataio 24:14 ma le 28:19, 20. O uso papatiso o ē ua agavaa atonu i se taimi ona valaaulia lea e auai i le tausia o “le lafu mamoe a le Atua” o ni failauga i le lautele ma faiaʻoga.—1 Pete. 5:2, 3.

Ia fautua atu i tagata aʻoga e faitau le faamalamalamaga a le tusi aʻoga i le isi manatu mo le faatonutonuina e sosoo ai mo i latou, i ni nai aso pe a uma ona tofia atu. Ia faalaeiau i latou e faatatau mea ua latou aʻoaʻoina i le sauniunia o a latou vaega mo le aʻoga, i talanoaga i aso taʻitasi, i tali i sauniga, ma i le auaunaga i le fanua.

Faia o Tofiga. E ao ona faia lenei mea a itiiti mai o le tolu vaiaso a o leʻi oo i le taimi e faia ai le lauga. O na tofiga uma e ao ona tusia i pepa ua saunia pe a mafai.

O vaega o loo aofia ai le aʻoaʻoina o le faapotopotoga e ao ona tofia i toeaina, aemaise i latou o ē o le a taulimaina ma le uigā na vaega, atoa ma auauna o le faiva ua avea o ni faiaʻoga lelei.

I le filifilia po o ā lauga a tagata aʻoga e tofia i uso a o ā foʻi e tofia i tuafāfine, mulimuli i faatonuga ua saunia i le faasologa o le aʻoga. Afai e toʻaitiiti uso ae toʻatele tuafāfine o ē tauaaoina lauga a tagata aʻoga, ia faaeteete ia lava le avanoa e tuu atu i uso e tauaaoina lauga e aofia ai mea e sili atu na i lo le faitauina o le Tusi Paia.

Ia iloilo tulaga o tagata taʻitoʻatasi pe a faia tofiga. Pe e manaʻomia ona tofia se toeaina po o se auauna o le faiva e lauga i le aʻoga i se pō e tasi o loo iai sana vaega i le Sauniga o le Auaunaga, po o le vaiaso e tasi o loo iai lana lauga i le lautele i le faapotopotoga? Pe ao ona tofia se tuafafine e faia se taulimaga i le pō e tasi o loo aofia ai lana fanauiti, o ē atonu o loo manaʻomia ona ia fesoasoani atu i ai? Aemaise lava i le tulaga o se tamaitiiti po o se tagata aʻoga e leʻi papatiso, pe fetaui i ai le mataupu? Siaki ia faamautinoa o fetaui le tofiga i le manatu mo le faatonutonuina o loo galue ai le tagata aʻoga.

Mo tofiga o loo avatu i tuafāfine, e masani lava ona filifilia e le tagata aʻoga lana lava faatulagaga ina ia ōgatasi ma faatonuga o loo i itulau e 78 ma le 82. E toʻatasi le fesoasoani e ao ona tofia, ae e mafai ona faaaogā se fesoasoani faaopoopo. Afai e talosagaina e le tagata aʻoga se fesoasoani o lē o le a matuā fetaui lelei ona ia faailoa mai se faatulagaga patino, e ao foʻi ona faaalia le magafagafa mo lenā talosaga.

Vasega Faaopoopo. Afai e sili atu i le 50 tagata aʻoga ua tusia o latou suafa, atonu o le a e manaʻo e iloilo le faaaogā o nisi nofoaga faaopoopo mo vaega o loo taulima e tagata aʻoga. E fuafua i manaʻoga o le faapotopotoga, e mafai ona faaaogā lenei faatatauga mo taulimaga uma a tagata aʻoga pe na o lauga mulimuli e lua.

E ao i vasega faaopoopo taʻitasi ona iai se faiaʻoga agavaa, e sili atu pe afai o se toeaina. Afai e tatau, e mafai ona faaaogā se auauna o le faiva e sili ona agavaa. O le faamaoniga mo nei faiaʻoga e ao ona faia e le ʻautoeaina atoa. Ia galulue felagolagomaʻi vavalalata ma faiaʻoga lagolago ina ia uigā ai ona uaʻi atu i tagata aʻoga, e tusa po o fea le nofoaga e fai ai a latou lauga e sosoo ai.

Vasega Faapitoa mo le Faitau. Afai e filifili toeaina o loo iai se aofaʻiga o tagata i le faapotopotoga e manaʻomia faatonuga faavae i le faitau i le gagana o loo faaaogā i le faapotopotoga, e mafai ona e faia ni faatatauga mo lenei mea e faaopoopo i le Aʻoga o le Faiva Faatiokarate. O lenei aʻoaʻoga e mafai ona aofia ai aʻoaʻoga faavae i le faitau ma le tusitusi, pe fai foʻi ma ona sini le faaleleia o le faitau.

O na vasega e lē tau manaʻomia ona faia i le taimi e tasi o loo faia ai lauga a tagata aʻoga i le Aʻoga o le Faiva Faatiokarate. Ina ia lava le fesoasoani e saunia, atonu e tele atu se taimi e manaʻomia na i lo le mea o loo mafai i le taimi o le aʻoga. Atonu e filifili toeaina o le faapotopotoga i le mea e manaʻomia ma le taimi e avatu ai lenā aʻoaʻoga. E fuafua i le manaʻoga, e mafai ona faia ni faatatauga mo aʻoaʻoga i se vaega po o le aʻoaʻoina taʻitoʻatasi.

E manaʻomia se faiaʻoga agavaa. O le a sili ona lelei le avatu o le tofiga i se uso e lelei le faitau ma e masani lelei ma le gagana. Afai e lē o avanoa se uso, e mafai i toeaina ona talosaga atu i se tuafafine agavaa, o loo fai ma faataʻitaʻiga lelei ina ia fesoasoani. E ao ona ia faia se ufiulu pe a aʻoaʻoina le vasega.—1 Kori. 11:3-10; 1 Timo. 2:11, 12.

O le tusi Apply Yourself to Reading and Writing ua maua i le tele o gagana. Ua fuafuaina ina ia aʻoaʻo ai aʻoaʻoga faavae i le faitau ma le tusitusi. E mafai foʻi ona faaaogā isi mataupu tau aʻoaʻoga, e faalagolago i le tulaga o loo iai le faitau a i latou ua tusia suafa i le vasega. A lava loa le agaʻigaʻi i luma a tagata aʻoga, e ao ona faalaeiau ina ia auai i le polokalame faifai pea a le Aʻoga o le Faiva Faatiokarate.

I le avea ma ovasia o le Aʻoga o le Faiva Faatiokarate, e mafai ona e faia ni mea e sili atu mo le manuia o le faapotopotoga. Ia sauniuni lelei, ma ina ia ōgatasi ma le fautuaga o loo i le Roma 12:6-8, ia tausia lou tofiga o se ʻoloa tautele mai le Atua.